Stap Kolosap Long Jeova
“Yufala i mas stap prea oltaem.”—ROM 12:12.
1. ?Jeova i wantem se yumi mekem wanem long saed blong prea, mo Pol i leftemap tingting blong yumi blong mekem wanem?
JEOVA i “God we i stap givim hop” (NW), long olgeta man we oli holemstrong long hem. From we hem i “stap harem prea” (NW), taswe hem i lesin taem ol man blong hem oli askem hem blong i givhan long olgeta blong harem gud long hop we hem i putum blong oli kasem. (Rom 15:13; Ol Sam 65:2) Long Tok blong hem, Baebol, hem i leftemap tingting blong ol man blong hem blong oli kam kolosap long hem long prea enitaem we oli wantem. Hem i rere oltaem, mo i wantem harem ol wari blong olgeta. Taswe hem i leftemap tingting blong olgeta blong oli “mas stap prea oltaem” mo blong ‘oltaem oli mas stap prea.’a (Rom 12:12; 1 Tesalonaeka 5:17) Jeova i wantem se olgeta Kristin oli mas singaot long hem long prea oltaem, blong talemaot samting we i stap long hat blong olgeta mo oli save mekem olsem tru long Pikinini ya blong hem, Jisas Kraes.—Jon 14:6, 13, 14.
2, 3. (a) ?From wanem God i askem yumi blong yumi “mas stap prea oltaem”? (b) ?Olsem wanem yumi save se God i wantem yumi blong prea long hem?
2 ?From wanem God i askem yumi blong mekem olsem? From laef mo hevi responsabiliti oli save mekem se yumi fogetem blong prea long hem. Maet ol trabol oli save winim yumi mo yumi no moa save glad long hop blong yumi mo yumi save stop blong mekem prea long hem. From samting ya, yumi nidim ol tok bakegen we i leftemap tingting, blong yumi stap prea mo kam kolosap long Jeova, God blong yumi we hem nao i stap givhan mo mekem yumi harem gud.
3 Disaepol Jemes i raet i se: “Yufala i mas kam stap kolosap long God, nao hem bambae i kam stap kolosap long yufala.” (Jemes 4:8) Yes God i no stap antap no longwe tumas long yumi, blong hem i no save harem ol prea we yumi mekem i go long hem, nating se yumi sinman nomo. (Ol Wok 17:27) Mo tu hem i stap intres mo i stap tingbaot yumi. Man blong raetem Sam i se: “Hae God i stap lukluk long ol stret man, i stap lesin blong harem krae blong olgeta.”—Ol Sam 34:15; 1 Pita 3:12.
4. ?Wanem pija tok i soemaot se God i stap lesin long prea?
4 Jeova i askem ol man blong oli prea. Yumi save skelem samting ya wetem fasin blong ol man we oli hivap wan ples long lafet mo oli stap toktok. Yu yu stap wetem olgeta, yu stap lesin long ol toktok blong olgeta. Yu yu stap lesin long olgeta. Nao wantaem nomo, wan man i tanraon long yu, i talem nem blong yu, mo i toktok stret long yu. Hem i pulum ae blong yu long wan spesel wei. I sem mak, God i stap lesin long ol man blong hem oltaem, nating se oli stap long weples. (2 Kronikel 16:9; Proveb 15:3) Hem i harem ol toktok blong yumi. Hem i stap lukaot gud mo i intres blong stap lesin long yumi oltaem. Taem yumi singaot long nem blong God long prea, nao, i olsem we yumi pulum ae blong hem, mo naoia hem i stap lukluk long yumi wetem spesel intres. Jeova i save yusum paoa blong hem blong kasem save long prea we ol man oli mekem long tingting mo hat blong olgeta. God i talem long yumi se hem bambae i kam kolosap long olgeta we oli stap singaot long nem blong hem mo oli stap wantem stap kolosap long hem.—Ol Sam 145:18.
Ansa Folem Plan Blong God
5. (a) ?Advaes ya se “yufala i mas stap prea oltaem” i soemaot wanem long saed blong prea? (b) ?Olsem wanem God i ansa long ol prea blong yumi?
5 Advaes ya blong stap prea oltaem i soemaot se samtaem Jeova i wantem se yumi gohed blong stap prea from wan samting bifo hem i mekem ansa i klia long yumi. Maet yumi save kam taed finis blong askem God long wan samting we yumi wantem no kaen gud fasin we yumi nidim tumas, be i tekem longtaem tumas blong kasem ansa. Taswe, Jeova God i askem yumi blong yumi no foldaon long ol traem olsem, be yumi mas stap prea oltaem. Yumi mas gohed blong askem hem blong givhan long yumi long ol wari blong yumi, mo yumi save gud se hem i stap tingbaot prea blong yumi mo bambae hem i ansa long ol nid blong yumi, i no from ol samting we yumi nomo i stap tingbaot. Jeova God i stap skelem ol samting we yumi askem long hem folem plan blong hem. Eksampel, maet samting we yumi askem God from i save mekem trabol long ol narafala man. Yumi save tingbaot bisnes ya olsem wan papa we pikinini blong hem i askem hem blong pem wan baskel blong hem. Papa ya i save se sipos hem i pem wan baskel blong pikinini ya, ol narafala pikinini blong hem bambae oli wantem baskel tu. No maet wan pikinini blong hem i yang tumas blong hem i gat wan baskel, ale papa ya i wantem wet fastaem. Long sem fasin, Papa blong yumi long heven i folem plan mo prapa taem blong hem, hem i stap skelem wanem i gud long yumi mo ol narafala man.—Sam 84:8, 11; lukluk Habakuk 2:3.
6. ?Wanem pija tok Jisas i givim long saed blong prea, mo fasin blong stap prea oltaem i soemaot wanem?
6 Makem gud pija tok we Jisas i givim long ol disaepol blong hem, “blong tijim olgeta we oli mas stap prea strong, oli no save letem tingting blong olgeta i foldaon.” Wan wido, i no save mekem wan jif i stretem bisnes blong hem, be oltaem hem i askem jif ya gogo jif ya i stretem bisnes ya blong hem. Jisas i gohed blong talem se: “?Be olsem wanem long God? ?Yufala i ting se ol man blong hem we hem i jusumaot olgeta, oli save krae long hem long dei mo long naet, be hem i no save stretem bisnes blong olgeta?” (Luk 18:1-7) Fasin blong stap prea oltaem i soemaot bilif blong yumi, i soemaot se yumi stap dipen long Jeova, i soemaot se yumi stap wantem stap kolosap long hem mo mekem prea. Ansa long prea blong yumi i stap long han blong hem.—Hibrus 11:6.
Ol Eksampel Blong Stap Kolosap Long Jeova
7. ?Olsem wanem yumi save folem bilif blong Ebel blong stap kolosap long Jeova?
7 Baebol i tokbaot plante prea we ol man blong God oli stap mekem i go long hem. Ol samting ya “we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Hop blong yumi i kam strong moa taem yumi tingbaot ol eksampel blong olgeta we oli stap kolosap long Jeova. God i akseptem sakrafaes we Ebel i mekem i go long hem, i no gat ripot we i talem se Ebel i prea, be yumi save se hem i askem Jeova blong hem i akseptem sakrafaes ya blong hem. Long Hibrus 11:4 i se: “From we Ebel i stap bilif long God, taswe hem i givim wan presen i go long God, we i gud moa, i winim presen blong Ken. From we Ebel i stap bilif long God, taswe God i givim gud nem long hem, se hem i wan stret man.” Ebel i bin save long promes blong God long Jenesis 3:15, be taem yumi skelem save ya blong Ebel wetem save we yumi kasem tede hem i kasem smol save nomo long promes ya blong God. Nating se i olsem, Ebel i yusum save ya we hem i gat. Taswe tede, sam long olgeta we oli jes intres long trutok blong God mo oli no gat plante save yet, be oli prea mo oli yusum save we oli gat olsem Ebel. Yes olgeta ya oli mekem wok wetem bilif blong olgeta.
8. ?Olsem wanem yumi save se Ebraham i stap kolosap long Jeova, mo wanem kwestin yumi mas askem long yumi wanwan?
8 Narafala man we i holemstrong long God hemia Ebraham, “stampa blong olgeta we oli . . . bilif long God.” (Rom 4:11) Tede yumi mas gat strong bilif bitim bifo, mo yumi mas prea wetem bilif olsem Ebraham i bin mekem. Jenesis 12:8 i talem se hem i wokem wan olta “long Jeova mo i singaot long nem blong Jeova.” (NW) Ebraham i save nem blong God mo hem i yusum taem hem i mekem prea. Mo bakegen hem i stap prea oltaem, mo i singaot “long nem blong Jeova we hem i God blong olwe.” (Jenesis 13:4; 21:33, NW) Ebraham i prea long God wetem bilif, from samting ya yumi save gud long hem. (Hibrus 11:17-19) Prea i givhan long Ebraham blong hem i stap harem gud tumas long hop blong Kingdom. ?Olsem wanem, yumi stap folem eksampel blong Ebraham blong yumi prea oltaem?
9. (a) ?From wanem ol prea blong Deved oli givhan long ol man blong God tede? (b) ?Wanem samting i save kamaot sipos yumi prea olsem Deved blong stap kolosap long Jeova?
9 Deved i nambawan long fasin blong stap prea oltaem, mo long ol Sam we hem i raetem, hem i soemaot prapa fasin blong prea. Eksampel, ol man blong God oli save prea blong God i sevem olgeta mo blong oli save stap gud (Ol Sam 3:7, 8; 60:5), blong Jeova i lidim olgeta (25:4, 5), blong Jeova i lukaot gud long olgeta (17:8), blong God i fogivim ol sin blong olgeta (25:7, 11, 18), blong God i mekem hat blong olgeta i klin (51:10). Taem Deved i harem nogud, hem i prea olsem se: “Masta, mi mi man blong wok blong yu, prea blong mi i stap go antap long yu nomo. Plis yu mekem mi mi glad.” (86:4) Yumi save prea olsem blong askem God blong mekem yumi save harem gud long hat blong yumi, yumi save se Jeova i wantem yumi blong harem gud long hop blong yumi. Deved i stap kolosap long Jeova mo i prea se: “Mi mi hang strong long yu long olgeta tingting blong mi, mo raethan blong yu i stap holem mi mi stap gud.” (63:8) ?Olsem wanem, bambae yumi stap kolosap long Jeova olsem we Deved i mekem? Sipos yumi mekem olsem bambae hem i sapotem yumi.
10. ?Wan taem Asaf man blong raetem Sam i gat wanem rong tingting, be biaen hem i luksave wanem?
10 Sipos yumi mas stap kolosap long Jeova, yumi no mas laekem nating ol fasin blong ol rabis man from we oli no stap kea long laef blong olgeta mo oli stap ronem ol flas samting blong wol ya. Asaf man blong raetem Sam, wan taem hem i harem olsem we hem i stap mekem wok blong Jeova blong nating nomo, from ol rabis man “oli gat plante samting.” Be yet hem i luksave se tingting ya blong hem i no stret, ol rabis man ya oli stap long “ol ples we i glis.” Hem i luksave se i no gat wan samting we i moa gud bitim fasin blong stap kolosap long Jeova, mo hem wan i talem long God i se: “Be oltaem mi mi stap kolosap long yu, mo yu stap holem mi long han blong mi. God, ol man we oli lego yu, mi mi savegud se bambae oli lus. . . . Taem we mi mi kam, mi stap kolosap long yu, hemia i gud tumas long mi. Yu yu sefples blong mi, yu yu stap blokem mi, mo oltaem bambae mi mi stap talemaot olgeta samting we yu yu mekem.” (Ol Sam 73:12, 13, 18, 23, 27, 28) Yumi no wantem gat fasin olsem ol man ya we oli no wari long laef nating, oli no gat hop, be yumi mekem olsem Asaf yumi stap kolosap long Jeova.
11. ?Olsem wanem eksampel ya blong Daniel blong stap kolosap long Jeova i gud long yumi, mo olsem wanem yumi save mekem olsem hem?
11 Daniel i stap prea oltaem, hem i holem strong fasin ya, nating se gavman i putum tabu long prea mo oli sakem hem i go insaed long ples we ol laeon oli stap long hem from we hem i no obei long oda ya. Be Jeova “i sanem enjel blong hem i satem maot blong ol laeon ya,” mo i sevem Daniel. (Daniel 6:7-10, 22, 27) Daniel i kasem bigfala blesing from we hem i stap prea oltaem. ?Olsem wanem long yumi, yumi stap prea oltaem, taem yumi fesem ol trabol long wok blong talemaot Kingdom?
Jisas i Soem Eksampel Long Yumi
12. (a) ?Long saed blong prea, wanem eksampel Jisas i givim taem hem i stat blong mekem wok blong hem, mo olsem wanem samting ya i save givhan long ol Kristin? (b) ?Prea we Jisas i tijim ol man blong hem long hem, i soemaot wanem long saed blong prea?
12 Long stat long wok blong Jisas long wol ya yumi luk se hem i mekem prea. Hem i prea taem hem i tekem baptaes mo samting ya i wan gudfala eksampel long olgeta we oli stap tekem baptaes tede. (Luk 3:21, 22) Yumi save prea long God blong givhan long yumi blong gohed long disisin we yumi gat taem yumi tekem baptaes long wora. Jisas i stap givhan long ol narafala man tu blong oli save prea long Jeova. Long wan taem, taem Jisas i stap long wan ples mo i stap prea, biaen wan long ol disaepol blong hem i talem long hem i se: “Masta, plis yu tijim mifala blong mifala i prea.” Nao Jisas i talem prea ya we yumi save gud se prea blong Masta. Long prea ya, hem i soemaot ol impoten samting blong prea from, olsem nem mo plan blong God se yumi mas putum olgeta fastaem long prea blong yumi. (Luk 11:1-4) Taswe yumi mas tingtinggud mo skelem gud ol prea blong yumi, mo no fogetem blong prea from “ol samting we oli impoten moa.” (Filipae 1:9, 10, NW) I tru se samtaem yumi mas prea from ol spesel nid no taem yumi kasem wan trabol. Ol Kristin oli save mekem olsem Jisas, oli save prea blong askem God blong givim paoa long olgeta blong oli mekem sam kaen wok we oli mas mekem no taem oli kasem ol traem, no taem oli stap long trabol. (Matyu 26:36-44) Ol prapa prea blong yumi wanwan oli mas soemaot evri samting long laef blong yumi.
13. ?Olsem wanem Jisas i soemaot se i impoten blong prea from ol narafala?
13 Jisas i soemaot gudfala eksampel ya se i impoten blong prea from ol narafala man. Hem i save se bambae ol man oli no laekem mo oli ronem ol disaepol blong hem, olsem we oli bin mekem long hem. (Jon 15:18-20; 1 Pita 5:9) Taswe hem i askem God i se: “Mi wantem blong yu blokem prapa man nogud ya Setan i no kam spolem olgeta, yu holem olgeta oli sef.” (Jon 17:9, 11, 15, 20) Jisas i save se wan bigfala traem bambae i kasem Pita taswe hem i talem long hem i se: “Mi mi prea finis from yu, blong bilif blong yu bambae i no save foldaon olgeta.” (Luk 22:32) I gud tumas tu sipos yumi stap prea oltaem from ol brata blong yumi. !Samting ya i soemaot se yumi stap tingbaot ol narafala, yumi no stap tingbaot ol prapa trabol no intres blong yumi nomo!—Filipae 2:4; Kolosi 1:9, 10.
14. ?Olsem wanem yumi save se Jisas i stap kolosap long Jeova long olgeta wok we hem i mekem long wol, mo olsem wanem yumi save soemaot fasin ya tu?
14 Jisas i stap prea oltaem, i stap kolosap long Jeova, taem hem i stap mekem minista wok blong hem. (Hibrus 5:7-10) Long Ol Wok 2:25-28, aposol Pita i talem tok we i stap long Sam 16:8 mo i talem se tok ya i stret long Masta Jisas Kraes, i se: “Hemia i olsem tok we Deved i talem bifo blong talemaot hem, i se ‘Mi mi stap luk Hae God. Hem i stap oltaem long fes blong mi. Mo from we hem i stap oltaem long raet saed blong mi, i no gat wan samting we bambae i save mekem mi mi seksek.” Yumi save mekem olsem tu. Yumi save prea long God blong hem i stap kolosap long yumi, mo yumi save soemaot se yumi stap trastem Jeova taem yumi stap tingbaot hem oltaem. (Lukluk Ol Sam 110:5; Aesea 41:10, 13.) Nao bambae yumi no save kasem plante trabol, from we Jeova bambae i givhan long yumi, mo bambae yumi no save seksek.
15. (a) ?Oltaem yumi mas prea from wanem? (b) ?Yumi mas lukaot gud olsem wanem long saed blong fasin tangkyu?
15 Neva yumi mas stop blong talem tangkyu long Jeova from ol gudfala samting we hem i stap mekem long yumi, yes “long gladhat blong hem.” Mo tu hem i givim Pikinini blong hem olsem wan ransom sakrafaes from ol sin blong yumi. (2 Korin 9:14, 15; Mak 10:45; Jon 3:16; Rom 8:32; 1 Jon 4:9, 10) Taswe long nem blong Jisas, “yufala i mas stap talem tangkyu long God, Papa blong yumi.” (Efesas 5:19, 20; Kolosi 4:2; 1 Tesalonaeka 5:18) Yumi mas lukaot gud se yumi no letem fasin tangkyu blong yumi i stop, from we maet yumi bisi tumas wetem ol samting we yumi no gat yet no wetem ol prapa trabol blong yumi.
Putum Ol Trabol Blong Yumi Long Jeova
16. ?Taem ol trabol oli kasem yumi, yumi mas mekem wanem?
16 Taem yumi prea oltaem samting ya i soemaot dip respek we yumi gat long hat blong yumi. Yumi harem gud taem yumi prea long God nating se yumi no kasem ansa long hem yet. Sipos i gat sam trabol long tingting blong yumi, yumi save stap kolosap long Jeova sipos yumi folem advaes ya se: “Yufala i mas putum ol trabol blong yufala long Hae God, nao hem bambae i blokem yufala, i sevem yufala.” (Ol Sam 55:22) Taem yumi putum ol trabol—ol wari, ol kros, ol fraet, mo ol narafala trabol blong yumi olsem long God mo yumi trastem hem fulwan, yumi kasem wan tingting we i kwaet, “pis we God i save putum, hem i bigfala moa, i bitim save blong yumi olgeta.”—Filipae 4:4, 7; Ol Sam 68:19; Mak 11:24; 1 Pita 5:7.
17. ?Olsem wanem yumi save kasem pis blong God?
17 ?Olsem wanem, pis ya blong God i kam wantaem nomo? Maet yumi save harem gud kwiktaem, be wanem Jisas i talem long saed blong prea from tabu speret i tru tu, i se: “Taem yufala i wantem wan samting, yufala i mas askem, nao bambae yufala i save kasem, mo yufala i mas lukaot, nao bambae yufala i save faenem, mo yufala i mas kilkilim doa nao bambae doa i save open.” (Luk 11:9-13) Tabu speret i mekem se yumi save sakemaot ol wari blong yumi, taswe oltaem yumi mas askem pis blong God mo askem hem blong i givhan long yumi long ol trabol blong yumi. Yumi save gud se taem yumi prea oltaem, bambae yumi kasem help we yumi wantem mo tingting we i kwaet gud.
18. ?Jeova i mekem wanem long yumi taem yumi no save olsem wanem blong prea samtaem?
18 ?Olsem wanem sipos yumi no save wanem yumi mas prea from? Samtaem yumi no save talemaot ol trabol we oli stap long tingting blong yumi from we yumi no save gud long trabol ya, no yumi no save gud olsem wanem blong talemaot long Jeova. Taem olsem, tabu speret bambae i save givhan long yumi. Pol i bin raetem se: “Tabu Speret tu i stap givhan long yumi, we yumi no gat paoa, from we yumi no save wanem fasin i stret blong yumi folem blong prea. Tabu Speret ya, hem nomo i stap prea long God oltaem from yumi, hem i stap krae we i no gat ol tok we i naf blong talem tok blong hem.” (Rom 8:26) ?Olsem wanem samting ya i kamaot? Long Tok blong God i gat ol profet tok mo ol prea we oli stret long ol trabol blong yumi. I olsem we God i letem ol samting ya oli toktok long saed blong yumi. Hem i akseptem ol samting ya olsem we oli prapa prea blong yumi sipos yumi save ol mining blong olgeta, mo i mekem i kamtru long yumi.
Prea Mo Hop Bambae Tufala i No Save Finis
19. ?From wanem fasin blong prea mo hop i save gohed blong olwe?
19 Fasin blong prea long Papa blong yumi long heven, bambae hem i gohed olsem blong olwe, speseli long saed blong fasin tangkyu long nyufala wol mo olgeta blesing blong hem. (Aesea 65:24; Revelesen 21:5) Bambae yumi gohed oltaem blong harem gud long hop tu, from hop i save stap blong olwe. (Lukluk 1 Korin 13:13.) I gat ol nyufala samting we Jeova bambae i mekem afta long en blong Sabat dei blong hem we hem i spel long saed blong wol ya, ol gudfala samting we yumi no save tingbaot naoia oli save kamaot. (Jenesis 2:2, 3) Oltaem nomo gogo i no save finis, bambae hem i mekem ol man blong hem oli sek long ol gudfala samting we i mekem long olgeta, mo fyuja blong olgeta i gud tumas taem oli stap mekem wil blong hem.
20. ?Tingting blong yumi i mas strong blong mekem wanem, mo from wanem?
20 From gudfala hop we i stap long fored blong yumi, i gud yumi evriwan i stap prea oltaem blong stap kolosap long Jeova. Neva yumi mas stop blong talem tangkyu long Papa blong yumi long heven from ol gudfala blesing we i stap givim long yumi. Long prapa taem blong hem, ol samting we yumi stap putum tingting blong yumi i strong long hem bambae oli kamtru, bambae i gud moa bitim wanem we yumi stap tingbaot. From Jeova i save “mekem antap moa long olgeta samting we yumi stap askem long hem, mo we yumi stap tingbaot.” (Efesas 3:20) !From samting ya oltaem nomo yumi mas presem, givim ona mo tangkyu long God ya blong yumi Jeova, we i “stap harem prea”!
[Futnot]
a Folem Webster’s New Dictionary of Synonyms, tok ya “Oltaem kolosap plante taem i minim wan gudfala fasin we wan man i gat, taem tingting blong hem i no foldaon from we hem i no kasem mak, i no moa bilif strong, no i kasem hadtaem, mo hem i holemstrong go kasem en.”
Tingtingbak
◻ ?From wanem yumi mas stap prea oltaem?
◻ ?Yumi lanem wanem samting long ol olfala bifo long saed blong prea?
◻ ?Eksampel blong Jisas long saed blong prea i tijim yumi long wanem?
◻ ?Olsem wanem yumi save putum ol hevi baden blong yumi long Jeova, mo wanem frut i save kamaot from?
[Tok Blong Pija Long Pej 17]
Daniel i stap prea oltaem nating se oli agensem hem mo oli talem se bambae oli sakem hem i go long ples blong ol laeon