Yumi Rere Oltaem Long Dei Blong Jeova

Ol Stampa Poen Blong Fas Tesalonaeka

!DEI blong Jeova! Ol Kristin blong Tesalonaeka bifo oli ting se dei ya i kolosap nomo, bambae hem i kamtru long taem blong olgeta. ?Tingting blong olgeta i stret? ?Wetaem dei ya bambae i kam? Poen ya nao, aposol Pol i tokbaot long faswan leta blong hem long ol man Tesalonaeka. Pol i sanem leta ya long olgeta taem hem i stap long taon blong Korin, raonabaot long yia 50 K.T.a

Pol mo Saelas tufala i putumap wan kongregesen long Tesalonaeka, wan hedkwota blong gavman blong ol man Rom long Masedonia. (Ol Wok 17:​1-4) Samtaem afta, long faswan leta blong hem long ol man Tesalonaeka, Pol i tokbaot bakegen gudfala wok we ol Kristin ya oli mekem, hem i pulum tingting blong olgeta blong oli gohed strong mo hem i tokbaot dei blong Jeova. Yumi tu yumi save kasem plante gudfala advaes from leta we Pol i raetem. Samting ya i impoten tumas from we dei blong Jeova i kolosap nomo naoia.

Pol i Leftemap Tingting Blong Olgeta

Fastaem, Pol i talemaot sam gudfala tok blong leftemap tingting blong ol man Tesalonaeka. (1:​1-10) Pol i tok olsem from we olgeta oli mekem gudfala wok mo oli stanap strong. Be tu, Pol i stap tokbaot gudfala wok blong olgeta from we olgeta ‘oli stap folem rod ya we ol Kristin oli folem mo we Masta blong yumi tu i folem. Taem we oli kasem tok ya blong gud nyus, i tru se olgeta i kasem plante trabol, be tabu speret i mekem olgeta oli harem gud tumas.’ ?Yu tu yu stap tokbaot gudfala wok we ol narafala oli mekem? Pol i mekem olsem. ?Olsem wanem long yu?

Aposol ya i livim wan gudfala eksampel i stap. (2:​1-12) Nating se ol man long Filipae oli mekem nogud long hem, ‘be God blong yumi i mekem tingting blong hem i strong blong kam talemaot gud nyus’ long ol man Tesalonaeka. Hem i no letem fasin blong mekem flas, fasin blong ronwe taem i gat trabol, mo fasin blong leftemap hem wan, yes, hem i no letem ol nogud fasin ya oli winim hem. Hem i ronwe long ol fasin ya. Hem i no wantem we olgeta oli kasem trabol long saed blong mane from we hem i stap wetem olgeta, no gat. Be hem i kaen gud long olgeta olsem wan mama we i lukaotgud long pikinini blong hem. !Rili, Pol i wan gudfala eksampel blong ol elda tede!

Afta, Pol i talem sam tok we i leftemap tingting blong ol man Tesalonaeka blong oli stanap strong taem we oli kasem trabol. (2:13 kasem 3:13) Olgeta oli winim finis sam trabol we ol man ples blong olgeta oli mekem long olgeta, mo Timote i givim gudfala ripot long Pol. Timote i talem long Pol se ol Kristin ya oli gohed strong long saed blong speret. Pol i prea blong mekem se olgeta oli laeklaekem moa ol fren blong olgeta mo hem i wantem se hat blong olgeta i kam strong moa. Long sem fasin tede, ol Wetnes blong Jeova oli prea blong ol fren blong olgeta long bilif we oli kasem trabol, oli leftemap tingting blong olgeta sipos oli gat rod, mo oli harem glad from ol gudfala ripot we i pruvum se ol fren blong ol oli fasgud long God.

!Yumi Wekap Oltaem Long Saed Blong Speret!

Nao ol man Tesalonaeka oli kasem wan advaes. (4:​1-18) Olgeta ya oli mas mekem God i glad moa long olgeta, oli mas soemaot fasin lav long ol brata blong olgeta mo oli mas wok wetem han blong olgeta blong kasem ol samting we oli nidim. Be moa yet, oli mas leftemap tingting blong olgeta, se taem we Jisas i kamtru, bambae hem i givim laef bakegen long ol dedman we tabu speret i makemaot. Bambae olgeta nao oli girap fastaem long ded mo oli go joen wetem hem long heven. Biaen, taem ol laswan man we tabu speret i makemaot oli ded mo oli girap bakegen long ded, bambae oli go mitim Jisas mo olgeta we oli girap finis long ded blong kasem laef long heven.

Biaen, Pol i tokbaot dei blong Jeova mo hem i talemaot sam moa advaes bakegen. (5:​1-28) Bambae dei blong Jeova i kam olsem wan stilman, stret afta long bigfala krae ya, “!Pis mo seftaem!” From samting ya nao, ol man Tesalonaeka oli mas stap wekap long saed blong speret, oli mas soemaot lav mo bilif, from we fasin ya i olsem sil blong blokem ara. Mo oli mas trastem promes we God i mekem blong sevem olgeta, from we fasin ya i olsem hat blong faet blong ol. Olgeta ya oli mas gat ona long olgeta we oli stap long hed blong kongregesen mo oli no mas mekem rabis fasin. Yumi tu yumi mas mekem sem mak nomo long olgeta tede.

Faswan leta blong Pol long ol man Tesalonaeka i mas pulum yumi blong yumi tokbaot gudfala wok we ol fren blong yumi long bilif oli mekem, mo yumi mas leftemap tingting blong ol brata sista long kongregesen. Leta ya i mas pusum yumi blong soemaot gudfala rod long saed blong ol fasin mo ol tingting blong yumi. Mo tu, olgeta kaonsel we i stap long leta ya oli mas halpem yumi blong yumi rere oltaem from dei blong Jeova we i stap kam.

[Futnot]

[Bokis/Foto blong pija long pej 11]

Klos Mo Hat Blong Faet: Pol i wantem se olgeta Kristin oli wekap oltaem long saed blong speret. Taswe hem i talem se: “Be yumi ya i man blong delaet, mo hed blong yumi i mas klia gud. Yumi mas holem fasin blong bilif mo blong laekem tumas ol man. Hemia i olsem klos blong faet blong blokem bodi blong yumi, ara i no save kasem yumi. Mo yumi mas putum tingting blong yumi long God blong hem i sevem yumi. Hemia i olsem hat blong faet blong yumi.” (1 Tesalonaeka 5:⁠8) Aean klos we ol soldia oli putum long jes blong olgeta i olsem: Long klos ya, oli putum sam aean sel, ol jen mo sam strong aean bakegen. Long sem fasin, sipos yumi gat strong bilif, bambae yumi save sef long saed blong speret. Bambae yumi save yusum bilif blong yumi olsem wan tul blong faet. ?Be olsem wanem long ol hat blong faet blong bifo? Bifo, plante taem man i mekem ol kaen hat olsem wetem aean. Ol soldia oli putum ol hat ya taem oli go mekem faet. Ol hat ya oli protektem olgeta from ol enemi blong ol. Long sem fasin tede, sipos yumi bilif strong se God i naf blong sevem ol man, samting ya i save protektem yumi from ol nogud tingting, ale ol Kristin oli naf blong stanap strong long saed blong God. !Yes, i impoten tumas we ol man blong Jeova tede oli putum ol klos blong faet olsem!​—⁠Efesas 6:​11-17.