Gudfala Eksampel Long Wok Blong Ol Kristin Misinari
“Yufala i mas folem fasin blong mi, olsem we mi mi stap folem fasin blong Kraes.”—1 KORIN 11:1.
1. ?Wanem sam rod long eksampel blong Jisas we ol man blong hem oli mas folem? (Filipae 2:5-9)
!HEMIA wan gudfala eksampel we Jisas i mekem long ol disaepol blong hem! Hem i glad blong lego hae ples blong hem long heven blong kamdaon long wol mo stap wetem ol sinman. Hem i bin rere blong kasem plante trabol blong sevem ol man mo, impoten moa, blong mekem nem blong Papa blong hem long heven i tabu. (Jon 3:16; 17:4) Taem hem i kasem traem long laef blong hem, Jisas i no fraet blong talem se: “Mi mi bon, mi kam long wol ya blong wan samting nomo, blong mi talemaot ol tok blong leftemap trutok.”—Jon 18:37.
2. ?From wanem taem Jisas i laef bakegen i save givim oda long ol disaepol blong hem blong gohed long wok we hem i statem?
2 Bifo long ded blong hem, Jisas i trenemgud ol disaepol blong hem blong olgeta oli save gohed blong talemaot trutok long saed blong Kingdom. (Matyu 10:5-23; Luk 10:1-16) Olsemia nao, taem hem i laef bakegen, Jisas i save givim oda ya se: “Yufala i mas go . . . blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala.”—Matyu 28:19, 20.
3. ?Olsem wanem wok blong mekem ol disaepol i gru moa, be long wanem ples wok ya i gru moa long hem?
3 Long tri mo haf yia biaen, ol disaepol blong Jisas oli obei long oda ya be oli mekem disaepol nomo long medel blong ol man Jyu, ol man Jyu we oli kam Kristin, mo ol man Sameria we oli sakomsaes. Biaen, long 36 K.T., God i mekem se gud nyus i kasem wan man we i no sakomsaes, Konilyas, mo ol famle blong hem. Long ten yia biaen, sam narafala Hiten man tu oli kam insaed long kongregesen. Be i luk olsem we wok ya i go moa long ol ples blong is Mediterenia.—Ol Wok 10:24, 44-48; 11:19-21.
4. ?Wanem samting i kamaot samwe 47-48 K.T.?
4 Ol Kristin oli nidim wan samting blong pusum no leftemap olgeta blong talemaot gud nyus long ol man Jyu mo ol Hiten man we oli stap long ol ples longwe. Taswe, samwe long 47-48 K.T., ol elda blong kongregesen blong Antiok long Siria oli kasem mesej ya we i kam long God se: “Mi mi wantem yufala i putumap Banabas mo Sol, olsem we tufala i tabu, tufala i stap blong mekem wok ya nomo we mi mi singaot tufala from.” (Ol Wok 13:2) Makemgud we long taem ya oli yusum faswan nem blong Pol, Sol. Makemgud, tu, we God i jusumaot Banabas fastaem long Pol, ating from se long taem ya Banabas i olfala moa long saed blong trutok long tufala.
5. ?From wanem store blong misinari wok blong Pol mo Banabas i givhan bigwan long ol Kristin tede?
5 Haf blong misinari wok blong Pol mo Banabas we oli raetemdaon i leftemap tingting blong ol Wetnes blong Jeova bigwan, i tru moa long ol misinari mo ol paenia we oli lego ples we oli bon long hem blong mekem wok blong God long wan narafala ples. Antap moa, sipos yumi ridim bakegen Ol Wok japta 13 mo 14 samting ya bambae i pulum moa man blong oli folem eksampel blong Pol mo Banabas blong mekem moa long impoten wok ya blong pulum ol man oli kam disaepol blong Kraes.
Aelan Blong Saepras
6. ?Wanem eksampel we tufala misinari i mekem long Saepras?
6 Kwiktaem nomo tufala misinari ya oli tekem sip long taon ya Selusia long Siria blong go long aelan blong Saepras. Taem Pol mo Banabas oli gosoa long Salamis, tufala i no letem wan samting i blokem tufala long wok blong tufala be “tufala i stap talemaot tok blong God, insaed long ol haos blong prea blong ol man Isrel.” Tufala i folem eksampel blong Kraes, taswe tufala i no glad blong stap long taon nomo mo wet blong ol man aelan oli kam luk tufala. Defren nao, tufala “i wokbaot long aelan ya, i gokros long narasaed.” Samting ya i tekem plante taem blong wokbaot mo plante defren ples tu blong slip, from we Saepras i wan bigfala aelan, mo trep we tufala i mekem i kavremap bighaf blong aelan ya.—Ol Wok 13:5, 6.
7. (a) ?Wanem gudfala samting we i kamaot long Pefos? (b) ?Samting ya i pulum yumi blong gat wanem tingting?
7 Long en blong trep ya, tufala ya i kasem wan gudfala blesing long taon blong Pefos. Gavman blong aelan ya, Sejas Polas, hem i lesin long mesej blong tufala mo “hem i bilif long tok blong God.” (Ol Wok 13:7, 12) Biaen Pol i raetem se: “Yufala i traem tingbaot. ?Taem we God i singaot yufala, yufala i wanem man? I no gat plante long yufala, we long fes blong ol man, yufala i waes man, no yufala i gat paoa, no yufala i haeman.” (1 Korin 1:26) Olsemia nao, Sejas Polas i wan long olgeta we oli gat paoa we oli lesin. Ekspiryens ya i mas leftemap tingting blong yumi evriwan, i tru moa long ol misinari, blong oli gat wan positif tingting blong talemaot gud nyus long ol haeman blong gavman, olsem we 1 Timote 2:1-4 i leftemap tingting blong yumi blong mekem. Samtaem ol haeman oli save givhan long ol man blong God.—Nehemaea 2:4-8.
8. (a) ?Wanem jenis i kamaot long Banabas mo Pol long taem ya mo biaen? (b) ?Long wanem rod Banabas i wan gudfala eksampel?
8 From paoa blong tabu speret blong Jeova, Pol i mekem bighaf blong wok blong storeyan wetem Sejas Polas, i bitim Banabas. (Ol Wok 13:8-12) Mo tu, stat long taem ya, i luk olsem we Pol i lidim wok blong tufala. (Skelem Ol Wok 13:7 wetem Ol Wok 13:15, 16, 43.) Samting ya i joen wetem wanem we God i talem long Pol taem hem i kam Kristin. (Ol Wok 9:15) Ating jenis ya i wan traem long fasin blong Banabas blong mekem tingting blong hem i stap daon. Nating se i olsem, be Banabas i wantem holem mining blong nem blong hem, “Pikinini blong Givhan,” hem i no kam kros from samting ya, be hem i sapotemgud Pol taem tufala i goraon blong mekem wok blong misinari mo biaen taem sam man Jyu we oli kam Kristin oli agensem tufala from we tufala i stap prij long ol Hiten man we oli no sakomsaes. (Ol Wok 15:1, 2) !Hemia i wan gudfala eksampel blong yumi evriwan, sem mak long olgeta we oli mekem wok blong misinari mo olgeta we oli wok insaed long ol Betel! Oltaem yumi mas rere blong akseptem ol jenis we oli kamaot long tiokratik kongregesen mo yumi mas sapotem fulwan olgeta we ogenaesesen i putumap olgeta blong lidim yumi.—Hibrus 13:17.
Flat Ples Blong Esia Maena
9. ?Yumi lanem wanem long Pol mo Banabas from strong tingting blong tufala blong go long Antiok long Pisidia?
9 Afta long Saepras, Pol mo Banabas tufala i karem sip blong go long not blong kantri ya Esia. Baebol i no talem from wanem tufala i no stap long ol ples long solwora be tufala i mekem wan long mo strong trep long samting olsem 180 kilomita i go long Pisidia blong Antiok, we i stap long medel blong flat ples blong Esia Maena. Samting ya i mekem se tufala i mas klaemap wan hil mo tufala i mas godaon long wan flat ples samwe 1,100 mita antap long level blong solwora. Wan man we i savegud Baebol J. S. Howson i talem se: “Oli savegud long ol haf blong olfala histri se ol man blong ol hil ya we i seraotem flat ples . . . stat long level ples we i stap long saot, oli no stap folem loa mo oli stap spolem ol ples.” Antap moa, tufala misinari ya oli kasem trabol from ren. “I no gat wan ples long Esia Maena,” Howson i talem, “we i gat bigfala ren we i mekem ‘wora i ron olbaot’ bitim ol hil blong Pisidia, we ol reva oli kamaot aninit long ol klif no oli ron strong i godaon long smol krik.” Ol samting ya i halpem yumi blong luksave ol kaen trep we tufala misinari ya i glad blong mekem blong talemaot gud nyus long evri ples. (2 Korin 11:26) Sem mak tede, plante long ol man blong Jeova oli gotru long ol hadtaem olsem blong kasem ol man mo talemaot gud nyus long olgeta.
10, 11. (a) ?Olsem wanem tok blong Pol i stret long olgeta we oli stap lesin? (b) ?From wanem plante man Jyu oli sapraes blong harem ol trabol blong Mesaea? (c) ?Wanem kaen laef ol man we oli lesin long Pol oli save kasem?
10 Long taem ya i gat wan haos prea blong ol man Jyu i stap long Antiok long Pisidia, tufala misinari i go long ples ya fastaem blong givim jans long olgeta ya we oli stap ridim Tok blong God blong oli akseptem gud nyus. Taem oli askem tufala blong tok, Pol i stanap mo i givim wan nambawan pablik tok. Long tok ya, hem i tokbaot ol samting we ol man we oli lesin oli intres long hem, hemia ol man Isrel mo ol hiten man we oli folem skul blong ol man Isrel. (Ol Wok 13:13-16, 26) Taem fastok blong hem i finis, Pol i talem bakegen histri blong ol man Jyu, blong mekem oli tingbaot we Jeova i bin jusum ol bubu blong olgeta mo biaen i mekem olgeta i gofri long Ijip, sem mak bakegen olsem wanem hem i halpem olgeta blong winim ol man we oli stap long Promes Lan. Biaen Pol i soemaot wanem we Jeova i mekem wetem Deved. Ol tok ya oli stretgud long tingting blong ol man Jyu blong faswan handred yia from we oli stap tingting se God bambae i putumap wan man we i kamaot long laen blong Deved olsem wan sevya mo wan rula blong olwe. Long poen ya, Pol i no fraet blong talem se: “Mo stret olsem we God i promes finis, hem i leftemap wan laen blong Deved, nem blong hem Jisas, blong hem i sevem ol man Isrel.”—Ol Wok 13:17-23.
11 Be, ol man Jyu oli ting se sevya ya i wan man blong faet we bambae i mekem olgeta i gofri long rul blong Rom mo bambae hem i leftemap nesen blong ol antap long ol narafala. Taswe, i klia se oli sapraes taem oli harem Pol i talem se ol prapa lida blong skul blong olgeta nomo oli putum Mesaea long han blong enemi blong oli kilim hem i ded. Pol i no fraet blong talem se: “Be God i mekem hem i laef bakegen finis long ded.” Kolosap long en blong tok ya, hem i soemaot long olgeta we oli stap lesin se oli save kasem wan gudfala laef. “Yufala i mas savegud tok ya, . . .” Pol i talem, “se long man ya Jisas nomo God bambae i tekemaot ol sin blong yufala. Yufala i mas save we Jisas nomo i save mekem olgeta we oli bilif long hem, oli fri long ol sin blong olgeta. Be Loa blong Moses, hem i no save mekem yufala i fri long ol sin blong yufala.” Pol i pulum olgeta we oli stap lesin blong no joen wetem olgeta we God i talem se bambae oli no wantem gudfala rod ya blong laef.—Ol Wok 13:30-41.
12. ?Wanem frut i kamaot long tok blong Pol, mo olsem wanem samting ya i leftemap tingting blong yumi?
12 !Pol i mekem wan gudfala tok we i stanap long Baebol! ?Olgeta we oli stap lesin oli mekem wanem? “I gat plante man we oli biaen long Pol mo Banabas. Ol man ya, sam oli man Isrel, mo sam oli hiten man fastaem, we biaen oli tekem skul blong ol man Isrel.” (Ol Wok 13:43) !Samting ya i leftemap tingting blong yumi tede! Ating yumi tu yumi save traehad blong gat gudhan blong talemaot trutok nating se yumi prij long pablik no yumi ansa mo yumi mekem ol tok long ol miting long kongregesen blong yumi.—1 Timote 4:13-16.
13. ?From wanem tufala misinari i mas livim Antiok long Pisidia, mo wanem kwestin i kamaot long saed blong ol nyu disaepol?
13 Ol nyuwan we oli intres long Antiok long Pisidia oli no save holem gud nyus ya blong olgeta nomo. From samting ya, “long nekis wik blong hem, long Sabat dei, kolosap olgeta man long ples ya oli kam wanples blong harem tok ya blong Masta blong yumi [Jeova, NW].” Mo biaen mesej i go kasem ol ples afsaed long taon. Yes, “tok blong Masta blong yumi [Jeova, NW] i goaot long olgeta ples raonabaot long taon ya.” (Ol Wok 13:44, 49) Plante man Jyu oli no glad long samting ya, oli jelas, ale oli pusum ol man blong sakemaot tufala misinari long taon ya. (Ol Wok 13:45, 50) ?Olsem wanem, samting ya i mekem ol nyu disaepol oli harem nogud? ?Tingting blong olgeta i foldaon mo oli lego?
14. ?From wanem ol enemi oli no finisim wok we tufala misinari i statem, mo samting ya i tijim yumi long wanem?
14 No gat, from we hemia i wok blong God. Antap moa, ol misinari oli mekem wan strong faondesen blong bilif se Masta Jisas Kraes i laef bakegen. Ale i klia se ol nyufala disaepol oli stap luk long Kraes olsem Lida blong olgeta, be i no long ol misinari. Olsemia nao, yumi ridim se “ol man blong Jisas long Antiok oli stap harem i gud tumas, mo Tabu Speret i fulap long olgeta.” (Ol Wok 13:52) Samting ya i leftemap tingting blong ol misinari mo ol narafala man blong talemaot gud nyus tede! Sipos yumi gat fasin daon mo strong long wok ya, Jeova God mo Jisas Kraes bambae tufala i blesem wok blong yumi.—1 Korin 3:9.
Ikoniam, Listra, mo Debe
15. ?Wanem plan tufala misinari i folem long Ikoniam, mo wanem ol frut we i kamaot?
15 Naoia Pol mo Banabas tufala i wokbaot samwe 140 kilomita saot is blong kasem narafala taon, Ikoniam. Fraet from ol traem i no blokem tufala blong folem sem rod ya olsem oli bin yusum long Antiok. From samting ya, Baebol i talem se: “Plante man Isrel mo plante man Gris tu oli bilif long Jisas.” (Ol Wok 14:1) Bakegen ol man Jyu we oli no akseptem gud nyus oli agensem tufala. Be tufala misinari ya oli stanap strong mo stap longtaem smol long Ikoniam blong halpem ol nyufala disaepol. Ale, taem tufala i save we ol man Jyu we oli agensem tufala oli wantem stonem tufala, wetem waes fasin Pol mo Banabas tufala i ronwe i go long nekis teritori, “Listra mo Debe” mo ol ples raonabaot.—Ol Wok 14:2-6.
16, 17. (a) ?Wanem i hapen long Pol long Listra? (b) ?Olsem wanem fasin blong God blong yusum aposol Pol i pulum wan yang man blong Listra?
16 Tufala i stanap strong “tufala i stap talemaot gud nyus” long nyu teritori ya we i no gat wan man i prij long hem yet. (Ol Wok 14:7) Taem ol man Jyu blong Antiok long Pisidia mo Ikoniam oli harem samting ya, oli kam long Listra mo pulum ol man blong stonem Pol. From we i no gat taem blong ronwe, ol ston i kasem Pol mo ol enemi blong hem oli ting se hem i ded. Oli pulum hem i go afsaed long taon.—Ol Wok 14:19.
17 ?Traem tingbaot olsem wanem samting ya i mekem ol nyufala disaepol oli harem nogud? !Be olgeta oli sapraes tumas, Pol hem i stanap taem oli raonem hem! Baebol i no tokbaot sipos yangfala man ya we nem blong hem Timote i wan long ol nyufala disaepol ya. Samtaem, i tru se Timote i harem olsem wanem God i stap yusum Pol mo samting ya i gat paoa long yang tingting blong hem. Pol i raetem long namba tu leta blong hem long Timote: “Yu save finis ol toktok blong mi, ol fasin blong mi, mo wanem samting mi mi putum laef blong mi long hem. . . . ol samting we mi kasem long Antiok mo Ikoniam mo Listra, we ol man oli stap ronem mi, oli stap mekem i nogud olgeta long mi. Be Masta blong yumi i tekemaot mi long olgeta samting ya, i sevem mi.” (2 Timote 3:10, 11) Samting olsem wan no tu yia biaen we oli stonem Pol, hem i gobak long Listra mo hem i faenem se yang Timote i wan eksampel long ol Kristin, “ol brata blong yumi long Listra mo Ikoniam oli stap talem se Timote i wan gudfala man.” (Ol Wok 16:1, 2) Nao Pol i jusum Timote blong go wetem hem. Samting ya i halpem Timote blong gru bigwan long saed blong speret, mo biaen hem i naf blong Pol i sanem hem blong go visitim ol defren kongregesen. (Filipae 2:19, 20; 1 Timote 1:3) Olsemia nao, tede, olgeta we oli strong blong mekem wok blong God oli gud eksampel blong ol yangfala, plante long olgeta taem oli gruap oli mekem wok blong God, olsem Timote.
18. (a) ?Wanem i hapen long tufala misinari long Debe? (b) ?Tufala i gat jans blong mekem wanem, be tufala i jusum wanem rod?
18 Oli traem kilim Pol i ded long Lystra, nao long nekis moning blong hem, hem i go long Debe wetem Banabas. Long taem ya, i no gat wan enemi i folem tufala, mo Baebol i talem se ‘tufala i stap mekem plante disaepol.’ (Ol Wok 14:20, 21, NW) Taem tufala i stanemap wan kongregesen long Debe finis, Pol mo Banabas tufala i mas mekem wan disisin. Long Debe, wan rod we ol man Rom oli mekem i gotru kasem Tasas. Long ples ya tufala i save kasem Siria long Antiok bakegen long smol taem nomo. Hemia i wan gudfala rod blong gobak, mo tufala misinari ya i save harem se naoia tufala i nidim spel. Be taem tufala i folem eksampel blong Masta blong tufala, Pol mo Banabas i luksave se i gat nid we i bigfala moa long narafala ples. —Mak 6:31-34.
Mekem Wok Blong God Fulwan
19, 20. (a) ?Olsem wanem Jeova i blesem tufala misinari taem tufala i gobak long Listra, Ikoniam, mo Antiok? (b) ?Samting ya i lanem ol Wetnes blong Jeova tede long wanem samting?
19 Tufala misinari ya i no folem sot rod blong gobak long hom, be tufala i strong blong gobak mo visitim bakegen ol taon ya we oli bin ronem tufala long hem. ?Olsem wanem, Jeova i blesem tufala from we tufala i no tingbaot tufala nomo blong halpem ol nyufala sipsip? Yes, taswe store long Baebol i talem se tufala i gohed blong “mekem tingting blong ol man blong Jisas i strong moa, tufala i stap givim tok long olgeta blong mekem olgeta oli stanap strong long fasin blong bilif.” Tufala i talem long ol nyu disaepol se: “Long rod blong go insaed long nyufala wol ya we God i king long hem, yumi save kasem plante trabol.” (Ol Wok 14:21, 22) Pol mo Banabas tufala i talem long olgeta bakegen tu se God i singaot olgeta blong bambae oli joen long Kingdom blong God we bambae i kam. Tede, yumi mas leftemap tingting blong ol nyu disaepol long sem fasin. Yumi save mekem olgeta oli strong blong stanap longtaem long ol traem sipos yumi pulum olgeta blong tingbaot gudfala laef ya we i no save finis long wol aninit long rul blong sem Kingdom ya blong God we Pol mo Banabas oli talemaot.
20 Bifo we Pol mo Banabas i lego ol taon ya wanwan, tufala i halpem ol lokol kongregesen blong oli save rere gud. I klia se tufala i trenem ol man we oli nafgud mo putumap olgeta olsem elda. (Ol Wok 14:23) Samting ya i mekem se wok i save go moa. Sem mak tede, ol misinari mo ol narafala tu, taem oli halpem olgeta we oli no gat ekspiryens blong gru inaf blong karem responsabiliti, samtaem oli go long narafala ples we i gat bigfala nid long hem mo gohed long gudfala wok blong olgeta.
21, 22. (a) ?Wanem i hapen biaen we Pol mo Banabas tufala i finisim misinari wok blong tufala? (b) ?Wanem ol kwestin ya we oli kamaot from samting ya?
21 Taem ol misinari oli gobak long Antiok long Siria, oli save haremgud tumas. Tru ya, Baebol i soemaot we “tufala i mekem ol wok ya we tufala i jes finisim” wok ya we God i givim long tufala blong mekem. (Ol Wok 14:26) Yumi save se ol ekspiryens blong tufala i mas mekem “ol brata blong yumi long ples ya oli harem gud tumas.” (Ol Wok 15:3) ?Be olsem wanem long fyuja? ?Olsem wanem, bambae tufala i spel mo no moa traehad blong mekem sam wok, olsem we tufala i ting se wok we tufala i mekem finis i naf? No gat. Biaen we tufala i go luk hed kampani long Jerusalem blong harem disisin ya long saed blong sakomsaes, tufala i goaot bakegen long ol misinari trep blong tufala. Naoia tufala i seraot. Banabas i karem Jon Mak mo tufala i go long Saepras, be Pol i faenem wan nyu fren blong hem, Saelas, mo tufala i go long Siria mo Silisia. (Ol Wok 15:39-41) Long trep ya nao, Pol i jusum yang Timote mo i tekem hem i go wetem hem.
22 Baebol i no tokbaot samting we i kamaot long namba tu trep blong Banabas. Long saed blong Pol, hem i gohed long nyu teritori mo i stanemap ol kongregesen long faef taon—Filipae, Berea, Tesalonaeka, Korin, mo Efesas. ?Wanem stampa rod we Pol i yusum blong kasem ol frut ya? ?Ol Kristin disaepol blong tede oli folem sem rod ya?
?Yu Yu Rimemba?
◻ ?From wanem Jisas i wan nambawan eksampel blong folem?
◻ ?Long wanem rod Banabas i wan eksampel?
◻ ?Yumi lanem wanem long tok blong Pol long Antiok long Pisidia?
◻ ?Olsem wanem Pol mo Banabas tufala i finisim wok blong tufala?
[Tok Blong Pija Long Pej 15]
Fasin blong aposol Pol blong stanap strong long ol trabol we hem i kasem i gat strong paoa long tingting blong yang man ya Timote