Sam Moa Save

Tok i Go Long Papa Mo Mama:

Sipos yu wan papa o mama, yu wantem tumas blong halpem ol pikinini blong yu blong oli lavem Jehova mo oli givim laef blong olgeta i go long hem. ?Yu save mekem wanem blong givhan long olgeta blong oli kasem mak ya blong baptaes? ?Wetaem nao, bambae oli rere blong mekem impoten desisen ya?

Jisas i talem long ol man blong hem se: “Yufala i mas go long ol man long olgeta nesen, yufala i pulum olgeta oli kam disaepol blong mi, mo yufala i baptaesem olgeta.” (Mat. 28:19) Folem tok ya, stamba risen from wanem yumi baptaes, hemia blong kam wan disaepol we i kasemsave ol tijing blong Jisas mo i bilif long olgeta. Be i no hemia nomo, yumi mas folem gud ol tijing ya tu. Hemia wan samting we ol yangfala tu oli save mekem.

Yu mas soemaot gudfala eksampol long ol pikinini blong yu, mo yu mas traehad blong mekem se ol tijing blong Jehova oli kasem hat blong olgeta. (Dut. 6:6-9) Blong mekem olsem, yu mas yusum ol save we oli stap long buk ya !Enjoem Laef Olwe! Olsem nao, bambae oli lanem ol stamba tijing blong Baebol, mo bambae oli tingting gud long ol rul blong Baebol mo folem olgeta taem oli mekem prapa desisen blong olgeta. Yu mas givhan long olgeta blong oli naf blong eksplenem bilif blong olgeta long prapa tok blong olgeta. (1 Pita 3:15) Ol pikinini bambae oli kasem mak ya blong baptaes mo gohed long trutok taem oli folem, ol advaes we yu givim long olgeta, ol save we oli lanem long prapa Baebol stadi blong olgeta, long famle wosip, long ol miting, mo taem oli joen wetem ol gudfala fren. Oltaem yu mas tokbaot ol samting we oli save mekem blong kam klosap moa long Jehova.

Ol Proveb 20:11 i talem se: “Nating se wan smol pikinini nomo, be ol aksen blong hem oli soemaot se hem i olsem wanem, oli save soemaot sipos ol fasin blong hem oli klin mo stret.” ?Wanem i soemaot se wan pikinini i kam wan disaepol blong Jisas Kraes, mo i rere blong baptaes?

Wan pikinini we i stap traehad blong kasem mak blong baptaes, hem i mas obei long papa mo mama blong hem. (Wok 5:29, Kol. 3:20) Baebol i talem se taem Jisas i gat 12 yia, “hem i gohed blong putum hem i stap aninit long [papa mo mama blong hem].” (Luk 2:51) I tru se pikinini blong yu i no stret gud olgeta olsem Jisas. Be pikinini we i wantem tumas blong baptaes, bambae i traehad blong folem eksampol blong Jisas. Mo tu, ol narafala bambae oli luksave se oltaem hem i obei long papa mo mama blong hem.

Mo tu, pikinini ya bambae i soemaot se hem i wantem tumas blong lanem ol trutok blong Baebol. (Luk 2:46) ?Olsem wanem? ?Pikinini blong yu i laekem blong go long ol miting mo givim ansa? (Sam 122:1) ?Hem i laekem blong mekem Baebol riding mo stadi Baebol?—Mat. 4:4.

Pikinini we i wantem baptaes, bambae i traehad blong putum Kingdom long fasples oltaem. (Mat. 6:33) Hem i luksave se hem i mas talemaot bilif blong hem long ol narafala. Hem i joen long evri haf blong wok blong prij. Hem i no sem blong talem long tija mo long ol fren blong hem long skul se hem i wan Witnes blong Jehova. Hem i mekem gud ol tok blong hem long Miting Blong Kristin Wok Mo Laef.

Mo tu, bambae hem i no joen wetem ol rabis fren. Hem i no wantem se oli spolem ol gudfala fasin blong hem. (Prov. 13:20; 1 Kor. 15:33) Hem i soemaot samting ya long ol miusik we hem i lesin long hem, ol muvi we hem i wajem, ol program long televisin, ol video gem, mo hem i lukaot gud long fasin blong hem blong yusum Intenet.

Plante papa mo mama oli traehad blong givhan long ol pikinini blong olgeta, mo wok blong olgeta i karem gudfala frut. Plante pikinini oli bilif strong long trutok, mo oli baptaes taem oli yangfala nomo. Jehova bambae i blesem yufala ol papa mo mama, taem yufala i stap givhan long ol pikinini blong yufala blong oli kasem nambawan mak ya blong fren gud wetem Jehova.

Tok i Go Long Pablisa We i No Baptaes:

!I wan blesing blong stap olsem wan pablisa we i no baptaes insaed long kongregesen! Mifala i glad tumas we yu gohed gud long wok blong God. Yu stadi Baebol blong save gud God, mo yu soemaot se yu bilif long ol promes blong hem.—Jon 17:3; Hib. 11:6.

Bifo we yu stat blong stadi Baebol wetem ol Witnes blong Jehova, maet yu bin joen long wan skul, o maet yu no joen nating long wan skul. Maet yu mekem sam samting we oli no laenap wetem ol tok blong Baebol. Be yu soemaot se yu bilif taem yu tanem tingting blong yu from ol sin blong yu. Hemia i min se yu sakemaot ol rabis fasin we yu mekem bifo, mo yu gat strong tingting blong mekem samting we i stret long fes blong God.—Wok 3:19.

Maet yu savegud ol tabu tok blong Baebol “stat taem yu bebi.” From samting ya, yu yu stap longwe long ol rabis fasin. (2 Tim. 3:15) Yu lanem blong stanap strong taem ol fren blong yu oli traem pulum yu blong mekem wan samting we i no stret long fes blong Jehova. Yu soemaot se yu bilif, taem yu sapotem tru wosip mo yu talemaot bilif blong yu long ol narafala. Yu kasem trening long wok blong prij. Ale naoia, yu mekem wok blong Jehova olsem wan pablisa we i no baptaes.

Nomata se yu lanem trutok taem yu bigman finis o taem yu pikinini nomo, maet naoia yu stap tingbaot blong kasem tufala mak ya, hemia blong givim laef i go long Jehova mo baptaes. Yu givim laef blong yu long Jehova, taem yu prea long hem mo yu talemaot se bambae yu wosipim hem nomo blong olwe. (Mat. 16:24) Blong soemaot se yu givim laef blong yu long Jehova, yu baptaes long wota. (Mat. 28:19, 20) Taem yu givim laef blong yu long Jehova mo yu baptaes, yu kam wan man blong Jehova God. !Hemia wan nambawan blesing!

Taem yu stadi Baebol, yu lanem se bambae yu kasem sam trabol. Yu traem tingbaot Jisas. Jes afta we hem i baptaes, “spirit i lidim Jisas i go long draeples, blong Devel i traem hem.” (Mat. 4:1) Long sem fasin, taem yu baptaes blong kam wan disaepol blong Jisas, yu tu yu save kasem sam trabol. (Jon 15:20) Ol trabol ya oli defdefren. Samtaem, ol famle oli agensem yu. (Mat. 10:36) Maet ol fren long skul, ol fren long wok, o sam narafala man we yu stap joen wetem olgeta bifo, oli jikim yu. Be oltaem yu mas tingbaot ol tok blong Jisas long Mak 10:29, 30, we i talem se: “Tru mi talem long yufala, man we i lego haos, o brata, o sista, o mama, o papa, o pikinini, o graon blong hem from mi mo from gud nius, bambae hem i kasem haos, brata, sista, mama, pikinini, no graon 100 taem antap bakegen naoia, mo ol man bambae oli ronem mo kilim hem tu. Mo long sistem blong wol we i stap kam, bambae hem i kasem laef we i no save finis.” Taswe, yu mas wok had oltaem blong stap klosap long Jehova mo obei long ol loa blong hem.

Taem yu wantem baptaes, yu mas talemaot long kodineta blong ol elda. Ol elda bambae oli yusum ol kwestin we oli kam biaen, blong storian wetem yu mo blong luk sipos yu yu naf blong baptaes. I gud yu stat blong ridim ol kwestin ya yu wan, taem yu mekem prapa Baebol stadi blong yu.

Blong reregud from ol storian ya, yu mas tekem taem blong ridim mo tingting gud long ol vas we oli stap. Maet yu wantem raetem sam smol not long buk ya o long wan narafala ples. Yu save yusum ol not ya, mo buk ya tu, long taem we yu storian wetem ol elda. Sipos yu no kasem save long sam kwestin, yu no mas fraet blong askem long brata o sista we i mekem stadi blong yu, o yu askem long ol elda.

Taem yu storian wetem ol elda, i no nid blong yu givim wan longfala ansa long ol kwestin. I moagud yu givim wan isi, stret ansa, long prapa toktok blong yu. Mo tu, i gud yu tokbaot wan o tu vas blong Baebol we ansa blong yu i stanap long hem.

Sipos ol elda oli luk se yu no gat naf save yet long ol stamba tijing blong Baebol, bambae oli mekem plan wetem wan brata o sista, blong i givhan moa long yu. Olsem nao, bambae yu save eksplenem ol stret save blong Baebol long prapa toktok blong yu, nao bambae yu naf blong baptaes samtaem long fiuja.

[Tok i go long ol elda: Ol tok blong talem mo ol kwestin blong askem long olgeta we oli wantem baptaes oli stap long pej 208-212.]