Taem Bodi Blong Jisas i Jenis i Kam Narafala: ?Store Ya i Gat Paoa Long Yu?

Fo man oli wokbaot oli go antap long wan bigfala hil. Nao tri long olgeta oli sek long samting we i kamaot long ples ya. Hemia tri long ol disaepol blong Jisas. Stret long fes blong olgeta, bodi blong Jisas i jenis, i kam narafala. Lesin long gudfala ripot ya long Gospel blong Mak:

“JISAS i tekem Pita mo Jemes mo Jon, oli go antap long wan bigfala hil. Trifala ya nomo i go biaen long hem. Nao stret long fes blong trifala, bodi blong Jisas i jenis, i kam narafala. Ol klos blong hem oli saen tumas, oli waet we i waet, we i no gat man long wol i save mekem kaliko i waet olsem. Nao trifala man ya blong hem oli luk we Elaeja mo Moses, tufala i kamtru, tufala i stap store wetem Jisas. Nao Pita i talem long Jisas, i se: ‘Tija, i gud we mifala i stap long ples ya tede. Bambae mifala i wokem tri wansaed haos, wan blong yu, wan blong Moses mo wan blong Elaeja.’ Trifala ya i seksek tumas, taswe Pita i tok olbaot nomo. Nao i gat wan klaod i kam kavremap olgeta. Nao oli harem wan tok i kamaot long klaod, i talem se ‘Hemia Pikinini blong mi ya, we mi laekem hem tumas. Yufala i mas lesingud long hem.’ Nao wantaem nomo, olgeta oli lukraon, be oli no moa luk tufala ya, Jisas nomo i stap wetem olgeta.”​—⁠Mak 9:​2-8.

!Tingbaot! Fes blong Jisas i saen olsem san nomo. (Matyu 17:⁠2) Klos blong hem oli waet we i waet, “we i no gat man long wol i save mekem kaliko i waet olsem.” Mo oli harem bigfala voes blong God hem wan i tokbaot Pikinini blong hem. !Samting ya we i kamaot i nambawan!

Grik wod ya we oli tanem i kam “bodi i jenis” i minim “i kam narafala.” Sem wod ya i stap long Rom 12:​2. Vas ya i givim advaes long ol Kristin se oli mas mekem tingting blong olgeta i kam nyufala olgeta. Olsem nao, oli save “jenisim” laef blong olgeta.​—⁠An Expository Dictionary of New Testament Words, Buk 4, pej 148, we W. E. Vine i raetem.

Yes, samtaem biaen long Lafet blong Pasova long 32 K.T.,a taem bodi blong Jisas i jenis i kam narafala, hemia i wan bigfala samting ya. ?Wanem i kamaot bifo long merikel ya? ?Hem i gat wan spesel risen blong hem? ?From wanem Moses mo Elaeja tufala i stap insaed long bisnes ya? ?Mo olsem wanem samting ya we i kamaot long Kraes i gat paoa long laef blong yumi?

Ol Samting We Oli Kamaot Fastaem

Bifo we hem i go antap long bigfala hil, Jisas wetem ol disaepol blong hem oli stap long ples ya Sisaria Filipae. Taon ya i samwe long 25 kilomita saotwes long Hil ya Hemon. Taswe ating antap long hil ya nao, bodi blong Jisas i jenis i kam narafala.

Taem oli stap wokbaot oli go antap long “bigfala hil” ya, Jisas i askem long ol disaepol blong hem se: “?Ol man oli stap taltalem mi se mi hu?” Oli ansa se: “Sam man oli stap talem se yu Jon Baptaes, mo sam oli stap talem se yu Elaeja. Mo sam narafala man oli stap talem se yu wan long ol profet bifo.” Nao Kraes i askem long olgeta se: “?Be yufala, yufala i stap talem mi se mi hu?” Pita i ansa i se: “Yu yu Mesaea ya.” Nao “Jisas i tok strong long olgeta, i se ‘Yufala i no talemaot tok ya long ol man.’ Nao Jisas i stat tijim ol man blong hem, i talemaot we Pikinini blong Man, hem bambae i mas harem nogud long plante samting. Ol elda blong ol man Isrel, wetem ol jif pris, mo ol tija blong Loa bambae oli no wantem hem, bambae oli kilim hem i ded. Be biaen long tri dei, bambae God i mekem hem i laef bakegen long ded.”​—⁠Mak 8:​27-31.

Nao Jisas i gohed blong talem wan promes long olgeta se: “I gat sam man oli stap stanap long ples ya, we bambae oli no save ded, gogo oli luk paoa blong [kingdom blong God, NW] i kamtru.” (Mak 9:1; Matyu 16:28) ‘Sikis dei biaen’ promes ya i kamtru. Long taem ya, Jisas i stap prea, nao long fored blong Pita, Jemes, mo Jon, bodi blong hem i jenis i kam narafala. Luk i talem se samting ya i hapen “eit dei” biaen. Ating hem i kaontem dei we Jisas i mekem promes ya mo dei we promes ya i kamtru wetem ol sikis narafala dei.​—⁠Matyu 17:​1, 2; Mak 9:2; Luk 9:​28, NW.

Hemia i No Wan Drim

Taem bodi blong Jisas i jenis i kam narafala, hemia i no wan drim nomo. Ol trifala aposol evriwan oli no save luk sem drim. Jisas i talem se hem i wan “vison.” (NW) Hem i min se hemia i no wan gyaman samting nomo, from we Grik wod ya long Matyu 17:​9, long narafala ples long Baebol oli tanem i kam “luk.” (Ol Wok 7:31) Ol man we oli lukluk samting ya oli no stap slip, oli wekap gud. Oli rili luk wetem ae blong olgeta mo harem wetem sora blong olgeta samting ya we i kamaot.​—⁠Luk 9:⁠32.

Pita i stap wekap gud, be hem i no save wanem blong talem from we hem i seksek tumas. Taswe hem i tok olbaot nomo, i talem se oli mas wokem tri wansaed haos, wan blong Jisas, wan blong Moses, mo wan blong Elaeja. (Luk 9:33) I klia se klaod ya we i kam kavremap olgeta taem Pita i stap toktok, i soemaot se paoa blong God i stap wetem olgeta antap long hil ya. Taem ol man Isrel oli stap long drae ples, klaod we i fulumap haos tapolen blong olgeta i soemaot sem samting. (Eksodas 40:​34-38; Luk 9:34) Mo tru, ol aposol oli no save slip taem oli harem ‘Papa God’ i talem se: “Hemia Pikinini blong mi ya, we mi mi jusumaot hem. Yufala i mas lesingud long hem.”​—⁠2 Pita 1:​17, 18; Luk 9:35.

From Wanem Oli Luk Moses

Taem bodi blong Jisas i jenis i kam narafala, Moses i ded plante handred yia finis. Taswe hem i “no save wan samting nating.” (Eklesiastis 9:​5, 10) Hem i sem mak long Deved. Tufala i no laef bakegen. Taswe Moses i no rili stap antap long hil. (Ol Wok 2:​29-31) ?Be olsem wanem oli luk we Moses i stap storeyan wetem Kraes long vison ya?

God i bin talem long Moses se: “Bambae mi jusumaot wan man long ol brata blong olgeta, nao bambae mi mekem hem i kam profet, olsem yu. Mo bambae mi putum ol tok blong mi long maot blong hem. Mo bambae hem i mas talemaot long olgeta ol tok ya we mi mi talem long hem.” (Dutronome 18:18) Pita i talem se profet tok ya i stret long Jisas Kraes nomo. (Ol Wok 3:​20-23) Jisas i nambawan profet blong God. Moses i daon moa long Jisas, be hem i profet we i hae moa long ol narafala profet we God i sanem i go long nesen blong Isrel.

I gat plante samting long laef blong Moses mo long laef blong Bigfala Moses, Jisas Kraes, we oli sem mak. Eksampel: Taem Moses i pikinini, rabis rula long taem ya i traem spolem laef blong hem. Sem mak long Jisas. Be God i protektem Moses, mo hem i protektem Jisas tu. (Eksodas 1:20 kasem 2:10; Matyu 2:​7-23) Taem Moses i stat blong mekem spesel wok we Jeova i givim long hem, hem i livim kakae blong hem gogo 40 dei i pas. Sem mak long Jisas. (Eksodas 24:18; 34:28; Dutronome 9:​18, 25; Matyu 4:​1, 2) God i givim paoa long Moses blong mekem sam merikel. Sem mak long Jisas.​—⁠Eksodas 14:​21-31; 16:​11-36; Ol Sam 78:​12-54; Mak 4:41; Luk 7:​18-23; Jon 14:11.

God i yusum Moses blong sevem ol man Isrel oli aot long han blong ol man Ijip. Jisas tu i mekem ol man oli fri long saed blong speret. (Eksodas 12:37 kasem 14:31; Jon 8:​31, 32) Moses i gat wan bigfala blesing, hem i mekem kontrak blong Loa i wok blong pulum ol man Isrel oli kam kolosap long God. Jisas i mekem nyufala kontrak i wok blong pulum ol man oli kam kolosap long God. (Eksodas 19:​3-9; 34:​3-7; Jeremaea 31:​31-34; Luk 22:20; Hibrus 8:​3-6; 9:15) Mo tu, Jeova i yusum Moses blong leftemap nem blong Hem long fored blong ol man Isrel, ol man Ijip, mo plante narafala man tu. Jisas Kraes tu i mekem plante samting blong leftemap tabu nem blong Jeova. (Eksodas 9:​13-17; 1 Samuel 6:6; Jon 12:​28-30; 17:​5, 6, 25, 26) Taswe taem bodi blong Jisas i jenis i kam narafala, mo Moses i stap kolosap long hem, God i stap soemaot se Kraes bambae i mekem sem wok olsem Moses bifo, be long fasin we i bigfala moa.

From Wanem Elaeja i Kamtru

Long taem ya, profet ya Elaeja i ded, hem i no laef bakegen. Be nating, i stret we hem i kamtru long vison ya. ?From wanem? Elaeja i mekem wan bigfala wok blong stanemap bakegen klin wosip mo blong mekem nem blong Jeova i tabu long fored blong ol man Isrel. Taem Jisas Kraes i stap long wol, hem i mekem sem wok ya. Mo long fyuja bambae hem i mekem plante moa samting blong stanemap bakegen klin wosip mo blong leftemap nem blong Papa blong hem long heven from Kingdom blong Mesaea.

Profet Malakae i soemaot se wok blong Elaeja i saen blong wan wok we i mas kamaot long fyuja. God i yusum Malakae blong talem se: “!Yufala i luk! Bambae mi sanem long yufala profet ya Elaeja, bifo long bigfala dei blong Jeova we i mekem ol man oli fraet. Mo hem i mas tanem tingting blong ol papa oli joen bakegen wetem pikinini blong ol. Mo hem i mas tanem tingting blong ol pikinini oli joen gud wetem papa blong ol bakegen. Olsem nao, mi mi no save kam blong kilim wol ya, blong spolem hem.”​—⁠Malakae 4:​5, 6.

Wok blong Jon Baptaes i mekem profet tok ya i kamtru smol. Jisas i soemaot samting ya afta we bodi blong hem i jenis i kam narafala. Ol disaepol blong hem oli askem long hem from wanem ol tija oli stap talem se Elaeja i mas kam fastaem bifo we Mesaea i kamtru. Jisas i ansa se: “I tru. Fastaem Elaeja i mas kam, mo hem i mas stretem olgeta samting. Be mi mi talem long yufala, Elaeja i kam finis, mo ol man oli no save hem, be oli mekem hem olsem we oli wantem. Mo long sem fasin, mi, mi Pikinini blong Man, bambae mi tu mi harem nogud long bodi blong mi, long han blong olgeta.” Nao store ya i gohed i se: “Nao trifala man ya blong hem, trifala i save we hem i stap tokbaot Jon Baptaes ya.”​—⁠Matyu 17:​10-13.

Jon i baptaesem ol man Isrel we oli tanem tingting blong olgeta from sin we oli mekem agens long kontrak blong Loa. Hemia nao wok ya we i olsem Elaeja bifo. Impoten moa, Jon i kliarem rod blong Mesaea i save kamtru, mo hem i talemaot Jisas Kraes long ol man. (Matyu 11:​11-15; Luk 1:​11-17; Jon 1:29) ?Be from wanem mifala i talem se wok ya i mekem profet tok blong Malakae i kamtru long smol fasin nomo?

Long vison ya, Elaeja i stap toktok wetem Jisas. Long taem ya, Jon Baptaes i ded finis. Taswe hemia i min se wan wok we i olsem wok blong Elaeja bifo i mas kamaot long fyuja. Mo tu, profet tok i soemaot se wok ya bambae i kamaot bifo long “bigfala dei blong Jeova we i mekem ol man oli fraet.” Dei ya i stap kam kwik nao. Mo “faet long bigfala Dei blong God ya we i gat olgeta paoa” long Ha-Mageden, no Amageden, hem i insaed long dei ya. (Revelesen 16:​14-16) Taswe vison ya i soemaot long olgeta long taem bifo se bifo we Kingdom blong God i stanap long heven long fyuja, i mas gat wan wok we i kamaot long wol we i sem mak long wok blong Elaeja bifo mo man we i kam biaen long hem, Elaesa. Mo i tru, bitim wan handred yia finis, ol Wetnes blong Jeova tede oli stap mekem wan wok blong stanemap bakegen klin wosip mo blong leftemap nem blong God.​—⁠Ol Sam 145:​9-13; Matyu 24:14.

Risen Blong Vison Ya

Samting ya we i hapen long Jisas antap long hil i mas givim paoa long hem blong winim ol traem we hem i kasem, taem hem i harem nogud long bodi blong hem gogo hem i ded. Hem i harem voes blong Papa blong hem i kamaot long heven we i talem se hem i Pikinini blong Hem we i laekem hem tumas. Samting ya i mas mekem bilif blong Jisas i strong moa. ?Be olsem wanem vison ya i givhan long ol narafala?

Samting ya we i kamaot long Jisas i mas mekem bilif blong ol man we oli luk hem long taem ya i kam strong moa tu. Vison ya i makem long tingting blong olgeta se Jisas Kraes hem i tru Pikinini blong God. Nambawan Man blong Talemaot Tok blong Jeova, hemia Waes Tok, i stap long medel blong olgeta. Taswe voes we oli harem i no voes blong hem, be i voes blong God hem wan. Hem i talem se: “Hemia pikinini blong mi, we mi laekem hem tumas. Tingting blong mi i harem gud tumas long hem.” Jeova i bin talem samting ya taem Jisas i tekem baptaes tu. Be taem bodi blong Jisas i jenis i kam narafala, God i talem moa, se ol disaepol oli mas lesin long Pikinini blong Hem.​—⁠Matyu 3:​13-17; 17:5; Jon 1:​1-3, 14.

Vison ya i mekem bilif blong olgeta i kam strong moa long wan narafala rod tu. Long vison ya, Jisas, “Moses mo Elaeja,” trifala i stap storebaot “fasin we bambae hem [Kraes] i aot long wol.” Mo oli tokbaot “ol samting ya we bambae hem i mekem long Jerusalem.” (Luk 9:31) Wod ya “aot” i kam long Grik wod ya eʹxo·dos. I klia se taem hem i livim wol no i aot long wol, i minim taem Jisas i ded mo God i mekem hem i girap bakegen, i laef olsem wan speret man. (1 Pita 3:18) Taswe vison ya i mekem bilif blong olgeta i strong moa se bambae Kraes i laef bakegen. Samting we i bildim bilif blong olgeta moa, se vison ya i pruvum we Jisas bambae i kam King blong Kingdom blong Mesaea blong God. Mo tu, vison ya i soemaot se Kingdom ya bambae i hae, i gat paoa.

Mo tu, vison ya i mekem bilif blong olgeta i strong moa long ol profet tok blong Baebol. Samwe long 32 yia biaen long taem ya, (64 K.T.), Pita i stil tingbaot samting ya we hem i bin luk. Hem i talem se: “Taem mifala i talemaot long yufala se Jisas Kraes Masta blong yumi i gat paoa, mo bambae hem i kambak bakegen, be mifala i no kasem ol samting ya long ol storeyan olbaot, no gat. Mifala tri, we long ae blong mitrifala, mifala i luk laet ya we i saenaot long Kraes, we i saen we i saen. Taem God Papa blong yumi i leftemap nem blong hem, nao i mekem laet ya i saenaot long hem, mitrifala i stap. Nao mitrifala i harem tok i kamaot long bigfala laet blong heven, i talem se ‘Hemia Pikinini blong mi ya, we mi mi laekem hem tumas. Tingting blong mi i glad tumas long hem.’ Taem mitrifala i stap wetem hem long bigfala hil ya we i tabu, mitrifala i harem tok ya we i aot long heven i kam. Ol samting ya oli mekem mifala i save moa we tok blong ol profet i tru. I gud yufala i lesingud long hem from we tok blong ol profet i olsem wan laet we i stap saen long ples we i tudak. Laet ya bambae i stap saen [long hat blong yufala, NW], gogo i brok delaet, nao bigfala Dei i kamtru, mo [wan moningsta i girap, NW].”​—⁠2 Pita 1:​16-19.

?Hem i Gat Wanem Mining Long Yu?

Yes, Pita i tingbaot vison we hem i luk antap long hil olsem wan samting we i soemaot ol profet tok blong God. Ating aposol Jon i stap tokbaot vison ya tu, taem hem i talem se: “Waes Tok ya i kam man, i stap wetem yumi, we hem i fulap long gladhat mo trutok. Mo mifala i luk bigfala paoa blong hem. Hemia bigfala paoa ya we hem i gat from we hem nomo i stret Pikinini blong Papa blong hem.” (Jon 1:14) Long sem fasin, vison ya we oli luk long taem bifo i save mekem yu yu bilif moa long ol profet tok blong Jeova.

Mo tu, samting we i kamaot long Jisas long taem ya i save mekem se yu yu bilif moa we Jisas Kraes i Pikinini blong God mo Mesaea we God i promes se bambae i kam. Hem i save mekem se yu yu bilif moa strong se Jisas i laef bakegen long ded, mo hem i go long heven long speret bodi. Mo tu, gudfala vison ya i mas mekem bilif blong yu i strong moa long gavman blong God, from we vison ya i blong soemaot paoa blong Kraes taem hem i rul long Kingdom.

Mo samting we i mekem bilif blong yumi i kam strong moa, se vison ya i makem taem blong yumi, taem Jisas i stap bakegen. (Matyu 24:​3-14) Stat long 1914, hem i rul long heven olsem King we God i makemaot hem. Kolosap nao bambae hem i yusum paoa mo haenem we God i givim long hem blong agensem ol enemi blong rul blong God, mo blong mekem rod blong nyufala wol i kamtru. (2 Pita 3:13) Yu yu save harem gud blong olwe long ol blesing ya sipos yu yu soemaot bilif long ol gudfala samting we ol man bifo oli luk long vison ya.

[Futnot]