Haf 1: Ol Bilif Blong Ol Kristin

Taem yu stadi Baebol wetem ol Witnes blong Jehova, yu kasem save long trutok. Ol save we yu kasem i mekem yu yu fren gud wetem God, mo yu putum tingting blong yu long ol promes blong God long fiuja. Promes ya, hemia blong kasem laef mo ol blesing long paradaes long wol ya, aninit long rul blong Kingdom blong God. Bilif blong yu long Tok blong God i kam strong moa, mo yu kasem plante blesing taem yu joen long Kristin kongregesen. Yu kasem save tu long ol samting we Jehova i stap mekem long ol man blong hem tede.—Sek. 8:23.

Naioa we yu rere blong baptaes, i gud yu storian wetem ol elda blong kongregesen, blong tokbaot ol bilif blong ol Kristin. (Hib. 6:1-3) Bambae Jehova i gohed blong blesem yu taem yu traehad blong save hem, mo bambae i givim laef long yu, olsem hem i promes blong givim.—Jon 17:3.

1. ?From wanem yu yu wantem baptaes?

2. ?Hu ya Jehova?

• “Jehova nao i trufala God blong heven mo wol, mo i no gat wan narafala God bakegen.”—Dut. 4:39.

• “Yu, we nem blong yu Jehova, yu nomo yu Hae God long fulwol.”—Sam 83:18.

3. ?From wanem i impoten blong yusum prapa nem blong God?

• “Taswe yufala i mas prea olsem: ‘Papa blong mifala long heven, plis yu mekem we nem blong yu i tabu.’”—Mat. 6:9.

• “Olgeta man we oli singaot long nem blong Jehova, bambae oli sef.”—Rom 10:13.

4. ?Baebol i talem wanem long saed blong Jehova?

• “Jehova, God Ya We i Wokem wol stat long narasaed blong hem i go kasem narasaed, hem i God ya we i stap oltaem gogo i no save finis.”—Aes. 40:28.

• “Papa blong mifala long heven.”—Mat. 6:9.

• “God hem i lav.”—1 Jon 4:8.

5. ?Yu save givim wanem long Jehova God?

• “Yu mas lavem Jehova we i God blong yu, long olgeta hat blong yu mo long olgeta sol blong yu mo long olgeta tingting blong yu mo long olgeta paoa blong yu.”—Mak 12:30.

• “Yu mas mekem wosip long Jehova nomo we i God blong yu, mo yu mas mekem tabu wok blong hem nomo.”—Luk 4:8.

6. ?From wanem i gud yu holemstrong long Jehova?

• “Boe blong mi, yu mas kam waes mo mekem hat blong mi i glad, olsem nao, mi save ansa long man ya we i stap tok nogud long mi.”—Prov. 27:11.

7. ?Yu yu stap prea long hu mo long nem blong hu?

• “Tru mi talem long yufala, sipos yufala i askem long Papa eni samting long nem blong mi [Jisas], bambae hem i givim long yufala.”—Jon 16:23.

8. ?Yu save prea from wanem samting?

• “Yufala i mas prea olsem: ‘Papa blong mifala long heven, plis yu mekem we nem blong yu i tabu. Yu mekem Kingdom blong yu i kam. Yu mekem wil blong yu i kamtru long wol ya olsem long heven. Plis yu givim bred long mifala tede, we i naf blong tede, mo yu fogivim ol kaon blong mifala, olsem we mifala i stap fogivim ol narafala we oli gat kaon long mifala. Mo yu no letem ol samting oli kam traem mifala, be yu tekemaot mifala long man ya we i rabis.’”—Mat. 6:9-13.

• “Yumi save trastem hem, se nomata wanem samting yumi askem long hem, mo sipos i laenap wetem wil blong hem, hem i harem yumi.”—1 Jon 5:14.

9. ?From wanem Jehova i no lesin long prea blong sam man?

• “Bambae oli singaot i go long Jehova from help, be bambae hem i no ansa long olgeta . . . from ol rabis wok blong olgeta.”—Maeka 3:4.

• “Ae blong Jehova i stap long ol stret man, mo sora blong hem i stap lesin long olgeta taem oli prea strong i go long hem. Be Jehova i tanem fes blong hem long olgeta we oli stap mekem ol samting we i nogud.”—1 Pita 3:12.

10. ?Hu ya Jisas Kraes?

• “Saemon Pita i ansa se: ‘Yu yu Kraes ya we i Pikinini blong God ya we i laef i stap.’”—Mat. 16:16.

11. ?From wanem Jisas i kam long wol?

• “Pikinini blong man i no kam blong ol man oli mekem minista wok blong givhan long hem, be hem i kam blong mekem minista wok blong givhan long olgeta mo blong givim laef blong hem olsem wan ransom, blong pembak plante man oli go fri.”—Mat. 20:28.

• “Mi [Jisas] mi mas talemaot gud nius blong Kingdom blong God long ol narafala taon tu, from we hemia nao samting we God i sanem mi blong mi mekem.”—Luk 4:43.

12. ?Olsem wanem yu save talem tangkiu from sakrefaes blong Jisas?

• “Hem i ded long bihaf blong evri man, mekem se olgeta we oli laef, oli no moa laef blong mekem samting we olgeta nomo oli wantem, be blong mekem samting we man ya we i ded mo i laef bakegen, i wantem.”—2 Kor. 5:15.

13. ?Jisas i gat wanem posisen?

• “God i givim paoa long mi long olgeta samting long heven mo long wol.”—Mat. 28:18.

• “God i leftemap hem, i givim wan posisen long hem we i hae, mo from we hem i kaen, hem i givim nem long hem we i hae moa long ol narafala nem.”—Fil. 2:9.

14. ?Yu yu bilif se Hed Kampani blong ol Witnes blong Jehova, hem i “gudfala slef we i waes” we Jisas i putumap?

• “?Hu ya gudfala slef we i waes, we masta blong hem i putumap hem blong i lukaot long ol narafala man blong hem, blong i givim kakae long olgeta long stret taem blong hem?”—Mat. 24:45.

15. ?Tabu spirit hem i wan man?

• “Nao enjel ya i ansa long hem se: ‘Tabu spirit bambae i kam long yu, mo paoa blong Hae God bambae i kavremap yu olsem wan sado. From samting ya, bambae oli talem se pikinini ya we i bon, hem i tabu, i Pikinini blong God.’”—Luk 1:35.

• “Sipos yufala ol man nogud, yufala i save givim ol gudfala presen long ol pikinini blong yufala, !be Papa blong yufala long heven, hem i save go moa, bambae hem i givim tabu spirit long olgeta we oli stap askem long hem!”—Luk 11:13.

16. ?Jehova i yusum tabu spirit blong hem blong mekem wanem?

• “Jehova i mekem heven long tok blong hem nomo, mo from spirit blong maot blong hem, hem i mekem evri samting we i stap long hem.”—Sam 33:6.

• “Taem tabu spirit i kam long yufala, bambae yufala i gat paoa nao yufala i witnes blong mi long . . . olgeta ples long wol.”—Wok 1:8.

• “I no gat wan profet tok long Baebol we i kamaot from prapa tingting blong man nomo. I no gat wan taem we profet tok i kamaot from we man nomo i wantem. Taem tok blong profet i kamaot, ol profet oli talem, be tabu spirit i putum tok ya long tingting blong olgeta, nao oli talemaot tok we i kamaot long God.”—2 Pita 1:20, 21.

17. ?Wanem ya Kingdom blong God?

• “God blong heven bambae i stanemap wan kingdom we bambae i neva foldaon. Mo kingdom ya bambae i no go long han blong wan narafala man. Bambae hem i smasem mo i finisim olgeta kingdom ya, mo hem nomo bambae i stanap olwe.”—Dan. 2:44.

18. ?Kingdom blong God bambae i givhan olsem wanem long yu?

• “Hem bambae i ravemaot wota blong ae blong olgeta, mo bambae i no moa gat man i ded, mo bambae man i no moa sore, mo bambae i no moa gat man i krae, mo bambae man i no moa harem nogud long bodi blong hem. Ol samting ya blong bifo oli lus olgeta.”—Rev. 21:4.

19. ?Olsem wanem yu save se ol blesing blong Kingdom bambae oli kamtru i no longtaem?

• “Ol disaepol oli kam long hem, oli talem se: ‘Yu talem long mifala, ?ol samting ya bambae oli hapen wetaem? ?Mo wanem saen bambae i soemaot se yu yu stap, mo se hem i lashaf blong sistem blong wol ya?’ Jisas i ansa long olgeta i se: ‘. . . Bambae ol nesen oli faet agensem ol narafala nesen, mo ol kingdom oli faet agensem ol narafala kingdom. Mo olbaot long wol bambae kakae i sot mo graon i seksek. Mo ol man bambae oli talemaot gud nius ya blong Kingdom long olgeta ples long wol, blong oli witnes long olgeta nesen, nao biaen en bambae i kam.’”—Mat. 24:3, 4, 7, 14.

• “Long ol las dei, laef bambae i strong tumas mo bambae i had blong winim ol trabol. Bambae ol man oli tingbaot olgeta nomo, oli laekem mane tumas, oli tok flas, tingting blong olgeta i go antap tumas, oli tok nogud long ol narafala, oli no obei long papa mo mama blong olgeta, oli no gat tangkiu, mo oli no holemstrong long ol narafala, oli no gat lav, oli no save agri long wan tingting, oli spolem nem blong narafala, oli no save bos long tingting, oli wael olgeta, mo oli no laekem ol gudfala fasin. Bambae oli putum ol fren blong olgeta long han blong ol enemi, oli stronghed, oli flas gogo tingting blong olgeta i go antap tumas, oli laekem ol samting we oli save harem gud long hem, bitim we oli lavem God. Long fes blong ol man, bambae oli mekem olsem se oli ona long God, be oli no wantem paoa blong hem long laef blong olgeta.”—2 Tim. 3:1-5.

20. ?Yu mas mekem wanem sipos Kingdom i impoten long yu?

• “Yufala i mas gohed blong lukaot Kingdom mo stret fasin blong hem fastaem.”—Mat. 6:33.

• “Jisas i talem long ol disaepol blong hem se: ‘Sipos eni man i wantem kam biaen long mi, hem i mas blokem ol samting we hem nomo i wantem mo i mas karem pos blong hem, mo hem i mas folem mi oltaem.’”—Mat. 16:24.

21. ?Setan mo ol rabis enjel oli hu?

• “Yufala i kamaot long papa blong yufala Devel . . . Stat bifo olgeta, hem i man blong kilim man i ded.”—Jon 8:44.

• “Oli slingim hem i kamdaon long wol. Bigfala algita ya, hem i snek ya blong bifo we oli singaot hem se Devel mo Setan, hem i stap lidim olgeta man long wol oli go krangke. Ol enjel blong hem tu, oli slingim olgeta oli kamdaon.”—Rev. 12:9.

22. ?Setan i sakem wanem nogud tok agensem Jehova mo ol man we oli wosipim Hem?

• “Woman ya i talem long snek ya se: “Mitufala i save kakae frut blong ol tri we oli stap long garen ya. Be tri ya nomo we i stap long medel blong garen ya, God i talem se: ‘Yutufala i no mas kakae frut blong hem, mo yutufala i no mas tajem, sipos no bambae yutufala i ded.’” Be snek ya i talem long woman ya se: ‘Bambae yutufala i no ded. From we God i save se long dei ya we yutufala i kakae frut ya, ae blong yutufala bambae i open, mo bambae yutufala i kam olsem God, yutufala i save samting we i gud mo samting we i nogud.’”—Jen. 3:2-5.

• “Setan i ansa long Jehova se: ‘Skin i pembak skin. Bambae man i lego evri samting we hem i gat blong sevem laef blong hem.’”—Job 2:4.

23. ?Olsem wanem yu save pruvum se ol tok blong Setan i giaman?

• “Yu mekem wok blong [God] long fulhat blong yu.”—1 Kron. 28:9.

• “!Go kasem we mi ded, bambae mi no lego fasin blong mi blong holemstrong long God!”—Job 27:5.

24. ?From wanem man i ded?

• “Wan man nomo i mekem se sin i kam long wol, mo ded i kamaot from sin. Mo ded i kasem olgeta man from we olgeta evriwan oli mekem sin.”—Rom 5:12.

25. ?Man we i ded finis i save mekem sam samting?

• “Ol man we oli laef yet oli save se bambae oli ded, be ol dedman oli no moa save wan samting nating.”—Pri. 9:5.

26. ?Wanem fiuja blong ol man we oli ded?

• “Ol man we oli stret wetem ol man we oli no stret bambae oli laef bakegen.”—Wok 24:15.

27. ?Hamas man oli mas rul wetem Jisas long heven?

• “Mi luk Smol Sipsip i stap stanap long Hil Ya Saeon, mo i gat 144,000 man oli stap wetem hem. Ol man ya oli gat nem blong hem wetem nem blong Papa blong hem long fored blong olgeta.”—Rev. 14:1.