?Yu Yu Respektem Ples Blong Wosip Blong Yu?

“Long stat blong gospel, oltaem ol Kristin oli gat prapa ples blong olgeta blong mekem wosip blong olgeta.”​—Buk ya (Primitive Christianity) blong William Cave.

OL MAN blong God oltaem oli haremgud taem oli stap hivap wanples blong mekem wosip. Samting ya i tru long faswan handred yia olsem tede. Ol man blong raetem ol buk mo ol man blong stadi long ol skul long taem bifo, olsem Lucian, Clement, Justin Martyr, mo Tertullian, olgeta oli agri se ol Kristin oli gat ol prapa ples we oli stap hivap oltaem long olgeta blong mekem wosip tugeta.

Baebol i talem sem samting, hem i tokbaot ol miting we ol grup blong ol Kristin oli stap gat oltaem. Ol grup ya oli olsem kongregesen. Hemia i stret from we tok ya “kongregesen” long ol faswan lanwis blong Baebol, hem i minim wan grup blong ol man we oli hivap wanples from wan risen no wan wok.

Ol Ples Blong Kristin Wosip Bifo

?Ol Kristin long faswan handred yia oli stap mekem wanem taem oli hivap wanples? Baebol i tokbaot sam miting olsem mo i soem se fasin blong tij i impoten haf blong hem. (Ol Wok 2:42; 11:26; 1 Korin 14:​19, 26) Oli mekem program long saed blong edukesen, wetem ol tok, oli talem ol ekspiryens blong leftemap tingting, mo oli tingtinggud long ol leta we oli stap kasem long hed kampani long Jerusalem no long wan aposol.

Long Ol Wok 15:​22-35, yumi ridim se, afta we oli ridim wan leta olsem long wan grup blong ol Kristin long Antiok, Judas mo Saelas tufala i “toktok longtaem long ol brata ya blong yumi. Tufala i stap leftemap tingting blong olgeta, mo tufala i stap mekem olgeta oli strong.” Narafala store i talem se taem Pol mo Banabas tufala i kamtru long Antiok “tufala i singaot ol memba blong jyos, blong oli kam wanples. Nao tufala i talemaot long ol man ya, olgeta samting ya we God i yusum tufala blong mekem.” Fasin blong prea long Jeova i wan impoten haf blong ol Kristin miting tu.​—Ol Wok 14:27.

Ol ples we ol kongregesen long faswan handred yia oli stap hivap long olgeta blong mekem wosip oli no flas bitim mak olsem plante long ol jyos blong Krisendom tede. Plante taem oli Kristin blong bifo oli stap joen wanples long ol prapa haos blong ol man. (Rom 16:5; 1 Korin 16:19; Kolosi 4:15; Faelimon 2) Plante taem oli stap yusum haos blong ol man be long rum antap. Taem oli mekem Kakae Blong Masta, oli bin mekem long rum antap. Mo tu, hem i insaed long rum antap we tabu speret i kamdaon long ol 120 disaepol long Pentekos.​—Luk 22:​11, 12, 19, 20; Ol Wok 1:​13, 14; 2:​1-4; 20:7, 9.

Tede, ol Wetnes blong Jeova oli folem rod ya we ol aposol oli stap yusum bifo. Oli stap yusum ol ples blong miting olsem ol Haos Kingdom. Long ples ya oli stap tren olsem ol man blong talemaot gud nyus blong Kingdom blong God. (Matyu 24:14) Long Haos Kingdom, oli stap stadi Baebol tu, oli prea, mo oli leftemap tingting blong olgeta wanwan. Samting ya i laenap wetem advaes long Baebol long Hibrus 10:​24, 25, i se: “I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa, from we yufala i luk we Dei ya we Masta blong yumi bambae i jajem olgeta man, hem i kam kolosap finis.”

Yusum Gud Ples Blong Wosip Blong Yumi

?Yu yu tingbaot ol tok blong aposol Pol se: “God i no stampa blong fasin ya we olgeta samting oli paspas, Hem i stampa blong pis ya,” mo, “Yufala i mas mekem olgeta samting long fasin we i stret gud, we ol man oli glad long hem”? Sipos yu lukluk gud long ol vas we oli stap raonabaot long ol tok ya, bambae yu faenem se Pol i stap tokbaot fasin blong mekem ol Kristin miting. Olsem long taem blong ol aposol, ol Kristin tede oli wantem mekem sua se ol miting blong olgeta oli no olbaot oli folem wan plan mo oli mekemrere gud.​—1 Korin 14:26-40.

Wajtaoa ya blong Novemba 15, 1969 (Engglis), i talem se: “Filing long saed blong speret we man i harem taem hem i stap long Haos Kingdom hem i tru, hem i kamaot from trufala intres long trufala wosip mo tijing blong Baebol. Mo lukluk blong Haos Kingdom insaed i mekem ol man we oli stap insaed oli harem fri blong go storeyan wetem ol narafala mo soem fasin fren, oli no stap kwaet olsem we i tabu blong oli toktok.” I tru, oli mas lukaotgud tu se oltaem oli yusum Haos Kingdom long fasin we i soem respek mo ona.

Krisendom i no soem respek long saed ya. Sam jyos ogenaesesen oli yusum ples blong wosip blong olgeta olsem ples blong mekem pleplei blong ol man oli luk. Oli stap plei rok myusek long ol singsing blong skul blong ol man oli lukluk, oli gat ol rum blong stap leftemap ol hevi wet, ol tebel blong pike, oli yusum blong stap lukaot long ol pikinini, mo blong mekem sinema insaed long haos. Wan jyos i stap holem kompetisin blong resling olsem haf blong program blong olgeta. Samting ya i no laenap nating wetem rod ya we ol aposol oli stap yusum.

Sipos kongregesen long faswan handred yia i mekem i no stret, i stret nomo we oli mas jenisim fasin ya. Eksampel, sam man insaed long Kristin kongregesen long Korin oli stap yusum lafet blong Kakae Blong Masta olsem wan taem blong kakae mo dring. Oli stap tekem kakae blong olgeta wetem olgeta blong oli save kakae bifo no long taem blong miting, sam oli bitim mak long saed blong kakae mo long saed blong dring. Hemia i no stret nating. Aposol Pol i raet long olgeta, i se: “?Weswe? ?Yufala i no gat haos blong yufala, we bambae yufala i save go long olgeta blong kakae mo dring?”​—1 Korin 11:​20-29.

Blong folem advaes blong Pol, ol Wetnes blong Jeova oli traem blong mekem ol prapa bisnes blong olgeta long haos nomo, no maet long narafala ples be i no long Haos Kingdom. I tru, ol miting we yumi stap gat oltaem, oli givim wan gudfala jans long yumi blong lukluk ol fren blong yumi long wantaem. Be, Haos Kingdom i blong Jeova, taswe yumi mas yusum nomo long wosip blong hem. Yumi no yusum taem ya we yumi go long miting blong mekem ol prapa bisnes blong yumi no stretem prapa bisnes blong yumi long saed blong mane wetem narafala.

Mo bakegen, kongregesen i no mas yusum Haos Kingdom blong mekem sam program blong pleplei, bring an bae, no ol miting olbaot, olsem blong lukaot long ol pikinini. I gat ol narafala ples we wanwan man i save mekem ol prapa samting we hem nomo i wantem mo ol samting long saed blong bisnes.

Ol elda long wan Haos Kingdom oli makem se ol memba blong kongregesen oli gat fasin blong tekem no givimbak ol samting we oli stap tekem long ol narafala taem oli go long miting. Mo tu, oli stap jenisim ol video kaset long Haos Kingdom. Nating se samting ya i no olsem wan bisnes blong winim mane, ol elda oli givhan long olgeta blong oli luksave waes fasin blong mekem ol samting ya long haos.

Blong no mekem wan samting we i save givim rong tingting mo blong lukaot gud se yumi yusum gud Haos Kingdom, yumi mas askem yumi wanwan se: “?I gat ol prapa bisnes blong mi we mi stap mekem long Haos Kingdom we mi save mekem nomo long haos?” Eksampel, taem mi mekem wan plan blong goaot samples no ol pati, ating i gud moa blong tokbaot ol plan olsem long haos. ?Yumi save yusum telefon no visitim olgeta we yumi wantem toktok wetem olgeta? Tekem tok blong Pol, maet yumi save talem se: ‘?Weswe? ?Yumi no gat haos blong tokbaot ol samting olsem?’

Wan Stret Taem Mo Ples Blong Wosip Long Jeova

Baebol i talem long Eklesiastis 3:1, i se: “Evri samting i gat wan taem we i stret long hem. Yes, i gat wan taem blong evri samting aninit long heven.” Taem yumi go long ol miting long Haos Kingdom, yumi save tingting fulwan long ol wok we i laenap wetem Kristin minista wok. Hem i wan taem blong mekem wosip long Jeova.

Jemes, haf brata blong Jisas, i givim advaes agensem fasin ya blong stap ona moa long sam man nomo insaed long Kristin kongregesen. (Jemes 2:​1-9) ?Olsem wanem yumi save mekem advaes ya i wok long ol Haos Kingdom blong yumi? Fasin blong stap ona nomo long sam man i save kamaot taem man i stap givimaot ol pepa blong askem man i go long pati insaed long Haos Kingdom. Long wan kongregesen fasin blong olgeta i blong putum pepa blong askem man i kam long pati insaed long ol bag no long ol Baebol blong ol man we oli stap long taem ya. I tru, olsemia i isi moa bitim we oli sanem pepa ya long postofis no go long haos blong olgeta wanwan blong givim. ?Be, wanem filing blong olgeta ya we oli luk ol pepa ya we i go long narafala be olgeta oli no kasem wan? ?Yu ting se hemia i soem fasin blong ona moa long sam man i bitim ol narafala?

I tru, i no nidim wan strong rul we i talem se man i no mas givim wan mesej no wan smol samting i go long narafala man taem yu stap long Haos Kingdom. Mo tu i no rong blong tokbaot ol wok no ol samting we oli stap kamaot long evridei insaed long Haos Kingdom, no blong askem man blong kam long haos blong yu, no blong askem man i joen wetem yu long sam pleplei. Be ol samting ya yumi no mas mekem olsem we oli impoten tumas no bigfala samting mo yu mas mekem long waes fasin mo we i no pulum ae. Ol prapa bisnes blong yumi oli neva mas spolem yumi no trufala risen we yumi joen wanples long Haos Kingdom from, olsem blong yumi kam strong long saed blong speret.​—Matyu 6:33; Filipae 1:10.

Ol Man We Oli Givim Eksampel

Ol elda mo ol man blong givhan oli strong blong givim eksampel long fasin ya blong soem respek long Haos Kingdom. Oltaem i gat wan no tu elda no ol man blong givhan we oli gat wok ya blong lukaot long sam samting we oli blong mekem Haos Kingdom i klin. Sipos i gat moa long wan kongregesen oli stap yusum wan Haos Kingdom, wan komiti blong ol elda i lukaot long ol bisnes ya.

Nating se i gat sam we oli mekem wok ya blong lukaot long sam bisnes olsem, olgeta man blong givhan mo ol elda oli mas soem trufala intres long Haos Kingdom. Oli luksave se Haos Kingdom oli givim i go long Jeova mo oli yusum blong mekem wosip long hem.

Ol elda oli no mas livim Haos Kingdom i stap olsem sipos hem i nidim blong oli fiksimap sam samting long hem. (2 Kronikel 24:​5, 13; 29:3; 34:8; Nehemaea 10:39; 13:11) Long sam kongregesen oltaem oli jekem Haos Kingdom blong luk sipos i gat sam samting we oli mas fiksimap kwiktaem. Oli makem daon namba blong ol samting blong mekem sua se oli gat ol samting ya we oli stap nidim. Sipos i gat wan prapa ples blong kipim ol samting i stap long hem, ol tul, mo ol samting blong klinim, ol elda mo ol man blong givhan oli mas intres long hem, oli mekem sua se hem i klin mo ol samting oli stap gud insaed. Olgeta we oli wok long ol buk mo magasin oli save soem intres taem oli tekemaot kwiktaem ol emti katon long Haos Kingdom.

Sipos ol elda mo ol man blong givhan oli soem eksampel, samting ya i save givhan long ol narafala memba blong kongregesen blong oli soem strong tingting blong mekem Haos Kingdom i klin. (Hibrus 13:7) Evriwan oli save soem gudfala respek taem oli joen long wok blong klinim Haos Kingdom mo soem trufala intres blong mekem Haos Kingdom i luk gud.

Jisas i talem long Matyu 18:20, i se: “From we taem tu tri man oli joen wanples long nem blong mi, mi mi stap long medel blong olgeta.” Yes, Jisas i intres long samting we yumi stap mekem taem yumi joen wanples blong mekem wosip long Jeova. Samting ya i minim tu ol miting we yumi stap gat long ol haos mo long ol bigfala miting olsem long ol asembli.

Long ol milyan Wetnes blong Jeova, i no gat ples we oli laekem moa i winim we oli laekem ples blong wosip blong olgeta hemia Haos Kingdom. Oli soem trufala respek long ples ya. Oli stap soem gudfala tingting blong lukaotgud long hem, oli traem oltaem blong yusum gud hem. I gud yu tu yu folem advaes we Jeova hem wan i givim, i se: “Lukaotgud long leg blong yu taem yu go long haos blong trufala God.”​—Eklesiastis 5:1.