LESEN 25
?From Wanem God i Wokem Yumi?
Baebol i talem se man i ‘laef sot taem nomo mo i kasem fulap trabol.’ (Job 14:1) ?God i wantem se laef i olsem? ?Sipos no, wanem plan blong hem? ?Plan ya bambae i kamtru? Bambae yu glad long ansa we Baebol i givim.
1. ?Jehova i wantem se yumi gat wanem kaen laef?
Jehova i wantem se yumi gat wan gudfala laef. Taem hem i wokem tufala faswan man, Adam mo Iv, hem i putum tufala long wan naesfala paradaes, hemia garen blong Iden. Biaen “God i blesem [tufala], mo i talem se: ‘Yufala i mas gat ol pikinini mo yufala i kam plante mo fulumap wol, mo mekem ol samting long wol ya oli stap aninit long han blong yufala.’” (Jenesis 1:28) Jehova i wantem se tufala i gat ol pikinini, mekem fulwol i kam wan paradaes, mo lukaotgud long ol animol. Stamba plan blong hem, i blong olgeta man oli helti mo enjoem laef olwe.
Nating se laef i no olsem tede,a be stamba plan o tingting blong God i no jenis. (Aesea 46:10, 11) Hem i wantem se ol gudfala man oli laef olwe long wan naesfala ples.—Ridim Revelesen 21:3, 4.
2. ?Yumi mas mekem wanem blong harem gud long laef tede?
Jehova i wokem yumi long fasin we yumi “nidim [Hem] long laef” blong yumi, taswe yumi gat filing ya blong wantem save God mo wosipim hem. (Ridim Matiu 5:3-6.) Hem i wantem se yumi fren gud wetem hem, “wokbaot long olgeta rod blong hem,” “lavem hem,” mo wosipim hem “long olgeta hat” blong yumi. (Dutronome 10:12; Ol Sam 25:14) Taem yumi mekem olsem, bambae yumi kasem trufala glad nating se yumi stap fesem ol trabol. Taem yumi wosipim Jehova yumi harem se yumi gat wan gudfala risen blong laef.
DIGIM MOA
Faenemaot lav we God i gat long yumi, taem hem i stap rerem wol ya mo risen from wanem yumi laef.
3. Jehova i wantem se ol man oli gat wan gudfala laef
Plei VIDEO, mo tokbaot kwestin ya.
?From wanem God i wokem wol blong i naes olsem?
Ridim Prija 3:11, mo tokbaot kwestin ya:
?Vas ya i tijim wanem long saed blong Jehova?
4. Stamba tingting blong Jehova i no jenis
Ridim Ol Sam 37:11, 29 mo Aesea 55:11, mo tokbaot kwestin ya:
?Olsem wanem yumi save se stamba tingting blong Jehova i no jenis?
Wan haos we i brokbrok oli save fiksim bakegen. Sem mak, wol ya we ol man oli spolem bambae God i fiksim bakegen blong ol gudfala man oli stap long hem
5. Yumi gat risen blong laef taem yumi wosipim Jehova
Taem yumi save risen from wanem yumi laef, samting ya bambae i mekem yumi harem gud. Plei VIDEO, mo tokbaot kwestin ya.
Taem Terumi i kasemsave mining blong laef, ?hemia i givhan long hem olsem wanem?
Ridim Prija 12:13, mo tokbaot kwestin ya:
Jehova i mekem plante samting blong yumi, ?olsem wanem yumi soem tangkiu long hem?
MAET MAN I ASKEM SE: “?From wanem yumi laef?”
?Bambae yu ansa olsem wanem?
SAMARI
Jehova i wantem se yumi enjoem laef we i stret gud olgeta long wol ya foreva. Mo tede, taem yumi wosipim hem long fulhat blong yumi, yumi harem se laef blong yumi i gat mining.
Tingtingbak
?Wanem plan blong God long saed blong Adam mo Iv?
?Olsem wanem yumi save se stamba tingting blong God long saed blong man i no jenis?
?Yu save mekem wanem blong faenem tru mining blong laef?
FAENEMAOT
Faenemaot ol pruf we i soem se garen blong Iden i tru.
“Stori Blong Gudfala Ples Ya Long Iden—?Hem i Tru Stori No Kastom Stori?” (Wajtaoa, 1 Februari 2011)
Lanem from wanem yumi sua se wol bambae i stap foreva.
Jekem samting we Baebol i talem long saed blong mining blong laef.
Luk olsem wanem wan man we i gat evri samting long laef, i harem se i misim wan samting.
a Long nekis lesen bambae yumi lanem from wanem laef i olsem.