Ol Elda—!Lukaot Long Ol Sipsip Blong God Long Kaengud Fasin!

“Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem.”​—⁠1 TESALONAEKA 2:⁠7.

1. ?From wanem olgeta trufala Wetnes blong Jeova oli save harem sefgud?

JEOVA hem i Nambawan Man blong Lukaot long Sipsip. Hem i stap givim plante samting long ol man blong hem, we oli olsem sipsip. Hem i stap lidim olgeta “long ol stret rod,” blong leftemap tabu nem blong hem. Taswe olgeta we oli stap mekem wok blong God oli no save fraet long wan samting nogud. God i gat sore long olgeta, mo olgeta oli save trastem se hem bambae i mekem olgeta oli harem gud. Tru ya, olgeta trufala Wetnes blong Jeova oli save harem sefgud, from lav mo fasin kea gud blong God.​—⁠Ol Sam 23:​1-4.

2. ?From we Jisas i olsem laet blong God we i saenaot i kam long yumi, hem i stap soemaot wanem fasin?

² Long saed blong Jisas Kraes, Baebol i talem se: “Oltaem God i stap insaed long bigfala laet blong hem, nao Pikinini ya blong hem i olsem laet ya we i saenaot i kam long yumi.” (Hibrus 1:​1-4) From samting ya, Jisas, we hem i Gudfala Man blong Lukaot long Sipsip, hem tu i stap soemaot lav mo fasin sore. (Jon 10:​14, 15) Wan eksampel: Wan taem Jisas “i luk we plante man oli stap, nao hem i sore tumas long olgeta, from we oli olsem ol sipsip we i no gat man blong lukaot long olgeta. Nao hem i girap, i tijim olgeta long plante samting.”​—⁠Mak 6:⁠34.

3. (a) ?Ol Kristin man we oli stap lukaot long ol sipsip blong God, oli mas soemaot wanem fasin olsem Jeova God mo Jisas Kraes tufala i stap soemaot? (b) ?Aposol Pol i givim wanem advaes mo woning long ol elda?

³ Ol Kristin oli mas ‘traehad blong folem fasin blong God, mo laekem ol man tumas, olsem we Kraes i laekem yumi tumas.’ (Efesas 5:​1, 2) Taswe olgeta oli mas gat lav mo fasin sore. Samting ya i tru moa long ol man blong kongregesen we oli olsem man blong lukaot long ol sipsip blong God. Aposol Pol i talem se: “Yufala i mas stap lukaotgud long yufala mo long ol man ya we Tabu Speret i putum olgeta oli stap finis long han blong yufala. Yufala i mas stap lukaot long ol man blong jyos blong God, olsem we man blong lukaot long sipsip i stap lukaot long ol sipsip blong hem. From we God i pemaot ol man ya finis long blad blong Pikinini blong hem. Mi mi save finis, se bambae, taem mi mi aot long yufala, olgeta ya we oli olsem wael dog nomo, bambae oli kam long yufala, mo bambae oli ronem yufala man blong Jisas, olsem we yufala i sipsip nomo. [Bambae oli no lukaotgud long ol sipsip blong God long kaengud fasin.] Yes, i gat taem i stap kam, we sam man blong yufala bambae oli save girap, oli gyaman nomo blong lidim ol man blong Jisas oli biaen long olgeta, oli go krangke.”​—⁠Ol Wok 20:​28-30.

4. (a) ?Biaen, wanem i kamaot insaed long kongregesen blong God, stret long woning we Pol i bin givim long Ol Wok 20:​29, 30? (b) ?Wanem ol kwestin we yumi save tingbaot naoia?

⁴ Biaen, sam man we oli olsem “wael dog nomo” oli bin kamaot insaed long kongregesen. Olgeta ya “oli no stap lukaotgud long ol sipsip blong God long kaengud fasin.” !Yumi glad tumas we ol elda long ol kongregesen blong ol Wetnes blong Jeova tede oli no stap rul long strong fasin olsemia! ?Ol brata mo sista long kongregesen oli save ting se ol elda ya we tabu speret i putumap olgeta bambae oli soemaot wanem fasin long olgeta insaed long kongregesen? ?Mo olsem wanem ol elda ya oli save soemaot kaengud fasin mo kea gud long ol sipsip blong Jeova?

Yufala i No Mas Mekem Olsem Bigfala Masta Long Ol Sipsip

5. (a) ?Ol haeman blong wol oli mekem wanem fasin long ol narafala man we oli stap aninit long olgeta? (b) ?Olsem wanem Jisas i soemaot se strong rul olsemia i no mas kam insaed long kongregesen?

⁵ I stret nomo we yumi ting se ol elda bambae oli gat sore long yumi. Olgeta oli no olsem ol haeman blong wol, we oli stap ronem ol man blong olgeta, oli stap mekem olsem bigfala masta long olgeta. Yumi save tingbaot eksampel blong wan king blong ol man Frank, nem blong hem Charlemagne (hem i rul long 768-814 K.T.a). Hem i “fosem ol man, we oli kolem Saksan, blong tekem baptaes. Sipos no, bambae hem i kilim ol man ya oli ded. Sipos oli no livim kakae blong smoltaem, hem i panisim olgeta long fasin we i strong bitim mak. Hem i no yusum fasin blong pulum man, oltaem hem i stap fosem man.” (The History of the Christian Church, we William Jones i raetem) Strong rul olsemia i no stret long ol man blong Jisas. Jisas i talem se: “Yufala i save finis we ol haeman blong ol hiten man oli stap mekem olsem bigfala masta long olgeta. Mo ol jif blong olgeta oli stap rul long fasin we i strong tumas antap long olgeta. Be fasin blong yufala bambae i no olsem. Sipos wan long yufala i wantem kam we i haeman blong yufala, hem i mas kam olsem wan man blong wok blong yufala. Mo sipos wan man i wantem kam lida blong yufala, hem i mas kam olsem slef nomo blong yufala. Bambae i mas olsem we mi mi mekem. Mi mi Pikinini blong Man, be mi mi no kam blong bambae ol man oli mekem wok blong mi. Mi mi kam blong mekem wok blong olgeta, mo blong givim laef blong mi blong pem rod blong plante man oli gofri.”​—⁠Matyu 20⁠:​25-28, An American Translation.

6. (a) ?Long saed blong ol elda, wanem trifala bigfala poen i stanap? (b) ?I stret nomo we kongregesen i tingbaot ol elda olsem wanem? ?Mo ol elda oli mas rimemba se oli hu?

⁶ Sipos wan Kristin man i ‘wantem kam we hem i elda long kongregesen, man ya i wantem wan gudfala wok.’ (1 Timote 3:⁠1) Taem yumi tingbaot vas ya mo advaes blong Jisas we yumi jes ridim, yumi luk se i gat tri bigfala poen i stanap: (1) Ol Kristin elda oli no mas rul long fasin we i strong bitim mak; (2) olgeta we oli mekem wok blong lukaot long ol man blong Jisas oli no mas kam olsem bigfala masta blong olgeta, be oli mas kam olsem slef blong olgeta; mo (3) ol man we oli wantem tekem wok blong wan elda insaed long kongregesen oli mas tingbaot wok ya olsem “wan gudfala wok.” Oli no mas tingbaot se oli kasem wan hae ples we i antap long ol narafala long kongregesen. (Proveb 25:27; 1 Korin 1:31) Nem ya “elda” i no mekem se wan man i hae moa long ol narafala man we oli stap wosip long Jeova. No gat. I stret nomo we kongregesen i tingbaot ol elda olsem we oli bigman long saed blong speret, oli gat ekspiryens, ol man we tingting blong olgeta i stap daon, we oli lidim gud kongregesen long tabu wok blong God. Yes, ol elda oli mas rimemba se oli slef nomo blong Jeova God, Jisas Kraes, mo ol brata mo sista blong olgeta.​—⁠Rom 12:11; Galesia 5:13; Kolosi 3:⁠24.

7. (a) ?2 Korin 1:24 i talem se ol elda oli mas mekem olsem wanem long ol narafala? (b) ?Taem Hed-Kampani i sanem toktok i kam long ol elda, oli mas mekem wanem?

⁷ Sipos wan elda i gat tingting daon we hem i wok olsem wan slef blong givhan long ol narafala, samting ya nomo bambae i blokem hem blong hem i no mekem olsem “bigfala masta” long kongregesen. !I gud tumas we ol elda blong yumi oli stap soemaot fasin we i sem mak olsem fasin blong Pol! Pol i talem long ol Kristin long Korin: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, no gat. Bilif blong yufala i stanap finis. Mifala i wantem wok wetem yufala, blong mekem yufala i harem gud moa.” (2 Korin 1:24) Stret long advaes ya, olgeta we oli stap lukaot long kongregesen long lav, oli no stanemap plante rul we oli mekem i hevi long ol brata mo sista blong olgeta. No gat. Ol elda blong ol Wetnes blong Jeova oli folem ol rul blong Baebol nomo, mo oli wok wetem ol brata mo sista blong olgeta mo givhan long kaengud fasin. Mo tu, oli stap soemaot se oli keagud long ol sipsip blong God from we oli kwik blong obei long ol toktok we Hed-Kampani blong ol Wetnes blong Jeova i sanem i kam long olgeta.​—⁠Ol Wok japta 15.

8. ?Pol i stap tingbaot ol brata mo sista blong hem olsem wanem? ?Eksampel ya i mas pusum ol elda tede blong mekem wanem?

⁸ From we Pol i stap soemaot kaengud fasin long ol sipsip blong God, taswe hem i save talem long ol Kristin long Tesalonaeka se: “Taem mifala i stap wetem yufala, mifala i stap mekem i isi long yufala, olsem wan mama we i stap lukaot long ol pikinini blong hem. Mifala i no tingbaot blong talemaot gud nyus ya nomo long yufala. Mifala i rere tu blong lego long laef blong mifala, from we mifala i laekem yufala tumas, mifala i wantem tumas blong givhan long yufala.” (1 Tesalonaeka 2:​7, 8) Pol i mekem olsem wan mama we i lukaotgud long ol pikinini blong hem, hem i laekem olgeta tumas. Taswe hem i rere blong lego long ol samting we hem i wantem blong givhan long olgeta. Hem i stap soemaot kaengud fasin oltaem long olgeta. !Eksampel ya i mas pusum ol elda tede blong lukaot long ol sipsip blong God long fasin we i kaengud nomo!

Oli Mas Givim Spel Long Tingting Blong Man Mo Mekem Hem i Harem Gud

9. ?Profet tok blong Aesea long Aesea 32:​1, 2 i talem se ol man blong Jeova tede oli stap olsem wanem?

⁹ Aesea i givim wan profet tok we i tokbaot taem we Jisas Kraes bambae i rul long Kingdom blong hem. Hem i talem se King ya bambae i “rul long stret fasin nomo” mo “ol pikinini blong king” bambae oli rul long fasin “we i stret nomo.” Ol elda we oli stap wok insaed long ogenaesesen blong God tede oli stap lukaot long bisnes blong Kingdom ya we i stanap finis long heven. Yes, oli stap mekem wok blong ‘ol pikinini blong king.’ Nekis haf blong profet tok blong Aesea i stret long ol man ya tu, i se: “Olgeta ya oli mas olsem wan samting we i save blokem bigfala win mo olsem wan ples blong haed taem bigfala ren i foldaon. Oli mas olsem springwora long drae ples, mo olsem sado blong bigfala ston long ples we i hot tumas.”​—⁠Aesea 32:​1, 2.

10. ?Wanem ol fasin we ol elda blong ol Wetnes blong Jeova oli mas leftemap insaed long kongregesen?

¹⁰ Ol elda blong ol Wetnes blong Jeova oli gat narakaen fasin long ol strong lida blong ol gyaman Kristin skul. Ol elda ya oli givim spel long tingting blong man mo mekem hem i harem gud. Olgeta oli wok tugeta olsem wan kampani nomo blong leftemap pis mo kwaet fasin long medel blong ol man blong Jeova, mo blong mekem olgeta oli harem we oli stap sefgud. Ol elda wanwan oli save givhan blong mekem ol fasin ya oli stanap strong insaed long kongregesen, sipos oli lukaot long ol sipsip blong God long fasin we i kaengud nomo.

Long Stret Fasin Nomo

11. (a) ?Wanem ol fasin we oli kamaot long ol kongregesen long faswan handred yia, we oli stap long medel blong bighaf blong ol kongregesen blong ol Wetnes blong Jeova tede tu? (b) ?Wanem wan long olgeta wok we ol elda oli mas mekem insaed long kongregesen? ?From wanem?

¹¹ Long faswan handred yia, samtaem i gat trabol i kamaot long ol Kristin man insaed long kongregesen. Be samting ya i no spolem pis, fasin joengud, mo glad blong ol kongregesen. (1 Korin 1:​10-12; 3:​5-9; Efesas 1:2; Jemes 2:​1-9; 3:​2-12; 4:​11, 12; 1 Jon 1:​3, 4) Sem mak long ol kongregesen blong ol Wetnes blong Jeova tede. From we God i stap blesem olgeta, Kraes i stap lidim olgeta, mo ol gudfala elda oli stap wok strong long wok blong olgeta, ol kongregesen oli stap harem gud long saed blong speret. Blong mekem se kongregesen i gat pis, fasin joengud, mo glad insaed long hem, ol elda oli askem long God blong givhan long olgeta. Mo oli traehad blong halpem ol man insaed long ogenaesesen blong God blong stap klin long saed blong fasin blong olgeta mo long saed blong speret tu. (Aesea 52:11) Wan ogenaesesen we i no klin i no save gat pis mo glad insaed long hem. Mo God i no save harem gud long hem mo givim blesing long hem tu. Ae blong Jeova i “klin tumas, i no save luk ol samting we i nogud,” yes, hem i no save letem nogud fasin i gohed. (Habakuk 1:13) Taswe wan long olgeta wok we ol elda oli mas mekem, hemia: Taem oli mas jajem wan trabol insaed long kongregesen, oli mas mekem long fasin we i stret nomo, we i laenap long ol rul blong Baebol nomo. ?Be wanem sam poen we oli save tingbaot taem oli mas jajem wan bisnes olsem?

12. Ol elda oli no mas luk insaed long bisnes blong ol man wanwan, sipos oli no brekem wan loa no rul blong Baebol. ?Be oli save mekem wanem, olsem Galesia 6:1 i talem?

¹² Sipos wan Kristin i gat trabol wetem wan narafala Kristin, maet tufala nomo i save stretem bisnes ya. (Matyu 18:​15-17) Ol elda oli no ‘bos blong bilif blong yumi.’ Yumi no mas ting se oli mas luk insaed long bisnes blong olgeta long kongregesen wanwan, sipos oli no bin brekem wan loa no rul blong Baebol. Be sipos wan long kongregesen “i foldaon, i mekem samting we i no stret,” i stret nomo we ol brata ya we oli naf long saed blong speret oli ‘givhan long hem blong stretem hem . . . long kwaet fasin.’​—⁠Galesia 6:⁠1.

13. ?Olsem wanem Baebol i soemaot se ol elda oli no mas lesin long toktok nomo, oli mas jajem man taem i gat sam samting we oli pruvum nomo se hem i mekem i rong?

¹³ Ol elda oli mas wok “long stret fasin nomo,” oltaem oli mas mekem i sem mak long olgeta man. Taem i gat wan samting we i pruvum se wan long kongregesen i mekem i rong, oli mas stretem bisnes ya. Be oli no mas lesin long toktok nomo. Pol i givim advaes ya se: “Bambae yu no lesin long man we i tok agens long wan elda, sipos i no gat tu tri wetnes blong mekem tok ya i stanap.” (1 Timote 5:19) Long Isrel bifo, Jeova i putumap wan rul se sipos wan man i mekem wan bigfala sin we i save ded from, mo jaj oli no mas jajem hem ‘from toktok blong wan wetnes nomo. I mas gat tu tri wetnes long bisnes ya.’ Mo tu, man ya we oli talem se i mekem wan bigfala rong, hem i gat raet blong fesem ol man we oli stap talemaot ol poen blong hem. Mo sipos olgeta oli pruvum se man ya i mekem i rong, man ya ‘i mas go long han blong ol wetnes ya fastaem, blong oli kilim hem i ded.’​—⁠Dutronome 17:​6, 7.

14. (a) ?Diotrefes i traem mekem wanem samting we i no stret nating? (b) ?God i wantem we ol elda oli jajem ol trabol long kongregesen olsem wanem?

¹⁴ Ol elda oli save jajem man taem hem i brekem loa blong Baebol nomo. !Yumi glad tumas we ol elda long ol kongregesen oli no flas olsem Diotrefes long faswan handred yia! Hem i mekem i no stret nating. Hem i stap blokem olgeta we oli wantem tekem ol brata we oli goraon blong visitim ol kongregesen oli go long haos blong olgeta. Hem i traem “sakemaot olgeta long kongregesen.” (NW) Mo man ya i mekem sam narafala fasin olsemia. Aposol Jon i ting se fasin blong man ya i no stret nating, taswe hem i givim woning ya se: “Sipos mi kam, bambae mi talemaot long ol man blong jyos wanem fasin we hem i stap mekem.” (3 Jon 9, 10) Taswe tede, bifo we wan kot-komiti i sakemaot wan man long kongregesen, oli mas sua se samting we man ya i stap mekem i agensem loa blong Baebol.b God i wantem we ol Kristin elda oli mekem i stret long ol narafala. Yes, olgeta we oli lukaot long ogenaesesen blong Jeova long wol oli mas “gudfala man we oli gat gudhan, man blong fraet gud long God, mo oli mas man we ol man oli save trastem olgeta.”​—⁠Eksodas 18:​21, NW.

15. ?Taem ol elda oli mekem kot-komiti blong jajem wan trabol long kongregesen, oli mas yusum prea olsem wanem?

¹⁵ Taem wan kot-komiti oli mekem miting blong jajem wan bisnes insaed long kongregesen, oli mas prea wetem ful hat blong olgeta blong askem Jeova blong givhan long olgeta. Taem samfala oli talem se wan brata no wan sista long kongregesen i mekem wan bigfala rong, nao ol elda oli mekem miting wetem brata no sista ya, oli mas prea blong statem miting ya. Mo taem oli stap mekem miting tugeta, sipos i gat wan samting i kamaot we oli luk se oli nidim spesel help blong God blong skelem, i stret we oli prea long God long taem ya nomo.​—⁠Jemes 5:​13-18.

16. ?Taem ol elda oli mas jajem ol trabol insaed long kongregesen, oli mas mekem long wanem fasin? ?From wanem?

¹⁶ Ol elda oli save se brata ya we samfala oli talem se hem i stap mekem i no stret, hem i wan “sipsip” blong God, we oli mas lukaotgud long hem long fasin we i kaengud nomo. (Skelem wetem Esikel 34:​7-14.) Ol prapa man blong lukaot long sipsip oli mas mekem long fasin we i kaengud, from we ol anamol ya oli gat kwaet fasin we oli fraet lelebet, oli dipen nomo long man we i lukaot long olgeta blong protektem olgeta. ?Nao olsem wanem long olgeta long kongregesen blong yufala we oli olsem sipsip nomo? Yumi save se oli harem we oli stap sefgud long han blong Nambawan Man blong Lukaot long Sipsip, Jeova God, mo Gudfala Man blong Lukaot long Sipsip, Jisas Kraes. Be ol man we oli lukaot long ol sipsip long kongregesen aninit long han blong tufala, oli mas mekem se ol sipsip blong Jeova oli stap kwaet long tingting blong olgeta mo oli harem we oli stap sefgud. ?Sipos yu yu wan Kristin man we yu stap lukaot long ol sipsip blong God, olsem wanem long ol brata mo sista blong yu? ?Tingting blong olgeta i stap kwaet mo oli harem we oli stap sefgud from we yu yu kea gud long olgeta? Tru, ol elda oli mas holemstrong long ol loa mo rul blong Baebol. Be Baebol i talem se olgeta oli mas laekem tumas ol sipsip mo oli mas jajem ol trabol insaed long kongregesen long fasin we i kwaet, i gat oda, i kaengud, mo oli soemaot se oli tingbaot mo kea gud long ol narafala.

17. ?Wanem sam advaes blong Baebol we ol elda oli mas tingbaot oltaem, i tru moa taem oli mekem wan kot-komiti?

¹⁷ Yumi evriwan i sinman, taswe “plante taem yumi evriwan i mekem i no stret” long toktok blong yumi. (Jemes 3:⁠2) Yumi evriwan i nidim we God i soemaot sore long yumi. Yumi evriwan i nidim “sakrafaes blong Kraes we i kavremap ol sin blong yumi.” (1 Jon 1:8 kasem 2:​2, NW; Ol Sam 130:⁠3) Taswe wan Kristin man we i wok olsem wan man blong lukaot long sipsip aninit long han blong Jeova mo Jisas, hem i no mas tinghae tumas long hem wan. Hem i mas putum hem i stap daon nomo. Hem i mas tingbaot tok blong Jisas we i talem se: “Yufala i mas mekem long ol man, olsem we yufala i wantem blong olgeta oli mekem long yufala.” (Luk 6:31) Samting ya i tru moa taem ol elda oli mekem wan kot-komiti. Ol man ya we oli nafgud long saed blong speret oli mas traehad blong stretem wan Kristin we i mestem rod. Oli mas mekem ‘long kwaet fasin, mo oli mas lukaotgud long olgeta, blong sam samting bambae i no kam traem olgeta.’​—⁠Galesia 6:1; 1 Korin 10:⁠12.

18. (a) ?Wanem nogud frut i save kamaot sipos ol elda oli strong tumas taem oli jajem wan trabol long kongregesen? (b) ?Olsem Mak 9:42 i talem, ol elda mo ol narafala Kristin tu oli mas lukaotgud we oli no mekem wanem?

¹⁸ Sipos ol elda oli strong tumas, oli no mekem i stret taem oli stap jajem wan brata, samting ya i save spolem brata ya. Maet oli no spolem hem long saed blong bodi no long saed blong filing blong hem, be oli save spolem hem bigwan long saed blong speret. Sipos oli mekem olsemia, maet fasin ya i soemaot se ol man ya oli no naf blong lukaotgud long wok blong elda. (Skelem wetem Jemes 2:13.) Taswe oltaem mo taem oli stap jajem wan trabol long kongregesen tu, ol elda oli mas soemaot kaengud fasin mo oli mas lukaot we oli no mekem narafala i foldaon long saed blong speret. I no ol elda nomo, be olgeta Kristin oli mas lukaot long samting ya, from we Jisas i talem se: “Sipos wan man i mekem wan long ol pikinini ya we oli bilif long mi i foldaon long sin, man ya bambae i kasem bigfala panis. Sipos oli fasem wan bigfala ston long nek blong hem, oli sakem hem long solwora, hemia i moa gud, i winim panis ya we bambae hem i kasem.” (Mak 9:42) Bigfala ston ya we Jisas i stap tokbaot hem i bigwan tumas. Long taem ya oli stap yusum ol anamol nomo blong muvum ol bigfala ston olsem. Sipos oli fasem wan bigfala ston olsem long nek blong man, nao oli sakem hem long solwora, man ya i no save laef. Wan elda i mas lukaotgud we hem i no mekem wan samting we i save spolem hem wan long saed blong speret, mo i save mekem narafala i foldaon tu.​—⁠Filipae 1:​9-11.

Gohed Blong Soemaot Kaengud Fasin

19. ?Pita i givim wanem advaes long ol elda? ?Sipos oli folem advaes ya, oli save kasem wanem presen long fyuja?

¹⁹ Aposol Pita i tokbaot olsem wanem ol elda oli save lukaotgud long ol sipsip blong God. Hem i talem se: “Yufala i mas lukaotgud long ol man we God i givim long yufala, olsem we man blong lukaot long sipsip i stap lukaotgud long ol sipsip blong hem. Yufala i mas lukaotgud long olgeta, we tingting blong yufala i glad blong mekem, olsem we God i wantem. I nogud yufala i mekem wok ya we tingting blong yufala i no glad. Mo i nogud yufala i mekem blong kasem pei long hem. Yufala i mas mekem from we tingting blong yufala i glad long hem. Bambae yufala i no kam olsem bigfala masta blong olgeta ya we God i putum olgeta long han blong yufala. Yufala i mas soemaot ol stret fasin long ol man blong yufala blong oli save folem, olsem we ol sipsip oli folem man blong lukaot long olgeta. Nao taem hemia we i Nambawan Man blong Lukaot long Sipsip bambae i kamtru, bambae hem i flasem yufala olsem we oli flasem man we i win long faet, mo i leftemap nem blong yufala i go antap we bambae i no save finis samtaem.” (1 Pita 5:​2-4) Ol elda oli mas folem advaes ya mo oli mas soemaot kaengud fasin long ol sipsip blong God. Long rod ya nomo, ol elda we tabu speret i makemaot olgeta bambae oli save kasem presen we God bambae i givim long olgeta, hemia laef long heven we i no save finis samtaem. Mo long rod ya nomo, ol elda we oli hop se bambae oli kasem laef blong olwe long Paradaes long wol, bambae oli save kasem presen ya.

20. (a) ?Ol Kristin elda we oli stap lukaot long ol sipsip blong God oli mas soemaot wanem fasin long ol brata mo sista blong olgeta? (b) ?From we ol gudfala elda oli givim gudfala eksampel long wok blong God mo oli soemaot kaengud fasin long olgeta long kongregesen, yu yu tingting olsem wanem long olgeta?

²⁰ Jeova God mo Jisas Kraes tufala i Man blong Lukaot long ol Sipsip, mo tufala i laekem tumas ol sipsip mo tufala i sore long olgeta. Ol Kristin elda we oli man blong lukaot long ol sipsip blong God, oli mas holemstrong long ol rul blong God. Long semtaem oli mas soemaot lav mo sore long ol sipsip ya. Ol trufala Wetnes blong Jeova oli gat bigfala tangkyu long ol elda we oli givim gudfala eksampel long wok blong God. Ol elda ya oli rili glad blong livim sam samting we olgeta nomo oli wantem, blong lukaotgud long ol samting we God i putum finis long han blong olgeta, long fasin we i kaengud nomo. ?Olsem wanem yumi save soemaot bigfala tangkyu ya wetem respek? Yumi save soemaot sipos yumi obei long olgeta we oli stap lidim yumi.

[Ol Futnot]

?Wanem Tingting Blong Yu?

◻ ?Olsem wanem Jisas Kraes i soemaot se fasin blong rul olsem bigfala masta long kongregesen i no stret?

◻ ?Taem Hed-Kampani i sanem toktok i kam long ol elda, olgeta oli mas mekem wanem?

◻ ?Aesea 32:​1, 2 i soemaot se ol elda oli mas gat wanem fasin?

◻ ?Olsem wanem Baebol i soemaot se ol elda oli no mas jajem wan bisnes from toktok we oli harem nomo?

◻ ?Ol Kristin elda ya oli mas lukaot long ol sipsip blong God long wanem fasin?

[Tok Blong Pija Long Pej 28]

Taem wan kot-komiti i mekem miting wetem wan Kristin, i impoten tumas we oli prea wetem ful hat blong olgeta