Yumi Kasem Save Long Wok We God i Givim Long Kraes

“LONG stat God i mekem heven mo wol.” Evri samting we hem i mekem, “oli gud tumas.” (Jen. 1:1, 31) Taem Jehova i mekem man, hem i talem se man i save gat wan nambawan laef long fiuja. Be Adam mo Iv tufala i mekem stronghed, nao olgeta we oli kamaot biaen long tufala oli no moa hapi. Be stamba tingting blong Jehova i no jenis. Hem i mekem promes se bambae hem i tekemaot ol pikinini blong Adam long trabol, sipos oli obei long hem. Bambae hem i stanemap tru wosip bakegen, mo i spolem Setan mo ol rabis wok blong hem. (Jen. 3:15) Ale, evri samting bambae oli kam “gud tumas” bakegen. Jehova bambae i yusum Pikinini blong hem, Jisas Kraes, blong mekem samting ya. (1 Jon 3:8) Taswe i impoten tumas we yumi kasem save long wok we God i givim long Kraes.—Wok 4:12; Fil. 2:9, 11.

WOK BLONG KRAES

² Yumi mas luksave se Kraes i mekem ol defdefren wok. Hem i pemaot yumi, hem i Hae Pris, hem i Hed blong Kristin kongregesen, mo naoia hem i King blong Kingdom blong God. Sipos yumi tingting dip long ol wok ya, bambae yumi tinghevi long plan we God i putumap, mo bambae yumi lavem Jisas Kraes moa. Baebol i tokbaot ol wok we hem i mekem.

³ Taem Kraes i stap long wol ya, i klia se hem nao i rod we God i yusum blong mekem ol man we oli obei oli fren bakegen wetem God. (Jon 14:6) Jisas i givim laef blong hem blong pemaot ol man. (Mat. 20:28) Hem i soemaot ol gudfala fasin we God i wantem se ol man oli mekem. Be i no hemia nomo. Hem i nambawan man we God i yusum blong mekem stamba tingting blong hem i kamtru. Jisas nomo i save givhan long yumi blong yumi fren bakegen wetem God. (Wok 5:31; 2 Kor. 5:18, 19) Taem Jisas i ded mo i laef bakegen, hem i mekem rod blong ol man we oli obei long God oli kasem ol blesing blong olwe, aninit long rul blong Kingdom blong God long heven.

⁴ Jisas we i Hae Pris, “i gat sore long yumi” from we “hem i savegud we yumi no gat paoa.” Hem i mekem rod blong Jehova i fogivim sin blong ol man we oli givim laef blong olgeta long hem. Aposol Pol i talem se: “Hae Pris ya blong yumi, hem i savegud we yumi no gat paoa, nao hem i gat sore long yumi, from we olgeta samting blong traem yumi oli traem hem finis. Be wan samting nomo, hem i no mekem sin.” Biaen, Pol i pulum ol man we oli bilif long Jisas Kraes, blong oli kam fren blong God bakegen, i se: “I gud yumi go klosap long tron blong God ya we i kaen tumas long ol man, mo yumi prea long hem we yumi no fraet blong toktok, blong hem i save sore long yumi mo i kaen long yumi long stret taem we yumi nidim help.”—Hib. 4:14-16; 1 Jon 2:2.

⁵ Jisas i Hed blong Kristin kongregesen. Ol disaepol blong Jisas bifo oli no nidim wan man long wol blong i kam lida blong olgeta. Sem mak tede. Jisas nomo i lidim ol man blong hem. Hem i yusum tabu spirit, mo ol elda we oli lukaot long ol sipsip blong God, blong oli lidim ol man blong hem. Ol elda ya oli mas talemaot long Jisas mo Papa blong hem se oli holem wok ya olsem wanem. (Hib. 13:17; 1 Pita 5:2, 3) Jehova i pulum profet Aesea blong i tokbaot Jisas se: “!Yufala i luk! Mi mi mekem hem i kam wan witnes blong ol nesen, wan lida mo wan komanda blong ol nesen.” (Aes. 55:4) Jisas i soemaot se profet tok ya i stret long hem, taem hem i talem long ol disaepol blong hem se: “Yufala i no mas letem ol man oli singaot yufala se ‘lida,’ from we yufala i gat wan Lida nomo, hemia Kraes.”—Mat. 23:10.

⁶ Jisas i wantem givhan long ol man. Hem i soemaot samting ya taem hem i singaot ol man, se: “Yufala evriwan we i stap hadwok tumas mo yufala i stap karem ol hevi samting, yufala i kam long mi, mo bambae mi mi mekem we yufala i kasembak paoa. Yufala i mas putum yok blong mi long solda blong yufala, blong yufala i wok wetem mi, mo yufala i lan long mi, from we mi mi wan kwaet man mo tingting blong mi i stap daon, nao bambae yufala i save harem gud long laef blong yufala. From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.” (Mat. 11:28-30) Jisas Kraes i lukaot long Kristin kongregesen long kwaet fasin we i mekem se i gat pis, nao tingting blong yumi i spel gud. Long rod ya, hem i soemaot se hem i “gudfala man blong lukaot long sipsip” olsem Papa blong hem, Jehova God.—Jon 10:11; Aes. 40:11.

⁷ Long fas leta we Pol i raetem long ol Kristin long Korin, hem i tokbaot wan narafala wok blong Jisas Kraes, i se: “Hem i mas rul olsem king gogo kasem we God i putum olgeta enemi oli stap daon aninit long leg blong hem. Be taem olgeta samting bambae oli stap aninit long paoa blong Pikinini ya, bambae Pikinini ya tu i putum hem wan aninit long paoa blong God ya we i bin putum olgeta samting oli stap aninit long paoa blong hem, nao God bambae i hed long olgeta samting.” (1 Kor. 15:25, 28) God i mekem Jisas fastaem long ol narafala samting. Bifo we Jisas i kam long wol, hem i “nambawan man blong wok” blong God. (Prov. 8:22-31) Taem God i sanem Jisas i kam long wol, oltaem Jisas i mekem ol samting we God i wantem. Hem i stanap strong taem i kasem trabol we i bigwan olgeta, mo hem i holemstrong long Papa blong hem go kasem we hem i ded. (Jon 4:34; 15:10) From samting ya, God i mekem hem i laef bakegen, i go antap long heven, mo God i givim raet long hem blong i kam King blong Kingdom. (Wok 2:32-36) God i givim wan nambawan wok long King ya Jisas Kraes. Bambae hem i lidim plante milian enjel, blong oli yusum bigfala paoa blong olgeta blong finisim rul blong man long wol ya wetem ol rabis fasin. (Prov. 2:21, 22; 2 Tes. 1:6-9; Rev. 19:11-21; 20:1-3) Nao bambae i gat wan gavman nomo we i rul long fulwol, hemia Kingdom blong God long heven we Kraes i King blong hem.—Rev. 11:15.

YUMI LUKSAVE WOK BLONG KRAES

⁸ Jisas Kraes we i Eksampol blong yumi, hem i stret gud olgeta. Jehova God i givim wok long hem blong i lukaot long yumi. Taswe, sipos yumi holemstrong long Jehova mo yumi wok gud wetem oganaesesen blong hem we i stap muv oltaem, bambae yumi kasem blesing ya we Kraes i lavem yumi mo i lukaot gud long yumi.

⁹ Ol man blong Jisas Kraes bifo oli kasem save gud long wok we God i givim long hem. Oli soemaot samting ya taem oli joen gud blong wok aninit long hem olsem Hed blong olgeta, mo taem oli letem tabu spirit i lidim olgeta. (Wok 15:12-21) Aposol Pol i tokbaot olsem wanem kongregesen blong ol tabu Kristin i joen gud, i se: “Yumi mas talem trutok mo yumi soemaot lav, nao long fasin ya, yumi save kam bigman long evri rod, blong yumi save wokbaot folem Kraes we i hed blong yumi. Hem i stap mekem ful bodi i joen gud, mo ol joen blong bodi ya oli givgivhan long olgeta blong kasem samting we bodi i nidim. Taem olgeta evriwan oli mekem gud wok blong olgeta, samting ya i givhan long bodi blong i gru, nao ful bodi ya i kam strong long lav.”—Efes. 4:15, 16.

¹⁰ Taem ol man long kongregesen oli joen gud blong wok mo oli luksave Jisas Kraes olsem hed blong olgeta, kongregesen i strong, mo lav ya we “i olsem wan rop we i save joenem ol man oli kam wan,” i fulap long kongregesen.—Jon 10:16; Kol. 3:14; 1 Kor. 12:14-26.

¹¹ Ol profet tok blong Baebol we oli stap kamtru tede oli soemaot klia se long yia 1914, Jisas Kraes i kasem paoa blong rul long Kingdom. Naoia hem i stap rul long medel blong ol enemi blong hem. (Sam 2:1-12; 110:1, 2) ?From wanem samting ya i impoten long ol man we oli laef naoia? From we i no longtaem, Jisas bambae i mekem wok blong King blong olgeta king mo Masta blong olgeta masta. Bambae hem i jajem mo i spolem ol enemi blong hem. (Rev. 11:15; 12:10; 19:16) Afta, promes we Jehova i mekem long garen blong Iden blong finisim ol trabol we man i stap kasem, bambae i kamtru long ol man we Kraes i glad long olgeta. (Mat. 25:34) !Yumi glad tumas se yumi luksave wok we God i givim long Kraes! I gud yumi stap joen gud blong finisim wok blong prij long fulwol long ol las dei ya, aninit long Lida blong yumi, Jisas Kraes.