!Harem Gud Long Kingdom Hop!
“From we yufala i gat hop, yufala i mas harem gud oltaem. Taem yufala i gat trabol, yufala i mas stanap strong.”—ROM 12:12, NW.
1. ?From wanem yumi save harem gud taem yumi frengud wetem Jeova, mo aposol Pol i talem wanem long ol Kristin?
“GOD ya we . . . i stap harem gud oltaem.” (1 Timote 1:11) !Tok ya i stret nomo long Jeova! ?From wanem? From olgeta wok blong hem oli givim gladtaem long hem. Jeova i Stampa blong ol gudgudfala samting mo ol samting we oli save mekem ol man oli harem gud, taswe ol man we hem i wokem olgeta oli save harem gud taem oli frengud wetem hem. I stret we aposol Pol i talem long ol Kristin blong oli harem gud from we oli save Jeova God mo blong oli gat fasin tangkyu long hem from ol gudfala wok blong Hem. Mo blong oli harem gud long kaen gud fasin we Hem i stap soemaot long olgeta. Pol i raet i se: “Yufala we i joen long Masta blong yumi, oltaem yufala i mas glad. Mi talem bakegen, yufala i mas glad.”—Filipae 4:4; Sam 104:31.
2. ?Wanem hop i mekem ol man oli harem gud, mo ol Kristin oli mas mekem wanem long saed blong hop ya?
2 ?Ol Kristin oli harem tok ya blong Pol? !Yes oli harem! Ol brata blong Jisas long saed blong speret oli harem gud long gudfala hop we God i givim long olgeta. (Rom 8:19-21; Filipae 3:20, 21) Yes oli save se bambae oli wok tugeta blong mekem bigfala fyuja hop blong ol man i kamtru, long olgeta we oli stap laef mo olgeta we oli ded finis, taem oli rul wetem Kraes long Kingdom blong heven. !Tingbaot olsem wanem bambae oli glad blong joen wetem Kraes blong kasem ol gudfala samting nao oli save rul mo kam pris wetem hem! (Revelesen 20:6) !Bambae oli harem gud blong givhan long ol man blong oli kam stret gud olgeta, mo taem oli lukaot long wok blong mekem Paradaes i kamaot long wol ya bakegen! Tru ya, olgeta man blong wok blong God “oli putum tingting blong olgeta i stap long laef ya we i no save finis. Bifo olgeta, taem we wol ya i no stap yet, God ya we i no save gyaman, hem i promes finis blong givim laef ya long olgeta.” (Taetas 1:2) Aposol Pol i stap tingbaot bigfala hop ya taswe hem i leftemap tingting blong olgeta Kristin se: “From we yufala i gat hop, yufala i mas harem gud oltaem.”—Rom 12:12, NW.a
Trufala Glad—I Kamaot Long Hat
3, 4. (a) ?Wanem mining blong tok ya “blong harem gud,” mo ol Kristin oli mas harem gud samtaem nomo? (b) ?Wanem trufala fasin blong harem gud, mo hem i dipen long wanem?
3 “Blong harem gud” i min se yu gat filing ya mo yu soemaot. Fasin ya i no min se tingting blong man i no save hevi samtaem, mo i no min se man ya i stap laf oltaem tu. Ol tok we oli yusum wetem Hibru mo Grik tok long Baebol blong talem se “glad,” “tingting i glad,” mo “harem gud,” ol tok ya oli minim tufala samting: Filing we i stap insaed long yumi, mo fasin blong yumi blong soemaot glad. Ol Kristin man oli mas “gohed blong harem gud” mo ‘stap glad oltaem.’—2 Korin 13:11, NW; 1 Tesalonaeka 5:16.
4 ?Be olsem wanem wan man i save harem gud oltaem? Samting ya i save kamaot from trufala glad i wan fasin we i kamaot long hat, hem i stap dip insaed long hat, hem i samting long saed blong speret. (Dutronome 28:47; Proveb 15:13; 17:22) Fasin ya i wan frut blong tabu speret blong God, hem i namba tu frut blong tabu speret we Pol i tokbaot biaen long lav. (Galesia 5:22) From we hem i fasin we i stap insaed long hat, taswe i no dipen long ol samting we oli stap afsaed, i no dipen tu long ol brata blong yumi. Be hem i dipen long tabu speret blong God. Fasin ya i kam taem yumi harem gud long hat blong yumi from we yumi kasem trutok, yumi gat hop blong Kingdom, mo yumi save se Jeova i laekem samting we yumi stap mekem. Taswe yumi no bon wetem fasin blong harem gud, no gat. Hem i haf blong “nyufala laef,” ol fasin we oli makemaot Jisas Kraes.—Efesas 4:24; Kolosi 3:10.
5. ?Wetaem mo olsem wanem yumi save soemaot se yumi stap glad?
5 Nating se glad i stap kamaot long hat nomo, yumi save soemaot fasin ya tu samtaem. ?Olsem wanem yumi save soemaot fasin ya? Fes blong man i save soemaot se tingting blong hem i stap kwaet, no hem i save jyajyam from we hem i glad. (1 King 1:40; Luk 1:44; Ol Wok 3:8; 6:15) ?Olsem wanem, i min se ol man we oli no toktok plante, oli no stap smael oltaem oli no glad? !No gat! Man we i toktok plante no i laf no i smael oltaem i no min se hem i kasem trufala glad. Plante samting i save mekem se glad i kamaot long plante defren fasin. I no fasin glad nomo we i mekem yumi stap gud tugeta long Haos-Kingdom, be from lav mo filing we yumi gat long ol brata blong yumi.
6. ?From wanem ol Kristin oli save harem gud oltaem nating se oli fesem sam samting we i nogud?
6 Blong harem gud oltaem, glad i mas stap olwe long hat blong yumi, olsem wan haf blong nyufala Kristin fasin. Samting ya nao i save mekem se yumi stap glad oltaem. I tru se samtaem yumi save harem nogud long sam samting, no yumi save fesem ol nogud samting. Be yet yumi save harem gud long hat blong yumi. Sam Kristin bifo oli wok blong sam masta we oli mekem i strong tumas long olgeta. ?Olsem wanem, ol Kristin olsem oli save harem gud oltaem? Yes, from olgeta oli gat hop long Kingdom mo fasin glad we i stap insaed long hat blong olgeta.—Jon 15:11; 16:24; 17:13.
7. (a) ?Jisas i talem wanem long saed blong fasin blong harem gud taem yumi kasem trabol? (b) ?Wanem samting i save givhan long yumi blong yumi save winim ol traem, mo hu i givim gudfala eksampel long yumi long fasin ya?
7 Jes afta we aposol Pol i talem se: “From we yufala i gat hop yufala i mas harem gud oltaem,” hem i se: “Taem yufala i gat trabol, yufala i mas stanap strong.” (Rom 12:12, NW) Jisas tu i tokbaot glad we yumi save gat taem ol man oli ronem yumi. Hem i talem long Matyu 5:11, 12 i se: “Yufala we ol man oli stap spolem nem blong yufala, oli stap ronem yufala, mo oli stap gyaman, oli stap talem ol rabis tok agens long yufala, from we yufala i man blong mi, yufala i save harem gud. Yufala i save hapi, yufala i save glad, from we i gat bigfala pei blong yufala i stap long heven.” Fasin blong harem gud mo fasin glad we vas ya i tokbaot i no min se yumi mas jyajyam blong ol man oli save luk. Bigfala mining blong hem se long hat blong yumi, yumi haremsave se Jeova mo Jisas oli laekem yumi from we yumi stanap strong taem yumi kasem traem. (Ol Wok 5:41) Fasin glad nao i givhan long yumi blong winim traem ya. (1 Tesalonaeka 1:6) Jisas i soemaot gudfala eksampel long yumi. Baebol i talem long yumi se: “Hem [Jisas] i luksave we bambae i save harem gud, nao from samting ya, hem i no moa tingbaot se [pos, NW] ya bambae i mekem bigfala sem long hem, hem i gohed nomo.”—Hibrus 12:2.
Harem Gud Long Hop Nating Se i Gat Ol Trabol
8. ?Wanem trabol we ol Kristin oli save kasem, be from wanem ol trabol ya oli no save tekemaot fasin glad ya blong olgeta?
8 Taem yumi kam man blong wok blong Jeova samting ya i no mekem yumi fri long ol trabol. Maet yumi save kasem ol trabol long saed blong famle, long saed blong mane, long saed blong bodi, no taem ol fren blong yumi oli ded. Ol samting ya oli mekem yumi harem nogud, be oli no tekemaot stampa fasin glad we yumi gat from hop blong Kingdom, glad ya we i stap insaed long hat blong yumi.—1 Tesalonaeka 4:13.
9. ?Wanem trabol we Ebraham i kasem, mo olsem wanem yumi save se hem i glad long hat blong hem?
9 Tingbaot Ebraham, olsem wan eksampel. Hem i no harem gud oltaem long laef blong hem. Hem i kasem ol trabol long saed blong famle. Narafala woman blong hem, Hega, mo stret woman blong hem Sera, tufala i no stap gud tugeta. Tufala i stap raorao. (Jenesis 16:4, 5) Ismael i stap tok fani blong daonem Aesak, hem i stap ronem Aesak. (Jenesis 21:8, 9; Galesia 4:29) Mo i no longtaem Sera, waef we Ebraham i laekem tumas, i ded. (Jenesis 23:2) Nating se hem i kasem ol trabol ya, hem i harem gud from hop long Laen blong Kingdom, hemia Laen blong Ebraham, we olgeta famle long wol oli save kasem blesing from. (Jenesis 22:15-18) Glad we i stap long hat blong hem i givhan long hem blong hem i stanap strong oltaem long wok blong Jeova long handred yia we hem i bin livim ples blong hem Uru. Taswe Baebol i tokbaot hem i se: “Ebraham i mekem olsem, from we i stap wet blong go long wan taon we God i mekem ol plan blong hem, mo i stanemap. Taon ya, faondesen blong hem i save stap oltaem nomo.” Ebraham i gat bilif long Kingdom blong Mesaea we bambae i kam. From samting ya, taem God i makemaot finis Jisas olsem King, Jisas i save talem se: “Taem . . . Ebraham i harem nyus se bambae hem i save luk taem blong mi, hem i harem gud tumas. Mo taem hem i luk taem blong mi, hem i glad we i glad.”—Hibrus 11:10; Jon 8:56.
10, 11. (a) ?Wanem kaen faet we ol Kristin oli gat, mo olsem wanem oli save kasem sef? (b) Yumi no save winim faet blong yumi long fasin we i stret gud olgeta. ?Taswe wanem samting i save givhan long yumi?
10 Yumi no stret gud olgeta. Yumi gat sin we yumi mas agensem mo samting ya i save mekem trabol long yumi taem yumi stap traehad blong mekem stret fasin. Be faet ya blong agensem ol slak fasin blong yumi i no minim se yumi no gat hop. Pol i harem nogud long kaen faet olsem mo hem i talem se: “?Hu man we bambae i save pulumaot mi long laef ya we i stap holemtaet mi, we bambae mi ded from? . . . Mi mi talem tangkyu tumas long God, we hem bambae i mekem. Masta blong yumi Jisas Kraes bambae i wokem samting ya.” (Rom 7:24, 25) From Jisas Kraes mo ransom we hem i givim, yumi kasem sef.—Rom 5:19-21.
11 Ransom sakrafaes blong Kraes i kavremap ol fasin we yumi no save mekem blong winim faet ya long fasin we i stret gud olgeta. Yumi save harem gud long ransom ya from hem i mekem se tingting blong yumi i save kam klin, mo God i save fogivim ol sin blong yumi. Long Hibrus 9:14, Pol i tokbaot “blad blong Kraes . . . i save mekem tingting blong yumi i klin long ol samting blong ded we yumi mekem.” Taswe tingting blong ol Kristin oli no mas kam hevi from ol nogud samting we oli bin mekem. Samting ya wetem hop we yumi gat oli pusum yumi blong harem gud. (Ol Sam 103:8-14; Rom 8:1, 2, 32) Sipos yumi evriwan yumi tingtinggud long hop we yumi gat, bambae yumi tingting strong blong winim faet ya.
Tingtinggud Long Hop Blong Yumi
12. ?Wanem hop blong ol Kristin we tabu speret i makemaot olgeta?
12 Hem i impoten long ol man we tabu speret i makemaot olgeta mo ol narafala sipsip blong oli putum “hop ya blong yumi se bambae yumi sef” i olsem hat blong faet blong olgeta. (1 Tesalonaeka 5:8, NW) Ol Kristin we tabu speret i makemaot olgeta oli save tingbaot gudfala jans blong kasem laef blong olwe long heven. Oli gat jans ya blong oli save stap wetem Jeova God, mo oli harem gud from we oli joen wetem King Jisas Kraes, ol aposol mo wetem ol narafala memba blong 144,000 we long ol handred yia we i pas oli stap holemstrong bilif blong olgeta. !Hemia i wan gudfala kampani we bambae oli stap wan ples!
13. ?Olsem wanem ol Kristin we tabu speret i makemaot olgeta oli stap tingbaot hop blong olgeta?
13 Smol haf blong ol Kristin we tabu speret i makemaot olgeta oli stap laef yet long wol. ?Wanem tingting blong olgeta long hop blong Kingdom? Tingting ya i stap long tok we presiden blong Watch Tower Sosaete, F. W. Franz we hem i baptaes long 1913 i talem, i se: “Hop blong mifala i wan trufala hop, mo bambae i kamtru fulwan long olgeta evriwan blong ol 144,000 memba blong smol kampani blong ol sipsip. Bambae i kamtru long fasin we i bitim mak long tingting blong mifala. Mifala blong kampani ya we mifala i stap yet long 1914, long taem ya mifala i ting se bambae mifala evriwan i go long heven, be nating se i no olsem, mifala i no lusum tingting blong mifala long nambawan hop ya. Naoia hop ya blong mifala i kam strong moa bitim bifo, mo mifala i laekem moa taem mifala i mas stap wet from. Hem i samting we i gud blong stap wet from, nating se i mas tekem wan milyan yia. Mi mi tinghae moa long hop ya i bitim bifo, mo mi no wantem lusum tingting ya nating. Hop blong mifala, smol kampani, i mekem mifala i luksave se samting we bigfala hif blong narafala sipsip i stap wet from, bambae i kamtru long fasin we i bitim waes tingting blong mifala. From samting ya mifala i holemstrong kam kasem naoia, mo bambae mifala i holemstrong yet gogo kasem taem we God bambae i pruvum se hem i stap tru long ‘ol bigbigfala promes blong hem, we yumi luk oli gud tumas.’ —2 Pita 1:4; Namba 23:19; Rom 5:5.
Harem Gud Naoia Long Hop Blong Paradaes
14. ?Wanem hop bigfala kampani i mas gat long tingting blong hem?
14 Bilif olsem i mekem se bigfala hif blong narafala sipsip oli gat gudfala risen blong oli harem gud. (Revelesen 7:15, 16) Oltaem olgeta ya oli mas tingbaot hop blong laef tru long Amageden. Yes oli save wet blong luk taem ya we Kingdom blong God bambae i leftemap hae rul blong Jeova God. Mo Kingdom ya bambae i mekem gudfala nem blong Jeova i tabu bakegen taem i mekem bigfala trabol, blong bambae i spolem ol rabis man we Devel Setan i god blong olgeta. !Bambae oli save harem gud blong laef tru long bigfala trabol ya!—Daniel 2:44; Revelesen 7:14.
15. (a) ?Wanem merikel Jisas i wokem taem hem i stap laef long wol, mo from wanem hem i mekem olsem? (b) ?Olgeta we oli laef tru long Amageden oli nidim wanem long saed blong bodi, mo from wanem oli defren long olgeta ya we bambae oli laef bakegen long ded?
15 Revelesen 7:17 i tokbaot bigfala hif blong man i se: “From we Smol Sipsip ya we i stap long medel long bigfala jea blong God, hem bambae i lukaot long olgeta, olsem we man blong lukaot long sipsip i stap lukaot long ol sipsip blong hem. Hem bambae i lidim olgeta oli go dring long ol springwora ya we i save givim laef. Mo God bambae i ravemaot wora blong ae blong olgeta.” Nating se profet tok ya i kamtru finis long saed blong speret naoia, be olgeta we bambae oli laef tru long Amageden bambae oli luk samting ya stret long ae blong olgeta. ?Olsem wanem? Tingbaot, ?Jisas i mekem wanem taem hem i stap long wol? Hem i mekem olgeta we oli no save wokbaot, leg blong olgeta i nogud, oli wokbaot bakegen, i mekem ol man we sora blong olgeta oli fas oli kam gud bakegen, mo i openem ae blong ol blaenman, mo i mekem olgeta we oli gat sik ya leprosi oli kamgud bakegen, olgeta we haf bodi blong olgeta i ded oli kamgud bakegen mo “i stap mekem olgeta we oli gat sik mo olgeta we bodi blong olgeta i nogud, oli gud bakegen.” (Matyu 9:35; 15:30, 31) Hemia samting we ol Kristin tede oli nidim. Bigfala hif blong ol man bambae oli go long nyufala wol wetem ol sik ya. ?Nao yu ting se Smol Sipsip ya bambae i mekem wanem long olgeta? Olgeta we oli laef tru long Amageden bambae oli nidim samting we i defren long ol man we bambae oli laef bakegen. Olgeta we oli laef bakegen, bambae oli kasem bodi we i gud nomo, be i tru we oli no stret gud olgeta yet. Merikel blong laef bakegen i mekem se bambae oli no nidim narafala merikel blong mekem bodi blong olgeta i gud. Be olgeta we oli kasem spesel blesing blong laef tru long Amageden, plante long olgeta bambae oli nidim merikel blong mekem bodi blong olgeta i kamgud bakegen, mo bambae merikel i kamaot long olgeta. I luk olsem we bifo, wan bigfala risen from wanem Jisas i stap mekem ol man oli kamgud bakegen i blong leftemap tingting blong bigfala hif blong ol man tede. Hem i soemaot se bambae oli kasem laef, be tu, bambae bodi blong olgeta i kamgud bakegen afta.
16. (a) ?Wetaem merikel i kamaot long ol man we oli laef tru long Amageden, mo wanem frut i save kamaot from? (b) ?Wanem hop bambae yumi save gohed blong harem gud long hem long Wan Taosen Yia?
16 Olgeta we oli laef tru long Amageden bambae oli kasem merikel ya blong mekem bodi blong olgeta oli kamgud bakegen jes afta long Amageden mo bifo we ol man oli stat blong laef bakegen long ded. (Aesea 33:24; 35:5, 6; Revelesen 21:4; lukluk Mak 5:25-29.) Nao bambae ol man oli sakem ol glas blong ae blong olgeta, ol stik blong wokbaot, ol wiljea, ol gyaman tut, mo samting we i givhan long ol man blong oli save harem, mo ol narafala samting olsem bakegen. !Samting ya yumi save harem gud from! !I stret nomo blong Jisas i mekem ol man we noli laef tru long Amageden oli kamgud kwiktaem from olgeta oli olsem faondesen blong nyufala wol! Ol sik we oli stap spolem ol man bambae oli no moa stap blong blokem ol man we oli laef tru long Amageden blong oli save mekem wok wetem gudfala tingting, mo oli lukluk i go fored long ol nambawan wok long Wan Taosen Yia, bambae oli no save kam slak from ol sik we oli kasem long olfala wol. Mo long wan taosen yia, bambae oli stap haremgud long hop blong kasem laef we i stret gud olgeta long en blong ol yia ya.
17. ?Wanem gladtaem bambae yumi kasem taem yumi stap mekem rere blong wol ya i kam Paradaes?
17 Sipos hemia i hop blong yu, tingbaot gladtaem ya we bambae yu yu joen long wok blong mekem wol ya i kam Paradaes. (Luk 23:42, 43) Ol man we oli laef tru long Amageden bambae oli givhan blong klinimap wol ya mo mekem ples i rere gud long olgeta we bambae oli laef bakegen. Fasin blong berem man i finis. Be yumi stap mekem welkam long ol man we oli laef bakegen, yes yumi mekem welkam tu long olgeta fren mo famle blong yumi we oli ded finis. Tingbaot olsem wanem yumi save harem gud blong joen wetem ol man mo ol woman blong bilif blong bifo. Tingbaot, ?yu yu wantem toktok wetem hu, long taem ya? ?Ating Ebel, Inok, Noa, Job, Ebraham, Sera, Aesak, Jekob, Josef, Moses, Josua, Rehab, Debra, Samson, Deved, Elaeja, Elaesa, Jeremaea, Esikel, Daniel, no Jon Baptaes? Tingting ya i olsem hop blong yu. Bambae yu yu save toktok wetem olgeta, lanem sam samting long olgeta, mo wok tugeta wetem olgeta blong mekem wol ya i kam paradaes.
18. ?Wanem ol narafala samting we oli save mekem yumi harem gud taem yumi tingbaot?
18 Tingbaot tu ol gudfala kakae, klin wora, mo fres win, mo wol ya wetem ol samting we oli laef long hem, oli stap long fasin we i stret gud olgeta olsem we Jeova i wantem taem hem i bin wokem. Laef long taem ya bambae i no blong harem gud nomo long stret fasin, be yumi wok mo yumi glad mo joen blong harem gud long ol wok ya. Tingbaot ol man we oli laef long wol we i no moa gat fasin blong kilim man, fasin blong ol man oli tingbaot olgeta nomo, fasin jelas, fasin blong rao—ol man ya oli stap olsem oli brata nomo we evriwan i wokem mo soemaot frut blong tabu speret long laef blong olgeta. !I gud tumas olsem!—Galesia 5:22, 23.
Hop We i Givim Mining Long Laef
19. (a) ?Wetaem yumi save harem gud olsem Rom 12:12 i stap tokbaot? (b) ?From wanem yumi no save letem ol trabol blong laef oli spolem hop blong yumi?
19 Taem samting we yumi putum tingting blong yumi i strong long hem i kamtru, bambae i no moa olsem hop. Taswe fasin blong harem gud we Pol i tokbaot long Rom 12:12, yumi save gat naoia. (Rom 8:24) Tingbaot ol blesing long fyuja we Kingdom blong God bambae i givim long yumi. Samting ya i save mekem yumi harem gud long hop naoia. Yumi mas putum tingting blong yumi i strong blong no letem ol trabol blong laef long rabis wol naoia oli pusum yumi blong lusum hop blong yumi. Yumi no mas kam slak mo stop long haf rod, mo yumi no mas lego tingting long hop ya we i stap long fored blong yumi. (Hibrus 12:3) Fasin blong lego rod blong Kristin man i no save givhan blong winim ol trabol. Tingbaot sipos wan man i no moa mekem wok blong God from ol trabol blong laef we hem i kasem naoia, hem i stil gat ol trabol ya, be hem i lusum hop mo hem i lusum jans ya we hem i save harem gud long ol nambawan blesing long fyuja.
20. ?Kingdom hop ya i mekem wanem long ol man we oli akseptem, mo from wanem?
20 Ol man blong Jeova oli gat gud risen blong harem gud long laef. Gudfala fyuja mo hop ya we God i givim i mekem se laef blong olgeta i gat mining. Mo oli no holem hop ya i blong olgeta nomo. No gat, oli stap wantem traehad blong talemaot long ol narafala man tu. (2 Korin 3:12) Taswe olgeta we oli kasem hop blong Kingdom oli putum tingting blong olgeta i strong long hem, mo oli wantem leftemap tingting blong ol narafala man taem oli stap talemaot gud nyus we i kamaot long God. Ol man we oli akseptem mesej blong olgeta oli kasem nambawan hop we i defren—hemia hop blong Kingdom we bambae i mekem Paradaes long wol. Sipos ol man oli no akseptem, be yumi gohed yet blong harem gud long hop ya we yumi gat. Olgeta we oli no wantem lesin long yumi bambae oli mestem wan bigfala samting long laef blong olgeta. Be yumi no olsem.—2 Korin 4:3, 4.
21. ?Wanem samting bambae i no longtaem i kamtru, mo olsem wanem yumi save tingbaot hop blong yumi?
21 God i promes se: “!Yu luk! Mi mi stap mekem olgeta nyufala samting.” (Revelesen 21:5) Nyufala wol wetem ol gudfala blesing blong olwe kolosap bambae oli kamtru. Hop blong yumi—blong laef long heven no long paradaes long wol ya—hem i nambawan tumas. Yu mas holemtaet long hem. Naoia long ol las dei, i bitim bifo, yu mas tingbaot hop ya olsem “wan angka we i fas strong, we i no save muf.” Hop blong yumi i fas long Jeova olsem wan angka we i fas long “bigfala ston ya we i stap we i stap—Bigfala Ston blong bifo olgeta.” Taswe yumi gat strong tingting mo gudfala risen naoia blong ‘harem gud long hop’ we i stap fored long yumi.—Hibrus 6:19; Aesea 26:4, The Amplified Bible.
[Futnot]
a Long 1992, vas blong yia blong ol Wetnes blong Jeova long olgeta ples long wol i se: “From we yufala i gat hop, yufala i mas harem gud oltaem. . . . Mo yufala i mas stap prea oltaem.”—Rom 12:12, NW.
Tingtingbak
◻ ?Wanem bigfala hop blong olgeta man?
◻ ?Trufala fasin glad i olsem wanem?
◻ ?Wetaem merikel i kamaot blong mekem ol man we oli laef tru long Amageden oli kamgud long bodi?
◻ ?From wanem yumi no mas letem ol trabol blong laef oli spolem yumi long hop we yumi gat?
◻ ?Wanem samting yu save harem gud long hem long nyufala wol?
[Tok Blong Pija Long Pej 9]
?Olsem wanem, yu ting se bambae i no mekem hat blong yumi i harem gud blong luk ol merikel we Jisas bambae i mekem?
[Tok Blong Pija Long Pej 10]
Olgeta we oli harem gud long Kingdom oli givhan long ol narafala man taem oli stap talemaot hop blong olgeta