Letem “Pis Blong God” i Lukaot Gud Long Hat Blong Yufala
“I gud Jeova i lukluk i go long yu, mo i givim pis long yu.”—NAMBA 6:26.
1. ?Smoltaem bifo we Pol i ded, hem i raetem wanem tok i go long Timote? ?Tok ya i soemaot wanem?
LONG yia ya 65 K.T.,a aposol Pol i stap kalabus long Rom. Biaen i no longtaem, bambae ol man Rom oli mas kilim Pol i ded. Nating we bambae i olsemia, be tingting blong Pol i kwaet. Hem i soemaot samting ya long ol tok we hem i raetem i go long yangfala fren blong hem, Timote. Hem i se: “Mi mi faet strong finis long gudfala faet ya we yumi stap faet long hem. Mi mi kamtru finis long en blong resis ya, mo mi stap holem yet fasin blong bilif. Nao praes blong ol man we oli win, hem i stap wet blong mi go tekem. Praes ya we Masta blong yumi bambae i givim long mi blong ona long mi, hemia we hem i talem se mi mi wan stret man. Masta ya blong yumi, hem i wan stret jaj. Nao long dei ya we hem bambae i jajem olgeta man, hem bambae i givim praes ya long mi.”—2 Timote 4:7, 8.
2. ?Wanem i lukaot gud long hat blong Pol long ful laef blong hem, go kasem ded?
2 I no longtaem bambae Pol i ded. ?Olsem wanem tingting blong hem i save stap kwaet? From we “pis we God i save putum, hem i bigfala moa, i bitim save blong yumi olgeta.” Pis ya nao i stap lukaot gud long hat blong Pol. (Filipae 4:7) Pis ya i bin lukaot gud long hem long ol yia we oli pas finis, i stat long taem we hem i tekem fasin blong Kristin man. Pis i givim paoa long hem blong stanap strong taem ol man oli holem hem, oli sakem hem long kalabus, oli wipim hem, mo oli stonem hem. Pis ya i givim paoa long hem blong agensem apostasib mo ol fasin blong skul blong ol man Jyu. Mo pis ya i givhan long hem blong faetem paoa blong ol rabis speret we hem i no save luk olgeta. I klia nomo se pis ya i givim paoa long hem go kasem en blong laef blong hem.—2 Korin 10:4, 5; 11:21-27; Efesas 6:11, 12.
3. ?Wanem sam kwestin oli stanap long saed blong pis blong God?
3 !Yes Pol i save se pis ya i gat bigfala paoa! ?Be olsem wanem? ?Tede yumi save lanem mining blong pis ya? ?Pis ya i save lukaot long hat blong yumi tu? ?Hem i save givim paoa long yumi blong “faet strong long gudfala faet ya we yumi stap long hem from we yumi bilif”? ?Hem i save halpem yumi blong winim ol trabol we i mekem ‘laef long wol ya i kam strong tumas’?—1 Timote 6:12; 2 Timote 3:1.
Pis Wetem God—?Olsem Wanem Hem i Lus?
4. ?Long Baebol, wanem sam mining blong tok ya “pis”?
4 Long Baebol, tok ya “pis” i gat plante mining. Wan buk (The New International Dictionary of New Testament Theology) i talem se: “Long ol buk blong Oltesteman [sha·lohmʹ] (pis) i minim se man i harem gud long plante defren fasin (Jaj. 19:20). Hem i save minim we man i gat plante samting (Sam 73:3), nating we hem i no bilif long God. Tok ya i save minim se bodi blong man i strong (Aes. 57:18[, 19]; Sam 38:3); hem i harem gud . . . (Jen. 15:15); ol nesen no ol man oli joen gud ( . . . Jaj. 4:17; 1 Kron. 12:17, 18); man i stap sef ( . . . Jer. 29:11; cf. Jer. 14:13).” Pis we i impoten moa, hemia pis wetem Jeova. Sipos man i no gat pis ya, ol narafala pis i smol nomo mo i save stap smoltaem nomo tu.—2 Korin 13:11.
5. ?Wanem i spolem pis blong ol samting we God i wokem fastaem?
5 Fastaem, olgeta samting we Jeova i wokem i gat pis wetem hem fulwan. From samting ya, God i save talem se ol samting we hem i wokem oli gud tumas. Yes, taem ol enjel long heven oli luk ol samting we hem i wokem, olgeta tu oli glad, oli singaot mo klaphan. (Jenesis 1:31; Job 38:4-7) Be sore tumas, pis ya we i kavremap evri samting fastaem, i lus. Speret man ya we naoia yumi kolem Setan, hem i spolem pis ya. Hem i pulum Iv, woman ya we God i jes wokem hem wetem waes, blong hem i no moa obei long God. Hasban blong Iv, Adam, hem i folem woman blong hem. Trifala stronghed ya i mekem trabol i kamaot long heven mo wol.—Jenesis 3:1-6.
6. ?Wanem i kamaot long ol man from we oli lusum pis wetem God?
6 Bigfala trabol i kamaot long Adam mo Iv from we tufala i lusum pis wetem God. Sloslou, bodi blong tufala i kam slak gogo tufala i ded. Tufala i no moa harem gud long pis long Paradaes. Long defren fasin, Adam i mas swet blong wokem graon afsaed long Iden, blong givim kakae long famle blong hem we i stap kam bigwan moa. Iv i no moa save harem gud long wok blong hem blong kam mama long stret laen blong ol man. Defren nao, hem i mas harem nogud long bodi blong hem blong bonem ol pikinini we oli no stret. Taem ol man oli lusum pis ya wetem God, oli jelas, mo fasin blong olgeta i raf. Ken i kilim i ded brata blong hem Ebel. Wol i kam moa nogud gogo taem Bigfala Ren i foldaon, wol i fulap long raf fasin. (Jenesis 3:7 kasem 4:16; 5:5; 6:11, 12) Taem faswan papa mama blong yumi tufala i ded, tufala i no harem gud long laef we tufala i bin gat. Tingting blong tufala i no “stap kwaet,” olsem tingting blong Ebraham, taem hem i ded plante handred yia biaen.—Jenesis 15:15.
7. (a) ?God i talem wanem profet tok we i soemoat se bambae i stanemap pis bakegen? (b) ?Enemi blong God, Setan, i gat wanem paoa long ol man?
7 Taem Adam mo Iv tufala i lusum pis ya, hemia nao fastaem we Baebol i tokbaot fasin badfren. God i tok long Setan, i se: “Bambae mi mi mekem we yu mo woman ya yutufala i enemi blong yutufala. Mo laen blong yu mo laen blong hem, tufala i enemi blong tufala. Hem bambae i smasem hed blong yu, mo yu bambae yu smasem bak blong leg blong hem.” (Jenesis 3:15, NW) Sloslou, ol fasin blong Setan oli kam fulap long wol. Taswe aposol Jon i save talem se: “Olgeta man blong wol oli stap long paoa blong Setan.” (1 Jon 5:19) Sipos ol man blong wol oli stap long paoa blong Setan, tru, oli no save gat pis wetem God. From samting ya, i stret nomo we disaepol Jemes i givim woning ya long ol Kristin se: “Taem yufala i mekem fren wetem ol fasin blong wol, semtaem nomo yufala i mekem badfren long God.”—Jemes 4:4.
Pis Long Wol We i Raf Tumas
8, 9. ?Afta we Adam i sin, olsem wanem ol man oli save kasem pis wetem God?
8 Taem God i talem tok ya “enemi” long Iden fastaem, semtaem, hem i talemaot olsem wanem bambae hem i mekem pis i stanap bakegen. Hem i promes se laen blong woman blong hem bambae i kilim hed blong hem ya we i spolem pis ya fastaem. I stat long Iden i go, olgeta we oli soemaot bilif long promes ya, oli save kasem pis wetem God. Ebraham i mekem olsem, nao hem i kam wan fren blong God.—2 Kronikel 20:7; Jemes 2:23.
9 Bubu blong Ebraham i tekem nem ya Isrel. Long taem blong Moses, Jeova i hivimap ol pikinini blong Isrel oli kam wan nesen. Hem i wantem se pis blong hem i stap wetem nesen ya. Hae pris ya Eron i soemaot samting ya, hem i talemaot wan blesing long nesen blong ol man Isrel. Hem i se: “I gud Jeova i blesem yu mo i lukaot gud long yu. I gud Jeova i mekem laet blong fes blong hem i saenaot i kasem yu, mo i soemaot gladhat long yu. I gud Jeova i lukluk i go long yu mo i givim pis long yu.” (Namba 6:24-26) Pis blong Jeova bambae i save givim plante bigfala presen long olgeta. Be blong kasem ol presen ya, oli mas mekem sam samting fastaem.
10, 11. ?Blong ol man Isrel oli save gat pis wetem God, oli mas mekem wanem? ?Wanem frut blong pis ya?
10 Jeova i talem long nesen ya se: “Sipos yufala i stap wokbaot oltaem long rod blong ol oda blong mi, mo yufala i holemtaet ol loa blong mi mo obei long olgeta, bambae mi mi givim ren long yufala long stret taem. Mo graon blong yufala bambae i givim fulap kakae, mo tri blong graon ya bambae i karem frut blong hem. Mo bambae mi putum pis long ples ya. Bambae yufala i slip, be i no gat wan man we bambae yufala i seksek from. Mi bambae mi mekem we i no moa gat ol wael anamol long graon ya, mo naef blong faet bambae i no moa kamtru long graon blong yufala. Bambae mi mi wokbaot long medel blong yufala. Bambae mi soemaot we mi nomo mi God blong yufala. Mo yufala, bambae yufala i soemoat se yufala i man blong mi.” (Levitikas 26:3, 4, 6, 12) Isrel i save gat pis, oli save stap sef we ol enemi blong olgeta oli no spolem olgeta. Oli save gat plante samting, mo oli save frengud wetem Jeova. Be blong kasem ol samting ya, oli mas obei long Loa blong Jeova.—Ol Sam 119:165.
11 Histri blong nesen ya i soemaot se ol man Isrel we oli bin traehad blong holemtaet ol loa blong Jeova mo obei long olgeta, oli kasem pis ya wetem hem. Mo samting ya i givim plante narafala blesing long olgeta. Long ol faswan yia blong rul blong King Solomon, pis blong God i mekem se oli kasem fulap samting long saed blong bodi. Mo oli no faet wetem ol nesen raonabaot long Isrel. Baebol i tokbaot taem ya, i se: “Ol man Juda mo Isrel oli stap sef gud. Oltaem long olgeta dei blong rul blong Solomon, ol man ya oli sidaon aninit long rop blong frut we oli wokem waen long hem mo aninit long figtri blong olgeta nomo, i stat long Dan i go kasem Bereseba.” (1 King 4:25) Mo nating we ol faet oli kamaot wetem ol kantri raonabaot, ol man Isrel we oli stap obei long God oli holem pis ya we i impoten moa, hemia pis wetem God. Taswe man blong faet ya, Deved, i raetemdaon se: “Hae God [Jeova, NW]. Taem mi mi ledaon, tingting blong mi i kwaet, nao mi mi slip, from we yu nomo yu stap lukaotgud long mi, nao mi mi sef.”—Ol Sam 4:8.
Wan Faondesen Blong Pis We i Moa Gud
12. ?Biaen, olsem wanem Isrel i sakem pis wetem God?
12 Biaen, ‘Laen’ ya we bambae i mekem pis i kambak bakegen fulwan, i kamtru. Hemia man ya Jisas. Taem hem i bon ol enjel oli singsing se: “Long heven antap we antap, olgeta oli stap leftemap nem blong God. Mo long wol ya, pis i stap wetem ol man we God i glad long olgeta.” (Luk 2:14) Jisas i kamaot long laen blong ol man Isrel. Nating we nesen ya i mekem kontrak wetem God finis, be oli sakem Jisas, oli putum hem long han blong ol man Rom, nao oli kilim hem i ded. Smoltaem bifo we Jisas i ded, hem i krae long Jerusalem, i se: “Ei, be sipos tede yufala i save ol samting ya we i save mekem yufala i gat pis, bambae mi mi glad tumas, be no gat. Ol samting ya oli stap haed, yufala i no save luk.” (Luk 19:42; Jon 1:11) From we oli sakem Jisas, Isrel i lusum olgeta pis wetem God.
13. ?Jeova i mekem wanem nyufala rod blong man i save kasem pis wetem Hem?
13 Be plan blong God i no lus. Jisas i laef bakegen long ded. Hem i givim long Jeova praes blong stret laef blong hem, we hem i yusum blong pemaot ol man we hat blong olgeta i stret. (Hibrus 9:11-14) Sakrafaes blong Jisas i mekem wan nyufala rod we i moa gud, blong ol prapa man Isrel mo ol narafala man tu oli save kasem pis wetem God. Pol i raetem leta i go long ol Kristin long Rom, nao hem i se: “Fastaem yumi olsem ol enemi blong God, be from we Pikinini blong hem i ded, God i mekem yumi kam olsem ol fren blong hem finis.” (Rom 5:10) Long faswan handred yia, olgeta we oli yusum rod ya blong mekem pis wetem God, tabu speret i makemaot olgeta. Nao God i adoptem olgeta blong oli kam pikinini blong hem. Mo oli kam wan nyufala nesen long saed blong speret we nem blong hem “Isrel blong God.”—Galesia 6:16; Jon 1:12, 13; 2 Korin 1:21, 22; 1 Pita 2:9.
14, 15. ?Pis ya blong God i olsem wanem? ?Olsem wanem pis ya i stap lukaot gud long ol Kristin man, nating we Setan i agensem olgeta?
14 Setan wetem wol blong hem bambae oli agensem strong ol nyufala man Isrel ya long saed blong speret. (Jon 17:14) Be olgeta bambae oli mas holem “pis blong God, Papa blong yumi, mo Kraes Jisas, Masta blong yumi.” (2 Timote 1:2, NW) Jisas i talem long olgeta se: “Mi mi talemaot ol samting ya finis long yufala, blong bambae tingting blong yufala i save stap kwaet, from we laef blong yufala i stap joen long laef blong mi. Bambae ol samting blong wol ya oli save mekem yufala i harem nogud tumas long bodi blong yufala. Be yufala i no fraet. Mi mi winim ol samting blong wol ya finis.”—Jon 16:33.
15 Pis ya nao i givhan long Pol mo ol Kristin fren blong hem blong stanap strong, nating we oli kasem bigfala traem. Pis ya i soemaot wan fasin fren we i mekem man i joen gud wetem God, mo tingting blong hem i kwaet. Samting ya i save kamaot from sakrafaes blong Jisas nomo. Man we i gat pis ya, tingting blong hem i kwaet from we hem i luksave se Jeova i stap kea gud long hem. Filing ya i sem mak long filing blong pikinini, taem papa blong hem i holemgud hem. Hem i trastem papa blong hem, from we hem i save se man ya we i lukaot long hem i laekem hem tumas. Pol i leftemap tingting blong ol man Filipae, i se: “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem. Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.”—Filipae 4:6, 7.
16. ?Olsem wanem pis wetem God i givhan long ol Kristin long faswan handred yia blong fren gud tugeta?
16 Man i lusum pis wetem God. Tu nogud frut i kamaot from: Fasin blong no laekem man mo rao. Long faswan handred yia, ol Kristin we oli kasem pis wetem God oli karem frut we i narakaen olgeta: Pis mo fasin joen gud. Pol i talem se pis ya i pulum olgeta blong “stap wan kampani nomo oltaem.” (Efesas 4:3) Olgeta oli ‘gat wan tingting nomo, mo oli gat pis. Mo God ya we i laekem ol man tumas, mo i stap givim pis oltaem, hem i kampani wetem olgeta.’ Mo tu, olgeta oli bin talemaot “gud nyus blong pis.” Gud nyus ya long saed blong rod blong kasem sef i blong ‘ol fren blong pis,’ olgeta we oli wantem obei long gud nyus ya.—2 Korin 13:11; Ol Wok 10:36; Luk 10:5, 6, NW.
Kontrak Blong Pis
17. ?Long taem blong yumi God i mekem wanem kontrak wetem ol man blong hem?
17 ?Yumi save kasem pis olsem tede? Yes. Afta we God i putum Kingdom blong hem long heven long han blong Jisas Kraes long 1914, hem i hivimap ol laswan blong ‘Isrel blong God’ oli aot long wol ya, nao hem i mekem kontrak blong pis wetem olgeta. Olsem nao, hem i mekem promes blong hem we profet Esikel i raetemdaon finis i kamtru, se: “Bambae mi mekem kontrak blong pis wetem olgeta. Wan kontrak blong olwe bambae i stap wetem olgeta. Bambae mi putum olgeta oli stap, mo bambae mi mekem olgeta oli kam plante. Tabu ples blong mi bambae i stap long medel blong olgeta blong olwe.” (Esikel 37:26) Jeova i mekem kontrak ya wetem ol Kristin we tabu speret i makemaot olgeta. Sem mak long ol brata blong olgeta long faswan handred yia, oli soemaot bilif long sakrafaes blong Jisas. Oli kam klin long saed blong speret, nao oli givim laef blong olgeta i go long Papa blong olgeta long heven mo oli traehad blong folem ol loa blong hem. Blong soemaot samting ya, oli lidim wok blong talemaot gud nyus long olgeta ples long wol, se Kingdom blong God i stanap finis.—Matyu 24:14.
18. Samfala long ol nesen oli luksave se nem blong God i stap long Isrel blong God, ?nao oli mekem wanem from?
18 Profet tok i gohed, i se: “Mo haos tapolen blong mi bambae i rili kavremap olgeta. Mo tru, mi bambae mi kam God blong olgeta, mo olgeta bambae oli kam man blong mi. Mo ol nesen oli mas save se mi Jeova, mi stap mekem Isrel i tabu.” (Esikel 37:27, 28) Stret long profet tok ya, plante handred taosen man, yes, plante milyan man long “ol nesen” oli luksave se nem blong Jeova i stap long Isrel blong God. (Sekaraea 8:23) Wan “bigfala kampani” we Revelesen i tokbaot i kamaot long ol nesen finis. Olgeta oli joen wetem Isrel blong God blong mekem wosip long Jeova. “Oli wasem klos blong olgeta finis blong mekem oli waet long blad blong Smol Sipsip ya we i ded.” From samting ya, bambae oli save pastru long taem blong bigfala trabol long fyuja, blong go insaed long nyufala wol blong pis.—Revelesen 7:9, 14.
19. ?Ol man blong God tede oli harem gud long wanem pis?
19 Isrel blong God wetem bigfala kampani ya, tufala i harem gud long pis long saed blong speret. Pis ya i kolosap sem mak long pis we ol man Isrel oli harem gud long hem aninit long rul blong King Solomon bifo. Long saed blong tufala kampani ya, Maeka i talem wan profet tok, i se: “Bambae olgeta oli hamarem ol naef blong faet blong olgeta oli kam aean blong brekem graon long garen, mo ol spia blong olgeta oli kam sisis blong katem han blong tri. Bambae olgeta oli no leftemap naef blong faet, wan nesen agens long narafala nesen, mo bambae oli no moa lanem fasin blong faet. Bambae oli sidaon, wanwan, aninit long rop blong frut we oli wokem waen long hem mo aninit long figtri blong olgeta. Bambae i no gat wan samting we i mekem olgeta oli seksek.” (Maeka 4:3, 4; Aesea 2:2-4) Stret long profet tok ya, oli sakem ol fasin blong faet mo rao. I olsem we oli tanem ol tul blong faet oli kam tul blong wokem garen. Taswe bigfala famle blong olgeta long evri kantri long wol oli harem gud long pis, nomata wanem nesen, lanwis, kala, no ples blong olgeta. Mo oli harem gud tumas from we oli save se Jeova i stap lukaot gud long olgeta. ‘I no gat wan samting i save mekem olgeta oli seksek.’ Tru ya, “Hae God [Jeova, NW] i stap givim paoa long ol man blong hem, mo i stap blesem olgeta, i stap mekem olgeta oli gat gudfala laef, oli gat pis.”—Ol Sam 29:11.
20, 21. (a) ?From wanem yumi mas hadwok blong holem pis blong yumi wetem God? (b) ?Yumi save talem wanem long saed blong ol samting we Setan i yusum blong traem spolem pis blong ol man blong God?
20 Long faswan handred yia K.T., Setan i kros long ol man blong God from we oli gat pis. Sem mak tede. Long 1914, Kingdom blong God i stanap long heven. Biaen, oli sakemaot Setan i aot long heven. I stat long taem ya, Setan i go faetem ‘smolhaf blong laen blong [woman]’ we oli stap long wol yet. (Revelesen 12:17, NW) Long taem blong Pol tu, Pol i givim woning, i se: “Olgeta ya we yumi stap faet agens long olgeta, long laef ya blong yumi, oli no man. Yumi stap faet agens long . . . ol rabis devel we oli stap olbaot [long heven, NW].” (Efesas 6:12) Naoia, Setan i no moa stap long heven, hem i kamdaon long wol. Taswe woning ya i impoten tumas.
21 Setan i yusum finis olgeta trik blong hem blong traehad blong spolem pis blong ol man blong God. Be hem i no save mekem. Long 1919, namba blong ol man we oli stap obei long God i no kasem 10,000. Tede, bitim fo milyan man oli stap winim wol ya from bilif blong olgeta. (1 Jon 5:4) Long laef blong olgeta, pis wetem God mo pis wetem ol brata mo sista blong olgeta i tru, i no wan drim nomo. Nating we oli mas stanap strong blong winim kros blong Setan mo laen blong hem, be pis ya i stap. Be yumi no mas fogetem se Setan i stap kros yet, mo yumi sinman yet, mo ‘laef long wol ya i strong tumas.’ Taswe yumi mas hadwok blong holem pis blong yumi. (2 Timote 3:1) Long nekis haf blong Wajtaoa ya, bambae yumi lanem olsem wanem yumi save mekem olsemia.
[Ol futnot]
a K.T. i min se Kristin Taem.
b Apostasi i fasin blong lego trufala wosip, mo agensem hem.
?Yu Yu Save Ansa Long Ol Kwestin Ya?
◻ ?From wanem man i lusum pis blong hem wetem God fastaem?
◻ ?Ol man Isrel oli mas mekem wanem blong holem pis wetem God?
◻ ?Tede pis wetem God i stanap long wanem?
◻ ?Wanem “pis blong God” we i save lukaot long hat blong yumi?
◻ ?Sipos yumi gat pis wetem God, wanem sam moa blesing we yumi save kasem?