Oli Mekem Wanem We Oli Save Mekem

Nating se yumi no save pembak Jeova from olgeta samting we hem i mekem long yumi, plante man oli mekem olsem we oli save mekem blong sapotem wok blong prij blong ol Wetnes blong Jeova raon long wol. (Matyu 24:14; lukluk Mak 14:​3-9.) Hemia wan leta we i kamaot long wan famle long Minesota, Yunaeted Stet:

“Halo ol brata,

“Mifala i sanem presen mane ya​—dola. Mifala i wantem se bambae oli yusum blong halpem wok raon long wol no blong givhan blong bildim ol Haos-Kingdom, no long eni narafala nid blong ogenaesesen we i stap. . . .

“Mifala i save se mane ya bambae oli yusum folem wil blong [Jeova]. Mifala i wantem tekem jans ya blong enkarajem yufala blong gohed long gudfala wok, mo speseli mifala i wantem talem tangkyu long video kaset blong wok blong [Wajtaoa] Sosaete long olgeta ples long wol. Kaset ya nao i mekem se mifala i luksave bigfala wok ya, mo i mekem se mifala i wantem givim mane ya from we i gat nid. Bifo, mifala i letem kongregesen, seket, mo distrik i stap tekem ol presen mane i kam long yufala, be naoia mifala i talem tangkyu long Jeova from longfala tingting blong hem, from we mifala i no luksave fastaem. Mo mifala i talem tangkyu long hem from long fasin lav, hem i mekem mifala i luksave se mifala i mas givhan long saed blong mane blong sapotem wok ya we i stap sevem ol man. Olsem wan famle, mifala i wantem sanem wan mane olsem​—dola long wan manis . . . i go stret long Nyu Yok.

“Bakegen mifala i talem tangkyu long yufala from gudfala wok we yufala i mekem long mifala mo from fasin we yufala i fasgud long God we yufala i stap soemaot.”