?God i Ansa Long Ol Prea Blong Yu?

WAN woman we hem i stap long aelan ya Hokaedo long Japan, hem i talem se: “Mi mi harem se neva God i ansa long prea blong mi.” I no woman ya nomo we i harem olsemia. Plante plante man oli harem se neva oli kasem ansa long prea blong olgeta. Mo yu tu, ating yu yu stap tingbaot sipos God i ansa long ol prea blong yu, no no gat.

Plante milyan man oli talem fulap prea long fulap god. ?From wanem i luk olsem we God i no ansa long olgeta prea ya? Blong faenemaot risen, fastaem yumi mas skelem ol defren kaen prea we ol man oli stap talem.

?Samfala Oli Askem Wanem Long Prea?

Long taem blong Nyu Yia, tu long evri tri man long Japan, hemia samwe long 80 milyan man, oli prea long ol olta blong Sinto no ol jyos blong Buda. Oli givim selva mane olsem presen long God, mo oli prea se bambae oli gat laki mo famle blong olgeta i stap sef.

Long Janewari mo Febuwari fulap studen oli prea jes bifo long ol strong tes long skul. Fulap fulap studen oli go prea long wan jyos long Tokyo we god blong edukesen i stap long hem. Oli raetem olgeta samting we oli wantem kasem long wan smol wud, nao oli hangem ol wud ya olbaot long yad blong jyos ya. Long 1990, taem ol skul oli stap testem ol pikinini, bitim 100,000 smol wud ya oli stap raonabaot long wan bigfala jyos long Tokyo.

Plante man oli prea se bodi blong olgeta i stap strong. Long wan jyos long Kawasaki long Japan, ol man oli stap askem long God blong hem i blokem sik ya AIDS. Pris we i lukaot long skul ya i talem se: “Risen from wanem mifala i prea blong blokem AIDS se bambae i pulum ol man blong lukaot long fasin blong olgeta.” ?Be hemia i bigfala risen blong prea?

Long wan narafala haos prea, wan olfala woman i prea blong hem i save “ded wantaem.” ?From wanem? From we longtaem finis olfala woman ya i sik mo hem i no moa wantem harem nogud long bodi blong hem. Mo tu, hem i no wantem putum wan baden long famle blong hem.

Long wan kantri we oli talem se hem i ‘Kristin,’ kapten blong wan futbol tim i prea se tim ya i win mo God i protektem ol man long tim ya blong oli no kasem kil. Ol Katolik man long Polan oli stap prea blong oli harem gud wanwan. Taem oli ting se Meri i harem prea blong olgeta, oli flasem aedol blong hem wetem ol sas ston. Fulap man oli go long ol skul olsem bigfala skul long Gwadalupe long Meksiko Siti mo long Lurd long Franis, blong prea strong from sam merikel we oli save tekemaot sik blong ol.

Long ol kantri long Is mo long ol kantri long Wes, olgeta man oli prea blong askem plante samting we i blong givhan long olgeta wanwan. I klia se oli wantem we God i harem prea blong olgeta mo i ansa long ol. ?Be i stret blong ting se God i harem evri prea? ?Olsem wanem long ol prea blong yu? ?God i ansa long ol? ?God i ansa long prea blong man, no no gat?