Ol Man Blong Jeova Oli Kam Strong Moa Long Bilif
“Ol [kongregesen] oli stap kam strong moa bakegen long fasin blong bilif. Mo evri dei, namba blong ol man i stap kam antap moa.”—OL WOK 16:5.
1. ?God i yusum aposol Pol olsem wanem?
JEOVA GOD i “jusumaot” Sol blong Tasas, blong yusum hem olsem wan “man blong wok.” Man ya i kam aposol Pol. Nao hem i ‘harem nogud long bodi blong hem’ long plante samting. Be from bigfala wok blong hem wetem plante narafala tu, ogenaesesen blong Jeova i stap joengud mo namba blong ol man oli stap go antap.—Ol Wok 9:15, 16.
2. ?From wanem i gud we yumi storebaot Ol Wok 13:1 kasem 16:5?
2 Plante moa hiten man oli stap kam Kristin nao. Hed-kampani i mekem wan impoten miting we i halpem ol man blong God blong joen gud moa, mo blong kam strong moa long fasin blong bilif. I gud we yumi storebaot samting ya mo ol narafala samting tu we i kamaot long taem ya, olsem Ol Wok 13:1 kasem 16:5 i talem, from we sem samting i stap kamaot long kongregesen blong ol Wetnes blong Jeova tede. Namba blong olgeta i stap go antap moa, mo Jeova i stap blesem olgeta long saed blong speret. (Aesea 60:22) (Taem yufala i mekem stadi wanwan long store ya, i gud yufala i ridim ol vas blong Ol Wok we mifala i raetem long ol bigfala leta.)
Ol Misinari Oli Stat Wok Strong
3. ?Ol “profet mo tija” oli mekem wanem wok long Antiok?
3 Kongregesen long Antiok, long Siria, i sanemaot sam man blong givhan long olgeta we oli bilif finis, blong oli kam strong moa bakegen long fasin blong bilif. (13:1-5) Long Antiok, i gat “ol profet mo tija” oli stap. I gat Banabas, Simeon (Naeja), Lusias we i man Saerin, mo Manaen, mo Sol blong Tasas. Wok blong ol profet i blong eksplenem Tok blong God mo blong talemaot ol samting we bambae oli kamaot long fyuja. Wok blong ol tija i blong tijim ol man long saed blong Baebol mo long fasin blong laef we God i glad long hem. (1 Korin 13:8; 14:4) Banabas mo Sol tufala i gat wan spesel wok. Tufala i tekem kasin-brata blong Banabas, nem blong hem Mak, nao trifala ya i go long ples ya Saepras. (Kolosi 4:10) Trifala ya i prij long ol haos prea long wan taon kolosap long solwora long saed i go long is, nem blong taon ya Salamis. Baebol i no talem se ol man Isrel long ples ya oli glad blong harem tok blong trifala ya. Olgeta long taon ya oli rij, oli gat plante samting, taswe oli ting se oli no nidim Mesaea.
4. ?Taem ol misinari oli stap gohed long wok blong prij long Saepras, wanem i kamaot?
4 Long sam narafala ples long Saepras tu, God i blesem wok blong olgeta we oli wetnes blong hem. (13:6-12) Long Pafos, trifala misinari i faenem wan klevaman mo gyaman profet, nem blong hem Bajisas (Elimas) we i man Isrel. Klevaman ya, hem i traem blokem Sejas Polas, we hem i hed gavman blong aelan ya Saepras, blong hem i no harem tok blong God. Nao tabu speret i kam fulap long Sol, mo hem i talem se: ‘Yu yu wan pikinini blong Setan stret. Yu yu agensem evri samting we i gud. Yu yu fulap long fasin nogud, yu man blong gyaman nomo. Oltaem yu stap traem tanem ol trutok blong Jeova, blong mekem i kam olsem ol gyaman tok nomo.’ Nao wantaem nomo, han blong God i panisim Elimas, ae blong hem i kam dak, hem i no moa save luk delaet longtaem lelebet. Taem Sejas Polas i luk samting ya, “hem i bilif long tok blong God. Mo hem i sapraes tumas long ol tok blong [Jeova, NW], we tufala i tijim hem long hem.”
5, 6. (a) ?Taem Pol i stap toktok long haos blong prea long Antiok long Pisidia, hem i talem wanem long saed blong Jisas? (b) ?Ol man we oli harem tok blong Pol oli mekem wanem?
5 Nao Pol mo ol fren blong hem oli aot long Saepras, oli tekem wan sip, oli go long Esia Maena, nao oli gosoa long taon ya Pega. Nao Pol mo Banabas tufala i aot long Pega, tufala i wokbaot i go long rod we oli katem long ol bigfala hil long not. Ating long ples ya nao, kolosap tufala i lusum laef blong tufala ‘from ol wora we i ron bigfala, mo from ol man blong stil.’ Ale, tufala i kamtru long Antiok long Pisidia. (2 Korin 11:25, 26) Long ples ya, Pol i tijim ol man insaed long haos prea. (13:13-41) Hem i storeyan bakegen long ol samting we God i mekem long ol man Isrel bifo, mo hem i eksplenem se Jisas we hem i wan laen blong Deved, hem nao hem i Man blong Sevem ol man. Nating we ol haeman blong Isrel oli jajem Jisas se hem i mas ded, be God i mekem hem i laef bakegen. Ale samting we God i promes finis long ol olfala blong Isrel bifo, hem i mekem i kamtru. (Ol Sam 2:7; 16:10; Aesea 55:3) Pol i givim woning long ol man we oli stap lesin long hem se oli no mas sakem wok blong God, we i givim Kraes blong sevem olgeta.—Habakuk 1:5, Septuagint.
6 Tok blong Pol i pulum plante man blong lesin long hem. Tede tu, taem ol Wetnes blong Jeova oli givim pablik tok, plante taem ol man oli wantem save moa. (13:42-52) Long nekis wik blong hem, long Sabat dei, kolosap olgeta man long ples ya oli kam wanples blong harem tok blong Jeova. Nao taem ol man Isrel oli luk olgeta man ya, oli fulap long jelas. Long wan wik nomo, ol misinari ya oli tanem tingting blong moa hiten man, i winim namba blong olgeta we ol man Jyu oli pulum long ful laef blong olgeta. Nao ol man Jyu oli stap tok nogud tumas long Pol, oli stap tok agens long tok blong hem. From samting ya, i stret taem blong mekem laet long saed blong speret i saenaot long narafala ples. Ale oli talem long ol man Isrel se: ‘From we yufala i stap sakem tok blong mifala olsem, mo from we yufala i stap talem se yufala i no naf blong kasem laef ya we i no save finis, mifala i mas livim yufala i stap. Mifala i mas go talemaot tok ya long ol hiten man.’—Aesea 49:6.
7. ?Taem ol man oli mekem trabol long Pol mo Banabas, tufala i mekem wanem?
7 Nao ol hiten man oli harem gud tumas long ol tok ya, mo olgeta we hat blong olgeta i stret blong kasem laef we i no save finis, oli bilif long hem. Long fasin ya, tok blong Jeova i goaot long olgeta ples raonabaot long taon ya. Be nao ol man Isrel oli goraon long ol woman blong prea we oli lida blong ol woman (ating blong oli pulum ol hasban blong olgeta), mo long ol haeman blong ples ya, mo oli pulum olgeta blong oli agensem Pol mo Banabas. Nao oli ronemaot tufala long ples blong olgeta. Be samting ya i no blokem tok blong ol misinari ya. Tufala ya i “ravemaot graon we i stap long leg blong tufala,” nao tufala i wokbaot i go long taon ya Ikoniam (we naoia oli kolem Konya). Hem i wan bigfala taon long ples blong Galesia, we ol man Rom oli lukaot long hem. (Luk 9:5; 10:11) ?Be olsem wanem long ol disaepol we oli stap long Antiok long Pisidia? Oli kam strong finis long bilif, nao “oli stap harem i gud tumas, mo Tabu Speret i fulap long olgeta.” Store ya i givhan long yumi blong luksave se taem sam man oli agensem yumi, oli mekem trabol long yumi, yumi no mas letem samting ya i blokem yumi long saed blong speret. Yumi mas gohed nomo.
Nating We Oli Kasem Trabol, Be Oli Stap Strong Long Bilif
8. ?Long Ikoniam, wanem gudfala frut i kamaot from wok blong prij?
8 Nating we ol man oli mekem bigfala trabol long Pol mo Banabas, be tufala i stap stanap strong long bilif blong tufala. (14:1-7) Long Ikoniam, tufala i go insaed long haos blong prea, nao tufala i prij we tok blong tufala i gud tumas, i pulum plante man Isrel mo plante man Gris tu oli bilif. Be ol man Isrel we oli no bilif long tok blong tufala, oli goraon long ol hiten man, oli pulum olgeta blong oli agensem ol nyufala brata. Nao tufala aposol i no fraet, God i givim raet long tufala blong mekem wok ya, ale tufala i strong blong talemaot gud nyus. Mo God i stap soemaot we hem i glad long wok blong tufala, from we hem i givim paoa long tufala blong mekem ol bigfala saen. From samting ya, ol man long ples ya oli seraot long tu kampani. Haf oli biaen long ol man Isrel, mo haf oli biaen long tufala ‘aposol’ ya (we God i ‘sanemaot’ olgeta). Tufala aposol ya tufala i no man blong fraet. Be taem tufala i harem we ol man long ples ya oli mekem plan blong stonem tufala i ded, tufala i mekem waes disisin. Tufala i girap, tufala i ronwe i go long Likonia, long Esia Maena, wan ples long saot blong Galesia. Long ples ya, tufala i stap talemaot gud nyus. Taem yumi kasem trabol, yumi tu yumi mas waes olsem, blong yumi save gohed long minista wok blong yumi.—Matyu 10:23.
9, 10. (a) ?Taem Pol i mekem leg blong wan man i kamgud bakegen, ol man Listra oli mekem wanem? (b) ?Taem ol man Listra oli mekem olsem, Pol mo Banabas tufala i mekem wanem?
9 Nao oli go long wan taon long Likonia, nem blong hem Listra, ale oli stap prij long ples ya. (14:8-18) Long ples ya, i gat wan man i stap we taem hem i bon, leg blong hem i nogud. Nao Pol i mekem leg blong man ya i kamgud, ale hem i wokbaot. Ol man we oli luk samting ya oli no save se paoa blong Jeova i mekem merikel ya, nao oli singaot bigfala, oli se: “!Ei! Ol God blong yumi oli tanem bodi blong olgeta oli kam man, nao oli kamdaon finis long ples blong yumi.” Ol man ya oli stap tok long lanwis blong ples ya, Likonia. Taswe Pol mo Banabas, tufala i no kasem. From we Pol i lidim tufala long wok blong talemaot gud nyus, ol man oli ting se hem i god ya, nem blong hem Hemis (man blong karem tok blong ol god blong olgeta). Mo oli ting se Banabas hem i god ya Sus, we i king blong ol god blong ol man Gris.
10 Nao pris blong god ya Sus, hem i tekem sam bul we i flasem olgeta finis long sam flaoa, nao hem i wantem kilim olgeta blong mekem wosip long Pol mo Banabas. Be taem tufala i harem bisnes ya, kwiktaem nomo tufala i eksplenem se tufala i man nomo, tufala i olsem olgeta nomo. Ating tufala i toktok long lanwis blong ol man Gris no sipos no, ating wan man i tanem toktok blong tufala, blong ol man oli save kasem save long hem. Tufala i talem se tufala i kam blong talemaot gud nyus long olgeta, blong tanem tingting blong olgeta, blong olgeta oli no moa lukluk bakegen long ol samting we “oli blong nating nomo” (ol narafala god no aedol, we oli no laef, oli no gat paoa). Tufala i wantem se olgeta oli luk God nomo we i laef. (1 King 16:13; Ol Sam 115:3-9; 146:6) Bifo, God i letem ol hiten man (i no ol man Isrel) oli folem ol rod blong olgeta nomo. Be oltaem hem i stap soemaot gud we fasin blong hem i olsem wanem, long ol gudfala wok we hem i stap mekem. Hem i ‘stap givim ren long olgeta, mo i stap mekem ol garen oli gat kakae long stret taem blong olgeta. Hem i stap givim kakae long olgeta, mo hem i stap mekem olgeta oli harem gud long tingting blong olgeta.’ (Ol Sam 147:8) Nating we Pol mo Banabas tufala i eksplenem gud ol samting ya long olgeta, be kolosap tufala i no naf blong blokem ol man we oli wantem wosip long tufala. Tufala misinari ya i no wantem we oli mekem wosip long tufala. Mo tufala i no yusum paoa we God i givim long tufala, blong stanemap Kristin wosip long ples ya. !Hemia wan nambawan eksampel long yumi! I nogud yumi wantem we ol man oli leftemap yumi from ol blesing we Jeova i givim long yumi long wok blong hem.
11. ?Yumi save lanem wanem long tok ya: “Long rod blong go insaed long [Kingdom blong God, NW], yumi save kasem plante trabol”?
11 Nao wantaem nomo, trabol i kamaot. (14:19-28) ?Olsem wanem? Sam man Isrel oli aot long Antiok long Pisidia, mo long Ikoniam, oli kamtru long Listra. Nao oli pulum plante man oli kam joen long olgeta. Nao oli tekem Pol, oli stonem hem, oli pulum i go afsaed long taon, oli livim i stap, oli ting se hem i ded finis. (2 Korin 11:24, 25) Be taem ol disaepol oli kam stanap raonabaot long Pol, hem i girap, i go insaed long Listra bakegen. Ating ples i tudak finis, taswe i no gat man i luk hem. Long nekis dei, hem mo Banabas, tufala i go long Debe. Long ples ya, tufala i pulum plante man oli kam disaepol blong Jisas. Nao tufala i tanraon, tufala i kambak long Listra, long Ikoniam, mo long Antiok. Tufala i stap mekem tingting blong ol disaepol i strong moa, tufala i stap givim tok long olgeta blong mekem olgeta oli stanap strong long fasin blong bilif. Tufala i talem se: “Long rod blong go insaed long [Kingdom blong God, NW], yumi save kasem plante trabol.” Tede tu, yumi ol Kristin man, yumi save kasem plante trabol, mo yumi no mas lego bilif blong yumi blong traem ronwe long trabol ya. (2 Timote 3:12) Long taem bifo, Pol mo Banabas i putumap ol elda long ol kongregesen. Hemia ol kongregesen we Pol i sanem leta blong Galesia i go long olgeta.
12. ?Taem faswan misinari trep blong Pol i finis, tufala misinari ya i mekem wanem?
12 Pol mo Banabas tufala i pastru long Pisidia, tufala i kamdaon long Pamfilia, long taon ya Pega. Nao long ples ya, tufala i talemaot tok blong gud nyus. Biaen, tufala i kambak bakegen long Antiok long Siria. Hemia en blong faswan trep blong Pol. Nao tufala misinari ya i talemaot long olgeta long kongregesen, “olgeta samting ya we God i yusum tufala blong mekem, mo we hem i openem rod blong ol hiten man olsem wanem, blong oli bilif long Jisas.” Nao tufala i stap longtaem lelebet long Antiok, wetem ol disaepol blong Jisas. Samting ya i givhan bigwan long olgeta blong oli kam strong moa long fasin blong bilif. Tede, taem ol elda we oli goraon long ol kongregesen oli visitim yumi, oli mekem sem samting, oli leftemap tingting blong olgeta long kongregesen long saed blong speret.
Oli Stretem Wan Impoten Kwestin
13. ?Blong mekem se kongregesen blong ol Kristin i no seraot long tu haf, wan haf blong ol man Isrel mo wan haf blong ol man blong ol narafala laen, oli mas stretem wanem kwestin?
13 Blong stanap strong long fasin blong bilif, ol Kristin long taem ya oli mas gat wan tingting nomo. (1 Korin 1:10) I nogud we kongregesen i seraot long tu haf, wan haf blong ol man Isrel, mo narafala haf blong ol man blong ol narafala laen. Taswe Hed Kampani i mas mekem wan disisin long kwestin ya: ?Ol hiten man we oli stap joen long ogenaesesen blong Jeova long taem ya, oli mas holem Loa blong Moses mo kasem sakomsaes, no no gat? (15:1-5) I gat sam man we oli aot long Judia, oli kamdaon long Antiok long Siria, mo oli stap tijim ol brata we oli kamaot long ol narafala laen se: ‘Sipos yufala i no kasem sakomsaes, bambae God i no save sevem yufala.’ (Eksodas 12:48) Taswe kongregesen i sanem Pol mo Banabas tufala i go long Jerusalem, blong luk ol aposol mo ol elda from bisnes ya. Long ples ya, i gat sam long kongregesen we fastaem oli man Farisi, we oli holemtaet Loa blong Moses. Olgeta ya tu oli talem se ol man we fastaem oli hiten man oli mas sakomsaes, mo oli mas folem Loa blong Moses.
14. (a) ?Nating we oli stap toktok longtaem lelebet long miting long Jerusalem, be oli givim wanem gudfala eksampel long ol elda tede? (b) ?Wanem mining blong ol tok blong Pita long taem ya?
14 Nao ol aposol mo elda oli mekem miting blong tokbaot bisnes ya, blong save tingting blong God long saed ya. (15:6-11) Yes, ol elda we oli gat strong bilif oli toktok longtaem lelebet long bisnes ya, be i no gat rao i kamaot. !Hemia wan nambawan eksampel long ol elda tede! Nao Pita i girap i talem se: ‘God i jusumaot mi blong mi mi talemaot gud nyus long ol hiten man [olsem Konilyas], blong oli bilif long hem. God i soemaot we hem i glad tumas blong tekem ol hiten man, from we hem i givim Tabu Speret blong hem long olgeta, long sem mak nomo we hem i givim long yumi. [Ol Wok 10:44-47] ?Be from wanem yufala i wantem traem God? ?Weswe yufala i girap blong putum Loa ya long olgeta, we i olsem wan hevi samting we i stap long solda blong olgeta? Yufala i luk. Yumi [prapa laen blong ol man Isrel], yumi bilif we Jisas, Masta blong yumi, hem i stap sevem yumi long gladhat blong hem, mo we hem i stap mekem olsem nomo long olgeta.’ God i soemaot finis we hem i glad tumas blong tekem ol hiten man we oli no sakomsaes. Samting ya i pruvum se oli no nidim blong holem Loa blong Moses blong God i sevem olgeta.—Galesia 5:1.
15. ?Wanem sam bigfala poen we Jemes i tokbaot? ?Mo hem i ting se i gud we oli raetem leta i go long ol hiten man we oli kam Kristin, blong talem wanem long olgeta?
15 Taem Pita i finisim toktok blong hem, kongregesen i stap kwaet nomo, i no talem wan samting. Be i gat sam moa toktok yet. (15:12-21) Pol mo Banabas tufala i mekem ripot long ol saen blong paoa blong God we God i yusum tufala finis blong mekem long fes blong ol hiten man. Nao Jemes, brata blong Jisas, we hem i jeman long miting ya, i talem se: “Saemon [narafala nem blong Pita long lanwis Hibru] i talemaotgud long yumi we God i kamtru olsem wanem fastaem long ol hiten man, blong tekemaot wan kampani blong olgeta, blong oli holem nem blong hem.” Jemes i tokbaot wok we ol profet bifo oli talemaot blong bildim bakegen “haos blong Deved” (blong mekem laen blong Deved i rul bakegen). Jemes i talem se long taem ya nao, wok ya i stap gohed blong hivimap ol disaepol blong Jisas (we bambae oli rul long Kingdom). Olgeta ya oli stap kamaot long laen blong ol man Isrel mo blong ol hiten man tu. (Emos 9:11, 12, Septuagint; Rom 8:17) Hemia plan blong God, taswe ol disaepol oli mas agri long samting ya. Jemes i talem se i gud we oli raetem wan leta i go long ol hiten man we oli kam Kristin blong talem long olgeta ol samting we oli tabu: (1) Ol kakae we man i yusum finis blong mekem wosip long ol narafala god, (2) fasin blong mekem nogud wetem woman, mo (3) oli no mas kakae blad, no anamol we man i jokem nek blong hem nomo. Ol rul ya oli stap insaed long ol samting we Moses i raetemdaon bifo. Mo long evri Sabat dei oli ridimaot ol loa ya long ol haos prea.—Jenesis 9:3, 4; 12:15-17; 35:2-4.
16. ?Kam kasem taem blong yumi tede, wanem trifala rul long leta blong Hed-kampani long faswan handred yia, oli stap givhan long yumi yet?
16 Nao Hed Kampani i sanem wan leta i go long ol Kristin we oli kamaot long ol hiten nesen long Antiok, mo Siria, mo Silisia. (15:22-35) Tabu speret wetem olgeta we oli raetem leta ya oli talem se olgeta long kongregesen oli no mas kakae ol kakae ya we man i yusum finis blong mekem wosip long narafala god. Mo oli no mas kakae blad (sam man long taem ya oli folem kastom ya blong kakae blad oltaem). Oli no mas kakae anamol we man i jokem nek blong hem nomo, we blad i stap yet long mit blong hem (plante hiten man long taem ya oli ting se mit ya i wan gudfala kakae). Mo oli no mas mekem nogud wetem woman. (Grik tok ya por·neiʹa, i minim rabis fasin long saed blong seks, we i no stret long ol rul we Baebol i stanemap long saed blong mared). Sipos olgeta oli folem ol rul ya, bambae oli harem gud tumas long saed blong speret. Ol Wetnes blong Jeova tede tu oli harem gud from we oli stap folem “ol rul ya we i mas gat.” Tok ya “!Yufala i harem gud!” (NW) Hemia wan kaen fasin we oli yusum long taem ya blong talem “Tata.” Taswe yumi no mas ting se ol rul ya oli blong blokem sik long bodi blong olgeta nomo. No gat. Taem oli ridim leta ya long kongregesen long Antiok, olgeta long kongregesen oli glad tumas, from we leta ya i leftemap tingting blong olgeta bigwan. Mo tu, long taem ya, ol man blong God long Antiok oli kam strong moa long fasin blong bilif from ol gudfala toktok blong Pol, mo Saelas, mo Banabas, mo sam narafala tu. I gud sipos yumi tu yumi lukaot sam rod blong leftemap tingting blong ol brata mo sista blong yumi.
Seken Trep Blong Ol Misinari i Stat
17. (a) ?Wanem trabol i kamaot taem oli tokrere blong mekem seken misinari trep? (b) ?Taem trabol ya i kamaot, Pol mo Banabas tufala i no mekem wanem?
17 I gat wan trabol i kamaot taem oli tokrere blong mekem wan seken misinari trep. (15:36-41) Pol i wantem se hem wetem Banabas tufala i gobak long ol kongregesen long Saepras mo Esia Maena, blong visitim bakegen ol brata long ples ya. Banabas i agri, be hem i wantem tekem kasin-brata blong hem Mak, i biaen long tufala. Be Pol i no wantem, from we bifo, Jon i no stap wetem tufala gogo en blong wok blong tufala. Long Pamfilia, hem i aot long tufala, i tanraon i gobak. Ale, nao “tufala i rao long bisnes ya.” Be bisnes ya i blong tufala ya nomo. Taswe tufala i no go askem sam elda no Hed-kampani blong jajem bisnes ya, blong wan i traem pruvum se hem i stret, mo narawan i traem pruvum se hem i stret. No gat. !Hemia i wan nambawan eksampel long yumi tede!
18. ?Taem Pol mo Banabas tufala i seraot, wanem i kamaot from? ?Store ya i save lanem yumi long wanem samting?
18 Trabol ya i mekem se tufala i seraot, tufala i go wanwan. Banabas i tekem Mak, nao tufala i go long aelan ya Saepras. Pol i jusumaot Saelas blong i biaen long hem, ale “tufala i wokbaot i gotru long Siria mo Silisia, tufala i stap mekem ol [kongregesen] oli strong.” Ating Banabas i tingting tumas long famle blong hem, ale samting ya i gat paoa long disisin we hem i mekem. I moa gud sipos hem i bin tingbaot se Pol i wan aposol, we Masta i “jusumaot hem finis,” blong hem i man blong wok blong hem. (Ol Wok 9:15) ?Olsem wanem long yumi? Store ya i save lanem yumi se yumi mas ona mo obei long tiokratik oda, mo yumi mas wok tugeta wetem “slef we i stret mo waes.”—Matyu 24:45-47, NW.
Oli Gohed Long Kwaet Fasin
19. ?Olsem wanem Timote i soemaot rod long ol yangfala Kristin tede?
19 God i no letem trabol ya i spolem pis blong olgeta insaed long kongregesen. Hem i gohed blong mekem olgeta i strong moa long fasin blong bilif. (16:1-5) Pol mo Saelas tufala i wokbaot, tufala i go long Debe mo Listra. Long ples ya, i gat wan man, nem blong hem Timote. Mama blong hem Yunis, hem i wan woman Isrel, we hem tu i bilif long Jisas. Be papa blong hem i wan man Gris, we hem i no bilif long Jisas. Timote i wan yangfala man nomo. Yumi save samting ya from we 18 no 20 yia biaen, Pol i talem long hem se: “Bambae yu no letem sam man oli stap lukluk nogud long yu, from we yu yu wan yang man nomo.” (1 Timote 4:12) “Ol brata . . . long Listra mo Ikoniam [taon ya i 29 kilomita long Listra] oli stap talem se Timote i wan gudfala man.” Hemia i min se ol man long ol taon ya oli save ol gudfala wok we Timote i stap mekem mo ol gudfala fasin blong hem tu. Ol yangfala Kristin tede tu oli mas askem long Jeova blong givhan long olgeta blong oli save gat gudnem olsem Timote. Pol i mekem sakomsaes long Timote, from we bambae tufala i go prij long ol man Jyu long haos mo long haos prea blong olgeta. Ol man ya oli save se papa blong Timote i wan man Gris. Aposol ya i no wantem mekem trabol long ol man mo woman Isrel we oli mas lanem trutok long saed blong Mesaea. Tede tu, ol Wetnes blong Jeova oli mekem evri samting we i stret long ol rul blong Baebol, blong traem pulum olkaen man oli harem gud nyus.—1 Korin 9:19-23.
20. ?Long faswan handred yia, wanem i kamaot taem ol kongregesen oli ona long leta blong Hed-kampani? ?Olsem wanem store ya i save gat paoa long yumi tede?
20 Nao Timote i biaen long Pol mo Saelas, ale trifala i gotru long ol taon, trifala i stap talemaot long ol disaepol, ol rul we Hed Kampani i putum. ?Wanem i kamaot from? I luk olsem we Luk i stap tokbaot Siria, mo Silisia, mo Galesia, taem hem i talem se: “Ol [kongregesen] oli stap kam strong moa bakegen long fasin blong bilif. Mo evri dei, namba blong ol man i stap kam antap moa.” Yes, from we oli ona long leta blong Hed Kampani, oli joen gud mo oli kasem plante blesing long saed blong speret. Naoia yumi stap long hadtaem, we ol man blong Jeova oli mas joen gud tugeta mo oli mas strong long fasin blong bilif. !Taswe gudfala eksampel blong olgeta long taem bifo i stret nomo long yumi naoia!
?Bambae Yu Yu Ansa Olsem Wanem?
◻ ?Taem Pol mo Banabas tufala i kasem trabol, tufala i mekem wanem?
◻ ?Yumi lanem wanem long tok ya: ‘Long rod blong go insaed long Kingdom blong God, yumi save kasem plante trabol’?
◻ ?Trifala stampa rul we Hed Kampani long faswan handred yia oli raetem long leta, oli save givim wanem advaes long yumi tede?
◻ ?Wanem samting i stap mekem ol Wetnes blong Jeova oli strong moa long bilif, tede olsem bifo?