Wokem Frut Blong Fasin Blong Bos Long Tingting
“Be Tabu Speret, hem i stap mekem ol man oli . . . laekem tumas ol man, mo oli gat glad mo pis long tingting blong olgeta. . . . Olgeta oli kwaet man, mo oli save [bos long tingting blong olgeta, “NW”]. I no gat loa blong blokem yufala long ol samting ya.”—GALESIA 5:22, 23.
1. ?Hu i givim nambawan eksampel long fasin blong bos long tingting, mo wanem vas blong Baebol i soemaot samting ya?
JEOVA GOD mo Jisas Kraes tufala i givim wan nambawan eksampel long fasin blong bos long tingting. Jeova i soemaot fasin ya stat long taem we man i no obei long hem long garen blong Iden. (Lukluk Aesea 42:14.) I gat naen taem long Hibru haf blong Baebol we yumi ridim se God i “slou blong kam kros.” (Eksodas 34:6, NW) I min se hem i stap bos long tingting blong hem. Mo i tru se Pikinini blong God i stap bos long tingting blong hem bigwan, from “taem ol man oli tok nogud long hem, hem i no tok nogud bakegen long olgeta. Taem oli mekem hem i harem nogud tumas long bodi blong hem, hem i no talem se bambae i givimbak fasin ya long olgeta.” (1 Pita 2:23) Nating se Jisas i save askem Papa blong hem long heven blong i ‘sanem ol enjel, we oli moa long twelef ami, oli kam lukaot long hem,’ be hem i no mekem olsem.—Matyu 26:53.
2. ?Ol man we oli no stret gud olgeta, Baebol i givim wanem gudfala eksampel we oli soemaot fasin blong bos long tingting?
2 Baebol i tokbaot sam gudfala eksampel olsem wanem ol man we oli no stret gud olgeta oli bin soemaot fasin blong bos long tingting. Josef, pikinini blong olfala ya Jekob i soemaot fasin ya long laef blong hem. !Josef i rili bos long tingting blong hem taem woman blong Potifa i traem fosem hem blong slip wetem hem! (Jenesis 39:7-9) Mo tu i gat gudfala eksampel blong ol fo yangfala blong Isrel we oli bos long tingting blong olgeta taem oli no wantem kakae ol kakae blong king blong Babilon from Loa blong Moses i putum tabu long ol kakae olsem.—Daniel 1:8-17.
3. ?Hu ya ol man we oli gat gudfala fasin, mo olsem wanem yumi save?
3 Long taem blong yumi ol Wetnes blong Jeova oli soemaot eksampel long fasin blong bos long tingting. I stret nomo we wan buk (New Catholic Encyclopedia) i tokbaot olgeta i se, “Fasin blong olgeta i moa gud i bitim kolosap olgeta narafala grup long wol.” Wan tija long yuniversiti blong Filipin i talem se: “Ol Wetnes blong Jeova oli stap mekem ol samting ya we oli stap lanem long Baebol.” Wan man blong raetem nyuspepa long Polan i tokbaot asembli ya blong ol Wetnes blong Jeova long Woso long 1989, i se: “!55,000 man oli no smok wan sigaret nating long tri dei! . . . Samting ya i soemaot se God i stap tijim olgeta, mi sapraes mo mi laekem fasin ya.”
Fraet Long God Mo No Laekem Nating Rabis Fasin
4. ?Wanem samting ya we i givhan long yumi blong yumi bos long tingting blong yumi?
4 Wan long ol bigfala samting we i save givhan long yumi blong yumi save bos long tingting blong yumi, hemia fasin fraetgud long God. Yumi fraet from we yumi no wantem mekem Papa blong yumi long heven we i laekem yumi tumas i harem nogud. I impoten blong yumi fraetgud long God, from plante taem Baebol i tokbaot fasin ya. Taem kolosap Ebraham i kilim i ded pikinini blong hem Aesak blong mekem sakrafaes long God, God i se: “!Yu no spolem boe ya! !Yu no mekem wan samting long hem! Naoia mi mi save we yu yu stap [fraetgud long God, NW], from we pikinini ya blong yu i wan nomo we yu yu gat, be yu no holemtaet hem, yu rere nomo blong letem hem i ded.” (Jenesis 22:12) Yumi save se long taem ya Ebraham i harem nogud long tingting blong hem. From samting ya hem i mas bos strong long tingting blong hem blong hem i folem tok ya blong God kasem mak ya we hem i leftemap naef blong hem blong kilim pikinini ya blong hem Aesak, we hem i laekem tumas. Yes fasin fraet long God bambae i givhan long yumi blong yumi bos long tingting blong yumi.
5. ?Olsem wanem fasin blong no laekem nating samting we i nogud i givhan long yumi blong yumi bos long tingting blong yumi?
5 Wan samting we kolosap i sem mak long fasin fraetgud long Jeova, hem i fasin blong no laekem nating ol samting we i nogud. Yumi ridim long Proveb 8:13 i se : “Fasin fraetgud long Jeova i minim fasin blong no laekem nating ol samting we i nogud.” Taswe fasin blong no laekem nating ol samting we i nogud i givhan long yumi blong bos long tingting blong yumi. Oltaem, Baebol i talem long yumi blong yumi no mas laekem nating, yes, no laekem nating samting we i nogud. (Ol Sam 97:10; Emos 5:14, 15; Rom 12:9) Samting we i nogud, plante taem bodi blong yumi i stap harem gud long hem, hem i pulum ol man, hem i pulum yumi blong harem gud long hem, taswe yumi mas no laekem nating ol samting we i nogud blong yumi save stanap strong agens long hem. Taem yumi no laekem nating samting we i nogud, tingting blong yumi i save kam strong blong yumi bos long tingting blong yumi, mo i blokem yumi blong no kasem trabol.
Bos Long Tingting, Hem i Waes Rod Blong Folem
6. ?From wanem i waes blong yumi bos long tingting blong yumi blong blokem fasin blong tingbaot yumi nomo?
6 Narafala samting we i save givhan bigwan long yumi blong yumi bos long tingting blong yumi se yumi luksave se i waes blong gat fasin ya. Jeova i wantem se yumi harem gud taswe hem i askem yumi blong yumi bos long tingting blong yumi. (Lukluk Aesea 48:17, 18.) Ol advaes long Tok blong hem oltaem oli soemaot se i waes blong yusum fasin blong bos long tingting blong yumi blong kontrolem fasin blong tingbaot yumi nomo. Yumi no save ronwe long ol loa blong God we oli no save jenis. Tok blong hem i talem long yumi i se: “Wanem sid we man i planem fastaem long garen blong hem, be frut blong hem nomo, man ya bambae i mas kakae. Sipos man i planem rabis fasin we tingting blong hem i wantem, rabis fasin ya blong hem bambae i givim kakae long hem, we i ded nomo. Be sipos hem i planem fasin we Tabu Speret i wantem, Tabu Speret bambae i givim kakae long hem, we i no save finis.” (Galesia 6:7, 8) Wan eksampel long saed blong kakae mo dring. Plante sik oli kamaot from ol man oli kakae no oli dring tumas. Fasin olsem blong man i stap tingbaot hem wan i spolem gudfala nem blong hem wan. Antap moa, wan man we i stap tingbaot hem wan hem i spolem fasin fren blong hem tu wetem ol narafala man. I impoten moa se sipos yumi no bos long tingting blong yumi, samting ya i spolem fasin fren blong yumi wetem Papa blong yumi long heven.
7. ?Wanem bigfala poen we buk blong Proveb i soemaot? ?Mo wanem vas long Baebol i soemaot samting ya?
7 Taswe yumi mas tingbaot se fasin blong tingbaot yumi nomo i save spolem yumi. Buk blong ol Proveb i stap makem fasin blong stretem tingting blong yumi wan. Be bigfala poen blong hem se, fasin blong tingbaot yumi nomo i no gat pei long hem mo i waes blong stap bos long tingting blong yumi. (Proveb 14:29; 16:32) I gud blong makem tu se fasin blong stretem yumi wanwan i no jes blong ronwe long ol nogud samting nomo. Blong mekem samting we i stret, yumi mas stretem tingting blong yumi wanwan mo bos long tingting blong yumi. Maet samting ya i hadwok from we yumi no stret gud olgeta long tingting blong yumi.
8. ?Wanem ekspiryens i soemaot se i waes blong bos long tingting blong yumi?
8 Store blong wan Wetnes blong Jeova i soemaot se i waes blong yumi bos long tingting blong yumi. Hem i stap folem laen blong ol man insaed long bank taem wan man i pus blong go fastaem long hem. Nating se Wetnes ya i kros lelebet, be hem i bos long tingting blong hem. Long sem dei ya hem i mas go luk wan man blong droem plan blong haos, blong i saenem nem blong hem long plan blong Haos-Kingdom. ?Yu save hu ya bambae i saenem nem blong hem long plan blong Haos-Kingdom ya? !Hem i sem man ya we i pus blong go fastaem long Wetnes ya insaed long bank! Man ya i frengud wetem Wetnes ya be i no hemia nomo, hem i daonem praes blong hem long Wetnes ya. !Wetnes ya i harem gud from we hem i bos long tingting blong hem jes bifo long sem dei ya, hem i no letem man ya i mekem hem i kros!
9. ?Wanem samting yumi mas mekem taem ol man oli tok nogud long yumi long wok blong prij?
9 Taem yumi stap go long ol haos wanwan blong talemaot gud nyus blong Kingdom blong God no yumi stanap long kona blong rod blong mekem ol man oli intres long mesej blong yumi, ol man oli save tok nogud long yumi. ?I waes blong mekem wanem? Samting we i waes blong mekem i stap long Proveb 15:1 i se: “Wan ansa, taem hem i kwaet, i save mekem kros i godaon.” I min se, yumi mas bos long tingting blong yumi. I no ol Wetnes blong Joeva nomo oli faenemaot se samting ya i tru, ol narafala man tu oli luksave samting ya. Ol man long saed blong meresin oli talem se fasin blong bos long tingting i save mekem man i harem gud.
Trufala Lav i Givhan
10, 11. ?From wanem lav hem i save givhan long yumi blong bos long tingting blong yumi?
10 Lav we Pol i stap tokbaot long 1 Korin 13:4-8 i gat paoa blong givhan long yumi blong yumi bos long tingting blong yumi. “Man we i stap laekem ol man tumas, tingting blong hem i longfala.” Yumi mas bos long tingting blong yumi blong yumi gat longfala tingting. “Man we i stap laekem ol man tumas, hem i no save jelas, mo i no save mekem tingting blong hem i go antap, mo i no save flas.” Gudfala fasin blong lav i givhan long yumi blong yumi bos long tingting mo long ol filing blong yumi, mo i blokem yumi blong yumi no jelas no yumi stap leftemap yumi wanwan, no yumi flas. Lav i givhan long yumi blong yumi gat fasin we i defren, yumi gat fasin daon, tingting blong yumi i daon olsem Jisas.—Matyu 11:28-30.
11 Pol i gohed blong talem se man we i gat lav “hem i no save jikim man.” Yumi mas bos long tingting blong yumi blong gat ol fasin olsem oltaem. Fasin blong laekem ol man i givhan tu long yumi blong yumi no gat fasin griri, ‘yumi no save tingbaot yumi nomo.’ Man we i gat lav “hem i no save kros kwik.” !I isi nomo blong yumi kam kros taem ol man oli tok no oli mekem i rong long yumi! Be lav bambae i givhan long yumi blong yumi bos long tingting blong yumi mo yumi no save talem no mekem samting we biaen yumi save harem nogud from. Man we i gat lav “i no save stap kros longtaem.” Hem i fasin blong ol man blong stap holem kros no ol nogud filing long ol narafala man. Be lav i givhan long yumi blong yumi no holem ol tingting olsem long maen blong yumi. Man we i gat lav “hem i no save glad taem i luk we wan narafala man i mekem i no stret.” Yes yumi mas bos long tingting blong yumi from yumi no wantem harem gud long ol rabis samting, olsem ol rabis buk no ol rabis video. Man we i gat lav “tingting blong hem i no save kam nogud. Oltaem hem i stap bilif strong long God, mo i stap putum tingting blong hem i strong long God oltaem.” Yumi mas bos long tingting blong yumi blong, yumi winim ol traem, ol trabol mo yumi no save letem olgeta oli daonem yumi, mo yumi no save givimbak, yumi no save stop long wok blong Jeova.
12. ?Olsem wanem yumi save soemaot fasin tangkyu long Jeova God mo Jisas Kraes from ol samting we tufala i stap mekem long yumi?
12 Sipos i tru we yumi laekem Papa blong yumi long heven mo yumi gat fasin tangkyu long hem from ol gudfala fasin blong hem mo from olgeta samting we hem i stap mekem long yumi, bambae yumi bos long tingting blong yumi oltaem, blong mekem hem i glad long yumi. Mo tu sipos yumi rili laekem Masta blong yumi Jisas Kraes, mo yumi gat fasin tangkyu from ol samting we i mekem long yumi, bambae yumi ‘karem [pos] blong yumi mo yumi biaen long hem.’ (Mak 8:34) Blong mekem olsem yumi mas bos long tingting blong yumi. Sipos yumi laekem ol Kristin brata mo sista blong yumi, bambae yumi no save mekem i nogud long olgeta from yumi stap folem prapa rod blong yumi.
Bilif Mo Fasin Daon Oli Givhan Long Yumi
13. ?Olsem wanem bilif i save givhan long yumi blong bos long tingting blong yumi?
13 Narafala samting blong givhan long yumi blong yumi bos long tingting blong yumi, hem i bilif we yumi gat long God mo long promes blong hem. Bilif ya bambae i mekem se yumi trastem Jeova mo yumi stap wet blong hem i stretem ol trabol long prapa taem blong hem. Aposol Pol i tokbaot sem poen ya long Rom 12:19 i se: “Sipos wan man i mekem trabol long yufala, bambae yufala i no traem blong mekem trabol long hem bakegen. . . . From we Baebol i talem se ‘Hae God i talem se “Fasin ya blong givimbak long man we i mekem i nogud, mi nomo mi gat raet blong mekem. Mo mi bambae mi givimbak long olgeta.” ’ ” Tingting we i stap daon bambae i save givhan tu long yumi blong mekem olsem. Sipos tingting blong yumi i stap daon, bambae yumi no kwik blong kros long ol man we oli mekem nogud long yumi no yumi ting se oli mekem nogud long yumi. Bambae yumi no kwik blong givimbak from we yumi ting se i stret folem loa. No gat, yumi bos long tingting blong yumi mo yumi glad blong stap wet nomo long Jeova.—Lukluk Ol Sam 37:1, 8.
14. ?Wanem ekspiryens i soemaot se ol man we oli no stap bos long tingting blong olgeta oli save gat fasin ya?
14 Yumi save lanem olsem wanem fasin blong bos long tingting i gat bigfala paoa from ekspiryens blong wan man we i stap kros kwik. Yes man ya hem i man blong kros kwik. Wan taem hem mo papa blong hem tufala i stap mekem bigfala rao mo faet. Ol man oli singaot polis blong kam from hem, be bifo oli save holem hem, hem i faetem tri long olgeta i foldaon. Biaen ol Wetnes blong Jeova oli stap luk hem mo hem i lanem blong bos long tingting blong hem. Fasin ya i wan long ol frut blong tabu speret blong God. (Galesia 5:22, 23) Tede 30 yia afta, man ya hem i gohed yet olsem wan man we i stap mekem wok blong Jeova long fasin we i stret.
Bos Long Tingting Insaed Long Famle
15, 16. (a) ?Wanem samting i save givhan long hasban blong hem i bos long tingting blong hem? (b) ?Wetaem i nidim moa blong bos long tingting, mo wanem ekspiryens i soemaot samting ya? (c) ?From wanem waef i mas bos long tingting blong hem?
15 Fasin blong bos long tingting i mas stap insaed long famle. Blong wan hasban i laekem woman blong hem olsem we hem i laekem prapa bodi blong hem, hem i mas kontrolem ol tingting, ol toktok mo ol fasin blong hem. (Efesas 5:28, 29) Yes, hasban i mas bos long tingting blong hem blong hem i folem ol tok blong aposol Pita long 1 Pita 3:7 se: “Mo long sem fasin, yufala man we i mared, yufala i mas tingtinggud long ol woman blong yufala, long ol laef blong yutufala long mared.” Samting ya i impoten moa taem wan hasban i gat wan waef we i no bilif, hasban ya i mas bos long tingting blong hem.
16 Blong soemaot samting ya: I gat wan elda we waef blong hem i no woman blong bilif mo hem i woman blong kros. Be elda ya i stap bos long tingting blong hem mo samting ya i givhan long hem bigwan from dokta i talem long hem se: “Jon, ating yu yu wan man we yu gat longfala tingting no yu yu gat wan skul we i gat bigfala paoa.” Yumi rili gat wan skul we i gat bigfala paoa, “from we Speret ya we God i givim long yumi, hem i no blong mekem yumi fraet, no gat. Speret ya i blong mekem yumi gat paoa, i blong mekem yumi laekem tumas ol man, mo i blong mekem yumi [bos long tingting blong yumi, NW].” (2 Timote 1:7) Mo tu, waef i mas bos long tingting blong hem blong hem i stap aninit long man blong hem, i impoten moa taem hasban i no man blong bilif.—1 Pita 3:1-4.
17. ?From wanem fasin blong bos long tingting i impoten long ol papa mama mo ol pikinini taem oli fren gud?
17 Ol pikinini mo ol papa mama oli mas bos long tingting blong olgeta taem oli stap wanples. Blong gat ol pikinini we oli stap bos long tingting blong olgeta, fastaem ol papa mama oli mas soemaot gudfala eksampel. Mo taem ol pikinini oli nidim blong papa mama i stretem olgeta, oltaem ol papa mama oli mas mekem long fasin we i kwaet mo long fasin lav, i min se ol papa mama oli mas bos long tingting blong olgeta. (Efesas 6:4; Kolosi 3:21) Mo bakegen, ol pikinini oli mas obei long papa mama blong soemaot se oli rili laekem olgeta, mo blong obei oli mas bos long tingting blong olgeta.—Efesas 6:1-3; lukluk 1 Jon 5:3.
Yusum Ol Samting We God i Givim Long Yumi
18-20. ?Talem tri samting long saed blong speret we yumi mas yusum gud blong givhan long yumi blong yumi bos long tingting blong yumi?
18 Blong yumi fraetgud long God, mo yumi gat lav we i stanap long fasin blong no stap tingbaot yumi nomo, yumi gat bilif, yumi no laekem nating ol samting we i nogud, mo yumi bos long tingting blong yumi, yumi mas yusum gud ol samting we Jeova God i stap givim blong givhan long yumi. Yumi save tingbaot tri samting long saed blong speret we Jeova i givim blong givhan long yumi blong yumi bos long tingting blong yumi. Faswan samting, hemia nambawan jans ya we yumi stap gat blong mekem prea. Yumi no wantem kam bisi tumas we yumi no save gat jans blong prea. Yes, ‘oltaem yumi mas stap prea.’ (1 Tesalonaeka 5:17; Rom 12:12) I gud yumi stap prea blong yumi wokem fasin blong bos long tingting blong yumi. Taem yumi mestem mak long fasin blong bos long tingting blong yumi, i gud yumi talem sore long Papa blong yumi long heven long prea blong hem i fogivim mastik ya blong yumi.
19 Sekenwan samting blong givhan long yumi blong yumi bos long tingting blong yumi, hem i fasin blong ridim Tok blong God, mo ol buk, ol magasin we oli givim save long Baebol mo oli soemaot olsem wanem blong mekem ol save ya oli wok. !I isi nomo blong yumi no mekem haf ya blong tabu wok ya blong yumi! Yumi mas bos long tingting blong yumi mo oltaem yumi mas tingbaot se i no gat ol buk we oli moa impoten long Baebol, ol buk, mo ol magasin we “slef ya we i stret mo waes,” i wokem taswe yumi mas putum olgeta long fas ples. (Matyu 24:45-47, NW) I tru se i gat tu rod be wan rod nomo blong laef. ?Olsem wanem, yumi rili strong long saed blong speret? Sipos yumi stap tingbaot ol samting long saed blong speret, bambae yumi stap bos long tingting blong yumi blong kilim video mo yumi mekem rere ol miting no yumi ridim Wajtaoa we yumi jes kasem.
20 Namba tri samting, yumi mas rere long ol miting blong kongregesen mo ol asembli no ol distrik asembli. ?Olsem wanem, yumi stap tingbaot se yumi mas go long ol miting olsem? ?Olsem wanem, yumi stap mekem rere ol miting blong yumi givim ansa taem yumi gat jans blong mekem? Taem yumi mekem olsem long ol miting, bambae yumi gat strong tingting blong yumi bos long tingting blong yumi oltaem.
21. ?Wanem frut we yumi save kasem taem yumi stap bos long tingting blong yumi?
21 ?Wanem frut yumi save tingbaot blong kasem taem yumi stap traehad blong bos long tingting blong yumi oltaem? Bambae neva yumi kasem ol rabis frut we i kamaot from fasin blong tingbaot yumi nomo. Bambae yumi harem gud mo tingting blong yumi i no save trabol from. Bambae yumi no save kasem plante trabol mo bambae yumi stap oltaem long rod ya blong laef. Mo tu bambae yumi save mekem i gud long ol narafala man. Antap moa, bambae yumi mekem olsem Proveb 27:11 i talem, i se: “Pikinini blong mi, yu mas waes, mo yu mas mekem hat blong mi i glad. Olsem nao, mi mi save ansa long hem we i stap jikim mi.” Hemia nao bigfala pei we yumi save kasem—yumi stap mekem hat blong Jeova Papa blong yumi long heven i glad.
Tingtingbak
◻ ?Olsem wanem fasin blong fraetgud long God i givhan long yumi blong bos long tingting blong yumi?
◻ ?From wanem lav i givhan long yumi blong bos long tingting blong yumi?
◻ ?Olsem wanem fasin blong bos long tingting blong yumi i givhan long famle?
◻ ?Wanem samting yumi mas yusum gud blong wokem fasin blong bos long tingting?
[Tok Blong Pija Long Pej 15]
Josef i gat fasin blong bos long tingting blong hem taem hem i kasem traem
[Tok Blong Pija Long Pej 17]
Papa i mas bos long tingting blong hem taem hem i stretem pikinini wetem fasin lav mo kwaet fasin