Taem Jisas i Kam Long Paoa Blong Kingdom

“I gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi king blong ol man blong mi.”—MATYU 16:28.

1, 2. ?Wanem i hapen smoltaem afta long Pentekos 32 K.T., mo wanem stampa risen blong samting ya?

Smoltaem afta long Pentekos 32 K.T.,a tri aposol blong Jisas Kraes oli luk samting olsem wan vison we oli no save fogetem. Folem tok blong Baebol, “Jisas i tekem Pita mo Jemes mo brata blong hem Jon, trifala i biaen long hem, nao oli go antap long wan bigfala hil, olgeta fo nomo. Nao stret long fes blong trifala, bodi blong Jisas i jenis, i kam narafala.”​—Matyu 17:​1, 2.

² Samting ya we oli luk taem bodi blong Jisas i jenis, i kasem olgeta long stret taem we oli nidim. Jisas i jes talem finis long ol man blong hem, se bambae hem i mas harem nogud mo ded long Jerusalem. Be, olgeta ya oli faenem i had blong kasem save long tok ya. (Matyu 16:21-​23) Samting we ol trifala aposol ya blong Jisas oli luk, i mekem bilif blong olgeta i kam strong. Nao oli rere blong fesem taem ya we bambae Jisas i ded, mo ol yia blong hadwok mo ol traem we bambae Kristin kongregesenb i kasem biaen. ?Yumi save lanem wan samting from vison ya? Yes, from we hem i olsem wan pija blong samting we bambae i kamaot long taem blong yumi.

3, 4. (a) ?Jisas i talem wanem, sikis dei bifo we bodi blong hem i jenis? (b) Eksplenem wanem i hapen long taem ya we bodi blong Jisas i jenis.

³ Sikis dei bifo we bodi blong Jisas i jenis, hem i talem long ol man blong hem se: “Bambae mi, mi Pikinini blong Man, mi kam wetem ol enjel blong mi, long bigfala paoa blong Papa blong mi, nao bambae mi mi givim pei long evri man, stret long ol wok we olgeta oli mekem.” Ol tok ya bambae oli kamtru long taem we “wol ya i finis.” Jisas i gohed blong talem tu, se: “Tru mi talem long yufala, i gat sam man oli stap stanap long ples ya, we bambae oli no save ded, gogo oli luk mi, mi Pikinini blong Man, mi kamtru, we mi mi king blong ol man blong mi.” (Matyu 16:27, 28; 24:3; 25:31-​34, 41; Daniel 12:4) Bodi blong Jisas i jenis blong mekem laswan toktok ya nao i kamtru.

⁴ ?Wanem samting stret we ol trifala aposol ya oli luk? Store blong Luk i talem se: “Taem [Jisas] i stap prea, oli luk we fes blong hem i kam narafala, mo klos blong hem i kam waet we i saen tumas. Nao wantaem nomo, tu man i kamtru we i gat bigfala laet i saen raon long tufala. Tufala ya, hemia Moses mo Elaeja, nao tufala i stap store wetem Jisas, tufala i stap tokbaot fasin we bambae hem i aot long wol. Hemia ol samting ya we bambae hem i mekem long Jerusalem.” Biaen, “wan klaod i kam, i kavremap olgeta [ol aposol]. Nao taem olgeta oli stap insaed long klaod ya, trifala ya i fraet tumas. Nao oli harem wan tok i kamaot insaed long klaod ya, i talem se ‘Hemia Pikinini blong mi ya, we mi mi jusumaot hem. Yufala i mas lesingud long hem.’”​—Luk 9:​29-​31, 34, 35.

Bilif i Kam Strong Moa

5. ?Taem aposol Pita i luk we bodi blong Jisas i jenis, samting ya i mekem wanem long Pita?

⁵ Aposol Pita i bin talemaot finis se Jisas hem i ‘Mesaea ya, Pikinini blong God ya we i laef we i no save ded.’ (Matyu 16:16) Ol tok blong Jeova we i kamaot long heven, i soemaot se tok ya blong Pita i tru. Mo taem bodi blong Jisas i jenis, samting ya i soemaot smol nomo, wanem bambae i kamaot long fyuja, taem Kraes i kamtru wetem paoa mo glori blong Kingdom, blong jajem ol man. Bitim 30 yia afta long taem ya we bodi blong Jisas i jenis, Pita i raetem se: “Taem mifala i talemaot long yufala se Jisas Kraes Masta blong yumi i gat paoa, mo bambae hem i kambak bakegen, be mifala i no kasem ol samting ya long ol storeyan olbaot, no gat. Mifala tri, we long ae blong mitrifala, mifala i luk laet ya we i saenaot long Kraes, we i saen we i saen. Taem God Papa blong yumi i leftemap nem blong hem, nao i mekem laet ya i saenaot long hem, mitrifala i stap. Nao mitrifala i harem tok i kamaot long bigfala laet blong heven, i talem se ‘Hemia Pikinini blong mi ya, we mi mi laekem hem tumas. Tingting blong mi i glad tumas long hem.’ Taem mitrifala i stap wetem hem long bigfala hil ya we i tabu, mitrifala i harem tok ya we i aot long heven i kam.”​—2 Pita 1:​16-​18; 1 Pita 4:​17.

6. ?Wanem ol samting we oli kamaot afta we bodi blong Jisas i jenis?

⁶ Tede tu, bilif blong yumi i kam strong moa from samting we trifala aposol ya oli bin luk. I tru, plante samting oli bin hapen stat long yia 32 K.T. kam kasem naoia. Wan yia biaen, Jisas i ded mo i laef bakegen, nao hem i go antap long heven, i sidaon long raetsaed blong Papa blong hem. (Ol Wok 2:​29-​36) Long Pentekos blong semfala yia ya, nyufala “Isrel blong God” i stanap, mo wan spesel wok blong prij i stat. Oli prij fastaem long Jerusalem, mo biaen, oli go kasem olgeta ples blong wol. (Galesia 6:​16; Ol Wok 1:8) Kwiktaem nomo, trabol i kasem ol man blong Jisas, mo i traem bilif blong olgeta. Ol man oli holem ol aposol mo oli kilim nogud olgeta, from we ol aposol oli no wantem stop long wok blong prij. I no longtaem biaen long samting ya, ol man oli kilim Steven i ded. Biaen, oli kilim Jemes tu i ded. Hem i wan long olgeta we i luk wetem prapa ae blong hem se bodi blong Jisas i jenis. (Ol Wok 5:​17-​40; 6:8 kasem 7:​60; 12:​1, 2) Be, Pita mo Jon, tufala i laef tru long taem ya, mo tufala i gohed blong mekem wok blong Jeova blong plante yia biaen. Yes, kolosap long en blong faswan handred yia K.T., Jon i raetemdaon sam moa drim, we hem i luk Jisas wetem bigfala paoa blong hem long heven.​—Revelesen 1:​12-​20; 14:14; 19:11-​16.

7. (a) ?Wetaem nao mining blong vison ya we bodi blong Jisas i jenis, i stat kamtru? (b) ?Long wanem taem Jisas i givim pei long samfala man, stret long wok we oli mekem?

⁷ Long stat blong ‘dei blong Masta’ long 1914 kam kasem naoia, plante long ol drim ya we Jon i bin luk, oli kamtru. (Revelesen 1:​10) ?Olsem wanem long taem ya we Jisas bambae i ‘kam long bigfala paoa blong Papa blong hem,’ taem ya we bodi blong Jisas we i jenis, i olsem wan pija blong hem? Vison ya i stat kamtru taem Kingdom blong God i stanap long heven long 1914. Jisas, olsem wan moning sta, i kamtru olsem nyufala King we i sidaon long jea blong hem. I olsem we delaet i kamtru long wan nyufala dei. (2 Pita 1:​19; Revelesen 11:15; 22:16) ?Long taem ya, Jisas i givim pei long sam man stret long ol wok we oli mekem? Yes. I gat bigfala pruf se smoltaem biaen, sam Kristin we tabu speret i bin makemaot olgeta, oli laef bakegen long heven.​—2 Timote 4:8; Revelesen 14:13.

8. ?Wanem samting bambae i kamaot blong mekem mining blong vison ya we bodi blong Jisas i jenis, i kamtru fulwan?

⁸ Be, long fyuja, i no longtaem, bambae Jisas i kamtru ‘wetem olgeta enjel, mo olgeta paoa blong hem,’ blong jajem olgeta man long wol ya. (Matyu 25:31) Long taem ya, bambae hem i kamtru wetem olgeta bigfala paoa blong hem, mo bambae hem i givim pei long “evri man,” stret long ol wok we olgeta wanwan oli mekem. Olgeta we oli olsem sipsip, bambae oli kasem laef we i no save finis long Kingdom we i rere blong olgeta. Mo ol man we oli olsem nani, bambae oli “go blong kasem panis ya we i no save finis.” !Long taem ya, vison ya blong bodi blong Jisas we i jenis, bambae i kamtru fulwan long nambawan fasin!​—Matyu 25:34, 41, 46; Mak 8:​38; 2 Tesalonaeka 1:​6-​10.

Ol Fren Blong Jisas We Oli Kasem Paoa

9. ?I stret blong bilif se bambae Moses mo Elaeja tufala i stap wetem Jisas taem mining blong vison ya we bodi blong Jisas i jenis, bambae i kamtru? Eksplenem.

⁹ Jisas i no stap hem wan taem bodi blong hem i jenis. Moses mo Elaeja tufala i stap wetem hem. (Matyu 17:​2, 3) ?Tufala i rili stap long taem ya? No gat, from we tufala man ya oli ded longtaem finis, mo tufala i stap slip long beregraon blong wet long taem we bambae tufala i laef bakegen long ded. (Eklesiastis 9:​5, 10; Hibrus 11:35) ?Bambae tufala i kamtru wetem Jisas taem hem i kam wetem bigfala paoa blong heven? No gat, from we Moses mo Elaeja tufala i laef bifo we eni man blong wol ya i gat jans blong go long heven. Tufala ya bambae oli stap wetem ol ‘man we oli stret, we bambae oli laef bakegen’ long wol ya. (Ol Wok 24:15) Taswe, long vison, taem tufala i kamtru wetem Jisas we bodi blong hem i jenis, samting ya i olsem wan pija. ?Pija blong wanem samting?

10, 11. ?Elaeja mo Moses tufala i pija blong hu long sam narafala store?

¹⁰ Long sam narafala ples long Baebol, Moses mo Elaeja tufala i olsem pija blong sam narafala man we oli kam biaen. Moses, we i tekem kontrak blong Loa i kamtru long ol man Isrel, hem i olsem pija blong Jisas, we i tekem nyufala kontrak i kamtru long ol man. (Dutronome 18:18; Galesia 3:​19; Hibrus 8:6) Elaeja i pija blong Jon Baptaes, man we i go fastaem long Mesaea. (Matyu 17:11-​13) Mo tu, taem yumi joenem Moses mo Elaeja wetem ol tok blong Revelesen japta 11, tufala i pija blong smol grup blong ol tabu man we oli laef yet long taem blong en. ?Olsem wanem yumi save samting ya?

¹¹ Yumi save samting ya taem yumi lukluk i go long Revelesen 11:​1-6. Long vas 3, yumi ridim se: “Bambae mi mi sanem tufala wetnes blong mi, we klos blong tufala, oli wokem long bag nomo . . . Nao long ol twelef handred sikiste dei ya, tufala wetnes ya blong mi bambae tufala i stap talemaot tok we mi bambae mi givim long tufala.” Profet tok ya i kamtru long ol tabu Kristin we oli laef long taem blong Faswan Bigfala Faet blong Wol.c ?From wanem i gat tufala wetnes? From we smol grup blong ol tabu Kristin ya oli mekem wok we, long saed blong speret, i sem mak long wok blong Moses mo Elaeja. Vas 5 mo 6 i gohed blong talem se: “Sipos sam man oli traem spolem tufala, faea i save kamaot long maot blong tufala blong spolem ol enemi blong tufala. From samting ya, olgeta we oli traem spolem tufala, bambae oli ded. Tufala i gat paoa blong blokem ren, blong bambae taem tufala i talemaot tok we God i givim long tufala, be ren i no save foldaon. Tufala i gat paoa long ol springwora tu, blong tanem olgeta i kam blad. Mo tufala i gat paoa tu, se evri taem tufala i wantem mekem olsem, tufala i save tekem ol narafala sik oli kam spolem ol man long wol.” Olsem nao, tok ya i mekem yumi tingbaot ol merikel we Elaeja mo Moses i bin mekem bifo.​—Namba 16:31-​34; 1 King 17:1; 2 King 1:​9-​12.

12. Long taem ya we bodi blong Jisas i jenis, ?Moses mo Elaeja tufala i pija blong hu?

¹² Ale, ?long taem ya we Moses mo Elaeja i stanap wetem Jisas we bodi blong hem i jenis, tufala i pija blong hu ya? Luk i talem se tufala i kamtru wetem Jisas, mo “i gat bigfala laet i saen raon long tufala.” (Luk 9:​31) I klia se, tufala i pija blong ol Kristin we tabu speret i makemaot olgeta blong oli “joen long Kraes,” nao oli gat nambawan hop ya blong “kasem gudfala laef” wetem hem long heven. (Rom 8:​17) Ol tabu Kristin ya we oli laef bakegen long ded finis, bambae oli stap wetem Jisas taem hem i kamtru long paoa blong Papa blong hem, blong “givim pei long evri man, stret long wok we olgeta oli mekem.”​—Matyu 16:27.

Ol Wetnes Olsem Moses Mo Elaeja

13. ?Wanem ol samting we oli soemaot se Moses mo Elaeja i stret pija blong ol tabu man blong Jisas we oli kasem paoa wetem hem long heven?

¹³ I gat sam samting we oli soemaot klia se, Moses mo Elaeja, tufala i stret pija blong ol tabu man we bambae oli joen wetem Jisas. Moses mo Elaeja, tufala tugeta oli mekem wok olsem man blong karem tok blong Jeova, blong plante yia. Tufala tugeta oli kasem hadtaem from wan rula long taem blong olgeta. Tufala tugeta oli kasem help long wan famle blong narafala kantri, taem tufala i nidim. Tufala tugeta oli no fraet blong talemaot tok blong God long ol king, mo blong stanap strong agensem ol gyaman profet. Moses mo Elaeja tufala tugeta oli bin luk ol bigbigfala saen blong paoa blong Jeova, long Bigfala Hil ya Sinae (we narafala nem blong hem se Oreb). Tufala tugeta oli putumap man blong tekem ples blong tufala, long is saed blong Jodan reva. Mo long taem blong Moses (wetem Josua) mo Elaeja (wetem Elaesa), i gat moa merikel i kamaot bitim ol narafala taem. Long taem blong Jisas nomo, namba blong ol merikel we oli kamaot i bigwan moa.d

14. ?Olsem wanem olgeta we tabu speret i makemaot olgeta, oli bin talemaot tok blong Jeova, olsem Moses mo Elaeja i mekem?

¹⁴ ?Olgeta samting ya oli mekem yumi tingbaot Isrel blong God? Yes, i tru tumas. Jisas i talem long ol man blong hem, se: ‘Yufala i mas go long ol man long olgeta ples long wol, blong pulum olgeta oli kam man blong mi. Mo yufala i mas baptaesem olgeta long nem blong Papa blong mi, mo long nem blong mi, mi Pikinini blong hem, mo long nem blong tabu speret. Mo yufala i mas tijim olgeta blong oli folem olgeta tok ya we mi mi givim finis long yufala. Mo yufala i mas save, bambae mi mi stap wetem yufala oltaem, gogo wol ya i finis.’ (Matyu 28:19, 20) Blong obei long ol tok ya, ol Kristin we tabu speret i makemaot olgeta, oli bin wok olsem man blong talemaot ol tok blong Jeova, stat long Pentekos 33 K.T. kam kasem tede. Olsem Moses mo Elaeja, olgeta oli kasem hadtaem from ol rula we oli kros tumas, mo oli givim wetnes long ol haeman ya tu. Jisas i talem long ol 12 aposol blong hem se: “From we yufala i man blong mi, bambae oli save pulum yufala i go stanap long fes blong ol haeman blong gavman mo long fes blong ol king. Be hemia i blong yufala i wetnes blong mi long fes blong olgeta ya, mo long fes blong ol hiten man.” (Matyu 10:18) Ol tok ya blong hem oli kamtru plante taem insaed long Kristin kongregesen, long ol yia we oli pas.​—Ol Wok 25:​6, 11, 12, 24-​27; 26:3.

15, 16. ?Olsem wanem olgeta we tabu speret i makemaot olgeta oli sem mak long Moses mo Elaeja (a) ?long fasin blong no fraet blong stanap strong long saed blong trutok? (b) ?long help we oli kasem long ol man we oli no man Isrel?

¹⁵ Mo tu, ol tabu Kristin oli gat fasin ya blong no fraet nating olsem Moses mo Elaeja, taem oli stanap long saed blong trutok mo agensem ol gyaman tijing. Tingbaot olsem wanem Pol i soemaot klia se man Jyu ya Bajisas i wan gyaman profet, mo olsem wanem hem i tok long waes fasin blong talem stret se ol god blong ol man Atens oli gyaman nomo. (Ol Wok 13:​6-​12; 17:16, 22-​31) Tingbaot olsem wanem ol tabu man we oli stap laef yet long taem blong yumi, oli no fraet blong talemaot ol rabis fasin blong Krisendom. Mo wok ya blong givim wetnes i rili mekem Krisendom i harem nogud.​—Revelesen 8:​7-​12.e

¹⁶ Taem Moses i ronwe long kros blong Fero, hem i haed long haos blong wan man we i no man Isrel, hemia Ruel, we narafala nem blong hem se Jetro. Samtaem biaen, Ruel i givim gudfala advaes long Moses, long saed blong wan plan blong wok. Mo pikinini boe blong Ruel, nem blong hem Obab, i lidim ol man Isrel oli gotru long draeples.f (Eksodas 2:​15-​22; 18:​5-​27; Namba 10:29) ?I gat sam memba blong Isrel blong God we oli kasem semkaen help olsemia, long sam man we oli no ol tabu man Isrel blong God? Yes i gat. Wan ‘bigfala kampani’ blong ol “narafala sipsip,” oli sapotem olgeta. Grup ya i jes hivap long ol las dei ya. (Revelesen 7:9; Jon 10:16; Aesea 61:5) Jisas i talemaot olsem wanem ol “sipsip” ya bambae oli sapotem ol tabu brata blong hem wetem kaengud fasin mo lav. Hem i talem profet tok ya se: “Taem we mi mi hanggri, yufala i givim kakae long mi, mo taem we mi mi tosta, yufala i givim wora long mi. Taem we mi mi strenja, yufala i tekem mi mi go long haos blong yufala, mo taem we mi mi neked, yufala i givim klos long mi. Taem we mi mi sik, yufala i kam luk mi, mo taem we mi mi stap long kalabus, yufala i kam storeyan wetem mi. . . . Tru mi talem long yufala, taem we yufala i mekem olsem long wan brata blong mi, we i daon moa long ol narafala brata blong mi, be hemia i olsem we yufala i mekem long mi nomo.”​—Matyu 25:35-​40.

17. ?Wanem samting i hapen long ol man we tabu speret i makemaot olgeta, we i sem mak long samting we i hapen long Elaeja long Bigfala Hil ya Oreb?

¹⁷ Mo tu, wan samting i kamaot long Isrel blong God we i kolosap sem mak long samting we i hapen long Elaeja long Bigfala Hil blong Oreb.g Long sem fasin we Elaeja i ronwe long Kwin Jesebel, smol grup blong ol tabu Kristin tu oli fraet, nao oli ting se wok blong olgeta i finis finis long en blong Faswan Bigfala Faet blong Wol. Mo tu, olsem Elaeja, oli gat wan ekspiryens wetem Jeova, taem hem i kam blong jajem ol grup we oli talem se oli ‘haos blong God.’ (1 Pita 4:​17; Malakae 3:​1-3) Taem hem i luk se Krisendomh i no naf, hem i luksave smol grup blong ol tabu Kristin olsem ‘slef ya we i stret mo waes,’ mo hem i putumap olgeta blong lukaot long olting blong Jisas long wol ya. (Matyu 24:45-​47) Long Oreb, Elaeja i harem “wan voes we i tok slou mo i kwaet,” hemia voes blong Jeova, we i givim moa wok long hem blong mekem. Long ol yia afta long faet, we oli kwaet, ol tabu man we oli holemstrong long wok blong Jeova, oli harem voes blong hem tru long Baebol. Olgeta ya tu oli kasem save se oli gat wan impoten wok blong mekem.​—1 King 19:​4, 9-​18; Revelesen 11:​7-​13.

18. ?Olsem wanem Jeova i soemaot paoa blong hem long nambawan fasin tru long Isrel blong God?

¹⁸ Laswan samting se, ?i gat sam bigfala saen oli kamaot blong soem se paoa blong Jeova i stap long Isrel blong God? Afta we Jisas i ded, ol aposol oli mekem plante merikel, be sloslou wok ya i finis. (1 Korin 13:​8-​13) Long taem blong yumi, yumi no luk ol merikel wetem prapa ae blong yumi. Be Jisas i talem long ol man blong hem se: “Tru mi talem long yufala, man we i bilif long mi, hem bambae i save mekem ol wok ya we mi mi stap mekem. Yes, hem bambae i save mekem ol wok we oli strong moa blong mekem, from we bambae mi mi go long Papa blong mi.” (Jon 14:12) Faswan taem we tok ya i kamtru, hemia taem ol disaepol blong Jisas oli talemaot gud nyus long olgeta ples we Gavman blong Rom i rul long hem long faswan handred yia. (Rom 10:18) Wok we i bigwan moa i kamaot tede, taem smol grup blong ol tabu Kristin oli lidim wok ya blong talemaot gud nyus ‘long olgeta ples long wol, blong oli wetnes long fes blong olgeta man.’ (Matyu 24:14) ?Wanem risal blong wok ya? Long ol yia biaen long 1900, namba blong ol man blong bilif we oli givim laef blong olgeta blong mekem wok blong Hem, i kam antap moa, i bitim olgeta narafala yia bifo. (Revelesen 5:​9, 10; 7:​9, 10) !Hemia i rili wan nambawan pruf blong bigfala paoa blong Jeova!​—Aesea 60:22.

Ol Brata Blong Jisas Oli Kam Wetem Paoa

19. ?Wetaem nao ol tabu brata blong Jisas oli joen wetem hem long bigfala paoa blong hem?

¹⁹ Taem ol wanwan tabu brata blong Jisas oli ded, oli kasem paoa wetem hem long heven. (Rom 2:​6, 7; 1 Korin 15:53; 1 Tesalonaeka 4:​14, 17) Long rod ya, oli kam ol king mo pris long Kingdom blong heven, we oli no save ded bakegen samtaem. Bambae oli joen wetem Jisas blong ‘rul long ol narafala man long wol, wetem wokingstik blong olgeta we i olsem aean, we i naf blong brekem bodi blong ol man blong evri ples, olsem we aean i save smasem graonpot we i brobrok olgeta.’ (Revelesen 2:​27; 20:​4-6; Ol Sam 110:​2, 5, 6) Olgeta ya bambae oli sidaon wetem Jisas long ol jea blong king, blong jajem “ol twelef laen blong ol man Isrel.” (Matyu 19:28) Olgeta laef samting we oli stap harem nogud tumas, oli wet longtaem finis blong luk ol spesel samting ya, we oli joen wetem fasin ya we God i “soemaot ol pikinini blong hem.”​—Rom 8:​19-​21; 2 Tesalonaeka 1:​6-8.

20. (a) ?Bilif blong Pita i kam strong moa long wanem hop, taem hem i luk we bodi blong Jisas i jenis? (b) ?Olsem wanem store ya blong bodi blong Jisas we i jenis, i mekem ol Kristin tede oli kam strong moa?

²⁰ Pol i tokbaot olsem wanem Jisas bambae i soemaot hem long taem blong “bigfala trabol.” Hem i raetem se: “Long Dei ya, bambae Jisas i kamtru bakegen, blong olgeta man we oli man blong hem bambae oli presem hem, oli ona long hem. Mo long Dei ya, yufala bambae i wetem olgeta man ya blong hem, from we yufala i bilif.” (Matyu 24:21; 2 Tesalonaeka 1:​10) !Hemia i rili wan nambawan hop blong Pita, Jemes, Jon, mo ol narafala Kristin we tabu speret i makemaot olgeta! Taem Pita i luk we bodi blong Jisas i jenis, bilif blong Pita i kam strong moa. I sua se, taem yumi ridim store ya, bilif blong yumi i kam strong tu, nao tingting blong yumi i strong moa se i no longtaem, bambae Jisas i “givim pei long evri man, stret long ol wok we olgeta oli mekem.” Ol gudfala tabu Kristin we oli laef i stap yet, oli luk we bilif blong olgeta se bambae oli kasem paoa wetem Jisas long heven, i tru. Bilif blong ol narafala sipsip i kam strong moa from save ya se bambae hem i sevem olgeta taem rabis wol ya i finis, mo bambae oli go insaed long wan nyufala wol we i nambawan tumas. (Revelesen 7:​14) !Hemia i rili leftemap tingting blong yumi blong stanap strong gogo kasem en! Be vison ya i save tijim yumi long plante moa samting tu. Bambae yumi luk long nekiswan stadi.

[Ol futnot]

?Yu Yu Tingbaot?

◻ ?Hu ya i stanap i stap wetem Jisas taem bodi blong hem i jenis?

◻ ?Olsem wanem bilif blong ol aposol i kam strong moa taem oli luk we bodi blong Jisas i jenis?

◻ ?Taem bodi blong Jisas i jenis, nao “bigfala laet i saen” raon long Moses mo Elaeja we tufala i stanap wetem Jisas, tufala i pija blong hu?

◻ ?Olsem wanem Moses mo Elaeja tufala i sem mak long Isrel blong God?

[Tok blong pija long pej 10]

Vison ya we bodi blong Jisas i jenis, i mekem bilif blong ol Kristin long taem bifo mo tede, i kam strong moa