“Yufala i Mas No Kam Slak Blong Mekem Ol Gudfala Wok”

Ol Stampa Poen Blong Seken Tesalonaeka

POL i gat strong tingting blong halpem ol Kristin we oli stap long Tesalonaeka, taon ya blong Masedonia. Ale, raonabaot long yia 51 K.T., hem i raetem seken leta blong hem long olgeta. Samfala long kongregesen oli rong olgeta mo oli stap talem se dei ya we Kraes bambae i kamtru bakegen i kolosap nomo nao. Maet oli kasem wan leta, nao oli gyaman nomo se hem i leta blong Pol mo oli stap talem se “dei blong Jeova” i kamtru finis long olgeta.​—2 Tesalonaeka 2:​1, 2, (NW)

Taswe, i gat nid blong stretem tingting blong samfala man Tesalonaeka. Long seken leta blong hem, Pol i talem long ol Kristin blong Tesalonaeka se oli mekem i gud from we bilif blong olgeta i kam bigwan moa. Hem i glad long olgeta from we oli laeklaekem olgeta mo oli fasgud long God. Be hem i soemaot tu we fasin blong apostasi bambae i tekem ples bifo we Kraes i stap bakegen. Hadtaem bambae i kasem ol Kristin, be nating, leta blong Pol i givhan long olgeta blong oli folem gudfala advaes ya: “Yufala i mas no kam slak blong mekem ol gudfala wok.” (2 Tesalonaeka 3:13) Long sem fasin, ol tok blong Pol oli save halpem yumi tu tede.

Taem We Kraes Bambae i Kamtru Mo i Stap Bakegen

Pol i talem fastaem we ol trabol we ol Kristin oli kasem bambae oli finis. (1:​1-12) Samting ya i mas kamaot “long taem ya we Jisas, Masta blong yumi, bambae i aot long heven, i kamtru long yumi, wetem ol strostrong enjel blong hem.” Stret long taem ya nao, ol man we oli no wantem obei long gud nyus bambae oli lus blong olwe. Nating we ol man oli mekem trabol long yumi, be yumi save harem glad tumas long gudfala promes we God i mekem.

Afta, Pol i soemaot se “Man blong Brekem Loa” i mas kamtru bifo we Kraes i stap bakegen. (2:​1-17) Ol Kristin blong Tesalonaeka oli no mas stap glad from we sam man oli talem se “dei blong Jeova” (NW) i kamtru finis long olgeta. Fastaem bambae plante Kristin oli tanem baksaed long trutok, mo man blong brekem loa i mas kamtru. Ale biaen bakegen, Jisas i mas mekem hem i lus olgeta mo samting ya nao bambae i soemaot se hem i stap bakegen. Be go kasem taem we Jisas bambae i mekem olsem, Pol i prea from olgeta. Hem i wantem se God mo Kraes tufala i leftemap tingting blong ol man Tesalonaeka, mo tufala i ‘mekem tingting blong olgeta i strong moa, i stap mekem olgeta i strong blong talem evri gudfala tok mo blong mekem evri gudfala wok.’

Olgeta We Oli Olbaot

Afta, Pol i givim sam advaes long olgeta we oli gat fasin olbaot. (3:​1-18) Ol tok we Pol i talem oli soemaot we hem i trastem gud Masta blong yumi se bambae hem nao i halpem ol man Tesalonaeka mo bambae hem i protektem olgeta from man ya we i rabis, Devel Setan. Be sipos oli wantem stanap strong long saed blong speret, oli mas mekem sam samting. Oli no mas joen wetem ol man we oli gat fasin olbaot. Oli mas ronwe long olgeta we oli putum nus blong olgeta long ol bisnes blong naraman mo long olgeta we oli les tumas, oli no wantem wok. Pol i talem se: “Man we i no wantem wok, yufala i no givim kakae long hem.” Ol Kristin oli mas makemgud ol man we oli gat fasin olsem, mo oli no mas mekem fren wetem olgeta. Nating se ol man ya tu oli stap kasem tok blong leftemap tingting blong olgeta olsem ol narafala brata, be ol Kristin oli no mas mekem fren wetem ol. Ol Kristin blong Tesalonaeka we oli fasgud long God oli mas gohed nomo blong mekem ol gudfala fasin. Pol i wantem tumas se gladhat blong Masta blong yumi Jisas Kraes i stap wetem olgeta evriwan.

Seken leta blong Pol long ol man Tesalonaeka i leftemap tingting blong ol Wetnes blong Jeova. Oli save se bambae oli kam fri from olgeta trabol blong ol, taem we Kraes mo ol enjel blong hem bambae oli smasemdaon olgeta we oli no wantem obei long gud nyus. Be tu, bilif blong yumi i kam strong moa from we yumi save se “man blong brekem loa” (ol lida blong Krisendom) mo ol gyaman jyos, i no longtaem olgeta evriwan bambae oli lus. Taswe, go kasem we taem ya i kam, bambae yumi gohed nomo blong folem gud advaes ya we Pol i givim long yumi se yumi no mas slak blong mekem ol gudfala wok.

[Bokis/Foto blong pija long pej 11]

Tok Blong Jeova i Kasem Plante Ples Kwiktaem Nomo: Pol i talem se: “Plis, yufala i gohed nomo blong prea from mifala blong bambae tok blong Jeova i save muf i go kwik [no “i save resis i go”] long plante moa ples, blong bambae ol man oli save leftemap tok ya olsem we yufala i mekem finis.” (2 Tesalonaeka 3:1; Kingdom Interlinear) Sam man we oli stadi long ol jyos oli talem se long vas ya, aposol Pol i yusum pija blong ol man we oli spid nomo long wan resis. Samting ya i no rili klia. Be Pol i askem long ol Kristin blong Tesalonaeka blong oli prea from hem, ale hem mo ol brata we i wokbaot wetem hem oli save talemaot trutok long olgeta man, be i no gat wan samting i stopem olgeta blong mekem olsem. From we God i ansa long ol kaen prea olsem, tok blong hem i “muf i go kwik long plante moa ples.” Sem samting nomo i hapen long gud nyus we yumi talemaot long ol las dei ya. Plante moa man oli “leftemap” tok blong Jeova antap. Olgeta we oli bilif long God oli tinghae long tok blong God mo oli gat strong tingting se hem i “paoa blong God, blong sevem olgeta man we oli bilif long hem.” Ol Kristin tede oli mekem sem mak long ol man Tesalonaeka bifo, from we olgeta tu oli agri long ol tok we Pol i talem. (Rom 1:16; 1 Tesalonaeka 2:13) !Yes, yumi hapi tumas taem yumi luk we Jeova God i stap blesem ol pablisa blong Kingdom mo hem i mekem namba blong ol man blong hem i kam bigwan moa oltaem!​—Aesea 60:22.