?From Wanem Wosip Blong Ol Kristin i Hae Moa?

Ol Stampa Poen Blong Hibrus

JEOVA GOD i soemaot sam moa samting bakegen long saed blong wosip we ol man oli mas mekem long hem. Samting ya i hapen taem hem i sanem Pikinini blong hem, Jisas Kraes, i kam long wol. I olsem from we Jisas, Man ya we i stanemap Kristin jyos, hem i bitim olgeta enjel mo profet Moses. Wok blong pris we Kraes bambae i mekem i hae moa, i bitim wok we ol man Livaet oli mekem long Isrel bifo. Mo tu, sakrafaes blong Jisas i moa gud bitim ol anamol we ol man oli stap mekem sakrafaes long hem aninit long Loa blong Moses.

Ol poen ya oli klia nomo long leta we Pol i raetem long ol man ‘Hibrus,’ hemia ol man Isrel. I luk olsem we aposol Pol i raetem leta ya taem we hem i stap long Rom raonabaot long yia 61 K.T.a mo hem i sanem leta ya i go long ol Hibru Kristin we oli stap long Judia. Ol Kristin blong Gris mo ol Kristin blong Esia we oli kam biaen, oli agri evriwan se Pol nao i bin raetem leta ya. Tingting olsem i stret from we Pol i save gud ol tok blong Oltesteman mo hem i yusum wan fasin blong mekem man i tingtinggud we i stret long hem nomo. Be hem i no putum nem blong hem long leta ya. Maet hem i mekem olsem from we ol man Jyu oli no laekem hem, mo tu from we oli save hem finis se hem i “aposol blong ol nesen.” (Rom 11:​13, NW) Naoia, yumi save lukluk bakegen ol bigfala samting we hem i talemaot long saed blong wosip blong ol Kristin. Bambae yumi skelem gud ol samting we hem i talemaot long leta we hem i raetem long ol man Hibru.

Kraes i Hae Moa Long Ol Enjel Mo Moses

Pol i soemaot fastaem hae ples blong Pikinini blong God. (1:1 kasem 3:6) Ol enjel oli obei long hem mo God nao i stap givim paoa long hem blong hem i rul olsem king. Taswe, yumi mas lesingud long ol samting we Pikinini ya i talem long yumi. I tru we taem Jisas i kam man, hem i daon moa long ol enjel. Be afta, hem i kam hae moa long olgeta mo God i jusumaot hem blong rulum nyufala wol ya we bambae i kam.

Jisas Kraes i hae moa long Moses tu. ?From wanem i olsem? Moses i mekem wok blong lukaot long ol man blong God we oli man Isrel nomo. Be Jeova i putumap Jisas blong hem i lukaot long ful famle blong hem, yes, hem nao i bos blong kongregesen blong ol man blong God.

Ol Kristin Oli Go Insaed Long Spel Blong God

Nekis poen we aposol Pol i tokbaot i olsem: I gat rod blong go insaed long spel blong God. (3:7 kasem 4:13) Ol man Isrel we oli slef long Ijip oli aot long ples ya, be oli no go insaed long spel blong God. ?From wanem? From we olgeta oli no wantem obei long ol loa blong God mo bilif blong olgeta i kam slak. Be sipos yumi tede, yumi putum bilif blong yumi long God mo yumi folemgud Jisas, nomata wanem samting hem i talem long yumi, bambae yumi save go insaed long spel blong God. Ale bambae yumi no moa mekem Sabat wan dei nomo long wik, no gat. Be evri dei nomo bambae yumi harem gud tumas from we yumi save spel long ol wok we yumi mekem bifo, taem yumi tingbaot yumi nomo.

Fasin blong gat spel wetem God i wan promes we Baebol, Tok blong God, i mekem. Mo Tok blong God i “sap tumas, i winim naef blong faet ya we i sap tu saed. Hem i save go insaed long ples we tingting [speret, NW] blong man i joen long laef [sol, NW] blong hem, olsem we naef blong faet i save go insaed long ples we wora blong bun i joen long bun.” Tok blong God i mekem wok olsem from we hem i gat paoa blong putum long klia ples ol samting we i stap long tingting blong man mo ol fasin blong man. Hem i strong inaf blong seraot ol samting we man i wantem from we hem i sinman nomo, mo ol tru fasin blong tingting blong hem. (Skelem ol tok ya wetem Rom 7:25.) Laef blong yumi (“sol”) i mas laenap wetem wan fasin blong tingting (“speret”) we i pulum yumi blong fasgud long God. Sipos yumi olsem, bambae yumi save go insaed long spel blong God.

Wan Pris Mo Wan Kontrak We i Hae Moa

Biaen, Pol i soemaot we Kraes i hae moa long olgeta pris mo nyufala kontrak we hem i mekem i bitim olfalawan. (4:14 kasem 10:31) Jisas Kraes i no mekem sin samtaem. Be hem i save gud ol trabol blong ol sinman from we, sem mak long yumi, hem tu i kasem traem. Be tu, God i jusumaot hem blong mekem wok blong pris olsem “pris ya Melkisedek bifo. Mo bambae [hem i] holem wok blong pris oltaem, gogo i no save finis samtaem.” Jisas i no sem mak long ol man Livaet we oli mekem wok blong pris. Laef blong Jisas i no save lus samtaem, taswe hem i no nidim we man i kam biaen long hem blong mekem wok blong sevem ol man bakegen. Hem i no nid blong mekem sakrafaes wetem ol anamol bakegen, from we hem i givim finis bodi blong hem we i no gat sin nating olsem sakrafaes, nao hem i go long heven wetem bigfala praes blong blad blong hem.

Nyufala kontrak we Jisas i pemaot wetem blad blong hem i hae moa long kontrak blong Loa bifo. Olgeta we oli haf blong nyufala kontrak ya, ol loa blong God oli stap long hat blong olgeta mo oli glad nomo se God i fogetem olgeta sin blong ol. (Jeremaea 31:​31-34) Oli glad tumas from we God i fogivim olgeta, taswe oli joen long wok blong talemaot bilif blong olgeta long ol man, mo oli kam long ol miting wetem ol Kristin brata blong olgeta. Be long narasaed, olgeta we oli gohed nomo blong mekem sin oli no moa gat wan sakrafaes nating blong pemaot ol sin blong olgeta.

!Fasin Blong Bilif i Impoten!

Blong kasem ol blesing blong nyufala kontrak we i hae moa, yumi mas bilif. (10:32 kasem 12:29) Sipos yumi wantem kasem ol samting we Jeova i promes blong givim long yumi, yumi mas gohed nomo blong stanap strong. Blong mekem olsem, “yumi gat ol wetnes ya blong God oli stap raonabaot long yumi, we kampani blong olgeta i bigfala tumas.” Be tu, yumi no mas fogetem gudfala rod we Jisas i soemaot long yumi gogo hem i ded. Maet God i letem ol trabol oli kasem yumi, taswe yumi mas tingbaot samting ya olsem wan rod we God i yusum blong stretem yumi, blong yumi gat stret fasin long laef blong yumi. Ol promes blong Jeova bambae oli kamtru olsem we hem i talem. Taswe, samting ya i mas pusum yumi blong yumi “mekem wosip long hem long fasin we hem i glad long hem, we yumi ona long hem mo yumi fraet long hem.”

Long en blong leta blong hem, Pol i talemaot sam tok blong leftemap tingting blong ol Kristin. (13:​1-25) Bilif blong yumi i mas pusum yumi blong yumi laekem ol narafala Kristin olsem we oli brata blong yumi nomo. From bilif blong yumi, bambae yumi rere nomo blong tekem ol strenja i kam long haos blong yumi, bambae yumi tingbaot oltaem ol fren blong yumi long bilif we oli trabol, yumi onagud long mared blong yumi, mo yumi ‘stap harem glad long ol samting we yumi gat finis.’ Long saed blong bilif, yumi mas mekem sem mak long olgeta we oli stap long hed blong kongregesen mo yumi mas obei long olgeta. Mo tu, yumi mas agensem fasin blong ol man we oli tanem baksaed long trutok, oli mekem apostasi. Mo yumi mas rere nomo blong ol man oli mekem sem long yumi, olsem we oli mekem sem long Jisas. Mo “yumi mas stap leftemap nem blong God. Fasin ya i olsem we oltaem yumi stap kilim anamol blong givim i go long hem. From we evri taem we yumi talemaot nem blong Jisas long fes blong ol man, i olsem we yumi givim presen i go long God.” Mo yumi mas gohed nomo blong mekem ol samting we oli gud. Ol gudfala fasin ya oli bigfala fasin blong wosip blong ol tru Kristin.

[Futnot]

[Bokis/Foto blong pija long pej 30]

Olkaen Baptaes: Wosip we ol man Isrel oli mekem long haos tapolen blong Jeova i stanap “nomo long ol kakae, ol dring mo olkaen baptaes.” (Hibrus 9:​9, 10, NW) Ol man Isrel oli mekem ol ‘baptaes’ ya taem oli wasem ol samting blong mekem wosip, olsem we Loa blong Moses i talem. Taem oli mekem wosip, ol pris oli mas wasem ol besin mo ol pot we oli kam doti, mo oli mas wasem klos mo bodi blong ol. (Levitikas 11:32; 14:​8, 9; 15:5) Ol pris oli mas swim mo ol samting we oli yusum blong mekem ol sakrafaes we oli bonem long faea, oli mas wasem olgeta long wora. (Eksodas 29:4; 30:​17-21; Levitikas 1:13; 2 Kronikel 4:6) Be “olkaen baptaes” we Pol i tokbaot oli no sem mak long ‘fasin blong baptaesem ol kap, ol jak, mo ol besin we oli mekem long kopa’ we sam man Jyu oli stap folem long taem we Jisas i stap long wol. Mo tu, ol tok blong Hibrus 9:10 oli no laenap wetem baptaes we Jon Baptaes i mekem no baptaes we ol Kristin tede oli tekem blong soemaot long ol man se oli givim laef blong olgeta long God.​—Matyu 28:​19, 20; Mak 7:4; Luk 3:3.