Baptaes i Wan Impoten Mak

Jisas i tijim se olgeta Kristin oli mas baptaes. (Ridim Matiu 28:19, 20.) ?Be baptaes i minim wanem? ?Mo man i mas mekem wanem blong kasem mak ya?

1. ?Oli baptaes olsem wanem?

Tok ya “baptaes” i kam long wan Grik tok we i minim “draonem” aninit long wota. Taem Jisas i baptaes, bodi blong hem i draon fulwan long Jodan Reva, mo biaen hem i “kamaot long wota.” (Mak 1:9, 10) Sem mak, wan tru Kristin i baptaes taem bodi blong hem i draon fulwan long wota.

2. ?Baptaes i soem wanem?

Taem man i baptaes, hem i soem se hem i bin givim laef blong hem long Jehova God. ?Hem i givim laef blong hem olsem wanem? Bifo we hem i baptaes, hem i prea long Jehova mo talemaot se hem i wantem mekem wok blong Hem blong olwe. Hem i promes se bambae hem i wosipim Jehova nomo mo bambae hem i mekem wok blong Jehova i stap fasples long laef blong hem. Hem i jusum blong “blokem ol samting we hem nomo i wantem . . . mo hem i mas folem” eksampol mo ol tijing blong Jisas oltaem. (Matiu 16:24) Taem hem i givim laef blong hem mo i baptaes, hemia i openem rod blong kam fren blong Jehova mo ol man blong Hem.

3. ?Wan man i mas mekem wanem blong i save baptaes?

Bifo we wan man i baptaes, hem i mas savegud Jehova mo bilif strong long hem. (Ridim Hibru 11:6.) Sipos save mo bilif blong yu i kam bigwan moa, bambae yu lavem Jehova moa. Nao bambae yu wantem tokbaot hem mo folem ol loa blong hem. (2 Timoti 4:2; 1 Jon 5:3) Taem fasin blong man i “stret olsem we Jehova i wantem, blong mekem hem i glad” bambae man ya i wantem blong givim laef blong hem long God mo baptaes.—Kolosi 1:9, 10.a

DIGIM MOA

4. Baptaes blong Jisas i tijim yumi

Ridim Matiu 3:13-17 blong save moa long saed blong baptaes blong Jisas. Biaen tokbaot ol kwestin ya:

• ?Jisas i baptaes taem hem i wan bebi nomo?

• ?Hem i baptaes olsem wanem, oli saksakem smol wota nomo long hem?

Jisas i statem spesel wok we God i givim long hem, taem hem i baptaes. Ridim Luk 3:21-23 mo Jon 6:38, mo tokbaot kwestin ya:

• ?Wanem wok i kam fasples long laef blong Jisas, afta we hem i baptaes?

5. Yu yu naf blong kasem mak ya blong baptaes

Fastaem, maet yu fraet blong givim laef blong yu mo baptaes. Be taem yu gohed moa bambae yu harem se yu naf blong tekem impoten desisen ya. Blong luk sam man we oli mekem olsem, plei VIDEO.

VIDEO: Kam Wan Fren Blong Jehova (1:11)

Ridim Jon 17:3 mo Jemes 1:5, mo tokbaot kwestin ya:

• ?Olsem wanem wan i save rere blong baptaes?

1. Mifala i givim laef long Jehova, taem mifala i prea se mifala i wantem mekem wok blong hem blong olwe

2. Taem mifala i baptaes, hemia i soemaot long ol man se mifala i givim laef blong mifala long God

6. Taem yumi baptaes yumi joen long famle blong Jehova

Taem yumi baptaes, yumi joen long wan bigfala famle blong Jehova long fulwol. Evri Witnes blong Jehova we oli baptaes, oli gat sem bilif mo oli folem sem rul blong Baebol, nomata wanem ples we oli kamaot long hem o bakgraon blong olgeta. Ridim Ol Sam 25:14 mo 1 Pita 2:17, mo tokbaot kwestin ya:

• ?Baptaes i mekem frensip blong yu wetem Jehova mo ol man blong Hem i kam olsem wanem?

SAMARI

Jisas i tijim se ol Kristin oli mas baptaes. Blong kasem mak ya, man i mas bilif strong long Jehova, folem ol rul blong hem mo givim laef blong hem long Jehova.

Tingtingbak

• ?Oli baptaes olsem wanem? ?From wanem i impoten blong mekem olsem?

• ?Baptaes i soemaot wanem?

• ?Man i mas mekem wanem bifo we i givim laef blong hem long Jehova mo baptaes?

FAENEMAOT

Lanem se baptaes i minim wanem mo i no minim wanem.

“?Wanem Ya Baptaes?” (Web atikol)

Tingbaot ol samting we man i save mekem blong i kasem baptaes

“Lav Mo Tangkiu Bambae i Pulum Yu Blong Baptaes” (Wajtaoa, Maj 2020)

Ridim stori blong wan man we i tekem desisen blong baptaes, i no from filing blong hem nomo.

“Tufala i Wantem Se Mi Wan Mi Luksave Trutok” (Wajtaoa, 1 Eprel 2013)

Faenemaot olsem wanem baptaes i wan impoten mak blong kasem mo olsem wanem yu save rere from.

“Should I Get Baptized?” (Questions Young People Ask—Answers That Work, Volium 2, japta 37)