?Olsem Wanem Yumi Save Pembak Jeova?

JEOVA GOD i soem wan gudfala eksampel long yumi long fasin blong givim samting long narafala man. Hem i givim long olgeta man “laef mo win mo olgeta samting.” (Ol Wok 17:25, NW) God i mekem san i saen long ol nogud man mo ol gudfala man. (Matyu 5:45) Tru ya Jeova, ‘i stap mekem ren i foldaon, mo i stap mekem ol garen oli gat kakae long stret taem blong olgeta. Hem i stap givim kakae long yumi, mo hem i stap mekem yumi harem gud long tingting blong yumi.’ (Ol Wok 14:​15-17) !Yes, “evri samting we oli gud mo evri presen we oli nambawan oli aot long heven nomo, oli kam long yumi. God ya we i mekem olgeta laet blong skae, hem i stap givim ol gudfala samting ya long yumi”!​—⁠Jemes 1:⁠17.

God i no givim ol presen we yumi nidim long saed blong bodi nomo, hem i sanem laet blong trutok i kam long yumi. (Sam 43:⁠3) Ol man blong wok blong Jeova oli harem gud long kakae long speret we hem i stap yusum “slef ya we i stret mo waes” blong givim, long stret taem blong hem. (Matyu 24:​45-47, NW) Yumi save kasem blesing from ol samting we God i givim long yumi long saed blong speret. God i mekem se ol sinman we oli blong ded nomo oli save kambak long hem bakegen. ?Olsem wanem? From ded blong Pikinini blong hem, Jisas Kraes. Hem i givim laef blong hem olsem wan ransom blong pemaot plante man. (Matyu 20:28; Rom 5:​8-12) !Hemia wan presen we i kamaot long Jeova, God ya we i laekem yumi!​—⁠Jon 3:⁠16.

?Yumi Save Pembak?

Ol handred yia bifo we God i givim ransom ya, man blong raetem Sam i gat bigfala tangkyu from God i stap sore long hem, i stap sevem hem, mo i stap givhan long hem. Taswe hem i se: “Hae God i stap mekem i gud tumas long mi. ?Bambae mi mi save givim wanem presen long hem? Bambae mi tekem kap waen, mi givim long Hae God blong talem tangkyu long hem from we hem i sevem mi. Long fes blong olgeta man blong hem, bambae mi givim olgeta samting ya long hem we mi mi promes blong givim.”​—⁠Sam 116:​12-14.

Yumi givim olgeta laef blong yumi long Jeova, taswe yumi stap prea long hem wetem bilif mo yumi givim ol samting we yumi promes blong givim long hem. From we yumi Wetnes blong Jeova, yumi save mekem God i glad taem yumi talemaot ol gudfala samting long saed blong hem mo oltaem yumi talemaot Kingdom blong hem. (Sam 145:​1, 2, 10-13; Matyu 24:14) Be yumi no save mekem Jeova i kam rij, from olgeta samting oli blong hem, mo yumi no save pembak hem from ol gudfala samting we hem i stap givim long yumi.​—⁠1 Kronikel 29:​14-17.

Taem yumi givim ol presen blong mekem wok blong Kingdom i gru moa, rod ya i no pembak Jeova, no i mekem Jeova i kam rij. Be yumi glad blong mekem olsem blong soemaot lav blong yumi long God. Sipos yumi givim ol presen from yumi no stap tingbaot yumi nomo no yumi no wantem ol man oli presem yumi from, bambae yumi harem gud mo Jeova bambae i blesem yumi. From we yumi givim long gudfala tingting mo blong mekem trufala wosip i gru moa. (Matyu 6:​1-4; Ol Wok 20:35) Wan man i mas save long fasin ya blong stap givim ol presen mo frut we hem i save harem gud from, taem hem i givim smol haf blong olting blong hem long God blong sapotem trufala wosip mo givhan long olgeta we oli nidim. (1 Korin 16:​1, 2) ?Olsem wanem, yumi mas mekem samting ya olsem ‘taet’?

?Yu Mas Pem ‘Taet’?

Jeova i yusum profet blong hem Malakae blong talem se: “Taem yufala i gat ten hif blong sam samting, tekem wan hif i kam insaed long haos blong kipim ol samting, blong bambae i save gat kakae insaed long haos blong mi. Mo testem mi, plis, long samting ya, . . . yu luk bambae mi mi openem doa blong heven blong bambae ol blesing oli kamdaon long yufala mo bambae mi givim olgeta samting ya long yufala gogo yufala i no moa nidim.” (Malakae 3:10) Narafala Baebol i talem olsem se: “Tekem olgeta taet blong yufala i kam insaed long haos blong kipim ol samting.”​—⁠An American Translation.

Sipos yu gat ten hif blong sam samting nao yu givim wan hif i go long narafala man, hemia i olsem ‘taet’. Hem i 10% long ol samting we yu gat blong yu mas givim no yu mas pem. Fasin ya blong pem taet i joen wetem ol bisnes blong skul. I min se ol man oli pem taet blong leftemap trufala wosip.

Olfala Ebraham (Ebram) bifo i seraotem ol samting we hem i winim long Jedaloma wetem ol kantri we hem i fren wetem, long ten hif, mo hem i givim wan hif long king pris Melkisedek. (Jenesis 14:​18-20; Hibrus 7:​4-10) Biaen, Jekob i mekem promes blong seraot olting blong hem long ten hif mo bambae hem i givim wan hif i go long God. (Jenesis 28:​20-22) Tufala store ya oli soemaot se fasin blong seraotem olting long ten hif mo givim wan hif i go long God i kamaot long prapa tingting blong olgeta nomo. Olgeta man Hibru bifo oli no gat ol loa long saed blong pem ol taet.

Pem Taet Folem Loa

Ol man Isrel oli man blong Jeova taswe oli kasem ol loa long saed blong pem taet. I luk olsem se long olgeta ten hif blong olting we oli kasem long wan yia, tu hif oli mas givim olsem taet. Be sam man we oli gat save long ol bisnes olsem oli ting se ol man Isrel oli pem taet wan taem nomo long wan yia. Be long evri namba seven yia (Sabat yia) oli no stap pem taet, from we oli no stap wokem garen long taem ya. (Levitikas 25:​1-12) Sipos oli givim ol fas frut blong garen blong olgeta long God, antap bakegen oli mas pem ol taet tu.​—⁠Eksodas 23:⁠19.

Long olgeta ten hif blong kakae long garen, ol tri we oli givim frut, ol sipsip, mo ol buluk, oli mas tekem wan hif i go long tempel mo givim long ol Livaet, from olgeta oli no gat graon. Nao olgeta oli seraot olting ya bakegen long ol ten hif mo givim wan hif long ol pris blong givhan long olgeta. I klia se fastaem oli mas tanem ol sid blong wit i kam flaoa mo ol frut oli kam waen mo frut blong oliftri i kam oel bifo oli yusum blong mekem taet. Sipos wan man Isrel i no wantem givim kakae be hem i wantem givim mane blong hem, hem i save mekem olsem, be hem i mas ademap haf mane bakegen.​—⁠Levitikas 27:​30-33; Namba 18:​21-30.

I gat wan narafala taet we i stap. Oltaem wan famle i stap mekem taet ya taem ol man oli stap hivap long ol lafet. ?Be olsem wanem sipos ples i longwe long Jerusalem mo i hadwok blong karem ol taet i go? Sipos i olsem, oli save salem ol flaoa blong wit, nyufala waen, oel, mo ol anamol mo tekem mane we oli kasem i go long Jerusalem. (Dutronome 12:​4-18; 14:​22-27) Long en blong evri namba tri mo namba sikis yia, ol taet blong olgeta i go long ol Livaet, ol strenja we oli stap wetem olgeta, ol wido mo ol pikinini we oli no gat papa.​—⁠Dutronome 14:​28, 29; 26:12.

Aninit long Loa ya, sipos wan man i no pem taet i no save gat panis from. Be, Jeova i putum rul ya olsem gudfala fasin blong oli mas pem ol taet. Samtaem oli mas talemaot long hem se oli pem olgeta taet blong ol. (Dutronome 26:​13-15) Sipos oli no givim samting we oli mas givim i olsem we oli stilim samting ya long God.​—⁠Malakae 3:​7-9.

Fasin blong pem taet i no wan hevi baden long ol man Isrel. Taem oli folem ol loa ya, oli save gat plante samting. Taet we oli stap pem i blong leftemap trufala wosip. Hem i no pusum tingting blong olgeta blong oli wok strong blong pem taet. Taswe, fasin blong pem taet hem i gud long olgeta man Isrel. ?Be olsem wanem, ol Kristin tu oli mas pem taet?

?Ol Kristin Oli Mas Pem Taet?

Bifo, fasin blong pem taet hem i kam bigwan long ol Krisendom. Buk ya The Encyclopedia Americana i talem se: “Sloslou long ol yia we oli ron biaen long 500 K.T. ol man oli yusum taet plante taem. Kaonsel blong Toas long 567 mo namba tu Kaonsel blong Makon long 585 oli agri long fasin blong pem taet. . . . Nao fasin blong yusum nogud ol taet i kam antap long saed blong mane, oli givim no oli salem long ol man olbaot, raet blong tekem ol taet. Stat long taem blong Pop Gregori 7 oli talemaot se fasin ya i no stret folem loa. Nao plante man oli givim raet blong mekem taet blong olgeta long ol ples blong skul mo ol jyos haos. Skul we oli seraot long Katolik skul mo agensem hem (Refomesen) oli no lego fasin blong pem taet, mo fasin ya i gohed long Roman Katolik Jyos mo long ol Protestan kantri.” Long plante ples, fasin blong pem taet hem i no moa stap mo plante skul naoia oli no moa stap mekem samting ya.

?Olsem wanem, ol Kristin oli mas pem taet? Alexander Cruden i talem long diksonari blong Baebol blong hem i se: “Man ya blong Sevem yumi, mo ol aposol blong hem oli no givim rul long yumi blong pem ol taet.” I tru, i no gat rul long ol Kristin blong oli pem taet. God hem wan i finisim Loa ya blong Moses, wetem fasin blong pem taet, mo i nilim long pos we Jisas i ded long hem. (Rom 6:14; Kolosi 2:​13, 14) I no gat rul we i fosem ol Kristin blong putum wan mak blong mane blong givhan long ol nid blong kongregesen, ol Kristin oli givim presen mane olsem we olgeta oli wantem.

Givim Ona Long Jeova Wetem Ol Gudfala Samting Blong Yufala

Sipos wan Kristin i seraotem mane blong hem long ten hif mo hem i wantem givim wan hif blong mekem trufala wosip i gru moa, i oraet nomo, Baebol i no blokem hem. Wan boe blong 15 yia long Nyu Gini i raet long leta se: “Taem mi mi smol, papa blong mi i stap talem long mi se, ‘Taem yu stat wok, yu mas givim fas frut we yu kasem long wok blong yu long Jeova.’ Mi tingbaot ol tok blong Proveb 3:​1, 9, we hem i talem se yumi mas givim ol faswan frut blong olting blong yumi long Jeova blong givim ona long hem. Taswe mi mi mekem promes blong mekem olsem, mo naoia mi mas mekem olsem we mi promes finis. Mi mi glad tumas blong sanem mane ya blong givhan long wok blong Kingdom.” Baebol i no talem se ol Kristin oli mas mekem promes olsem. Be, fasin blong givim wetem gladhat i wan gudfala rod blong soemaot se yumi wantem leftemap trufala wosip.

Wan Kristin i save jusum blong hem i no putum wan mak long ol presen we hem i wantem givim blong halpem trufala wosip blong Jeova God i gru moa. Blong soemaot samting ya: Tu olfala sista taem oli stap long wan asembli blong ol Wetnes blong Jeova, tufala i stap storeyan long ol samting we bambae tufala i givim blong givhan long wok blong Kingdom. Wan long tufala sista ya we i gat 87 yia, i askem hamas mane hem i save givim blong pem kakae long taem blong asembli. Narafala sista we i gat 90 yia, i talem se: ‘Yu givim wanem yu ting se inaf mo smol moa antap long hem.’ !Hemia i wan gudfala tingting we sista ya we i olfala moa i soemaot!

From we ol man blong Jeova oli givim laef blong olgeta long hem, oli glad blong givim ol presen mane mo ol narafala presen blong sapotem trufala wosip. (Lukluk 2 Korin 8:12.) I tru, Kristin fasin blong givim presen olsem i soemaot lav long wosip blong Jeova. Be fasin blong givim presen olsem i no wan loa olsem taet, no fasin blong seraotem olting long ten hif mo yusum wan hif blong mekem presen. From samtaem wan samting i save mekem se wan man i wantem givim moa blong mekem wok blong Kingdom i gru.​—⁠Matyu 6:⁠33.

Aposol Pol i talem se: “Nao evri man oli mas givim sam samting, olsem we evri man wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem. From we God i laekem tumas man we i save givim long gladhat blong hem.” (2 Korin 9:⁠7) Sipos yu yu givim from gladhat blong yu blong sapotem trufala wosip, bambae yu harem gud, from wan waes tok blong Proveb i se: “Ona long Jeova wetem ol sas samting blong yu, mo wetem ol fas kakae blong garen blong yu. Nao haos we yu stap kipim ol kakae long hem bambae i fulap gud wetem plante kakae. Mo wel blong yu bambae i fulap wetem nyufala waen.”​—⁠Proveb 3:​9, 10.

Yumi no save mekem Hae God i kam rij. Olgeta gol mo selva oli blong hem, olgeta anamol blong bus long hamas taosen hil mo olgeta gudfala samting we i plante tumas oli blong hem. (Ol Sam 50:​10-12) Neva yumi save pembak God from ol gudfala samting we hem i stap givim long yumi. Be yumi save soemaot se yumi rili laekem hem mo tu yumi glad long gudfala jans we yumi gat blong mekem tabu wok ya blong presem hem. Mo yumi save gud se ol rij blesing bambae oli kam long olgeta we oli stap givim from gladhat blong olgeta blong leftemap klin wosip mo givim ona long God Jeova we i laekem yumi tumas.​—⁠2 Korin 9:⁠11.

[Bokis blong pija long pej 20]

OLSEM WANEM BLONG GIVIM PRESEN LONG WOK BLONG KINGDOM

◻ OL PRESEN BLONG GIVHAN LONG WOK RAON WOL: Plante man oli skelem gud mane blong olgeta mo oli stap putum haf long bokis: “Presen Mane Long Wok Blong Sosaete Raon Wol​—⁠Matyu 24:14.” Evri manis ol kongregesen oli stap sanem mane ya long hedkwota long Bruklin, Nyu Yok, no long brenj-ofis we i stap kolosap.

◻ OL PRESEN: Ol man oli save sanem presen mane i go stret long Watch Tower Bible and Tract Society of Pennsylvania, 25 Columbia Heights, Brooklyn, New York 11201, no oli save sanem i go long brenj-ofis blong Sosaete. Oli save givim ol sas samting olsem ol gol ring mo ol jen. Oli mas raetem wan leta taem oli sanem ol presen olsem blong talem se hem i wan presen nomo.

◻ PRESEN BLONG DIPEN LONG HEM: Maet yu save givim mane long Wajtaoa Sosaete blong i holem long nem blong yu go kasem yu ded, sipos yu nidim samtaem, bambae Sosaete i save givimbak long yu.

◻ INSURENS: Yu save putum nem blong Wajtaoa Sosaete long laef insurens polisi blong yu, no yu save putum nem blong Sosaete se taem yu olfala yu finis long wok, oli save givim mane long hem. Yu mas talemaot long Sosaete sipos yu mekem sam plan olsem.

◻ KAON LONG BANK: Ol kaon long bank no ol pepa blong mane we oli stap long kaon, no ol mane we yu putum blong tekem taem yu olfala, yu save putum blong Wajtaoa Sosaete i kasem mane ya taem yu ded. Mekem folem ol rul blong bank. Yu mas talemaot long Sosaete long ol plan olsem.

◻ OL STOK MO BOND: Yu save givim ol stok mo bond mane long Wajtaoa Sosaete olsem wan presen no yu save mekem plan se bambae yu stap kasem profet long hem.

◻ OL SAMTING WE YU GAT: Yu save givim haos mo graon long Wajtaoa Sosaete olsem wan presen no hem i save lukaotem taem yu laef yet mo yu save yusum go kasem taem we yu ded. Wan man we i wantem mekem olsem i mas talemaot fastaem long Sosaete.

◻ OL LAS TOKTOK: Ol samting we yu gat mo mane we yu wantem givim long Watch Tower Bible and Tract Society of Pennsylvania yu mas mekem olsem hem i las toktok blong yu mo i mas folem loa, yu save putum nem blong Sosaete blong hem i kasem samting ya mo yu mas saenem pepa blong soem se yu agri. Ol man oli stap pem smol takis nomo long ol mane we i go long wan ogenaesesen blong skul. Yu mas sanem wan kopi blong las toktok blong yu no pepa blong agri long Socaete.

Blong save moa long bisnes ya, yu save raet i go long Treasurer’s Office, Watch Tower Bible and Tract Society of Pennsylvania, 25 Columbia Heights, Brooklyn, New York 11201, no long brenj-ofis blong Sosaete kolosap long ples blong yu.