Ol Elda Oli Lukaot Long Ol Sipsip Blong God

TAEM Jisas i mekem wok blong God long wol, hem i soemaot se hem i “gudfala man blong lukaot long sipsip.” (Jon 10:11) Hem i lukluk ol man we oli wokbaot biaen long hem, nao “hem i sore tumas long olgeta, from we ol narafala oli stap spolem olgeta mo oli no lukaot long olgeta, oli olsem ol sipsip we i no gat man blong lukaot long olgeta.” (Mat. 9:36) Pita mo ol narafala aposol oli luk se Jisas i lavem ol man mo i tingbaot olgeta. Jisas i defren long ol lida blong skul blong ol man Isrel. Oli no kea nating long ol sipsip blong God, mekem se ol sipsip ya oli go wanwan mo oli hanggri gud from tok blong God. (Esik. 34:7, 8) Ol aposol oli wajem Jisas taem hem i tijim ol man mo i lukaot gud long ol sipsip blong God, mo i givim laef blong hem from olgeta tu. Taem oli luk fasin blong Jisas, oli lanem olsem wanem blong givhan long ol man we oli gat bilif, blong oli kambak long Jehova, ‘man ya blong lukaot long sipsip we hem i ovasia blong sol blong yufala.’—1 Pita 2:25.

² Wan taem, Jisas i stap toktok long Pita, nao hem i makemgud se i impoten tumas blong givim kakae long ol sipsip blong God mo blong lukaotgud long olgeta. (Jon 21:15-17) Ol tok ya oli tajem hat blong Pita. Biaen, Pita i talem strong long ol elda long Kristin kongregesen bifo, se: “Yufala i mas lukaot gud long ol sipsip blong God we oli stap aninit long yufala, olsem man blong lukaot long sipsip, yes olsem ol ovasia, mo yufala i no mas fosem yufala nomo blong mekem, be yufala i mas glad nomo blong mekem long fes blong God. Mo yufala i no mas mekem blong kasem samting, be yufala i mas mekem from we yufala i wantem tumas blong mekem. Yufala i no mas bos long ol man ya blong God, be yufala i mas soemaot gudfala eksampol long ol sipsip.” (1 Pita 5:1-3) Ol tok blong Pita i stret long ol elda tede. Olsem Jisas, ol elda oli glad blong soemaot eksampol long ol sipsip blong God, mo oli wantem lidim olgeta long wok blong hem.—Hib. 13:7.

³ Yumi talem tangkiu from ol elda we tabu spirit i putumap olgeta long kongregesen. Wok blong olgeta i givhan bigwan long yumi. Yu traem tingbaot: Ol elda oli spenem taem blong toktok gud long evriwan long kongregesen, blong givhan long olgeta. Oli wok had blong lidim ol miting blong kongregesen evri wik, blong mekem bilif blong evriwan i kam strong moa. (Rom 12:8) Ol elda oli wok strong blong blokem ol rabis man mo ol nogud fasin, blong oli no save spolem ol sipsip blong God. (Aes. 32:2; Taet. 1:9-11) Oli joen oltaem long wok blong prij, mo hemia i pulum yumi tu blong prij oltaem, we yumi no mestem wan manis blong talemaot gud nius. (Hib. 13:15-17) Taem Jehova i putumap ‘ol man ya we oli olsem presen,’ hem i givim samting we kongregesen i nidim blong kam strong moa.—Efes. 4:8, 11, 12.

MAN I MAS KASEM OL MAK BLONG KAM ELDA

⁴ Blong meksua se ol elda oli lukaotgud long kongregesen, oli mas kasem sam mak we Baebol i talem. Sipos oli kasem ol mak ya, samting ya i soemaot se tabu spirit i putumap olgeta. (Wok 20:28) I tru, ol mak we Baebol i talem oli hae. I mas olsem, from we ol elda oli gat wan hevi wok. Be ol mak ya oli no hae tumas sipos ol Kristin man ya oli lavem Jehova mo oli glad blong letem hem i yusum olgeta. Ol narafala oli mas luk klia se ol elda ya oli folem advaes blong Baebol long evri haf blong laef blong olgeta.

⁵ Long leta we aposol Pol i raetem long Timoti mo Taetas, hem i talem ol mak we ol elda oli mas kasem. Long 1 Timoti 3:1-7 yumi ridim se: ‘Sipos wan man i stap wok had blong kam wan ovasia, hem i stap wantem wan gudfala wok. Wan ovasia i no mas gat poen long hem nating, i mas gat wan waef nomo, i mas kontrolem ol fasin blong hem, i mas gat stret tingting, laef blong hem i no mas olbaot, hem i mas welkamem ol narafala, mo hem i mas naf blong tijim ol narafala. Hem i no mas man blong drong, i no mas man blong faet, be hem i mas rere blong lego prapa tingting blong hem. Hem i no mas man blong rao, mo i no mas laekem mane tumas. Man olsem i mas lidim gud famle blong hem, mo ol pikinini blong hem oli obei gud long hem mo oli gat gudfala fasin, (from we sipos wan man i no save lidim gud famle blong hem, ?bambae hem i save lidim gud kongregesen blong God olsem wanem?), man olsem, hem i no mas wan man we i jes kam disaepol, from we i nogud hem i kam flas, nao i kasem sem jajmen we Devel i kasem. Ol man aotsaed oli mas luk se man olsem i wan gudfala man, blong mekem se nem blong hem i no save kam nogud mo hem i no foldaon long trap blong Devel.’

⁶ Long leta we Pol i raetem long Taetas, hem i talem se: ‘Taem mi aot long Krit, mi livim yu yu stap blong yu stretem sam samting we oli no stret, mo blong yu go long olgeta taon blong putumap ol elda, stret folem ol tok ya blong mi: Man i no mas gat poen long hem, hem i mas gat wan waef nomo, ol pikinini blong hem oli mas bilif, mo oli no mas mekem stronghed, mo oli no mas mekem nogud, nao ol man oli stap tokbaot olgeta from. Wan ovasia i wan slef we God i trastem hem, taswe hem i no mas gat poen long hem, i no mas folem prapa tingting blong hem nomo, i no mas kros kwik, i no mas man blong drong, i no mas faet, mo i no mas griri nao i mekem samting we i blong givhan long hem nomo. Be hem i mas welkamem ol narafala, hem i laekem blong mekem ol gudfala fasin, i mas gat stret tingting, hem i wan stret man, i mas holemstrong long God, mo i mas bos long tingting blong hem. Hem i mas folem gud ol tok ya we i tru, taem hem i stap tijim ol man. Olsem nao, hem i save tijim ol man long ol gudfala tok blong leftemap tingting blong ol man, mo hem i save stretem olgeta we oli tok nogud long tok ya.’—Taetas 1:5-9.

⁷ Maet wan Kristin man i harem se i strong tumas blong kasem ol mak ya we Baebol i talem. Be tingting ya i no mas blokem wan man, blong i no wantem kasem gudfala wok ya. Taem ol elda oli gat ol gudfala Kristin fasin, oli pulum ol narafala long kongregesen blong oli soemaot ol semfala fasin ya. Aposol Pol i talem se God i ‘givim ol man ya olsem presen’ blong “oli givhan long ol tabu man blong oli wokbaot long stret rod. Mo hem i mekem olsem blong oli wok blong givhan long ol narafala, mo blong oli mekem bodi blong Kraes i kam strong moa. Bambae oli mekem olsem gogo yumi evriwan i kam wan nomo we bilif i joenem yumi, mo yumi kasem stret save long Pikinini blong God. Nao long fasin ya, bambae yumi no moa olsem pikinini, be yumi kam olsem Kraes we i bigman finis.”—Efes. 4:8, 12, 13.

⁸ Ol elda oli no ol pikinini mo oli no jes kam disaepol. Be oli stap folem ol Kristin fasin longtaem finis long laef blong olgeta. Oli gat plante save long Baebol, oli kasem save gud long hem, mo oli lavem evriwan long kongregesen. Oli no fraet blong toktok blong stretem eniwan we i stap mekem i no stret. Long rod ya, oli protektem ol sipsip blong God, blong i no gat wan man we i spolem olgeta. (Aes. 32:2) Olgeta long kongregesen oli luk klia se ol elda oli bigman long ol Kristin fasin, oli fren gud wetem God, mo oli wantem givhan long ol sipsip blong God.

⁹ Olgeta we oli naf blong kam elda oli soemaot waes fasin long laef blong olgeta. Sipos elda i mared, hem i folem ol rul we Baebol i putum long ol mared man. Hem i gat wan waef nomo, mo i stap lidim gud famle blong hem. Sipos elda i gat ol pikinini we oli bilif, oli mas obei gud long hem, mo oli mas gat gudfala fasin. Oli no mas mekem stronghed mo oli no mas mekem nogud, nao ol man oli stap tokbaot olgeta from. Olgeta long kongregesen oli glad blong go luk wan elda we ol pikinini blong hem oli obei long hem, blong askem advaes long Kristin laef blong olgeta mo famle blong olgeta. Elda i no mas gat poen long hem nating, mo ol man afsaed oli mas luk hem olsem wan gudfala man. Man i no save talem se hem i mekem fasin we i nogud we i spolem gudnem blong kongregesen. Man we kongregesen i jes stretem hem from wan bigfala sin, i no naf blong kam wan elda. Elda i mas wan man we olgeta long kongregesen oli glad blong folem gudfala eksampol blong hem, mo oli trastem hem blong i lukaotgud long Kristin laef blong olgeta.—1 Kor. 11:1; 16:15, 16.

¹⁰ Ol man we oli kasem ol mak ya, oli save mekem wok long kongregesen olsem ol elda long Isrel bifo. Baebol i talem se ol elda ya “oli waes, oli gat save, mo oli save mekem wok.” (Dut. 1:13) I tru se ol elda oli save mestem samtaem. Be olgeta long kongregesen mo long vilej oli save luk se ol elda oli stap mekem i stret mo oli onagud long God, mo oli soemaot longtaem finis se oli stap folem ol tok blong God long laef blong olgeta. Oli no fraet blong toktok long klia fasin long fored blong kongregesen, from we i no gat poen long olgeta.—Rom 3:23.

¹¹ Ol man we oli naf blong kam elda long kongregesen, oli kontrolem ol fasin blong olgeta mo ol fasin we oli mekem long ol narafala. Oli naf blong skelemgud ol samting, oli no bitim mak, mo oli bos long tingting blong olgeta. Oli no bitim mak long kakae, dring, pleplei, ol samting we oli mekem blong spel mo haremgud, mo ol muvi we oli wajem. Oli no dring bitim mak, olsem nao man i no save talem se oli man blong drong. Man we i no save tingting stret from we i dring tumas, i isi blong hem i no moa bos long tingting mo fasin blong hem. Taswe man olsem i no naf blong lukaotgud long Kristin laef blong olgeta long kongregesen.

¹² Man we i lukaot long kongregesen i mas wan man we laef blong hem i no olbaot. Klos mo hea blong hem, haos blong hem, mo ol samting we hem i mekem evri dei, oli soemaot gudfala fasin ya. Hem i no slo tumas blong tekem aksen, hem i luksave wanem we hem i mas mekem mo hem i plan from. Hem i folem ol rul blong Baebol blong mekem ol samting ya.

¹³ Elda i mas wan man we i rere blong lego prapa tingting blong hem. Hem i save joen gud mo i wok gud wetem ol narafala elda. Hem i no mas tinghae long hem wan, mo i no mas strong tumas long ol narafala. Elda we i rere blong lego prapa tingting blong hem i no gat flas tingting, we oltaem hem i ting se tingting blong hem i gud moa i bitim ol narafala elda. Maet ol narawan oli nambawan long sam fasin we hem i no gat, o maet oli gat gudhan long samting we hem i no gat gudhan long hem. Taem ol toktok mo desisen blong elda oli stanap long Baebol, mo hem i traehad blong folem eksampol blong Jisas Kraes, hem i soemaot se hem i rere blong lego prapa tingting blong hem. (Fil. 2:2-8) Elda i no mas wan man blong rao o faet. Hem i gat respek long ol narafala, mo i luk ol narafala olsem we oli gud moa long hem. Hem i no mas folem prapa tingting blong hem nomo, i min se hem i no traem fosem ol narafala blong oli folem tingting mo fasin blong hem. Hem i no mas kros kwik, be i mekem pis wetem ol narafala.

¹⁴ Man we hem i naf blong kam wan elda long kongregesen, hem i mas gat stret tingting. Taem wan trabol i kamaot, hem i stap kwaet mo i tingting gud. Mo hem i no hareap blong jajem wan bisnes. Hem i kasem save gud ol tingting mo rul blong Jehova mo olsem wanem blong folem olgeta. Man we i gat stret tingting, hem i glad blong kasem advaes mo ol tok blong soemaot rod. Hem i no gat tu fes.

¹⁵ Pol i talem long Taetas se elda i wan man we i laekem ol gudfala fasin. Hem i wan stret man, mo i holemstrong long God. Hem i soemaot ol fasin ya long ol samting we hem i talem mo i mekem long ol narafala, mo hem i strong blong folem ol stret fasin. Hem i neva kam slak blong onagud long Jehova mo blong leftemap stret fasin. Samting we i no blong talemaot, hem i naf blong holem i stap blong hem nomo. Hem i welkamem ol narafala oli kam long haos blong hem, mo hem i givim taem mo paoa blong hem wetem sam samting blong hem tu, blong halpem ol narafala.—Wok 20:33-35.

¹⁶ Blong wan elda i mekem gud wok blong hem, hem i mas naf blong tijim ol narafala. Pol i talem long Taetas se wan elda i mas “folem gud ol tok ya we i tru, taem hem i stap tijim ol man. Olsem nao, hem i save tijim ol man long ol gudfala tok blong leftemap tingting blong ol man, mo hem i save stretem olgeta we oli tok nogud long tok ya.” (Taet. 1:9) Elda i save pulum narafala blong i tingting gud long wan poen, mo i save pruvum poen ya, mo i save winim ol tok we man i sakem blong agensem hem. Mo taem hem i soemaot olsem wanem blong folem ol tok blong Baebol, hem i mekem narafala i sua se hemia stret rod blong folem, mo i mekem bilif blong narafala i strong moa. Elda i mas naf blong tijim gud man we i wantem harem tok blong hem, mo man we i no wantem harem tu. (2 Tim. 4:2) Hem i gat longfala tingting, taswe long kwaet fasin hem i save stretem man we i mekem sin, mo i save pulum man we i gat tu tingting blong i mekem ol gudfala wok we oli stanap long bilif. Sipos elda i naf blong tijim ol man wanwan mo kongregesen, hem i soemaot se hem i kasem mak ya we Baebol i talem.

¹⁷ I impoten we ol elda oli wok strong long wok blong prij. Ol narafala oli mas luksave se ol elda oli stap traehad blong folem fasin blong Jisas. Long tingting blong Jisas, wok blong prij i impoten tumas. Jisas i intres long ol disaepol blong hem, mo i givhan long olgeta blong oli kam ol man blong talemaot gud nius. (Mak 1:38; Luk 8:1) Taem ol elda oli strong blong prij nating se oli bisi, ol narafala long kongregesen oli folem fasin blong olgeta. Mo taem elda i prij wetem famle blong hem mo ol narafala, ‘bilif blong hem i leftemap tingting blong olgeta, olsem we bilif blong olgeta i leftemap tingting blong hem.’—Rom 1:11, 12.

¹⁸ Maet i luk olsem se i had tumas blong ol elda oli kasem ol hae mak ya. I tru se i no gat wan elda we i save mekem ol samting we Baebol i talem, long fasin we i stretgud olgeta. Be bigfala samting se, elda i no mas slak tumas long wan long ol fasin ya. Maet wan elda i gud moa long wan fasin, narawan i gud moa long narafala fasin. Samting ya i mekem se bodi blong elda bambae i gat olgeta gudfala fasin we i nidim blong lukaotgud long kongregesen blong God.

¹⁹ Taem bodi blong elda i rekomendem ol brata blong oli kam elda, oli mas tingbaot ol tok blong aposol Pol se: “Mi mi talem long yufala se i no mas gat wan long yufala we i tinghae long hem bitim mak. Yufala i mas gat stret tingting folem mak blong bilif we God i givim long yufala wanwan.” (Rom 12:3) Taswe, wan elda i mas tingbaot se hem i daon moa long ol narafala. Taem oli skelem fasin blong wan brata blong luk sipos hem i naf blong kam elda, oli no mas “stret bitim mak.” (Pri. 7:16) Oli mas gat klia tingting long ol fasin we Baebol i talem. Nao bodi blong elda i traem luksave sipos brata ya i mekem ol fasin ya go kasem mak we i naf. Oli mas tingbaot se yumi evriwan i sinman, mo oli no mas mekem i gud moa long wan man i bitim narafala, mo oli no mas gat tu fes. Taswe, oli mas gat respek long ol stret rul mo loa blong Jehova, mo oli tingbaot wanem i gud long kongregesen. Oli prea blong tabu spirit i lidim olgeta mo oli skelem ol fasin blong brata wetem ol fasin we Baebol i talem se wan elda i mas gat. Hemia wan wok we ol elda oli tinghevi long hem, mo oli folem advaes blong Pol se: “Yu no hariap tumas blong putum han blong yu long wan man.”—1 Tim. 5:21, 22.

FRUT BLONG TABU SPIRIT

²⁰ Ol man we oli naf blong kam elda, oli soemaot long laef blong olgeta se tabu spirit i stap lidim olgeta. Oli gat ol naen fasin we oli kamaot long tabu spirit, hemia “lav, glad, pis, longfala tingting, kaen, gud fasin, bilif, kwaet fasin, mo bos long tingting.” (Gal. 5:22, 23) Ol elda we oli gat ol fasin ya oli mekem ol brata mo sista oli haremgud, mo oli givhan long kongregesen blong i joen gud long tabu wok blong God. Ol fasin blong olgeta mo frut blong wok blong olgeta i soemaot se tabu spirit nao i putumap olgeta.—Wok 20:28.

OLI PULUM KONGREGESEN BLONG I JOENGUD

²¹ I impoten tumas we ol elda oli wok wanples blong pulum kongregesen blong i joen gud. I tru se ol elda wanwan oli gat defdefren fasin. Be bodi blong elda i joen gud sipos olgeta wanwan oli lesin wetem respek long ol narawan, nating se oli no gat sem tingting long sam samting we oli tokbaot. Olgeta wanwan oli mas rere blong lego prapa tingting blong olgeta blong sapotem desisen blong bodi blong elda, sipos desisen ya i no agensem wan rul o stamba trutok blong Baebol. Taem oli rere blong lego prapa tingting blong olgeta, oli soemaot se “waes we i kamaot long heven” i stap lidim olgeta. Waes ya “i mekem man i gat pis, i rere blong lego prapa tingting blong hem.” (Jem. 3:17, 18) I no mas gat wan elda we i ting se hem i hae moa long ol narafala elda, mo i no mas gat wan we i traem bos long ol narawan. Taem ol elda oli joen gud olsem wan bodi blong mekem kongregesen i gohed gud, oli stap wok gud wetem Jehova.—1 Kor. japta 12; Kol. 2:19.

TRAEHAD BLONG KASEM WOK YA

²² Ol brata we oli bigman long ol Kristin fasin oli mas wantem blong kasem wok ya blong lukaot long ol sipsip blong God. (1 Tim. 3:1) Be taem oli kam elda, oli mas rere blong wok had mo lego sam samting we olgeta nomo oli wantem. Oli mas rere blong givhan long ol brata long sam samting, mo halpem olgeta blong oli fren gud wetem God. Taem ol brata oli traehad blong kasem wok blong elda, oli wok had blong kasem ol hae mak we Baebol i talem.

LAEF BLONG ELDA I SAVE JENIS

²³ Maet wan brata i mekem wok blong elda longtaem finis i kam, be naoia hem i sik o i handikap. Maet hem i kam olfala, nao i no moa save mekem wok blong elda. Nating se i olsem, sipos hem i wan elda yet, ol narafala long kongregesen oli mas respektem hem. Hem i no nid blong lego wok ya from we hem i no moa save mekem plante wok. I stret yet we hem i kasem bigfala ona olsem olgeta elda, we oli wok had mo oli yusum ol gudfala fasin blong olgeta blong lukaot gud long ol sipsip blong God.

²⁴ Be sipos wan brata i harem se i moagud we hem i lego wok blong elda from we sam samting oli jenis long laef blong hem nao hem i no moa save mekem plante wok, ale desisen ya i stap long hem nomo. (1 Pita 5:2) Nating se hem i no moa mekem wok blong elda, be ol narafala oli mas respektem hem yet. Hem i save mekem plante gudfala wok long kongregesen.

WOK INSAED LONG KONGREGESEN

²⁵ Ol elda oli lukaot long plante defren wok long kongregesen. I gat kodineta blong ol elda, mo sekretari, mo elda we i lukaot long wok blong prij, mo elda we i lidim Wajtaoa Stadi, mo elda we i lukaot long Miting Blong Kristin Wok Mo Laef. Plante long ol elda oli lukaot long wan grup blong prij. Ol elda oli no stap jenisim wok blong olgeta oltaem, be oli save stap longtaem long wan wok. Be sipos wan elda i muv i go long narafala ples, o i kam sik nao i no moa save mekem wok blong hem, ol elda bambae oli jusum wan narafala elda blong mekem wok blong hem. Bambae oli mekem sem mak sipos wan elda i lusum wok blong hem, from we hem i no moa gat ol fasin we Baebol i talem. Sipos i no gat plante elda long kongregesen, maet wan elda i mas mekem moa long wan wok, go kasem taem we wan brata i kam naf blong mekem wok blong elda.

²⁶ Kodineta blong bodi blong elda i jeaman long ol miting blong ol elda. Hem i mekem wok ya wetem tingting daon, mo i wok gud wetem ol narafala elda blong lukaot long ol sipsip blong God. (Rom 12:10; 1 Pita 5:2, 3) Hem i wan brata we i save mekem gudfala plan blong wok, mo i traehad long wok blong hem.—Rom 12:8.

²⁷ Sekretari i lukaot long ol fael blong kongregesen, mo hem i talemaot long ol narafala elda ol impoten save long ol leta we kongregesen i kasem. Sipos i gat nid, maet oli givim wok long wan narafala elda o wan man blong givhan we i nafgud, blong i halpem sekretari.

²⁸ Elda we i lukaot long wok blong prij i mekem ol plan blong wok blong prij mo ol narafala samting we oli joen wetem wok ya. Hem i mekem wan program blong visitim olgeta grup blong prij, ale wan wiken long wan manis hem i visitim wan grup. Long ol smosmol kongregesen we i no gat plante grup blong prij, maet evri yia hem i visitim ol grup ya tu taem. Long wiken we hem i visitim grup, hem i lidim ol miting blong prij, mo i prij wetem ol pablisa blong givhan long olgeta blong oli mekem ol visit mo Baebol stadi.

ELDA WE I LUKAOT LONG GRUP BLONG PRIJ

²⁹ I wan nambawan blesing blong wok olsem elda we i lukaot long grup blong prij. Ol wok blong hem oli olsem: (1) Hem i givhan long evriwan long grup blong oli fren moa wetem God. (2) Hem i givhan long evriwan long grup blong oli joen oltaem long wok blong prij, oli wok wetem strong tingting, mo oli kasem glad from wok ya. (3) Hem i trenem ol man blong givhan we oli stap long grup blong hem, blong oli kam naf blong mekem moa wok long kongregesen. Bodi blong elda i mekem desisen se hu nao ol brata we oli naf blong mekem trifala wok ya.

³⁰ I moagud ol elda oli mekem wok ya blong lukaot long ol grup blong prij. Wan man blong givhan we i naf i save mekem wok ya go kasem taem we i gat wan elda blong mekem. Sipos wan man blong givhan i mekem wok ya, yumi singaot hem se brata we i lukaot long wan grup blong prij, from we hem i no wan elda. Hem i wok aninit long ol elda nomo.

³¹ Wan impoten wok blong elda we i lukaot long grup blong prij, i blong lidim grup ya long wok blong prij. Sipos hem i prij oltaem, mo i wok strong long wok blong prij, mo i glad blong mekem wok ya, bambae ol narafala pablisa oli mekem sem mak. Ol pablisa oli laekem tumas blong prij wanples wetem ol narafala, from we hemia i leftemap tingting blong olgeta mo i givhan long olgeta blong oli kamgud moa long wok ya. Taswe elda we i lukaot long grup i mas mekem wan program we i stret long bighaf blong ol brata mo sista. (Luk 10:1-16) Elda ya i mas meksua se i gat naf teritori evri taem we grup i go prij. Klosap oltaem hem nao i lidim miting blong prij, mo i talem plan we ol pablisa oli mas folem long dei ya. Sipos hem i no save kam, hem i mas askem long wan narafala elda o wan man blong givhan, blong i lidim miting blong prij. Sipos i no gat wan narafala elda o man blong givhan, hem i save askem long wan pablisa we i nafgud. Olsem nao, ol pablisa oli save wanem blong mekem.

³² Elda we i lukaot long wan grup blong prij i mas talemaot fastaem, se elda we i lukaot long wok blong prij long kongregesen bambae i visitim grup ya. Hem i mekem plan blong visit ya, mo i tokbaot long grup, nao evriwan oli glad blong kasem ol gudfala samting long visit ya. Sipos evriwan long grup oli save gud plan ya, bambae oli rere blong sapotem gud visit ya.

³³ Ol grup blong prij oli smol nomo. Hemia i mekem se elda we i lukaot long grup i gat janis blong savegud evri brata mo sista. Hem i lavem ol sipsip blong Jehova, mo i intres gud long olgeta wanwan. Hem i leftemap tingting blong olgeta blong oli prij, mo i givhan long olgeta long wok ya. Hem i givhan long olgeta blong oli kam long ol miting, mo i givhan long olgeta wanwan olsem oli nidim blong oli stap strong. Olgeta we oli sik o tingting blong olgeta i foldaon, bambae oli glad tumas sipos hem i go visitim olgeta. Maet sam advaes o tok blong leftemap tingting we hem i givim, i givhan long samfala blong oli traehad blong kasem wok long kongregesen. Samting ya i save givhan moa long ol brata mo sista blong olgeta. I tru, elda ya bambae i traehad moa blong givhan long olgeta long grup we hem i lukaot long hem. Be from we hem i wan elda mo wan man blong lukaot long ol sipsip blong God, hem i lavem evriwan long kongregesen, mo hem i rere blong givhan long eniwan we i nidim help.—Wok 20:17, 28.

³⁴ Wan wok blong elda we i lukaot long grup blong prij, i blong karem ol ripot blong prij long evriwan long grup. Biaen, hem i givim ol ripot ya long sekretari. Ol pablisa oli save givhan bigwan long elda we i lukaot long grup, sipos oli kwik blong givim ripot long en blong manis. Oli save givim ripot ya stret long elda we i lukaot long grup, o oli save putum long bokis blong ol ripot long Haos Kingdom.

SEVIS KOMITI

³⁵ Sevis Komiti blong Kongregesen, hemia kodineta, sekretari, mo elda we i lukaot long wok blong prij. Olgeta ya oli gat sam spesel wok blong mekem long kongregesen. Sevis komiti i givim raet long ol brata we oli wantem yusum Haos Kingdom blong mekem tok blong mared o tok blong berem dedman. Mo komiti ya i talem long ol pablisa wanwan, weswan grup blong prij we bambae oli joen long hem. Sevis komiti i jekem mo i agri long ol pepa we ol brata mo sista oli fulumap blong kam fultaem paenia o haftaem paenia, o blong mekem wan narafala wok. Sevis komiti i wok folem ol desisen blong bodi blong elda.

³⁶ Branj ofis i eksplenem wok blong ol elda ya, wetem elda we i lidim Wajtaoa stadi, elda we i lukaot long Miting Blong Kristin Wok Mo Laef, mo ol narafala elda.

³⁷ Sam samtaem, bodi blong elda i mekem miting blong tokbaot olsem wanem kongregesen i stap gohed. Antap long miting we eria elda i mekem wetem ol elda taem hem i visitim kongregesen, ol elda oli mekem wan miting tri manis afta we hem i visitim olgeta. Be sipos i gat wan narafala samting i kamaot we oli mas tokbaot, oli save mekem miting enitaem nomo.

OBEI LONG OL ELDA

³⁸ Ol elda oli no stret gud olgeta. Nating se i olsem, Baebol i talem se olgeta long kongregesen oli mas obei long olgeta. Jehova nao i putumap plan ya, mo ol elda oli mas talemaot ol fasin blong olgeta long hem. Oli wok long nem blong hem mo gavman blong hem. Hibru 13:17 i talem se: “Yufala i mas obei long olgeta we oli stap lidim yufala, mo yufala i mas stap aninit long olgeta, from we olgeta oli stap gohed blong lukaot gud long laef blong yufala, mo oli mas talemaot long God se oli holem wok ya olsem wanem. Olsem nao, oli save mekem wok ya wetem glad, be oli no pulum nogud win blong olgeta, from we samting ya i save spolem yufala.” Jehova i yusum tabu spirit blong putumap wan man i kam elda. Mo Jehova i save yusum sem spirit ya blong tekemaot wok ya long wan man, sipos hem i no moa soemaot frut blong spirit, mo sipos laef blong hem i no moa laenap wetem ol fasin we Baebol i talem se elda i mas gat.

³⁹ ?Olsem wanem? ?Yu yu talem tangkiu long ol elda from hadwok mo gudfala eksampol blong olgeta? Taem Pol i raetem leta i go long kongregesen long Tesalonaeka, hem i talem se: “Ol brata, mifala i askem long yufala blong yufala i respektem olgeta ya we oli stap wok had long medel blong yufala, mo oli stap lidim yufala long ol wok blong Masta, mo oli stap givim advaes long yufala. Yufala i mas lavem olgeta mo yufala i mas gat bigfala ona long olgeta from wok we oli mekem.” (1 Tes. 5:12, 13) Ol elda oli wok had long kongregesen, mo wok blong olgeta i mekem se i isi moa blong yumi mekem wok blong God, mo yumi harem gud moa blong mekem wok ya. Mo tu, long leta we Pol i raetem long Timoti, hem i tokbaot stret tingting we kongregesen i mas gat long ol elda, i se: “Ol man oli mas soemaot bigfala ona long ol elda we oli lidim gud kongregesen, speseli olgeta we oli wok strong blong talemaot tok blong God mo blong tijim ol man.”—1 Tim. 5:17.

SAM NARAFALA WOK LONG OGANAESESEN

⁴⁰ I gat sam elda we oli wok olsem Grup We i Visitim Ol Sikman. Sam narafala oli wok long Komiti blong Toktok Wetem Ol Dokta. Oli go long ol hospital mo toktokgud wetem ol dokta, blong givim moa save long olgeta long saed blong ol tritmen we i no gat blad long hem, mo blong pulum olgeta blong oli yusum ol tritmen ya long ol Witnes blong Jehova. Sam narafala elda oli givhan blong mekem wok blong Kingdom i gohed moa, taem oli bildim mo lukaot gud long ol Haos Kingdom mo ol Haos Asembli, o oli wok long Komiti blong Asembli. Olgeta evriwan long oganaesesen blong Jehova oli talem bigfala tangkiu from hadwok blong ol brata ya, mo from we oli glad blong yusum taem mo paoa blong olgeta long ol wok ya. Tru ya, ‘yumi mas gohed blong tinghae long ol man olsem.’—Fil. 2:29.

ERIA ELDA

⁴¹ Hed Kampani i mekem plan se sam elda we oli nafgud, bambae oli mekem wok blong eria elda. Branj ofis i talem wanem eria we bambae oli wok long hem. Klosap oltaem oli visitim evri kongregesen tu taem long wan yia. Samtaem oli visitim ol paenia we oli stap wok long ol ples farawe long kongregesen. Ol eria elda oli mekem program blong olgeta blong ol manis we oli kam, mo oli sanem toktok i go long ol kongregesen. Olsem nao, olgeta evriwan oli save harem gud long visit blong eria elda.

⁴² Kodineta blong ol elda i lidim wok ya blong mekem wan gudfala plan blong visit blong eria elda, olsem nao, evriwan long kongregesen oli save kasem niufala paoa from visit blong hem. (Rom 1:11, 12) Taem kongregesen i kasem nius se eria elda bambae i kam mo i save ol nid blong hem mo woman blong hem (sipos i mared), bambae kodineta i mekem plan blong faenem ples blong slip mo ol narafala samting we hem i nidim. Kodineta i meksua se evriwan, wetem eria elda tu, oli save long ol plan ya.

⁴³ Eria elda bambae i tokbaot program blong ol miting mo ol miting blong prij wetem kodineta. Bambae oli mekem program ya folem advaes blong eria elda mo branj ofis. Evriwan oli mas save fastaem long stret taem mo ples blong ol miting blong kongregesen, miting blong ol paenia, miting blong ol elda mo ol man blong givhan, mo stret ples mo taem blong ol miting blong prij.

⁴⁴ Long Tusde aftenun, eria elda i lukluk ol Ripot Blong Pablisa long kongregesen, ol pepa we oli talem namba blong ol man we oli kam long ol miting, ol map blong teritori, mo ol kaon blong kongregesen. Samting ya i givhan long hem blong i save sam samting we kongregesen i nidim, mo blong save olsem wanem blong givhan long olgeta we oli lukaot long ol fael ya. Kodineta i mas meksua se eria elda i kasem ol fael blong kongregesen bifo long dei ya.

⁴⁵ Long wik we eria elda i visitim kongregesen, hem i tekem taem blong toktok wetem ol brata mo sista wanwan, olsem we hem i naf blong mekem. Maet hem i mekem olsem long ol miting, long wok blong prij, taem hem i kakae wetem olgeta, mo long sam narafala taem bakegen. Mo tu, hem i mekem miting wetem ol elda mo ol man blong givhan, blong serem sam tok blong Baebol we i stret long olgeta, wetem sam advaes. Long miting ya, hem i talem ol tok we i givhan long olgeta blong oli lukaotgud long ol sipsip we oli stap long han blong olgeta. (Prov. 27:23; Wok 20:26-32; 1 Tim. 4:11-16) Eria elda i mekem miting wetem ol paenia tu, blong leftemap tingting blong olgeta blong gohed long wok ya, mo blong givhan long olgeta wanwan blong oli winim ol problem we oli stap kasem long wok blong prij.

⁴⁶ Sipos i gat sam narafala problem long kongregesen, eria elda i save givhan olsem we hem i naf blong mekem long wik we hem i stap long kongregesen. Sipos oli no stretem fulwan long wik ya, hem i save givhan long ol elda o olgeta we oli insaed long problem ya, blong oli mekem risej long Baebol. Sipos i gat wan samting we branj ofis i mas mekem biaen, eria elda mo ol elda long kongregesen bambae oli raetem wan ripot long branj ofis blong talemaot problem ya fulwan.

⁴⁷ Taem eria elda i visitim kongregesen, hem i go long ol miting blong kongregesen ya. Maet samtaem i gat jenis long ol miting ya folem ol advaes we i kam long branj ofis. Eria elda i givim sam tok blong leftemap tingting blong kongregesen, mo blong pulum olgeta blong oli wok, mo blong tijim olgeta, mo blong mekem olgeta oli strong moa. Hem i traehad blong mekem se oli lavem Jehova, Jisas Kraes, mo oganaesesen.

⁴⁸ Wan risen blong visit blong eria elda, i blong pulum ol brata mo sista blong oli wok strong long wok blong prij, mo i givim ol gudfala advaes we i wok gud. Maet plante long kongregesen oli save jenisim program blong olgeta blong joen moa long wok blong prij long wik ya. Maet oli save mekem wok blong haftaem paenia long manis we eria elda i visitim kongregesen. Olgeta we oli wantem joen blong wok wetem hem o woman blong hem, oli save putum nem blong olgeta. Yu save lanem plante samting taem yu tekem eria elda o woman blong hem long Baebol stadi o long sam visit blong yu. I gud yu traehad fulwan blong sapotem wok blong prij long wik we hem i visitim kongregesen.—Prov. 27:17.

⁴⁹ Evri yia, i gat tu smol asembli, mo eria elda i mas meksua se evri samting i rongud. Eria elda bambae i putumap wan elda blong lukaot long asembli mo wan narafala elda blong givhan long hem. Tufala i mas wok wetem hem blong mekem se asembli i rongud. Samting ya bambae i mekem se eria elda i gat taem blong tingting moa long program blong asembli. Mo eria elda i jusum sam narafala brata tu, we oli naf blong lukaot long ol defdefren wok long asembli. Mo tu, hem i mekem plan blong wan brata i jekem ol kaon blong eria afta long asembli. Wan brata we branj ofis i sanem bambae i kam long wan long tufala asembli ya evri yia, blong givim sam tok. Long sam eria we oli bigwan tumas o haos asembli i smol, oli seraotem eria long tu grup, mo oli mekem tu smol asembli.

⁵⁰ Long en blong manis, eria elda i sanem ripot blong prij blong hem i go stret long branj ofis. Mo tu, sipos kongregesen i no givimbak smol mane we hem i spenem blong pem pasis blong hem wetem kakae mo ples blong slip, mo sam narafala samting we hem i nidim blong mekem wok blong hem, hem i save sanem ol kaon ya long branj ofis. Ol eria elda oli bilif long promes blong Jisas se, bambae oli kasem ol samting we oli nidim long saed blong bodi, sipos oli mekem wok blong Kingdom blong Jehova fastaem. (Luk 12:31) Olgeta long kongregesen oli mas tingbaot se i wan bigfala blesing blong tekem elda ya we i wok had, i kam long haos blong olgeta.—3 Jon 5-8.

BRANJ KOMITI

⁵¹ Long ol branj ofis blong ol Witnes blong Jehova, i gat Branj Komiti. Hemia tri brata, o maet i bitim tri, we oli bigman long ol Kristin fasin, mo oli nafgud blong lukaot long wok blong prij long kantri we branj ofis i stap long hem o long sam narafala kantri we branj ofis ya i lukaot long olgeta. Wan long olgeta long Branj Komiti ya, hem i kodineta.

⁵² Olgeta long Branj Komiti oli lukaot long ol kongregesen long teritori blong branj ya. Komiti ya i meksua se gud nius blong Kingdom i goaot long olgeta ples long teritori, mo i mekem plan blong statem ol niufala kongregesen mo eria, long ol ples we i nidim. Branj komiti i lukluk tu long wok blong ol misinari, ol spesel paenia, fultaem paenia mo haftaem paenia. Taem i gat ol smol asembli mo ol bigfala asembli, branj komiti i mekem plan mo i givimaot wok, blong mekem se “olgeta samting oli mas hapen long fasin we i stret mo i folem plan.”—1 Kor. 14:40.

⁵³ Long sam kantri we branj ofis blong narafala kantri i lukaot long olgeta, i gat Kantri Komiti. Hemia i mekem se ol brata oli save lukluk moa long wok we i gohed long ples we Kantri Komiti i stap long hem. Kantri Komiti i lukaot long ol samting long Haos Betel mo ofis, i raetem ol leta mo ripot, mo i lukaot long wok blong prij. Kantri Komiti i wok wetem Branj Komiti blong mekem wok blong Kingdom i gohed gud.

⁵⁴ Hed Kampani i putumap ol brata we oli wok long Branj Komiti mo Kantri Komiti.

BRATA WE HEDKWOTA I SANEM

⁵⁵ Samtaem, Hed Kampani i mekem plan se wan brata we i nafgud i visitim branj ofis blong ol defdefren kantri. Brata we i mekem wok ya, yumi singaot hem se brata we hedkwota i sanem. Wok blong hem i blong leftemap tingting blong olgeta we oli stap long Betel, mo blong givhan long ol Branj Komiti blong oli stretem ol problem. Mo tu, hem i givim ansa long ol kwestin we Branj Komiti i gat long wok blong prij mo mekem disaepol. Brata we hedkwota i sanem i mekem miting wetem sam eria elda mo samtaem wetem ol misinari tu. Long ol miting ya, hem i tokbaot ol problem mo ol samting we oli nidim, mo hem i leftemap tingting blong olgeta blong gohed long wok we i impoten moa, hemia blong talemaot Kingdom mo mekem disaepol.

⁵⁶ Brata we hedkwota i sanem i intres long save blong prij long ol teritori blong branj ofis, mo long wok blong ol kongregesen. Sipos i gat taem, maet hem i visitim ol translesen ofis tu. Taem hem i visitim wan branj ofis, hem i joen long wok blong talemaot Kingdom, olsem we hem i naf blong mekem.

LUKAOT GUD LONG OL SIPSIP BLONG GOD

⁵⁷ Hadwok mo lav blong ol brata ya we oli bigman long ol Kristin fasin, i givhan bigwan long yumi. Sipos yumi gohed blong obei long ol elda we oli stap lukaot long ol sipsip blong God, bambae yumi joengud wetem Hed blong kongregesen, Jisas Kraes. (1 Kor. 16:15-18; Efes. 1:22, 23) From samting ya, spirit blong God i stap long olgeta kongregesen long wol, mo Tok blong God i lidim wok we oli mekem.—Sam 119:105.