Lukluk Biaen Long “Pis Mo Seftaem” We Man i Wokem
Ol man i no save wokem trufala pis blong olwe. ?From wanem? From we olgeta oli no stampa blong brekem pis, nating se oli gat fol from ol nogud faet we plante man i ded long hem bifo. Be trufala man blong brekem pis hem i gat moa paoa bitim man. Hemia Devel Setan, we Baebol i tokbaot hem se “hem i gyaman long olgeta man long wol finis, i lidim olgeta oli go krangke.”—Revelesen 12:9.
BAEBOL i talem se: “Olgeta man blong wol oli stap long paoa blong Setan.” (1 Jon 5:19) Taswe blong kasem trufala pis mo seftaem blong olwe, oli mas tekemaot Setan mo ol fasin blong wol ya we hem i stanemap mo stap kontrolem. (Lukluk Aesea 48:22; Rom 16:20.) Be ol man oli no save mekem olsem.
?Olsem wanem pis mo seftaem i save kamaot? Hemia we i gat moa paoa i bitim Setan, hem nao i save mekem. God ya we i gat olgeta paoa i makemaot taem i stap blong finisim ol wok blong Setan long wol ya. Stret long taem ya, bambae wantaem nomo “bigfala trabol” i kam long wol ya we Setan i stap bos long hem. (1 Tesalonaeka 5:3-7) Ol pruf i soemaot se i no longtaem bambae samting ya i kamaot.
!Pis Mo Seftaem Naoia!
?I save gat pis mo seftaem tede? Yes, trufala pis mo seftaem i save kamaot tede tu. ?Olsem wanem? Plante lida blong ol skul oli stap joen long ol politik blong wol ya, blong traem faenem. Be i no olsem. Hem i defren olgeta, taem ol man oli folem ol loa mo advaes blong God, trufala pis mo seftaem i save kamaot from.
?I tru se pis i save kamaot from? Yes, i tru ya. Ol Wetnes blong Jeova oli traem mo faenemaot se rod ya i mekem se oli harem gud long trufala pis mo tu oli harem se oli sefgud. Nao taem oli stap folem ol loa we i stap insaed long Baebol, samting ya i givhan long olgeta blong oli kam joen tugeta olsem wan bigfala kampani we trufala pis i stap long hem, nating se oli kam long ol defdefren laen, kantri no lanwis.—Ol Sam 133:1.
From we oli stap obei long loa blong God, i olsem we oli stap ‘hamarem ol naef blong faet blong olgeta oli kam aean blong brekem graon long garen, mo oli no moa lanem fasin blong faet.’ (Aesea 2:2-4) Oli harem se oli sef from God i laekem olgeta, mo oli save gud se ol brata blong olgeta long saed blong speret oli laekem olgeta. (Rom 8:28, 35-39; Filipae 4:7) Blong faenemaot yu wan mifala i glad blong yu kam long wan long ol Haos-Kingdom blong olgeta blong luk.
Pis Mo Seftaem Long Ful Wol
Ol promes blong Baebol long tru pis mo seftaem i no kasem fulmak blong hem yet. !Hem i defren long pis mo seftaem we ol man blong God oli kasem tede! Hemia i pija nomo long ol samting we bambae i kamaot long fyuja taem evri man we oli stap long wol oli folem ol loa blong God. Bambae i no longtaem samting ya i kamtru.
Aposol Pol i talem se: “Taem ol man [olgeta we oli no wantem God] oli stap talem se: ‘!Pis mo seftaem!’ [olgeta ya oli ting se oli wokem pis mo seftaem long prapa rod blong olgeta] nao wantaem nomo bigfala trabol i mas spolem ol man ya olgeta.” (1 Tesalonaeka 5:3, NW) Bambae God i jes talemaot se i naf blong Setan i stap trikim ol man. Long taem ya nao God bambae i finisim hem wetem olgeta rabis fasin blong wol ya we oli stap long paoa blong hem. Nao profet tok blong Daniel bambae i kamtru, hem i se: “Long ol dei blong ol king ya, God blong heven bambae i stanemap wan kingdom we bambae i no save brokdaon samtaem. Mo kingdom ya i no save go long han blong narafala man. Hem bambae i smasem mo i finisim olgeta kingdom ya, mo hem nomo bambae i stanap blong olwe.”—Daniel 2:44.
?Yu ting se hemia i no stret fasin blong God? No gat ya. Bambae wantaem nomo bigfala trabol ya i kasem olgeta ya we oli mas kasem, from God i jajem olgeta folem stret fasin blong hem. ?Yu yu trastem Hemia we i wokem yumi se, bambae hem i mekem long stret fasin? !Yes, olgeta samting i stap long han blong hem! ?Mo bambae wanem i kamaot from jajmen blong hem? Buk blong Proveb i talem se: “Ol stret man nomo bambae oli stap long wol, mo ol man we oli no gat poen bambae oli stap long hem. Be long saed blong ol rabis man, bambae oli lus, oli no moa stap long wol. Mo ol man blong tanem baksaed, God bambae i pulumaot olgeta, oli no moa stap long wol.” (Proveb 2:21, 22) Bambae yumi no save sore from ol rabis man ya we oli lus.
Taem we olgeta we oli man blong brekem pis oli lus, ol man blong wol bambae oli kasem tru pis mo seftaem aninit long Kingdom blong God. “Bambae oli no mekem nogud nating, mo oli no mekem trabol nating long olgeta ples long tabu hil ya blong mi, from we bambae wol ya i fulap tru long save blong Jeova olsem we ol wora oli kavremap solwora.” (Aesea 11:9) ?Yu yu bilivim promes ya blong Baebol? ?Yu yu save gud se ol samting ya oli save kamtru i no longtaem? Sipos yu yu gat sam kwestin, i gud yu lukluk moa insaed long bisnes ya. I tru tumas, yumi mas folem ol rod we God i wantem. Hemia nomo i save mekem ol man i kasem tru pis mo seftaem we oli wantem tumas.
[Tok Blong Pija Long Pej 8]
Ol man blong Jeova oli harem gud from tru pis mo seftaem we oli kasem tede long laef blong ol