Mekem “Evri Kaen Fasin We i Gud”

“From we fasin blong man blong delaet, hem i gat ol gudgudfala frut blong hem. Ol man olsem, oli stap mekem [evri kaen, “NW”] fasin we i gud.”​—EFESAS 5:9.

1, 2. I stat longtaem bifo, i gat tufala grup oli stap. ?Wanem tufala grup ya? ?Mo tede, tufala ya oli defren olsem wanem?

BIAEN we Adam mo Iv oli agensem God long Iden, i gat sikis taosen yia finis, mo biaen we Bigfala Wora i foldaon long taem blong Noa, olgeta man oli seraot long tu grup, no ogenaesesen. Wan grup i traehad blong mekem wok blong Jeova, narafala grup i folem Setan. ?Olsem wanem tede? ?Tufala ogenaesesen ya oli stap yet? !Yes! Profet Aesea i tokbaot tufala grup ya, mo i soemaot wanem i stap hapen long olgeta long taem blong yumi. Hem i talem se: “!Luk! Tudak hem wan bambae i kavremap wol, mo ol nesen bambae oli stap long tudak we i tudak. Be antap long yu, Jeova bambae i stat blong saenaot, mo antap long yu, ol man bambae oli save luk bigfala paoa blong hem i saen.”​—Aesea 60:​1, 2.

² Yes, tufala ogenaesesen ya oli defdefren olgeta, i sem mak long tudak we i defren olgeta long delaet. Mo olsem laet i save pulum man we i lus long tudak, long sem fasin laet we i kam long Jeova i stap saen long tudak blong wol ya. Nao, hem i pulum ol milyan man we hat blong olgeta i stret, oli go long ogenaesesen blong God. Taswe Aesea i talem se: “Tru ya, ol nesen [ol narafala sipsip] bambae oli go long laet blong yu, mo ol king [ol man we God i makemaot blong rul long Kingdom] bambae oli go long laet blong yu we i saen bigwan.”​—Aesea 60:3.

3. ?Olsem wanem ol Kristin oli soemaot bigfala paoa blong Jeova we i saen?

³ ?Olsem wanem ol man oli save luk bigfala paoa blong Jeova i saen long ol man blong hem? Faswan samting, olgeta oli talemaot gud nyus blong Kingdom blong God we i stanap finis. (Mak 13:10) Be oli mekem moa. Oli folem fasin blong Jeova we i wan nambawan eksampel blong mekem i gud. Olsem nao, fasin blong olgeta i pulum ol man we oli gat tingting daon, oli kam long laet. Pol i talem se: “Bifo, yufala i stap long tudak nomo, be naoia we yufala i joen long Masta blong yumi, yufala i stap long delaet. From samting ya, yufala i mas holem fasin blong man blong delaet, oltaem long laef blong yufala.” Nao hem i gohed olsemia: “From we fasin blong man blong delaet, hem i gat ol gudgudfala frut blong hem. Ol man olsem, oli stap mekem [evri kaen, NW] fasin we i gud, mo i stret, mo i tru. Yufala i mas traehad blong faenemaot wanem fasin Masta blong yumi i glad long hem. Bambae yufala i no go joen long ol man we oli stap mekem ol rabis fasin ya, we oli blong tudak nomo, mo i no gat frut blong olgeta.” (Efesas 5:​8-11) ?Pol i minim wanem taem hem i tokbaot “evri kaen fasin we i gud”?

4. ?Wanem mining blong gud fasin? ?Mo olsem wanem man i save luk fasin ya long Kristin man?

⁴ Olsem magasin ya i soemaot long fas haf blong hem, gud fasin i min se man i gat nambawan mo klin fasin. Jisas i talem se Jeova nomo i rili gud. (Mak 10:18) Be wan Kristin i mas folem fasin blong Jeova, nao hem i save gat gud fasin, we i wan frut blong tabu speret. (Galesia 5:22) Wan diksonari (Vine’s Expository Dictionary of Old and New Testament Words) i tokbaot Grik wod a·ga·thosʹ, we man i tanem i kam “gud.” Hem i talem se: “Wod ya i tokbaot man we i gat gud tingting mo gud fasin, nao narafala man i save kasem gudfala frut from.” Olsem nao, taem wan Kristin i gat gud fasin, i minim se hem i gud, mo tu hem i mekem i gud long narawan. (Skelem wetem Dutronome 12:28.) Bambae hem i no save mekem ol nogud samting we oli agensem gud fasin, ‘bambae hem i no joen long ol man we oli stap mekem ol rabis fasin ya, we oli blong tudak nomo, mo i no gat frut blong olgeta.’ Pol i tokbaot ‘evri kaen fasin we i gud.’ Hemia i min se wan Kristin i gat plante rod blong soemaot gud fasin. ?Ol rod ya oli olsem wanem?

“Mekem Ol Gudfala Fasin”

5. ?Wanem fasin i soemaot we man i gud? ?Mo from wanem wan Kristin i mas soemaot fasin ya?

⁵ Pol i tokbaot wan rod olsem taem hem i raet i go long ol man Rom. Hem i talem se yumi mas obei long “ol haeman we oli stap rul.” Biaen hem i talem se: “?Yu no wantem we bambae yu yu fraet long gavman? Ale, yu mas mekem ol gudfala fasin, nao bambae gavman i save presem yu nomo.” ?Pol i yusum wod ya “gudfala” blong tokbaot wanem? Hemia nao, yumi mas obei long ol loa mo long ol samting we ol haeman blong gavman oli askem long yumi blong mekem. ?From wanem wan Kristin i mas obei long olgeta? From we hem i no wantem kasem panis mo agensem ol haeman blong nating. Mo samting we i impoten moa, hem i obei tu blong mekem we voes blong hat blong hem i stap klin long fes blong God. (Rom 13:​1-7, NW) Wan Kristin i obei long Jeova fastaem, mo hem i mas ‘ona long king tu.’ Olsem nao, hem i no mas girap agens long ol haeman we Jeova God i letem olgeta oli stap. (1 Pita 2:​13-17) Long fasin ya, ol Kristin oli gat gud fasin wetem ol man raonabaot long olgeta, oli gud sitisen, mo oli gudfala eksampel.

Yumi Kea Long Narafala

6. (a) ?Blong mekem i gud, yumi save mekem wanem bakegen? (b) Baebol i tokbaot ol man we i stret nomo blong yumi kea long olgeta. ?Hu ya ol man ya?

⁶ Jeova i soemaot we hem i gud taem hem i givim long ol man long wol ‘ren we i foldaon, mo i stap mekem ol garen oli gat kakae long stret taem blong olgeta.’ ?Wanem samting i kamaot from? ‘Hem i stap givim kakae, mo hem i stap mekem man i harem gud long tingting blong hem.’ Samting ya i soemaot se God i rili kea long ol man. (Ol Wok 14:17) Blong folem fasin blong hem, yumi save kea long ol narafala long ol smol mo long ol bigfala samting tu. ?Yumi save mekem olsem long hu fastaem? Pol i talem se yumi mas kea long ol elda, “olgeta ya we oli stap wok wetem yufala. Hemia olgeta ya we Masta blong yumi i jusumaot olgeta blong oli lidim yufala, mo blong oli tijim yufala.” Hem i talem se ol Kristin oli ‘mas onagud long olgeta, mo oli mas laekem olgeta tumas.’ (1 Tesalonaeka 5:​12, 13) ?Olsem wanem yumi save mekem olsem? Yumi mas wok wetem olgeta. Yumi save mekem olsem taem yumi mekem ol impoten wok long Haos-Kingdom. Taem yumi nidim help blong ol elda, yumi save go luk olgeta. Be, yumi no mas bitim mak, yes, i no stret we yumi go luk olgeta blong ol smosmol samting. Plante elda oli wok long kongregesen, mo oli gat responsabiliti long famle blong olgeta tu. Taswe i gud yumi traehad blong givhan long olgeta, blong mekem we wok blong olgeta i kam moa isi, i no kam hevi moa.

7. ?Olsem wanem yumi save kea long ol olfala?

⁷ Yumi mas kea long ol olfala tu. Wan spesel loa long Loa blong Moses i talem se: “Long fored blong waet hea, yu mas stanap, mo yu mas kea gud long man we i olfala, mo yu mas fraet gud long God blong yu. Mi mi Jeova.” (Levitikas 19:32) ?Olsem wanem yumi save kea long olgeta? Olgeta we oli yang moa, oli mas rere blong halpem olgeta taem oli go long stoa no oli mekem sam narafala wok. Ating sam olfala oli nidim help blong go long miting. Taswe ol elda we oli kea, oli save jekem samting ya. Long ol asembli, ol yangfala mo ol man we oli strong, oli no mas pusum wan olfala we i wokbaot slou, blong traem bitim hem. Oli mas gat longfala tingting, nao oli mas wet sipos wan olfala i slou blong go sidaon no blong go kakae.

8. Baebol i tokbaot narafala kaen man we yumi mas kea long olgeta. ?Olsem wanem yumi save mekem olsem?

⁸ Yumi mas kea long narafala kaen man tu. Man blong raetem ol Sam i tokbaot olgeta, i se: “Olgeta we oli stap tingbaot ol puaman oli save harem gud.” (Ol Sam 41:1) I isi blong kea long olgeta we oli gat mane no hae ples. ?Be olsem wanem long man we i man nating no i pua? Long Baebol, Jemes i talem se sipos yumi kea long olgeta ya, hemia i soemaot we yumi gat stret fasin mo Kristin lav. Samting ya i wan tes blong luk sipos yumi rili gat ol fasin ya. Yumi save winim tes ya sipos yumi kea gud long olgeta, nomata oli gat mane, hae ples, no no gat.​—Filipae 2:​3, 4; Jemes 2:​2-4, 8, 9.

“Yufala i Mas Gat Sore”

9, 10. ?From wanem ol Kristin oli mas gat sore? ?Mo olsem wanem oli save gat gudfala fasin ya?

⁹ Long sam pija tok, Jisas i tokbaot wan narafala rod blong soemaot gud fasin. Long wan pija tok olsem, hem i tokbaot wan man we i wokbaot i go long Jeriko. Taem hem i wokbaot, ol man blong stil oli stilim hem, oli kilim hem, mo oli letem hem i ledaon long rod. Wan man Livae mo wan pris oli pas kolosap long man ya we i karem kil, be oli no wantem halpem hem. Biaen, wan man Sameria i pas, i luk hem, nao i stop blong givhan plante long hem. Plante taem, ol man oli kolem store ya parabol blong wan man Sameria, we i gudfala man. ?Man Sameria ya i gat wanem gudfala fasin? Hem i gat sore. Taem Jisas i askem long man we i lesin long hem blong talem weswan long ol trifala man ya i mekem i gud long man we i karem kil, man ya i givim stret ansa, i se: “Man ya we i gat sore long hem.”​—Luk 10:37.

¹⁰ Ol Kristin we oli gat sore, oli folem fasin blong Jeova. Moses i tokbaot Jeova long ol man Isrel, i se: “Jeova, God blong yu, i wan God we i gat sore. Bambae hem i no lego yu, i no spolem yu, mo i no fogetem kontrak wetem ol bubu blong yu, we hem i mekem strong promes long saed blong hem.” (Dutronome 4:31) Jisas i talem se sore blong God i mas gat paoa long yumi, i se: “Yufala i mas gat sore, olsem we Papa blong yufala i gat sore.” (Luk 6:36) ?Olsem wanem yumi save soem se yumi gat sore? Parabol blong Jisas i talem se yumi mas rere blong halpem narafala, nating se yumi save kasem smol trabol from, no i hadwok long yumi. Taem wan gudfala man i luk wan brata blong hem i kasem trabol, hem i no mekem olsem we hem i no luk. Be sipos hem i naf, hem i mekem wan samting blong givhan long hem.​—Jemes 2:​15, 16.

11, 12. Olsem parabol blong Jisas long saed blong tufala slef i soemaot, ?fasin sore i minim wanem tu? ?Mo olsem wanem yumi soemaot fasin ya tede?

¹¹ Wan narafala parabol blong Jisas i soemaot se man we i gud i gat sore, nao hem i rere blong fogivim narafala. Hem i tokbaot wan slef we i gat kaon long masta blong hem long ten milyan dola. Slef ya i no save pem kaon ya. Nao, hem i askem long masta blong hem blong gat sore long hem, nao masta ya i kaen long hem, i fogivim bigbigfala kaon ya blong ten milyan dola. Ale, Slef ya i goaot, mo hem i faenem wan narafala slef we i gat kaon long hem long faef handred dola nomo. Be slef ya we masta blong hem i fogivim hem, i no gat sore. Nao, hem i sakem slef we i gat kaon long hem long kalabus, gogo kasem hem i save pem kaon blong hem. I klia se slef ya i no gat sore, i no wan gud man. Mo taem masta blong hem i harem wanem i bin hapen, hem i askem long slef ya blong pemaot olgeta kaon blong hem.​—Matyu 18:​23-35.

¹² Samting ya i kamtru long yumi tede. Yumi olsem wan slef we masta blong hem i fogivim hem. From sakrafaes blong Jisas, Jeova i fogivim wan bigbigfala kaon long yumi, hemia sin. Nao yumi mas rere blong fogivim narafala. Jisas i talem se yumi mas rere blong fogivim go kasem “sevente taem.” I min se i no gat wan mak, oltaem yumi mas fogivim man. (Matyu 5:7; 6:​12, 14, 15; 18:​21, 22) Wan Kristin we i gat sore, i no save ting nogud long wan brata. Hem i no save holem kros blong hem i stap long brata ya, mo i no stret sipos hem i ting nogud long hem, i no moa wantem toktok wetem hem. Sipos hem i mekem olsem, i min se hem i no gat sore, nao hem i no gat gud fasin.

Gladhat Mo Tekem Man i Kam Long Haos

13. ?Olsem wanem man i save soemaot se hem i gud tu?

¹³ Man i soemaot se hem i gud taem hem i gat gladhat mo i tekem man i kam long haos blong hem. Wan dei, wan yang man i askem wan advaes long Jisas, i se: “?Tija, mi mi mas mekem wanem gudfala wok blong bambae mi kasem laef ya we i no save finis?” Jisas i ansa se hem i mas folem ol loa blong God oltaem. Yes, taem yumi obei long loa blong Jeova, hemia wan rod blong soemaot gud fasin. Be yang man ya i ting se hem i mekem olgeta samting finis. I klia se ol man raonabaot long hem oli luk man ya olsem wan gud man, be hem i filim se i gat wan samting we hem i no mekem yet. Taswe, Jisas i talem long hem, i se: “Sipos yu wantem kam stret gud olgeta, yu go, yu salemaot olgeta samting blong yu, yu tekem mane blong olgeta, yu go givim long ol puaman, nao bambae yu yu gat plante samting blong yu long heven. Ale, yu kam, yu biaen long mi, yu man blong mi.” (Matyu 19:​16-22) Yang man ya i gowe, tingting blong hem i hevi. Hem i rij tumas. Sipos hem i folem advaes blong Jisas, bambae hem i soemaot se hem i no laekem tumas ol samting blong wol, mo i mekem i gud long gladhat blong hem. Be hem i no folem advaes ya.

14. ?Wanem gudfala advaes Jeova mo Jisas oli givim long saed blong gladhat?

¹⁴ Jeova i talem long ol man Isrel se oli mas gat gladhat. Olsem nao, yumi ridim se: “Yu no mas mestem. Yu mas givim long [puaman we i stap long ples blong yu], mo hat blong yu i no mas griri taem yu yu givim sam samting i go long hem. From we sipos yu mekem olsem, bambae Jeova, God blong yu, i blesem yu long evri wok blong yu, mo long evri samting we yu yu wantem mekem.” (Dutronome 15:10; Proveb 11:25) Jisas Kraes hem wan i talem se yumi mas gat gladhat. Hem i talem se: “Yufala i mas givim olting blong yufala i go nomo long narafala man, nao God bambae i givim olting i go nomo long yufala. Bambae God i givim long yufala olsem we man i fulumap bag, i seksekem, i ramem gogo i fulap gud, i stap kafsaed i folfoldaon.” (Luk 6:38) Antap bakegen, Jisas tu i soemaot we hem i fulap long gladhat. Wan dei, hem i wantem spel smol. Be, ol man oli faenem ples we hem i stap long hem, nao oli kam long hem. Jisas i gat gladhat, nao i no spel, i wok strong blong givhan long ol man ya. Biaen, hem i givim kakae long bigfala hif blong ol man ya. Samting ya i soemaot we hem i gat fasin blong welkamem man.​—Mak 6:​30-44.

15. ?Olsem wanem ol disaepol blong Jisas oli gat gladhat, oli soemaot wan nambawan eksampel long yumi?

¹⁵ Plante disaepol blong Jisas oli folem advaes blong Jeova mo blong Jisas, nao oli gat gladhat mo oli tekem man i kam long haos. Long yia 33 K.T.,a taem Kristin kongregesen i jes stanap, plante man we oli kam blong mekem Lafet blong Pentekos, oli harem ol aposol i prij, nao oli bilif long Jisas. Taem lafet ya i finis, oli wantem save moa samting. Taswe oli stap long taon ya. Be, oli no moa gat naf kakae. From samting ya, ol Kristin we oli stap long ples ya, oli salem graon no haos blong olgeta. Wetem mane we oli kasem, oli givim kakae long ol nyufala brata blong olgeta. Olsem nao, olgeta oli save stap yet blong kam strong moa long bilif. !Ol brata we oli salem olting blong ol, oli rili soemaot gladhat!​—Ol Wok 4:​32-35; lukluk tu Ol Wok 16:15; Rom 15:26.

16. ?Yumi save mekem wanem tede blong welkamem man long haos, mo gat gladhat?

¹⁶ Tede, taem ol Kristin oli givim taem mo mane blong olgeta blong halpem kongregesen blong ol, mo blong halpem wok blong prij raonabaot long wol, oli gat gladhat. Oli mekem olsem Kraes. Taem i gat faet, etkwek no wan narafala samting olsem, gudfala fasin ya i kamaot klia, from we oli givhan long ol brata we oli kasem ol trabol olsem. Taem seket elda i kam visitim olgeta, oli soemaot gladhat tu, oli lukaot gud long hem. Taem ol Kristin famle oli askem long sam “boe we i no gat papa” (mo gel we i no gat papa) blong kam pleplei no kakae long haos blong ol, mo stadi Baebol tugeta, oli soemaot tu se oli gat fasin blong welkamem man. Hemia tu i wan rod blong soemaot gud fasin.​—Ol Sam 68:5.

Talem Trutok

17. ?From wanem i had blong talem trutok oltaem tede?

¹⁷ Taem Pol i tokbaot frut blong delaet, hem i joenem fasin ya we i gud wetem stret fasin mo trutok. Olsem nao, i stret blong talem se man we i talem trutok, i gat gud fasin. Ol gudfala man oli no gyaman. Be tede, plante man raonabaot long yumi oli stap gyaman. Taswe, i had blong talem trutok oltaem. Plante man oli gyaman taem oli fulumap pepa blong pem takis blong olgeta. Ol man blong wok oli gyaman long saed long wok we oli stap mekem. Long skul, ol studen oli gyaman taem oli mekem lesen blong ol mo taem oli pas ol tes. Ol bisnesman oli gyaman long ol man. Ol pikinini oli gyaman blong no kasem panis. Sam oli talem gyaman tok blong spolem nem blong narafala.

18. ?Wanem tingting blong Jeova long ol gyaman man?

¹⁸ Jeova i no laekem nating gyaman tok. Long ol ‘seven samting’ we hem i no laekem nating, i gat “tang we i gyaman,” mo “gyaman wetnes we i tok gyaman oltaem.” (Proveb 6:​16-19) Long lis blong ol man we bambae oli no save stap long nyufala wol blong God, i gat “ol man blong gyaman.” Olgeta ya oli stap wetem ol man blong fraet, ol man blong kilim man i ded mo ol man blong mekem nogud wetem woman. (Revelesen 21:8) Mo tu, wan proveb i talem se: “Man we i wokbaot long stret fasin blong hem, i fraet gud long Jeova. Be man we i kruked long ol rod blong hem, i tingbaot Hem olsem nating nomo.” (Proveb 14:2) Ol rod blong wan man we i gyaman, oli kruked. From samting ya, man we i gyaman i soemaot klia se hem i tingbaot Jeova olsem nating nomo. !Samting ya i nogud olgeta! Yumi mas talem trutok, nating se biaen man i mas stretem yumi from, no yumi lusum mane. (Proveb 16:6; Efesas 4:25) Olgeta we oli talem trutok, oli folem fasin blong Jeova, “God ya blong trutok.”​—Ol Sam 31:5, NW.

Soemaot Gud Fasin Oltaem

19. ?Samtaem yumi luk wanem long wol, we i leftemap God we i Wokem yumi?

¹⁹ Ol samting we yumi tokbaot, oli jes sam ‘kaen’ rod nomo we man i save folem blong soemaot gud fasin. Wan Kristin i mas soemaot fasin ya oltaem. I tru, ol man blong wol tu oli gud samtaem. Olsem nao, sam oli tekem man i kam long haos blong ol, mo sam oli gat sore. Taswe parabol blong Gudfala Man Sameria i nambawan. Jisas i talem se wan man we i no man Jyu, hem i gat sore, be ol elda blong kongregesen blong ol man Jyu, oli no gat sore. Yes, nating se i gat sikis taosen yia finis we ol man oli sinman, be sam man oli stil gat ol gudfala fasin ya insaed long olgeta. Samting ya i leftemap God we i Wokem gud ol man.

20, 21. (a) ?From wanem gud fasin blong ol Kristin i defren long enikaen gud fasin we yumi save luk long ol man blong wol? (b) ?Olsem wanem Kristin man i save soemaot gud fasin? ?From wanem yumi mas traehad blong mekem olsem?

²⁰ Be long saed blong ol Kristin, i no naf blong olgeta oli gud nomo long sam fasin blong olgeta. Oli mas mekem i gud long olgeta kaen rod, from we oli wantem folem fasin blong God. Baebol i talem se yumi save lanem fasin ya we i gud. Man blong raetem ol Sam, i prea long God, i se: “Tijim mi blong mi mi gud.” ?Olsem wanem? Hem i gohed, i talem se: “From we mi bilif long ol loa blong yu.” Hem i ademap tok ya, i se: “Yu yu gud, mo yu yu stap mekem i gud. Plis, yu tijim mi long ol rul blong yu.”​—Ol Sam 119:​66, 68, NW.

²¹ Yes, sipos yumi lanem ol loa blong Jeova mo yumi obei long olgeta, bambae yumi gud. Yumi mas rimemba oltaem se gud fasin i wan frut blong tabu speret. Sipos yumi lukaot tabu speret blong Jeova taem yumi prea, yumi joen wetem ol brata sista, mo yumi stadi Baebol, ale bambae tabu speret i save halpem yumi blong soemaot fasin ya. Antap bakegen, gud fasin i gat bigfala paoa. Hem i save winim ol fasin nogud tu. (Rom 12:21) From samting ya, i impoten tumas we yumi mekem i gud long narafala, mo antap moa, yumi mas mekem olsem long ol Kristin brata fastaem. (Galesia 6:10) Sipos yumi mekem olsem, bambae yumi save stap wetem olgeta we oli gat “haenem, ona mo pis” we God i promes blong givim long “evriwan we oli mekem i gud.”​—Rom 2:​6-11, NW.

[Futnot]

?Yu Yu Save Ansa?

◻ ?Olsem wanem yumi save gohed blong mekem i gud long saed blong ol haeman blong gavman?

◻ ?I stret nomo we yumi kea long hu?

◻ ?Olsem wanem man i soemaot se hem i gat sore?

◻ Tede, ol Kristin oli gat gladhat mo oli glad blong tekem man long haos. ?Olsem wanem oli soemaot ol fasin ya?

◻ ?Olsem wanem yumi save soemaot gud fasin?

[Tok Blong Pija Long Pej 16]

Taem man i kea long narafala, hemia wan rod blong mekem i gud

[Tok Blong Pija Long Pej 19]

Jisas i Bigfala Tija. Hem i gat gladhat blong givhan long narafala