Harem Gud Blong Obei Long Olgeta We God i Putumap

SIPOS yumi wantem stap long oganaesesen we i mekem wok blong Jehova, yumi mas obei long Jehova we i King blong heven mo wol. Yumi mas luksave se Pikinini blong hem i Hed blong Kristin kongregesen mo yumi obei long ol narafala tu we oli hed blong yumi. Taem yumi obei long olgeta we God i putumap, samting ya i mekem i gud long yumi evriwan.

² Tingting ya blong obei long olgeta we oli hed, i stap long ol tok we God i talem long garen blong Iden. Yumi ridim tok ya long Jenesis 1:28 mo Jenesis 2:16, 17. Ol animol oli mas obei long man, mo Adam mo Iv tufala i mas obei long God olsem Hed blong tufala, mo mekem samting we hem i wantem. Olsem nao, bambae i gat pis long wol, mo ol samting i no olbaot. Long 1 Korin 11:3, aposol Pol i tokbaot olgeta we oli hed blong yumi, i se: “Mi wantem we yufala i save se Kraes i hed blong man, mo man i hed blong woman, mo God i hed blong Kraes.” Tok ya i soemaot se yumi evriwan i mas obei long narafala we i hed blong yumi. Be Jehova hem wan nomo we i no gat narafala i hed blong hem.

³ Tede, bighaf blong ol man oli no wantem luksave se narafala i hed blong olgeta mo oli no wantem obei. ?From wanem? Trabol ya i stat long garen blong Iden, taem fas papa mo mama blong yumi tufala i no wantem obei long God olsem King blong tufala. (Jen. 3:4, 5) Samting ya i no mekem se tufala i fri moa, be i mekem se tufala i kam slef blong rabis enjel ya Setan. Tufala i mekem se olgeta man oli stap longwe long God. (Kol. 1:21) Tede, bighaf blong ol man oli stap yet aninit long paoa blong Setan.—1 Jon 5:19.

⁴ Taem yumi kasem save long Tok blong God mo yumi mekem i wok long laef blong yumi, yumi naf blong luksave ol trik blong Setan. Taem yumi givim laef blong yumi i go long Jehova mo yumi baptaes olsem wan Witnes, yumi akseptem Jehova blong i rul long laef blong yumi. Yumi agri wetem King Deved we i talem se, Jehova i “hae moa long olgeta ples.” (1 Kron. 29:11) Yumi talem wetem tingting we i stap daon, se: “Yufala i mas save se Jehova i God. Hem nao i mekem yumi, mo yumi blong hem. Yumi ol man blong hem, mo yumi ol sipsip long yad blong hem.” (Sam 100:3) Yumi luksave se Jehova i hae we i hae, mo i stret nomo we yumi obei long evri samting we hem i talem, from we hem nao i mekem yumi. (Rev. 4:11) Yumi, we yumi ol man blong wok blong tru God, yumi folem Jisas Kraes we i obei gud long God.

⁵ ?Ol trabol we Jisas i kasem long wol, i tijim hem long wanem? Hibru 5:8 i talem se: “Nating se hem i pikinini blong God, be hem i lanem fasin blong obei, taem ol samting oli mekem hem i safa.” Yes, Jisas i obei gud long Papa blong hem long heven, mo hem i mekem sem mak taem hem i kasem trabol. Mo tu, hem i no mekem wan samting nating long tingting blong hem nomo, mo tok we hem i talem i no kamaot long prapa tingting blong hem, mo hem i no wantem se ol man oli leftemap hem. (Jon 5:19, 30; 6:38; 7:16-18) Taem hem i stap prij, hem i harem gud tumas blong mekem samting we Papa blong hem i wantem, nating se ol man oli agensem hem mo oli mekem nogud long hem. (Jon 15:20) Oltaem Jisas i obei long God. Jisas “i mekem tingting blong hem i stap daon” blong i obei long God gogo “hem i ded long pos.” I gat plante gudfala samting i kamaot from we Jisas i obei gud long Jehova. Hem i openem rod blong God i sevem ol man, mo God i givim nem long hem we i hae we i hae, mo hem i leftemap nem blong Papa blong hem.—Fil. 2:5-11; Hib. 5:9.

BLONG OBEI LONG GOD, ?YUMI MAS OBEI LONG HU?

⁶ Taem yumi obeigud long God, bambae yumi no wari tumas o kasem plante trabol we ol man oli stap kasem tede. Oltaem Setan i stap lukaot rod blong kakae yumi. Be sipos yumi stanap strong agensem hem, mo yumi putum yumi i stap daon, mo yumi obei long Jehova, bambae Setan i no save kasem yumi.—Mat. 6:10, 13; 1 Pita 5:6-9.

⁷ Long Kristin kongregesen, yumi luksave se Kraes i Hed, mo hem i putumap “gudfala slef we i waes.” From samting ya, yumi toktok gud mo yumi mekem ol gudfala fasin. Sipos yumi respektem olgeta we God i putumap blong lidim kongregesen, bambae yumi wantem obei long Tok blong God long evri haf blong wosip blong yumi. Hemia i min se yumi prij, yumi go long miting mo givim ansa, yumi fren gud wetem ol elda, mo yumi wok folem ol plan we oganaesesen i mekem.—Mat. 24:45-47; 28:19, 20; Hib. 10:24, 25; 13:7, 17.

⁸ Taem yumi obei long God, i gat pis mo yumi harem se yumi stap sef, mo i gat oda insaed long Kristin kongregesen. Ol man we Jehova i rul long olgeta oli soemaot ol nambawan fasin blong hem. (1 Kor. 14:33, 40) King Deved i tokbaot ol man blong Jehova se oli defren long ol rabis man, nao hem i glad blong talem se: “!Ol man we Jehova i God blong olgeta, oli glad!” Yumi we yumi harem gud blong stap long oganaesesen blong Jehova, yumi gat sem tingting olsem Deved.—Sam 144:15.

⁹ Long famle, “man i hed blong woman.” Mo tu, Kraes hem i hed blong man, mo God hem i hed blong Kraes. (1 Kor. 11:3) Woman i mas obei long man blong hem, mo pikinini i mas obei long papa mo mama blong hem. (Efes. 5:22-24; 6:1) Taem evriwan long famle oli respektem hed blong olgeta, i gat pis.

¹⁰ Kraes i hed blong ol man blong hem long fasin we i soemaot lav. Man i mas mekem sem mak long famle blong hem. (Efes. 5:25-29) Hem i no mas yusum paoa blong hem blong spolem famle blong hem, mo i no traem ronwe long wok blong hem olsem hed blong famle. Taem hem i mekem gud wok blong hem, woman mo ol pikinini blong hem oli glad blong obei long hem. God i mekem woman blong i givhan long man blong hem, i prapa fren blong hem. (Jen. 2:18) Taem woman i givhan long man blong hem mo i respektem hem, woman i givim ona long God, mo man blong hem i glad long hem. (1 Pita 3:1-4) Taem ol man mo woman we oli mared oli folem advaes blong Baebol blong obei long hed blong olgeta, oli soemaot rod long ol pikinini blong olgeta blong oli obei long God.

¹¹ Taem yumi obei long God, yumi gat stret tingting long “ol haeman we oli stap rul,” we “oli holem ol defdefren posisen ya from we God i letem.” (Rom 13:1-7) Ol Kristin oli obei long loa mo oli pem takis. “Ol samting we oli blong Sisa, yufala i givimbak long Sisa, mo ol samting we oli blong God, yufala i givimbak long God.” (Mat. 22:21) Mo tu, ol plan blong wokem teritori oli mas laenap wetem ol loa we oli protektem man, blong yumi no givimaot save long saed blong hem. Yumi obei long gavman long evri samting we i no agensem loa blong Jehova, mo yumi wok strong long wok blong prij.—Mak 13:10; Wok 5:29.

¹² Long evri haf blong laef blong yumi, yumi mas obei long olgeta we Jehova i putumap. From we yumi gat strong bilif, yumi stap wet nomo long taem ya we olgeta man bambae oli obei long Jehova God. (1 Kor. 15:27, 28) !Jehova i glad long olgeta we oli luksave se hem i gat raet blong rul long olgeta mo oli obei long hem, mo bambae hem i blesem olgeta gogo i no save finis!