Leftemap Tingting Blong Ol Narafala Taem Dei i Kam Kolosap
“Oltaem yumi mas leftemap tingting blong ol narafala. Samting ya, yufala i mas mekem moa, taem yufala i luk we dei i kam kolosap finis.”—HIBRUS 10:25, NW.
1, 2. ?Wanem dei we i kam kolosap finis? ?Ol man blong Jeova oli mas gat wanem tingting?
TEDE, ol man we oli stap singaot se, ‘Yufala i kam, yufala i dring long wora blong laef,’ oli no stap haed wanwan. No gat. Taem oli luk we bigfala dei blong Jeova i kam kolosap finis, oli harem advaes blong Baebol we i talem se: “I gud yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego fasin blong joen wanples, olsem we sam long yumi oli mekem finis. Oltaem yumi mas leftemap tingting blong ol narafala. Samting ya, yufala i mas mekem moa, taem yufala i luk we dei i kam kolosap finis.”—Hibrus 10:24, 25, NW.
2 Profet tok blong Baebol i talem se “dei” ya hem i “dei blong Jeova.” (2 Pita 3:10, NW) Jeova, hem i Hae God we i gat olgeta paoa. Taswe i no gat wan narafala dei samtaem we i bigwan moa i bitim dei blong hem. (Ol Wok 2:20) Long dei ya bambae hae rul blong God i win. Bambae i soemaot se God nomo i gat raet blong rulum olgeta samting. Dei ya we i impoten moa i bitim ol narafala dei, i kam kolosap finis.
3. ?Long faswan handred yia, olsem wanem dei blong Jeova i stap kam kolosap long ol Kristin? ?Olsem wanem long yumi tede?
3 Long faswan handred yia, aposol Pol i talem long ol Kristin long taem ya se dei blong Jeova i stap kam kolosap. Olgeta oli wantem luk dei ya. Be long taem ya, dei ya i stap 1,900 yia long fyuja. (2 Tesalonaeka 2:1-3) Nating we dei ya bambae i kamtru longtaem long fyuja nomo, be tingting blong olgeta i mas stap strong from we dei ya bambae i kam. Mo sipos ol Kristin oli gohed strong long bilif blong olgeta, oli save kasem ol blesing we bambae oli kamaot long dei ya. (2 Timote 4:8) Traem tingbaot. Pol i talem long ol Kristin long taem ya se dei ya i kam kolosap. ?Olsem wanem long yumi tede? Tru ya, dei blong Jeova i stap kolosap tumas. Yumi glad tumas from we yumi luk se ol nambawan profet tok blong Baebol we oli stap kamtru naoia, oli pruvum samting ya. I no longtaem, bambae nem blong God blong yumi, Jeova, i antap long ol narafala nem. Bambae hem i tabu blong olwe.—Luk 11:2.
Nem Blong God i Leftemap Tingting Blong Yumi
4. ?Revelesen 19:6 i talem se hu bambae i kam King? ?Olsem wanem yumi luksave nem blong King ya?
4 Olgeta man long wol oli mas tingbaot nem blong God. Today’s English Version i talem se: “!Yumi presem God! From we Masta ya, God ya blong yumi we i gat olgeta paoa, hem nomo i King.” (Revelesen 19:6) Baebol ya we oli tanem long taem blong yumi i talem se hem i Masta, hem i God we i gat olgeta paoa. Baebol ya i no talem nem blong God ya we hem i King blong ol man. Plante narafala Baebol tu we oli tanem i no longtaem oli no talem nem ya. Be nem blong God i stap insaed long tok ya “!Haleluia!” (“Presem Jah” no “Presem Jeova”) Tok ya, yumi save faenem long Revelesen 19:6 long ol Baebol ya: Revised Standard Version, New International Version, mo Baebol blong Moffat. Plante handred yia finis, ol man we oli tanem ol Baebol, oli stap haedem nem blong God, oli no talemaot klia. Be bambae yumi luk we long taem bifo mo tede tu, nem ya i leftemap tingting blong ol man blong God bigwan.
5, 6. (a) ?From wanem Moses i nidim blong save nem blong God ya we i sanem hem? (b) ?Ol man Isrel oli mas harem olsem wanem taem Moses i talemaot nem blong God long olgeta?
5 Long taem bifo, Hae God i sanem Moses i go long ol man Isrel we oli stap olsem ol slef long Ijip. Moses i go long olgeta, be olgeta oli tingbaot se hu nao i sanem Moses. Moses i save se ol man Jyu ya we oli harem nogud bambae oli wantem save nem blong God ya we i sanem hem. Yumi save ridim store ya long Eksodas 3:15, (NW): “God i talem bakegen long Moses se: ‘Yu mas talem long ol pikinini blong Isrel se: “Jeova, we i God blong ol bubu blong yufala bifo, God blong Ebraham, God blong Aesak, mo God blong Jekob, hem nao i sanem mi long yufala.” Nem ya blong mi bambae i stap we i no save lus samtaem. Mo olgeta we bambae oli kamaot biaen long yufala bambae oli singaot mi long nem ya.’ ”
6 Taem Moses i talemaot samting ya long ol man Isrel, yumi save se olgeta oli mas harem gud. From we God ya we hem nomo i trufala God, Jeova, hem i promes blong sevem olgeta. Olgeta oli mas harem gud taem oli tingbaot we oli save frengud wetem God, oli save luk fasin blong hem, taem bambae hem i soemaot mining blong nem blong hem long olgeta. !Yes, hem i no flas, hem i no haed long olgeta!—Eksodas 3:13; 4:29-31.
7. (a) ?Olsem wanem yumi save se ol disaepol blong Jisas oli save nem blong God? (b) ?Olsem wanem oli stat haedem mo daonem nem blong God?
7 Nem blong God—Jeova—mo mining blong hem, i leftemap tingting blong ol disaepol blong Masta ya Jisas Kraes tu. (Jon 17:6, 26) Taem Jisas i stap mekem minista wok blong hem long wol, hem i neva daonem no haedem nem blong God. Hem i neva traem putum nem blong hem, Jisas, i stap antap long nem blong God. No gat. Profet tok blong Baebol i tokbaot taem we bambae plante man oli lego trufala Kristin bilif, oli agensem hem. Hemia nao taem we oli stat haedem mo daonem nem blong God. Yes, kolosap oli no moa yusum nem ya. (Ol Wok 20:29, 30) Taem ol man we oli talem se oli Kristin oli putum nem blong Pikinini blong God fastaem long nem blong Papa, oli faenemaot se oli no moa kolosap long Papa long wosip blong olgeta. Oli no moa frengud wetem hem olsem we oli stap insaed long famle blong hem. Taswe oli no save harem gud long wosip blong olgeta.
8. Ol man blong God oli tekem nem ya ‘ol Wetnes Blong Jeova.’ ?I stat long taem ya kam kasem naoia, samting ya i mekem olgeta oli harem olsem wanem?
8 Yia ya 1931 i wan hapi taem tumas, from we ol Intanasnal Baebol Studen we oli joen wetem Wajtaoa Sosaete oli tekem nem ya ‘ol Wetnes Blong Jeova.’ Oli glad tumas, be i no hemia nomo. Nem ya i leftemap tingting blong olgeta tu. From samting ya, ol Baebol Studen ya we oli tekem nyufala nem ya, oli save leftemap tingting blong ol brata blong olgeta. Kam kasem tede, oli stap mekem olsem.—Ridim Aesea 43:12.
9. ?Ol trufala Kristin tede oli tingting olsem wanem long Hemia we oli Wetnes blong hem?
9 From samting ya, ol trufala Kristin tede oli luk se i stret nomo we oli talemaot nem blong Hemia we oli Wetnes blong Hem. Lida blong olgeta, Jisas Kraes, hem i mekem olsem taem hem i stap long wol. (Revelesen 1:1, 2) Yes, ol Wetnes oli talemaot hem se hem nomo, nem blong hem Jeova.—Ol Sam 83:18.
Fulap Long Glad Mo Tabu Speret
10-12. (a) ?Wanem frut blong tabu speret taem hem i kamaot long ol man blong Jisas? (b) ?Glad i pusum ol Wetnes blong Jeova blong mekem wanem long ol brata blong olgeta?
10 Kolosap long taem we Jisas Kraes i lego ol aposol blong hem, i go antap long heven, hem i talem long olgeta se: “Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong Tabu Speret. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo wol ya i finis.”—Matyu 28:19, 20.
11 Hem i talem se ol nyufala Kristin oli mas tekem baptaes long nem blong tabu speret. Tabu speret ya i no wan man. Hem i bigfala paoa blong Jeova God. God i yusum paoa ya tru long Jisas Kraes. Long Pentekos, Jeova God, tru long Jisas Kraes, i kafsaedem tabu speret long ol man we oli givim laef blong olgeta blong folem Jisas Kraes. (Ol Wok 2:33) Olgeta oli fulap long tabu speret. Mo wan frut blong tabu speret ya, hemia glad. (Galesia 5:22, 23; Efesas 5:18-20) Glad i save givim paoa long man. Hem i save mekem hem i girap, i go moa. Ol disaepol blong Kraes oli mas fulap long glad ya we tabu speret i givim. Prea blong aposol Pol i stret nomo, i talem se: “God, hem i stampa blong fasin ya we yumi save mekem tingting blong yumi i strong. Mo hemia prea blong mi, we hem bambae i mekem yufala i glad tumas, nao yufala i gat pis long tingting blong yufala oltaem, from we yufala i bilif long hem. Nao bambae yufala i save putum tingting blong yufala i stap strong moa long hem oltaem, from we Tabu Speret i stap givim paoa long yufala.”—Rom 15:13.
12 Tabu speret we i givim glad i fulap long ol Wetnes blong Jeova tede. From we glad ya i pusum olgeta wetem “bigfala kampani” tu, oli wantem leftemap tingting blong ol brata blong olgeta long medel blong wan wol we i no glad nating. Oli gat sem tingting olsem aposol Pol, we hem i talem se hem i wantem joen wetem ol brata blong hem, ‘blong bambae bilif blong olgeta i save givhan long hem, olsem we bilif blong hem tu i save givhan long olgeta.’—Revelesen 7:9, 10, NW; Rom 1:12; 14:17.
Fulap Samting Blong Harem Gud From
13. ?Wanem ol samting we yumi save harem gud long olgeta, nao yumi save leftemap tingting blong ol narafala from?
13 Setan i rulum wol, i bos long hem, mo i agensem evri samting we i stret. Ol Kristin oli mas laef long rabis wol ya. Taswe oli mas leftemap tingting blong ol narafala insaed long Kristin kongregesen long wol, we tabu speret blong Jeova God i fulap long hem. (Hibrus 10:24, 25; Ol Wok 20:28) Yumi gat plante samting blong harem gud from. Yumi glad tumas we yumi gat stret save long saed blong Jeova mo Pikinini blong Hem mo paoa we tufala i yusum, hemia tabu speret. !Yumi glad tumas long gudfala hop we oli givim long yumi! Taswe wosip blong yumi i fulap long glad. Aposol Pol i talem long ol Kristin we hem i raetem leta blong hem long ol, se oli mas leftemap tingting blong ol narafala long kongregesen. Oli mas mekem tingting blong olgeta i strong moa blong holemtaet bilif blong olgeta we i tabu tumas. Samting ya, oli mas ‘mekem moa taem oli luk we dei i kam kolosap finis.’ Taem bambae ol paoa blong politik long wol oli agensem ol gyaman Kristin skul, nao oli spolem olgeta wetem ol narafala gyaman skul tu, long taem ya nao bambae yumi nidim blong leftemap tingting blong ol brata blong yumi moa, i bitim bifo.
14. ?Tede hu ya i mas leftemap tingting blong ol narafala? ?Olsem wanem?
14 Ol elda oli stap leftemap tingting blong olgeta long ol kongregesen wanwan. Be hemia i no wok blong ol elda nomo. Olgeta Kristin oli mas leftemap tingting blong ol narafala long kongregesen, olsem Hibrus 10:25 i talem. Hemia wan mak blong ol trufala Kristin. ?Sipos yu yu memba blong wan kongregesen, yu yu leftemap tingting blong ol narafala long kongregesen? Maet yu yu ting se: ‘?Olsem wanem? ?Mi mi mas mekem wanem blong leftemap tingting blong ol narafala?’ Faswan samting: Sipos yu yu kam long olgeta miting, mo yu sapotem Kristin kongregesen fulwan, samting ya i save leftemap tingting blong ol narafala brata mo sista blong yu. Mo tu, taem yu luk we ol narafala long kongregesen oli stap kam evri taem long ol miting, ating samting ya i stap leftemap tingting blong yu tu. Mo tu, taem oli luk we yu yu stap stanap strong long bilif blong yu, samting ya i save leftemap tingting blong olgeta. Nating we yu yu stap kasem traem mo trabol long Kristin laef blong yu, be sipos oli luk we yu yu stap gohed nomo, yu no save lego long Kristin rod ya, samting ya i save givim paoa long olgeta.
Blokem Ol Samting We Setan i Yusum Blong Daonem Tingting Blong Yumi
15. ?From wanem Devel Setan i “kros tumas”? ?Hem i kros moa long hu?
15 I no yumi nomo we i save se dei blong Jeova i kolosap finis. Devel Setan i save samting ya tu. Revelesen 12:12 i talem se ol trabol long wol oli kamaot from we “Setan i kamdaon finis long yufala, mo hem i kros tumas, from we i save, i gat smol taem nomo blong hem i stap yet.” Revelesen 12:17 i talem se hem i kros moa long olgeta we “oli stap obei long ol loa blong God, mo we oli stap holem trutok we Jisas i wetnes long hem se i tru.” !Tru ya, Setan i wantem mekem tingting blong yumi i foldaon! Mo hem i savegud ol rod blong mekem olsemia. Hem i save ol slak fasin mo trabol blong yumi, mo hem i save yusum ol samting ya blong daonem tingting blong yumi.
16. ?From wanem Setan i yusum rod ya we hem i mekem tingting blong man i foldaon?
16 ?From wanem Setan i stap yusum rod ya we hem i mekem tingting blong yumi i foldaon? From we plante taem finis hem i winim man long rod ya. Wan man i save stanap strong mo winim ol bigfala traem mo trabol we hem i kasem. Be biaen, maet hem i save foldaon long trap ya we tingting blong hem i kam slak. Setan i wantem jikim Jeova God. Mo hem i traehad blong pruvum se hem i save mekem ol man oli lego wosip blong God. (Proveb 27:11; Ridim Job 2:4, 5; Revelesen 12:10.) Sipos hem i save mekem tingting blong yu i foldaon, hem i save mekem se yu yu kam slak long wok blong God. Mo maet i save mekem se yu yu stop olgeta, yu no moa talemaot gud nyus blong Kingdom.—2 Korin 2:10, 11; Efesas 6:11; 1 Pita 5:8.
17. ?Long taem blong Moses, wanem nogud frut i kamaot from we tingting blong olgeta i foldaon?
17 Tingbaot ol man Isrel taem oli stap long Ijip. Traem tingbaot ol nogud frut we i kamaot long olgeta from we tingting blong olgeta i foldaon. Taem fastaem Moses i tok long Fero, biaen Fero i mekem i hevi moa long ol man Isrel. Hem i strong moa long olgeta. Ale, God i talem long Moses blong leftemap tingting blong ol man Isrel, se bambae hem i sevem olgeta, bambae hem i jusumaot olgeta olsem ol man blong hem, bambae i mekem olgeta oli fri, mo bambae i givim long olgeta graon ya we hem i promes finis. Ale, Moses i talem ol samting ya long ol man Isrel. Be Eksodas 6:9 i talem se: “Be oli no save lesin long hem nating, from we tingting blong olgeta i foldaon finis from ol hadwok ya we ol man Ijip oli stap fosem olgeta blong oli mekem.” Tingting ya blong olgeta i mekem tingting blong Moses i kam slak tu. Gogo Jeova i tok long Moses, i leftemap tingting blong hem, i pulum hem blong go tok long Fero olsem God i talem long hem finis.—Eksodas 6:10-13.
18. ?From wanem ol man blong God oli mas traehad blong blokem fasin we Setan i yusum blong daonem tingting blong olgeta?
18 Devel Setan i savegud ol nogud frut we oli save kamaot taem tingting blong wan man blong God i foldaon. Proveb 24:10 i talem se: “?Yu yu letem tingting blong yu i foldaon long dei blong trabol? Paoa blong yu bambae i smol nomo.” Yumi stap kolosap kolosap tumas long en blong rabis wol ya. Taswe yumi nidim paoa, yumi nidim we yumi strong long saed blong speret. Yumi sinman, yumi gat plante slak fasin, mo yumi mestem plante taem. Ol samting ya oli save blokem yumi, mo i hadwok blong yumi winim ol samting ya. Be antap long ol samting ya, Setan i save yusum ol mastik blong yumi blong daonem yumi moa. Taswe yumi nidim sam samting blong givhan long yumi.
Trastem Sakrafaes Blong Kraes
19. ?Wanem samting i save givhan long yumi blong no letem tingting blong yumi i foldaon? ?Olsem wanem?
19 Samting we Jeova i mekem taem hem i givim Jisas Kraes olsem wan sakrafaes, i save givhan long yumi bigwan. Yumi save winim ol samting we i daonem tingting blong yumi sipos yumi trastem sakrafaes blong Jisas. Be sipos yumi no tinghae long bigfala blesing ya, yumi save foldaon. Yes, yumi sinman yet, taswe bambae yumi mestem yet long plante rod. Be yumi no mas letem tingting blong yumi i foldaon from. I nogud we tingting blong yumi i no moa strong, nao yumi stop long wok blong Jeova, ale yumi foldaon long trap ya blong Setan. Yumi save se sakrafaes blong Jisas i kavremap ol sin blong yumi fulwan. Hem i save tekemaot sin. Sipos yumi stap long medel blong “bigfala kampani” yumi save bilif fulwan se yumi save mekem klos blong yumi oli waet sipos yumi wasem olgeta long blad blong Smol Sipsip.—Revelesen 7:9, 14, NW.
20. ?Olsem wanem Revelesen 12:11 i soemaot se yumi save winim bigfala man blong daonem tingting blong yumi, Devel Setan?
20 Revelesen 12:10 i talem se Setan “i agensem ol brata blong yumi, we long dei mo long naet hem i stap talemaot ol poen blong hem long olgeta long fes blong God.” ?Olsem wanem yumi save winim rabis man ya we i agensem yumi mo i daonem yumi olsemia? Long sem japta, vas 11 i givim ansa, i se: “Ol brata blong yumi oli faetem hem, oli winim hem finis, long paoa blong blad blong Smol Sipsip ya, mo long paoa blong trutok we oli stap wetnes long hem se i tru. Olgeta oli winim hem from we oli no tingbaot laef blong olgeta tumas, oli rere nomo blong ded.” Ale ol man blong Jeova oli mas trastem fulwan blad blong Smol Sipsip ya, we hem i givim blong pemaot yumi. Holemtaet gudfala tingting we yu kasem from wok blong prij. Talemaot gud nyus blong Kingdom blong God oltaem, long olgeta man we oli wantem harem.
21. ?Maet yumi no luksave, be olsem wanem yumi save givhan long Setan long wok blong daonem tingting blong ol brata blong yumi?
21 Ating yumi no luksave, be samtaem yumi save givhan long Setan long wok blong hem blong daonem tingting blong ol brata blong yumi. ?Olsem wanem? Yumi save tok agens long olgeta, no maet yumi strong tumas long olgeta, no maet yumi traem mekem olsem we yumi stret man long fes blong olgeta. (Eklesiastis 7:16) Yumi evriwan i sot mo slak long sam fasin. Yumi no mas yusum ol slak fasin blong ol brata blong yumi olsem Devel Setan i yusum olgeta. Long defren fasin, taem yumi tokbaot ol brata blong yumi mo kongregesen blong ol man blong Jeova, yumi mas yusum ol gudfala toktok we i leftemap tingting blong narafala. Yumi wantem mekem ol narafala oli harem gud long hat blong olgeta. Fasin ya bambae i blokem fasin blong daonem tingting blong narafala.
Leftemap Tingting Blong Ol Narafala Taem Dei i Kam Kolosap Moa
22, 23. (a) ?From wanem yumi no mas ting se ol elda nomo oli gat wok blong leftemap tingting blong ol narafala? (b) ?Olsem wanem yumi save leftemap tingting blong olgeta we oli stap lukaot long Kristin kongregesen?
22 Yumi mas gat strong tingting, blong oltaem yumi leftemap tingting blong narafala taem yumi luk we dei i kam kolosap moa. Yu mas gat strong bilif mo gudfala toktok, nao yu save leftemap tingting blong olgeta. Long saed ya, yumi mas folem eksampel blong Jeova mo Masta blong yumi Jisas Kraes. Yumi no mas ting se ol elda long kongregesen nomo oli gat wok blong leftemap tingting blong ol narafala. No gat. Samtaem ol elda oli nidim we ol narafala oli leftemap tingting blong olgeta tu. Olgeta oli olsem ol narafala long kongregesen. Oli gat sam slak fasin, mo oli sot long sam fasin tu. Oli hadwok blong lukaotgud long famle blong olgeta, mo blong winim ol trabol we oli stap kasem long wol ya we i stap kam moa nogud evri dei. Mo antap long ol samting ya, oli stap wari long olgeta long kongregesen, olsem Pol i talem. (2 Korin 11:28, 29) Yes, wok blong olgeta i had. Olgeta tu oli nidim we yumi leftemap tingting blong olgeta.
23 Yumi save leftemap tingting blong olgeta we oli lukaot long Kristin kongregesen bigwan sipos yumi letem olgeta oli lidim yumi, mo yumi wokgud wetem olgeta. Sipos yumi mekem olsemia, yumi stap obei long advaes blong Hibrus 13:17, se: “Yufala i mas ona long ol man we i stap lidim yufala, mo yufala i mas obei long ol tok blong olgeta. Olgeta ya oli stap lukaot long Kristin laef blong yufala, we oli no save spel, mo bambae oli mas talemaot long God we oli holem wok ya blong olgeta olsem wanem. Yufala i mas mekem olgeta oli harem gud long wok ya blong olgeta. Sipos yufala i stap mekem olgeta oli harem nogud long wok ya, fasin ya bambae i no givhan long yufala nating.”
24. ?Long taem ya we i gat plante samting blong daonem tingting blong yumi, yumi mas mekem wanem? ?From wanem?
24 Long taem blong yumi, i gat plante samting blong mekem tingting blong yumi i foldaon. Hat blong ol man i slak, mo oli fraet long ol samting we oli stap kamaot long wol, olsem Jisas i talem finis. (Luk 21:25, 26) From we i gat plante tumas trabol blong daonem tingting blong yumi tede, taswe oltaem nomo yumi evriwan i mas “leftemap tingting blong ol narafala. Samting ya, yumi mas mekem moa, taem yumi luk we dei i kam kolosap finis.” Yes, yumi mas harem gudfala advaes we aposol Pol i talem long 1 Tesalonaeka 5:11, i se: “Yufala i mas stap toktokgud long yufala blong mekem tingting blong yufala i strong, mo yufala i mas givgivhan long yufala, olsem we yufala i stap mekem naoia.”
?Bambae Yu Yu Ansa Olsem Wanem?
◻ ?From wanem ol Kristin oli mas leftemap tingting blong ol narafala Kristin moa naoia, i bitim bifo?
◻ ?Olsem wanem save long saed blong nem blong God i leftemap tingting blong ol man blong Jeova?
◻ ?Olsem wanem yumi wanwan i save leftemap tingting blong narafala?
◻ ?Maet yumi no luksave, be olsem wanem yumi save givhan long Setan long wok blong hem blong daonem tingting blong ol brata blong yumi?
[Tok Blong Pija Long Pej 21]
Ol elda oli lidim wok blong leftemap tingting blong olgeta long ol kongregesen.