Jeova i Fulap Long Gud Fasin

“!Yu yu fulap long gud fasin, mo yu yu holem hem gud blong givim long olgeta we oli fraet gud long yu!”​—OL SAM 31:19, “NW.”

1, 2. (a) ?Longtaem bifo, Jeova i mekem wanem bigfala wok? (b) ?Taem hem i wokem ol samting finis, olsem wanem Jeova i tokbaot wok blong hem?

LONGTAEM bifo, God i wokem ‘heven i olsem jea blong king ya we i jea blong hem, mo wol i olsem ples we hem i putum leg blong hem antap long hem.’ (Aesea 66:1) Tok blong God i no talem wetaem samting ya i kamtru. Store ya i stat olsem ya nomo, i se: “Bifo we bifo olgeta, God i mekem wol mo skae wetem olgeta samting we i stap long tufala.” (Jenesis 1:1) Long taem ya we hem i wokem olgeta samting, hem i wokem milyan kampani blong sta, hemia ol galaksi, we yumi no save kaontem olgeta. Mo insaed long ol galaksi ya wanwan, i gat taosen milyan sta oli stap. Long raon blong wan galaksi, i gat wan sta i stap we i saen gud, hemia san. Plante smol planet we oli dak, oli no saen olsem ol sta, oli stap ron raonabaot long hem. Nem blong wan long olgeta planet ya hem i wol. Sipos yumi skelem hem wetem ol bigbigfala sta we oli saen tumas, wol ya i smol, i olsem nating nomo. Be long ples ya nao, Jeova i wantem putum leg blong hem i stap.

² Nao Jeova i yusum ol save blong hem long saed blong planet Wol. Long taem ya, “fasbon blong olgeta samting we hem i mekem” i stap wetem hem. Hem i olsem wan Nambawan Man blong Wok. Yes, hem i stap wetem God long ol sikis longfala dei ya we God i wok blong jenisim wol ya we i smol. Nao, olsem pija tok blong Baebol i talem, wol ya i kam olsem wan gudfala ples blong spel blong leg blong God. (Kolosi 1:​15, NW; Eksodas 20:11; Proveb 8:30) Long ples ya nao, God i wantem putum wan nyufala laef samting we i save tingting, hemia ol man. God i wokem faswan man mo woman from ol smosmol samting we oli stap long graon. Biaen, hem i putum tufala i stap long wan nambawan ples, wan paradaes. (Jenesis 1:​26, 27; 2:​7, 8) Olgeta samting ya we God i wokem oli nambawan mo oli naes tumas. From samting ya, Baebol i tokbaot ol filing blong God long moning​—hemia long en​—blong namba sikis dei ya we hem i wokem ol samting. Hem i talem se: “God i luk olgeta samting we hem i wokem finis, mo olgeta wok blong hem i gud tumas.”​—Jenesis 1:31, NW.

Gud Fasin Blong God

3. ?Wanem nambawan fasin blong God i kamaot klia, long ol samting we hem i wokem?

³ Sam taosen yia biaen, wan man we i kamaot long faswan man mo woman, i tingtingbak long taem ya we God i wokem olgeta samting. Hem i talem se: “Yumi no save luk ol fasin ya blong hem [God] stret long ae blong yumi. Hem i God we i blong stap oltaem, mo paoa blong hem i no save finis. Be i stat long taem ya we God i mekem wol ya fastaem, i kam kasem naoia, hem i bin mekem ol fasin ya blong hem oli klia, blong yumi luk. Yumi save faenemaot long ol samting blong wol ya, we hem i bin mekem. From samting ya, ol man oli no gat wan tok nating blong talem.” (Rom 1:20) Yes, nating se yumi no save luk ol fasin blong God stret long ae blong yumi, be yumi luksave olgeta taem yumi luk nambawan wol ya mo ol anamol we oli stap long hem. Hemia nao wan long ol fasin ya we yumi makem: God i fulap long gud fasin. !Taswe taem hem i wokem olgeta samting finis, i stret nomo we God i talem se ol samting ya oli gud!​—Ol Sam 31:19.

4, 5. ?Wanem mining blong gud fasin?

⁴ Long Galesia 5:​22, aposol Pol i tokbaot ol frut blong tabu speret blong God, mo gud fasin i namba sikis frut blong hem. Ol Wajtaoa bifo, oli stadi finis long faef blong olgeta. Ol magasin ya oli soem se i impoten tumas we ol Kristin oli wokem ol fasin ya long laef blong olgeta.a !Olsem nao, i impoten tumas we yumi no fogetem gud fasin! I stret nomo we naoia, yumi stadi long fasin ya.

⁵ ?Wan man we i gat gud fasin hem i olsem wanem? Man ya hem i gud. Hem i gat nambawan mo klin fasin. Hem i wantem tumas blong mekem i gud long narafala, blong oli harem gud from. ?Olsem wanem yumi save soemaot nambawan fasin ya? Yumi mas folem eksampel blong Jeova. Olsem nao, bifo we yumi luk olsem wanem ol Kristin oli save gat gud fasin, yumi save luk olsem wanem God blong yumi Jeova, we i gat lav, i soemaot gud fasin long ol man.

Gud Fasin i Klia Long Ol Samting We God i Wokem

6. ?Wanem samting i pulum Jeova blong wokem ol laef samting we oli save tingting?

⁶ God i harem gud blong stap laef. Nao, i gat wan samting we i pulum Papa blong yumi long heven blong mekem ol laef samting we oli save tingting, oli harem gud olsem hem. ?Wanem samting? Aposol Jon i ansa long kwestin ya, i se: “God hem i lav stret.” (1 Jon 4:8, NW) Yes, lav nomo i pulum God we i nambawan Stampa blong laef, blong wokem ol narafala laef samting, we sam oli stap long heven, mo sam oli stap long wol. I tru, yumi no save gud se heven mo ol laef samting we oli stap long hem, oli olsem wanem. Oli speret man, nao ae blong man i no save luk ol, mo ples blong olgeta i stap long heven. Be traem luk wol ya raonabaot long yu, we i ples we Jeova i givim long ol pikinini blong man. Mo traem tingbaot ol man oli olsem wanem. Nao biaen, long prapa ae blong yu, bambae yu yu luksave se God i gud.

7-9. ?Olsem wanem yumi luksave se God i gud, long rod we hem i wokem wol mo ol man we oli stap long hem?

⁷ Jeova i givim laef long faswan papa mama blong yumi. Antap long samting ya, hem i wokem ol samting blong mekem man i harem gud. Fastaem, hem i wokem wol i goraon long fasin we i stret nomo, nao wol ya i no hot mo i no kolkol tumas. Hem i mekem win we i stap raonabaot long wol i stret nomo blong yumi pulum. Hem i mekem wota, ol gas olsem nitrojen mo oksijen. Ol man ol anamol mo ol gras oli joen gud tugeta blong wokem ol samting ya bakegen, mo ol man oli harem gud blong yusum olgeta taem oli nidim. Long graon, hem i planem ol defren kaen gras mo tri blong ol man oli kakae, mo oli harem gud taem oli luk olgeta. Hem i fulumap skae wetem ol pijin. Kala mo singsing blong olgeta oli naes, oli mekem man i harem gud blong luk mo lesin long olgeta. Hem i fulumap solwota wetem plante fis, mo long graon hem i wokem plante defren kaen anamol, sam oli wael, sam oli save kam fren blong man. !Samting ya i soemaot bigfala gladhat blong God mo gud fasin blong hem tu!​—Ol Sam 104:24.

⁸ Naoia traem tingbaot olsem wanem God i wokem man. Leg, han blong hem oli longfala inaf, nao hem i save stanap mo muf isi nomo. Raonabaot long hem, i gat fulap samting i stap long graon. From samting ya, hem i save kakae mo tekem ol narafala samting we hem i nidim. Jeova i mekem man i harem tes blong ol samting we hem i kakae mo dring. Olsem nao, hem i no kakae blong gat paoa nomo olsem wan mesin. Yes, man i no olsem wan radyo we batri i stap long hem blong i save gat paoa, nao i wok, no gat. God i mekem man i kakae blong hem i save harem gud from. Hem i no mekem samting ya blong fulumap bel blong hem nomo, be blong hem i harem gud long tes blong kakae mo drink blong hem. Mo tu, Jeova i mekem sora blong man. Mo raonabaot long hem, hem i mekem plante noes, blong sora blong hem i harem gud long olgeta. !Tru ya, i gud tumas blong lesin long noes blong wan smosmol reva we i stap ron, long singsing blong nawemba, mo long smol laf blong wan bebi! I tru, plante nogud samting oli hapen biaen long taem ya we hem i wokem ol samting. Be yumi stil luksave se God i gud from we hem i mekem man i glad blong stap laef. Yumi tangkyu long hem from.

⁹ Tingbaot sam narafala samting bakegen. !Ae blong yumi i harem gud blong luk plante defren kaen kala we oli naes! !I gud tumas blong smelem naesfala smel blong wan flaoa tu! !Taswe, yumi no sapraes we man blong raetem ol Sam i talem long Jeova, i se: “Bodi blong mi, yu mekem hem i gud we i gud. Samting ya i save mekem man i fraet. Ol wok blong yu oli strong bitim mak, mo sol blong mi i savegud samting ya.”​—Ol Sam 139:​14, NW.

Man i Mekem Sin, Bambae Hem i Fri Bakegen

10. God i gud long ol man, ?be bighaf blong olgeta oli soemaot wanem fasin long hem? ?Olsem wanem oli stap harem gud yet long gud fasin blong God?

¹⁰ Jeova i gat gud fasin, be sore tumas, faswan papa mama blong yumi oli no gat tangkyu long hem from. Taem oli no obei long ol loa blong Jeova, mo oli brekem wan rul nomo we God i bin putum long olgeta, oli soemaot samting ya. Nao, tufala ya mo ol pikinini blong tufala oli stat blong harem nogud long bodi mo tingting blong olgeta, mo biaen oli ded. (Jenesis 2:​16, 17; 3:​16-19; Rom 5:12) I stat long taem ya, sam taosen yia oli pas. Be bighaf blong ol man oli no tingbaot nating se God i gud, mo oli no tangkyu long hem from. Nating se oli no gat tangkyu mo oli no glad long ol wok we God i mekem, be God i mekem i gud long ol yet. ?Hem i mekem wanem? Aposol Pol i eksplenem samting ya long ol man blong Listra, long Medel Is. Hem i talem se: “Be oltaem hem [God] i stap soemaot gud we fasin blong hem i olsem wanem, long ol gudfala wok we hem i stap mekem. Hem i stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yufala, mo hem i stap mekem yufala i harem gud long tingting blong yufala.”​—Ol Wok 14:17.

11. Gud fasin blong God i pulum hem blong givim wan naesfala wol long ol man. ?Be hem i pulum hem blong mekem wanem moa?

¹¹ I tru, God i gud taem hem i givim ol gudfala samting we oli fulap long wol, nao yumi save laef. Be hem i no mekem samting ya nomo. Jeova i rere blong fogivim ol sin blong ol pikinini blong Adam mo blong joengud wetem ol man we oli fasgud long hem long wol ya. Moses i luksave se God i gud taem Jeova i promes long hem blong mekem ‘olgeta gudfala samting blong hem oli pas long fored blong fes [blong Moses].’ Biaen, Moses i harem tok ya, i se: “Jeova, Jeova, God we i gat sore mo gladhat, hem i slo blong kam kros, mo hem i fulap long kaen gud fasin mo trutok, hem i holem kaen gud fasin blong plante taosen man, i fogivim mastik mo rong mo sin blong ol.”​—Eksodas 33:​19, NW; 34:​6, 7, NW.

12. ?Long Loa blong Moses, wanem samting i soemaot we Jeova i gud?

¹² Long taem blong Moses, Jeova i stanemap plante loa we nesen blong Isrel we i jes stat i mas folem. Long ol loa ya, ol man we oli no wantem mekem sin, be oli mekem, God i save fogivim olgeta. Moses i tekem ol man Isrel i go long God, tru long kontrak blong Loa ya. Nao, nesen ya i kam spesel nesen blong God. Loa ya i tijim olgeta blong mekem sakrafaes long Jeova wetem defren kaen anamol. Ol sakrafaes ya oli save kavremap sin blong olgeta mo ol fasin blong ol we oli no klin. Olsem nao, nating se oli no stret olgeta, be ol man Isrel we oli sore long sin blong ol mo oli tanem tingting blong olgeta from, oli save gohed blong kam kolosap long Jeova. Olsemia tu, oli save se wosip blong olgeta i mekem God i glad long ol. Long saed ya, King Deved, wan memba blong nesen ya we i stap aninit long Loa, i luksave se God i gud. Hem i talem se: “Plis, yu fogivim mi from ol sin blong mi mo ol rabis fasin blong mi, we mi stap mekem taem mi yang yet. [Jeova, NW] yu yu gud tumas, mo oltaem yu stap laekem man tumas, plis yu tingbaot mi oltaem.”​—Ol Sam 25:7.

13. ?Blong fogivim ol sin, Jeova i wokem wanem rod we i moa gud, i bitim ol sakrafaes blong anamol?

¹³ Long stret taem, fasin ya blong Jeova we i gud tumas, i pulum hem blong wokem wan rod blong fogivim ol sin blong ol man blong olwe. Rod ya i sakrafaes blong Jisas, we i kamaot long laen blong King Deved. (Matyu 1:​6-16; Luk 3:​23-31) Jisas i no mekem sin. From samting ya, taem hem i ded, laef blong hem we hem i givim olsem sakrafaes, i gat bigfala praes. Mo God i agri long sakrafaes ya we i wan ransom blong kavremap olgeta sin blong ol pikinini blong Adam. Aposol Pol i talem se: “Olgeta evriwan oli mekem nogud finis, mo oli stap longwe long ol gudgudfala fasin blong God. Be long gladhat blong God, hem i stap givhan long olgeta. Hem i stap mekem olgeta oli stret man long fes blong hem, from we oli joen long Jisas Kraes ya we i pem rod finis blong olgeta oli go fri. God i putum Jisas Kraes blong hem i ded, blong i mekem rod long blad blong hem blong tekemaot ol sin blong ol man we oli bilif long hem.”​—Rom 3:​23-26.

14. ?From sakrafaes blong Jisas, ol man oli save kasem wanem tufala nambawan hop?

¹⁴ Sakrafaes blong Jisas i mekem plante moa samting blong givhan long ol Kristin, i bitim ol sakrafaes blong anamol we ol man Isrel oli mekem bifo, taem oli stap aninit long kontrak blong Loa. Yes, ransom blong Jisas i openem rod blong sam Kristin oli save kam stret long tingting blong God, mo hem i save adoptem olgeta olsem pikinini blong hem. Namba blong ol Kristin ya i gat mak blong hem. Nao oli kam brata blong Jisas mo oli gat hop blong save laef bakegen olsem speret man. Olsem nao, oli save stap wetem hem long Kingdom long heven. (Luk 22:​29, 30; Rom 8:​14-17) !Traem tingbaot! !God i openem rod blong sam man we oli stap long smol planet ya, wol, oli save go long heven! Wan smolhaf blong ol man ya i stap laef yet long wol. Be plante milyan narafala Kristin tu oli bilif long ransom. Bilif blong olgeta i openem rod long ol blong oli save harem gud long samting we Adam mo Iv oli lusum bifo. Yes, bambae oli kasem laef we i no save finis long Paradaes long wol ya we i kam wan naes garen. Kontrak blong Loa nomo i no naf blong mekem man i gat hop blong go long heven no blong stap long wol ya blong olwe.

15. ?Gud nyus i minim wanem tu?

¹⁵ Baebol i kolem mesej long saed blong nyufala plan we God i stanemap tru long Jisas Kraes, wan “gud nyus.” Nem ya i stret nomo from we mesej ya i soemaot we God i gud. (2 Timote 1:​9, 10) Samtaem Baebol i kolem gud nyus ya se “gud nyus blong kingdom.” Tede, hem i stanap long trutok ya se Kingdom i stanap finis mo Jisas we i laef bakegen long ded, i King long hem. (Matyu 24:14; Revelesen 11:15; 14:​6, 7) Be olsem Pol i talem long Timote long vas antap, gud nyus i no minim samting ya nomo. Hem i minim moa. Yes, gud nyus ya i tokbaot praes blong sakrafaes blong Jisas tu we hem i mekem blong givhan long yumi. Sipos i no gat sakrafaes ya, yumi no save frengud wetem God, hem i no save sevem yumi, i no save gat Kingdom blong Jisas, mo God i no save tekem 144,000 pris mo king. !Tru ya, ransom i rili soemaot we God i gud!

God i Gud Tede

16, 17. ?Olsem wanem Hosea 3:5 i kamtru (a) long 537 B.K.T.? (b) long 1919?

¹⁶ Taem aposol Pol i tokbaot “ol las dei,” hem i givim woning ya, i se: “Bambae ol man . . . oli no laekem ol samting we oli gud.” (2 Timote 3:​1-3, NW) Tru ya, bambae ol man oli no laekem ol gud fasin, olsem gladhat mo fasin blong joen gud wetem ol man raonabaot long olgeta. Nao, profet tok blong Hosea 3:5 i save leftemap tingting blong yumi. Hem i talem se: “Bambae ol pikinini blong Isrel oli kambak, mo tru ya bambae oli lukaot Jeova we i God blong olgeta, mo Deved we i king blong olgeta. Mo long las haf blong ol dei, bambae oli seksek, oli kambak long Jeova mo long gud fasin blong hem.”

¹⁷ Profet tok ya i kamtru fastaem long 537 B.K.T.,b taem ol man Jyu oli gofri long Babilon, oli gobak long promes ples. Long taem blong yumi, profet tok ya i kamtru long yia 1919. Long taem ya, haf blong Isrel blong speret we i stap yet, oli kamaot long ogenaesesen blong Setan. Hat blong olgeta i tru, nao oli stat blong lukaot Jeova mo gud fasin blong hem. Nao oli luksave se long 1914, “Deved we i king blong olgeta,” hemia Jisas Kraes, i stat finis blong rul long heven. Hem i stap lidim olgeta taem oli wok strong blong talemaot gud nyus ya long ol nesen. Olsem nao, oli mekem profet tok we i stap long Matyu 24:​14 (NW) i kamtru, se: “Mo gud nyus ya blong kingdom [we i stanap finis], bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.”

18. ?Hu i joen long las haf blong Isrel blong speret, blong talemaot gud nyus?

¹⁸ Tede, “bigfala kampani” oli joen wetem las haf blong olgeta we God i makemaot. Olgeta tu oli leftemap fasin blong Jeova we i gud. (Revelesen 7:9) Long wan drim, aposol Pol i luk wan enjel we i stap talemaot wan mesej. Tede, i gat bitim fo milyan man we oli stap talemaot sem mesej ya long ol nesen. Hem i talem se: “Yufala i mas onagud long God, mo yufala i mas leftemap nem blong hem, from we taem i kam finis blong hem i jajem olgeta man. Hem i mekem skae mo wol mo solwora mo springwora, mo yufala i mas foldaon long fes blong hem blong presem hem.”​—Revelesen 14:7.

19. Talem wan bigfala samting we i soemaot se God i gud.

¹⁹ Wan bigfala samting we i soemaot we God i gud, hemia: Hem i givim raet long yumi blong joen wetem hem long wok ya we kolosap i finis. !Tru ya, i gud tumas blong talemaot “nambawan gud nyus blong hapi God ya”! (1 Timote 1:​11, NW) Taem yumi prij mo yumi tijim samting ya long narafala, yumi gat gud fasin, we i wan bigfala frut blong tabu speret blong God. Nao yumi gat sem tingting olsem man blong wok blong God, Deved, we i talem se: “Bambae oli talemaot plante we yu yu fulap long gud fasin, mo from we yu yu stret, bambae oli singaot bigwan wetem glad.”​—Ol Sam 145:​7, NW.

20. ?Long saed blong gud fasin, bambae yumi tokbaot wanem long nekis haf?

²⁰ Taem yumi talemaot gud nyus, hemia i wan rod blong soemaot gud fasin long laef blong yumi. ?Be i gat rod ya nomo? !No gat! Baebol i wantem we yumi “folem fasin blong God, olsem ol pikinini we hem i laekem olgeta.” (Efesas 5:1, NW) Yumi luksave we God i gud long plante samting. Taswe yumi mas gud long ol defren saed blong laef blong yumi tu. Long nekis haf blong magasin ya, bambae yumi tokbaot olsem wanem yumi save soemaot fasin ya.

[Ol futnot]

?Yu Yu Save Ansa?

◻ ?Olsem wanem ol samting we God i wokem oli soemaot we hem i gud?

◻ ?Jeova i mekem wanem blong fogivim sin blong ol man we oli tanem tingting blong olgeta from sin blong ol?

◻ ?Wetaem olgeta we God i makemaot oli bin kam long Jeova mo long gud fasin blong hem, olsem Hosea 3:​5 i talem? ?Mo wanem samting i kamaot from?

◻ ?Long taem blong yumi, wanem wan bigfala samting we i soemaot se God i gud?

[Tok Blong Pija Long Pej 11]

Ol samting we God i wokem oli soemaot se God i fulap long gud fasin

[Tok Blong Pija Long Pej 12]

God i givim raet long yumi blong mekem wok blong prij. Samting ya i soemaot we hem i gud