!Stap Glad Long Jeova!
“Yufala we i joen long Masta blong yumi, oltaem yufala i mas glad. Mi talem bakegen, yufala i mas glad.”—FILIPAE 4:4.
1. ?From wanem maet yumi no klia long mining blong tok blong Pol taem hem i talem se oltaem ol Kristin oli mas glad?
NAOIA, i luk olsem se i no gat plante risen blong glad. Ol man we oli kamaot long ases, ol trufala Kristin tu, oli fesem ol samting we i mekem olgeta oli harem nogud—oli no gat wok, oli kasem sik, ol fren no famle blong olgeta oli ded, ol slak fasin blong olgeta, no fasin agens blong ol memba blong famle we oli no bilif no ol fren blong olgeta bifo. ?From samting ya, wanem mining blong advaes blong Pol se, “Oltaem yufala i mas glad”? Taem yumi tingbaot ol hadtaem long laef we oli mekem yumi harem nogud, we yumi evriwan i mas fesem, ?i rili tru se yumi save stap glad oltaem? Naoia yumi tokbaot ol vas we oli stap raonabaot long ol tok ya, mo bambae samting ya i mekem mining blong poen ya i klia.
Glad—?From Wanem Mo Olsem Wanem?
2, 3. ?From wanem glad i impoten, olsem store blong Jisas mo ol man Isrel bifo oli soemaot?
2 “Yufala we i joen long Masta blong yumi, oltaem yufala i mas glad. Mi talem bakegen, yufala i mas glad.” Samting ya i save mekem yumi tingbaot ol tok we i go long ol man Isrel 2,400 yia bifo se: “Glad blong Jeova i strong haos blong yufala,” no Moffatt Baebol i talem se: “Fasin blong glad long Hemia we i Stap Olwe, hem i paoa blong yufala.” (Nehemaea 8:10) Glad i givim paoa mo i olsem wan strong haos we man i save ronwe i go long hem blong kam strong bakegen mo blong blokem hem long plante samting. Nating se Jisas i stretgud olgeta, glad i wan samting we i halpem hem blong stanap strong agensem ol trabol. “Taem hem i go blong i ded long pos, hem i no lego rod blong hem, no gat. Hem i luksave we bambae i haremgud, nao from samting ya, hem i no moa tingbaot se pos ya bambae i mekem bigfala sem long hem, hem i gohed nomo. Mo naoia, hem i stap sidaon long raetsaed blong God we hem i king, i stap sidaon long bigfala jea blong hem long heven.” (Hibrus 12:2) I klia nomo, blong kasem laef, yumi nidim blong stap glad taem yumi fesem ol hadtaem.
3 Bifo we ol man Isrel oli go insaed long Promes Lan, oli kasem oda ya se: “Yufala i mas glad long ol gudfala samting we Jeova, God blong yufala i givim long yufala mo long famle blong yufala, yufala mo ol Livaet mo ol man blong narafala kantri we oli stap long medel blong yufala.” Bambae oli kasem ol nogud frut sipos oli no mekem wok blong Jeova wetem glad. “Olgeta trabol ya oli mas kasem yufala mo folem yufala mo winim yufala gogo yufala i ded evriwan . . . from we yufala i no mekem wok blong Jeova, God blong yufala wetem fasin glad mo fasin blong haremgud long hat, long evri samting we yufala i gat plante long hem.”—Dutronome 26:11; 28:45-47.
4. ?From wanem, maet samtaem yumi no glad?
4 !From samting ya, i impoten tumas se ol Kristin tede we tabu speret i makemaot mo ol fren blong olgeta, ol “narafala sipsip,” oli mas glad! (Jon 10:16) Taem Pol i talem bakegen advaes ya blong hem se, “mi talem bakegen,” hem i makem se i impoten blong glad long olgeta gudfala samting we Jeova i bin mekem long yumi. ?Yumi stap glad long ol samting ya? ?No yumi letem ol samting blong evridei laef oli mekem se samtaem yumi fogetem plante gudfala samting we oli givim risen blong glad? ?Ol problem oli hivap tumas mekem se oli blokem tingting blong yumi, nao yumi no moa tingbaot Kingdom mo ol blesing blong hem? ?Yumi letem ol narafala samting—fasin blong no obei long ol loa blong God, fasin blong sakemaot ol rul blong hem, mo fasin blong slak long ol Kristin wok—oli spolem glad blong yumi?
5. ?From wanem man we i no gat stret tingting i save faenem se i had blong stap glad?
5 ‘Yufala i mas soemaot long olgeta man, we yufala i gat stret tingting. Bambae i no longtaem Masta blong yumi i kamtru.’ (Filipae 4:5) Man we i no gat stret tingting, hem i no skelgud. Maet hem i no keagud long helt blong hem, i stap kros no i wari tumas long ol samting we hem i no nidim blong tingbaot. Maet hem i no lanem blong akseptem ol mak blong prapa paoa blong hem mo blong folem ol mak ya. Maet hem i save putum ol mak we oli hae tumas mo i traem blong kasem, nating se wanem denja i save kamaot. No maet hem i yusum ol mak blong prapa paoa blong hem olsem eskyus blong no gohed strong no blong kam slak. From we hem i no skelgud mo i no gat stret tingting, hem i faenem se i had blong stap glad.
6. (a) ?Ol Kristin brata sista oli mas luk wanem long yumi, mo bambae samting ya i save kamaot wetaem nomo? (b) ?Olsem wanem ol tok blong Pol long 2 Korin 1:24 mo Rom 14:4, oli halpem yumi blong gat stret tingting?
6 Stret tingting blong yumi i mas klia blong ol Kristin brata sista blong yumi oli luk, nating sipos ol man blong agens oli luk yumi olsem we yumi krangke. Mo bambae oli luk, sipos yumi skelgud mo yumi no ting se yumi no ol narafala i mas mekem i stretgud olgeta oltaem. Antap long samting ya, yumi no mas putum ol baden long ol narafala we oli bitim samting we Tok blong God i askem. Aposol Pol i talem se: “Mifala i no wantem mekem i strong long yufala, blong makem wanem tok i stret blong yufala i bilif long hem mo wanem i no stret, . . . Mifala i wantem wok wetem yufala, blong mekem yufala i harem gud moa.” (2 Korin 1:24) Pol we bifo i wan Farisi, hem i savegud se ol strong rul we olgeta we oli lidim narafala oli putumap mo oli fosem olgeta blong folem, i spolem fasin glad, be ol gudfala advaes blong ol Kristin brata sista we oli wok tugeta, i mekem glad i kam moa. Tok ya se “i no longtaem Masta blong yumi i kamtru” i mas pulum man we i gat stret tingting blong tingbaot se, yumi no mas ‘jajem ol man blong wok blong narafala man. Yumi no gat raet blong mekem olsem. Masta blong olgeta nomo i save talem we olgeta oli mekem i gud no oli mekem i nogud.’—Rom 14:4.
7, 8. ?From wanem ol Kristin oli save se bambae oli gat problem, be olsem wanem oli save gohed yet blong stap glad?
7 “I nogud yufala i stap tingting tumas from sam samting. Be sipos yufala i sot long wan samting, yufala i mas prea long God from. Yufala i mas askem long hem, mo yufala i mas talem tangkyu tu long hem.” (Filipae 4:6) Tede, yumi stap fesem taem ya we laef i “strong tumas” we Pol i tokbaot long leta blong hem. (2 Timote 3:1-5) Taswe ol Kristin oli save se oli mas fesem plante problem. Ol tok blong Pol se “oltaem yufala i mas glad” i no min se neva wan Kristin we i fasgud long God i harem nogud no neva tingting i foldaon samtaem. Long ol hadtaem we Pol hem wan i fesem, hem i talem stret se: “Plante taem, mifala i gat trabol, be neva se tingting blong mifala i foldaon. Sam taem, mifala i no save rod, be neva se mifala i lus olgeta. Ol man oli stap ronem mifala, be neva se mifala i no gat fren blong mifala. Ol man oli stap kilim mifala, be neva se mifala i ded olgeta.” (2 Korin 4:8, 9) Fasin glad blong wan Kristin i save daonem mo biaen i winim ol taem we hem i tingting tumas mo i harem nogud. Fasin glad i givim paoa we wan Kristin i nidim blong stap gohed, neva hem i fogetem plante risen we hem i gat blong glad.
8 Taem i gat ol problem oli kamaot, nating se wanem kaen problem, wan Kristin we i glad, i mekem tingting blong hem i stap daon mo prea blong askem help long Jeova. Hem i no letem fasin blong tingting tumas i winim hem. Afta we hem wan i mekem samting we hem i save mekem blong winim problem ya, hem i livim risal blong samting ya long han blong Jeova, folem tok ya we i askem yumi blong mekem olsem: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.” Long semtaem, Kristin ya i mas gohed blong talem tangkyu long Jeova from olgeta gudgudfala fasin blong Hem.—Ol Sam 55:22; lukluk tu Matyu 6:25-34.
9. ?Olsem wanem save long saed blong trutok i givim pis long tingting, mo samting ya i mekem wanem gudfala wok long wan Kristin?
9 “Nao pis we God i save putum, hem i bigfala moa, i bitim save blong yumi olgeta. Mo God bambae i putum pis ya long tingting blong yufala, blong lukaotgud long yufala ya we i joen long Jisas Kraes.” (Filipae 4:7) Save long saed blong trutok blong Baebol i mekem se tingting blong wan Kristin i fri long ol gyaman tijing mo i halpem hem blong gat gudfala fasin blong tingting. (2 Timote 1:13) Olsem nao, samting ya i halpem hem blong blokem ol fasin we oli rong no oli krangke we oli save spolem gudfala fasin fren blong hem wetem ol narafala. Ol fasin we ol man oli mekem i no stret long ol narafala mo ol rabis fasin, oli no mekem hem i kros, be hem i putum tras blong hem long Jeova, se bambae Jeova i yusum Kingdom blong finisim ol problem blong olgeta man. Pis ya long tingting i lukaotgud long hat blong hem, i mekem se oltaem tingting we i pusum hem blong mekem ol samting i klin, mo i lidim hem blong tingting long rod blong stret fasin. Nao, tingting we i pusum hem we i klin mo tingting we i stret i givim plante risen blong stap glad, nating se i gat plante problem mo hadtaem we rabis wol ya i mekem.
10. ?Ol man we oli kasem trufala glad, oli ol man ya nomo we oli tokbaot no tingbaot wanem samting?
10 “Ol brata mo sista. Hemia lastok blong mi. I gat ol fasin i stap we oli stret gud, mo we i stret nomo blong yumi presem olgeta. Mo yufala i mas putum tingting blong yufala i stap strong long ol fasin we oli tru, mo ol fasin we oli hae, mo ol fasin we oli stret, mo ol fasin we oli klingud, mo ol fasin we oli mekem yumi harem gud mo ol fasin we ol man oli stap ona long olgeta.” (Filipae 4:8) Ol Kristin oli no mas glad blong tokbaot no tingting long ol samting we oli no stret. Samting ya i minim se oli mas blokem plante long ol pleplei blong wol. Wan man i no save holem Kristin fasin glad sipos hem i fulumap maen mo hat blong hem wetem ol gyaman toktok, ol krangke tok plei we oli nogud, mo ol bisnes we oli joen wetem fasin we i no stret, rabis fasin long saed blong seks, ol fasin we oli nogud, ol fasin blong agensem narafala, mo ol fasin we oli rabis olgeta. Blong talem stret, man i no save faenem trufala glad sipos hem i fulumap maen mo hat blong hem wetem doti. !Long wol blong Setan we i fulap wetem ol rabis fasin, yumi haremgud tumas blong save se ol Kristin oli gat plante gudfala samting blong tingbaot mo tokbaot!
Plante Risen Blong Glad
11. (a) ?Yumi neva mas ting nating long wanem samting, mo from wanem yumi no mas mekem olsem? (b) ?Wan intenasnal asembli i gat wanem paoa long wan man mo waef blong hem we tufala i kam long asembli ya?
11 Taem yumi tokbaot ol samting we oli givim risen blong glad, i gud yumi no fogetem kampani blong ol brata sista raonabaot long wol. (1 Pita 2:17) Taem ol nesen blong wol mo ol laen blong man oli stap gohed blong agensem strong olgeta, ol man blong God oli kam kolosap moa long olgeta long fasin lav. Man i save luk klia fasin joen blong olgeta long ol intenasnal asembli. Long saed blong intenasnal asembli we oli mekem long 1993 long Kiev, Yukren, wan man Yunaeted Stet we i kam joen long hem, i raetem se: “Ol wora blong ae we oli kamaot from glad, ol fes we oli smael, fasin ya we oli stap gohed blong holholem olgeta olsem wan famle, mo lav we olgeta long narasaed stad oli stap soem long ol narafala long narasaed stad, taem oli stap saksakem ol ambrela mo ol angkejif blong olgeta we oli gat naesfala kala, i soemaot klia tiokratik fasin joen. Long hat blong mifala, mifala i praod tumas from ol samting we Jeova i mekem, olsem wan merikel, long medel blong kampani blong ol brata sista raonabaot long wol. Samting ya i tajem hat blong mi mo waef blong mi bigwan mo i mekem se bilif blong mitufala i gat nyufala mining.”
12. ?Olsem wanem Aesea 60:22 i stap kamtru, we yumi stap luk long prapa ae blong yumi?
12 !Bilif blong ol Kristin tede i kam moa strong taem oli luk wetem prapa ae blong olgeta ol profet tok blong Baebol we oli stap kamtru! Eksampel, tingbaot ol tok blong Aesea 60:22, se: “Man ya we i smolwan bambae i kam taosen man, mo hemia we i olsem nating nomo bambae i kam wan strongfala nesen. Mi, Jeova, mi mekem wok ya i spid moa long stret taem blong hem.” Taem Kingdom i bon long 1914, i gat 5,100 man nomo—wan smolwan—oli stap wok strong long wok blong prij. !Be long ol faef yia we oli jes pas, kampani blong ol brata sista raonabaot long wol i bin go antap long wan mak we evri wik, i gat 5,628 nyufala Wetnes oli baptaes! Long 1993, ol Kristin minista we oli stap wok strong long wok blong prij, namba blong olgeta i go antap kasem 4,709,889. !Jes tingbaot! !Samting ya i minim se “man ya we i smolwan” long 1914, kolosap i kam “wan taosen man” stret!
13. (a) ?Wanem samting i stap kamaot stat long 1914? (b) ?Olsem wanem ol Wetnes blong Jeova oli folem rul we i stap long ol tok blong Pol long 2 Korin 9:7?
13 Stat long 1914, King Mesaea i bin rul long medel blong ol enemi blong hem. Ol man blong hem long wol, we oli glad blong givim taem, paoa, mo mane blong olgeta blong mekem wok blong prij i gohed mo blong bildim ol Haos Kingdom mo ol Betel raonabaot long wol, oli bin sapotem rul blong King ya. (Ol Sam 110:2, 3) Ol Wetnes blong Jeova oli glad long ol presen mane blong mekem ol wok ya oli gohed, nating se long ol miting blong olgeta, oli no stap tokbaot mane tumas.a (Lukluk 1 Kronikel 29:9.) Wan man i no fosem ol trufala Kristin blong givim; oli tingbaot fasin ya olsem wan jans blong sapotem King blong olgeta, go kasem mak we oli naf blong givim, “evri man oli mas givim sam samting, olsem we evri man wanwan oli jusumaot. I nogud man i givim samting long sore nomo, no from we hem i harem olsem we olgeta oli fosem hem.”—2 Korin 9:7.
14. ?Wanem samting long medel blong ol man blong God we i kam klia stat long 1919, mo samting ya i givim wanem risen long olgeta blong stap glad?
14 Trufala wosip we profet tok i bin talem se bambae i stanap bakegen long medel blong ol man blong God, i mekem wan paradaes long saed blong speret. Sloslou, stat 1919, hem i bin seftem ol mak blong hem i go longwe moa. (Ol Sam 14:7; Aesea 52:9, 10) ?Wanem frut i kamaot? Ol trufala Kristin oli “haremgud tumas mo oli glad.” (Aesea 51:11) Ol gudfala frut we oli kamaot, oli pruvum samting we tabu speret blong God i naf blong mekem tru long ol man we oli no stretgud olgeta. Olgeta respek mo ona oli go long Jeova, ?be wanem jans we i bigwan moa bitim jans ya blong kam olsem man blong joen wetem God blong mekem wok blong hem? (1 Korin 3:9) Sipos Jeova i wantem, hem i gat naf paoa blong mekem ol ston oli talemaot mesej blong trutok. Nating se i olsem, hem i no mekem samting ya, be hem i givim strong tingting long ol man we oli kamaot long ases nomo, we oli glad blong wok, blong mekem wil blong hem.—Luk 19:40.
15. (a) ?Wanem ol samting we oli stap kamaot tede we yumi lukluk wetem intres? (b) ?Wanem taem yumi stap lukluk i go long hem wetem glad?
15 Wetem fasin respek, ol man blong Jeova naoia, oli stap wajem ol samting we oli stap kamaot long wol we oli joen wetem ol nambawan profet tok blong Baebol. Ol nesen oli stap traehad—be blong nating nomo—blong kasem pis we i save stap longtaem. Ol samting we oli kamaot oli stap fosem olgeta blong singaot Yunaeted Nesen blong mekem wan samting blong stretem trabol long plante kantri long wol. (Revelesen 13:15-17) Long semtaem, ol man blong God oli stap lukluk finis i go long fyuja wetem bigfala hop blong luk taem ya we bambae i nambawan bitim ol narafala taem bifo, wan taem we i stap kam moa kolosap evri dei. “Yumi haremgud tumas, yumi sing from glad blong yumi, mo yumi leftemap nem blong God i go antap, from we taem i kam finis blong Smol Sipsip blong hem i mared. Mo woman ya we i olsem promes blong hem, hem i rere finis.”—Revelesen 19:7.
Wok Blong Prij—?Wan Baden No Wan Samting Blong Glad From?
16. Eksplenem olsem wanem wan Kristin we i no mekem samting we hem i lanem i save spolem glad blong hem.
16 “Yufala i mas holem ol fasin ya we mi mi soemaot long yufala long ol tok mo ol wok blong mi, mo we mi tijim yufala long olgeta, nao yufala i lanem olgeta finis. Nao God ya we i stampa blong pis, hem bambae i stap kampani wetem yufala.” (Filipae 4:9) Taem ol Kristin oli mekem ol samting we oli lanem i wok long laef blong olgeta, oli save sua se bambae oli kasem blesing blong God. Wan samting we i moa impoten bitim ol narafala samting we oli bin lanem, hemia se oli mas talemaot gud nyus long ol narafala. Tru ya, ?hu i save gat pis long tingting mo glad tumas sipos hem i haedem save long ol man we hat blong olgeta i stret, we laef blong olgeta i dipen fulwan long save ya we oli mas harem?—Esikel 3:17-21; 1 Korin 9:16; 1 Timote 4:16.
17. ?From wanem wok blong yumi blong prij i mas stap oltaem olsem wan stampa blong glad?
17 !Yumi haremgud tumas taem yumi faenem ol man we oli olsem sipsip, we oli glad blong kasem save long saed blong Jeova! Tru ya, olgeta we stret tingting i pusum olgeta blong prij, oltaem bambae oli faenem se wok blong Kingdom i givim glad. Hemia i from we bigfala risen blong stap olsem wan Wetnes blong Jeova i blong presem nem blong Hem mo blong sapotem haenem blong Hem olsem Haefala Rula. (1 Kronikel 16:31) Man we i luksave samting ya, bambae hem i glad, nating se ol man we oli no waes, oli no wantem lesin long gud nyus we hem i karem i go long olgeta. Hem i save se wan dei, fasin blong prij long ol man we oli no gat bilif bambae i finis; be fasin blong presem nem blong Jeova bambae i gohed gogo i no save finis.
18. ?Wanem samting i pusum wan Kristin blong mekem wil blong Jeova?
18 Trufala skul i leftemap tingting blong ol man we oli joen long hem blong mekem ol samting we Jeova i askem olgeta blong mekem, i no from we oli mas mekem, be from oli wantem mekem. (Ol Sam 40:8; Jon 4:34) Plante man oli faenem se i had blong kasem save long samting ya. Wan taem, wan woman i talem long wan Wetnes we i visitim hem se: “Yu save, i stret blong mi presem yu. Mi neva save go long ol haos wanwan blong prij long saed blong skul blong mi olsem we yu yu stap mekem.” Wetnes ya i smael, mo i ansa se: “Mi kasem save long filing blong yu. Bifo we mi kam wan Wetnes blong Jeova, i no gat wan man i save mekem mi mi go long ol narafala man blong tokbaot skul. Be naoia mi wantem mekem.” Woman ya i tingting smoltaem mo biaen i talem se: “I klia nomo, skul blong yu i gat samting blong givim, samting we skul blong mi i no gat. Ating mi mas lukluk moa long hem.”
19. ?From wanem naoia i taem blong glad bitim ol narafala taem bifo?
19 Vas blong yia 1994, we i stap klia long ol Haos Kingdom blong yumi, oltaem i mekem yumi tingbaot se: “Trastem Jeova wetem fulhat blong yu.” (Proveb 3:5) ?I gat wan narafala samting we i save givim moa glad bitim we yumi trastem Jeova, olsem wan strong haos we i sefples blong yumi? Ol Sam 64:10 i eksplenem se: “Olgeta stret man bambae oli glad from ol samting ya we Hae God i mekem, nao bambae oli faenem sefples long hem.” Naoia i no taem blong kam slak no blong lego Jeova. Ol wanwan manis we oli stap pas, oli stap karem yumi i kam moa kolosap long trufala samting we ol man blong Jeova oli bin wantem tumas blong luk stat long taem blong Ebel. !Naoia i taem blong trastem Jeova wetem fulhat blong yumi, from yumi save se naoia, bitim bifo, yumi gat plante risen tumas blong glad from!
[Futnot]
a Long ol asembli mo wan taem evri manis long ol kongregesen, oli ridim wan sot tok blong soemaot se kongregesen i kasem hamas presen mane mo i spenem hamas. Samtaem oli sanemaot ol leta blong talem olsem wanem oli stap yusum ol presen mane ya. Olsem nao, oli talemaot long evriwan, olsem wanem long wok blong ol Wetnes blong Jeova raonabaot long wol, long saed blong mane.
?Bambae Yu Yu Ansa Olsem Wanem?
◻ ?Folem Nehemaea 8:10, from wanem yumi mas glad?
◻ ?Olsem wanem Dutronome 26:11 mo 28:45-47 oli soem se fasin glad i impoten tumas?
◻ ?Olsem wanem Filipae 4:4-9 i save halpem yumi blong stap glad oltaem?
◻ ?Vas blong yia 1994 i givim wanem risen long yumi blong stap glad?
[Tok blong pija long pej 16]
Ol Wetnes blong Rasia mo Jemani oli glad blong joen long bigfala kampani blong ol brata sista blong ol defren ples long wol
[Tok blong pija long pej 17]
Fasin blong serem trutok wetem ol narafala i givim glad