LESEN 06
?Laef i Stat Olsem Wanem?
“[God] nao [i] stamba blong laef.” (Ol Sam 36:9) ?Yu yu bilivim tok ya? Sam man oli ting se laef i kamaot olsem nomo, i no gat man i wokem. Sipos i tru, hemia i min se yumi laef from aksiden nomo. Be sipos laef i kamaot long Jehova, ?yu no ting se i mas gat wan risen?a Tingbaot stori we Baebol i talem long saed blong stat blong laef, mo from wanem i stret blong bilivim.
1. ?Yunives i stat olsem wanem?
Baebol i talem se: “Long stat God i mekem heven mo wol.” (Jenesis 1:1) Plante saentis oli agri se yunives i gat stat blong hem. ?Olsem wanem God i krietem? Hem i yusum “paoa” blong hem, hemia tabu spirit, blong mekem evri samting long yunives, olsem ol galaksi, ol sta, mo ol planet.—Jenesis 1:2.
2. ?From wanem God i krietem wol?
Jehova “i no mekem [wol] blong i stap nating nomo, be i wokem blong man i stap long hem.” (Aesea 45:18) Hem i mekem planet ya blong i kam wan gudfala hom blong ol man oli stap long hem blong olwe. (Ridim Aesea 40:28; 42:5.) Sayens i soem se i no gat wan narafala planet we i olsem wol. Hem nomo we oli faenemaot se man i save laef long hem.
3. ?Wanem i mekem se man i defren long animol?
Afta we Jehova i mekem wol, hem i wokem ol laef samting long hem. Fastaem, hem i fulumap wol ya long ol plant mo animol. Biaen, “God i gohed, i mekem man long pija blong hem.” (Ridim Jenesis 1:27.) ?Wanem i mekem se man i spesel? From we God i wokem yumi long pija blong hem, yumi save soemaot ol gudfala fasin blong hem, olsem lav mo jastis. Mo tu, hem i mekem se yumi naf blong lanem ol lanwis, laekem ol naesfala samting, mo enjoem miusik. Mo yumi defren long ol animol, yumi save wosipim Krieta blong yumi.
DIGIM MOA
Tingbaot ol pruf we oli soem se God i disaenem ol laef samting, mo se stori blong kriesen long Baebol i stret nomo. Faenemaot olsem wanem ol gudfala fasin blong man oli save tijim yumi long saed blong God.
4. God i disaenem ol laef samting
Ol man oli presem sam man from ol disaen we oli kopi long ol laef samting raonabaot long yumi. ?So ol man oli mas presem hu from ol orijinol disaen? Plei VIDEO, mo tokbaot kwestin ya.
?Wanem ol laef samting we ol man blong disaen oli kopi?
Evri haos i gat man we i disaenem mo wokem. ?Be hu i disaenem mo wokem ol laef samting? Ridim Hibru 3:4, mo tokbaot ol kwestin ya:
?Wanem disaen long kriesen we yu yu laekem moa?
?Yu ting se i stret blong bilif se God i disaenem yunives wetem evri samting long hem? ?From wanem?
?Yu yu save?
Blong faenem moa long topik ya, go long jw.org, long ol haf ya we oli kamaot oltaem “?I Gat Wan Man We i Wokem Samting Ya?” mo “Tingting Blong Ol Narafala Long Stamba Blong Laef.”
“Yes i tru, evri haos i gat man we i wokem, be God i wokem olgeta samting we i stap”
5. Stori blong kriesen long Baebol i stret nomo
Long Jenesis japta 1, Baebol i tokbaot olsem wanem wol mo laef i stat. ?Yu save bilivim stori ya, o i wan giaman stori nomo? Plei VIDEO, mo tokbaot ol kwestin ya.
?Baebol i tijim se God i wokem wol mo ol laef samting long sikis dei blong 24 aoa nomo?
?Yu ting se i stret blong bilivim stori ya blong kriesen? ?From wanem yu ansa olsem?
Ridim Jenesis 1:1, mo tokbaot kwestin ya:
Ol saentis oli talem se yunives i gat stat blong hem. ?Taem yu skelem tingting blong olgeta wetem samting we yu ridim long Baebol, yu luk wanem?
Sam man oli stap askem sipos God i yusum evolusen blong krietem ol laef samting. Ridim Jenesis 1:21, 25, 27, mo tokbaot ol kwestin ya:
?Baebol i tijim se God i wokem wan smol laef samting, afta samting ya i jenis i kam fis, animol, mo man? ?O hem i krietem evri defdefren “kaen” laef samting?b
6. Man i wan spesel kriesen blong God
Yumi no sem mak long ol animol we Jehova i krietem. Ridim Jenesis 1:26, mo tokbaot kwestin ya:
From we God i wokem yumi long pija blong hem, ?fasin blong yumi blong soem lav mo sore i soem se God i gat wanem fasin?
SAM MAN OLI SE: “Stori blong kriesen long Baebol i wan giaman stori.”
?Wanem tingting blong yu? ?From wanem yu ansa olsem?
SAMARI
Jehova i krietem yunives mo olgeta laef samting.
Tingtingbak
?Baebol i talem se yunives i stat olsem wanem?
?God i letem wan smol laef samting i jenis i kam ol defdefren kaen laef, o hem i krietem olgeta wanwan?
?Wanem i spesel long saed blong man?
FAENEMAOT
Faenemaot ol disaen we oli ol kopi blong ol laef samting.
Luk olsem wanem wan papa i eksplenem stori blong kriesen long smol boe blong hem.
Traem luk sipos tijing blong evolusen i stret wetem Baebol.
“?God i Yusum Evolusen Blong Krietem Ol Defren Kaen Laef Samting?” (Web atikol)
Jekem sipos ol bun blong bifo mo ol tes we ol man blong sayens oli stap mekem, oli soem se God i krietem ol laef samting, o oli kamaot olsem nomo.
b Long Baebol, tok ya “kaen” i minim wan bigfala grup blong ol laef samting.