Jeova i “Jajem Olgeta Man Blong Wol” i Sem Mak Nomo
“Taem God i jajem man, hem i save folem sem fasin nomo blong jajem olgeta man evriwan.”—1 PITA 1:17.
1, 2. (a) ?From wanem yumi mas fraet mo yumi mas haremgud taem yumi tingbaot Jeova olsem wan bigfala Jaj? (b) ?Wanem wok ol man blong hem long wol oli stap mekem, long jajmen we Jeova i mekem agensem ol nesen?
JEOVA i bigfala Man blong “jajem olgeta man blong wol.” (Jenesis 18:25) From we Jeova i Hae God blong heven mo wol, i stret nomo blong hem i jajem ol man we hem i wokem olgeta. Hemia samting blong mekem man i fraet mo semtaem hem i givim spel long tingting. Moses i tokbaot tufala defren fasin ya blong Jeova i se: “Jeova, we i God blong yufala, hem i God blong ol god mo Masta blong ol masta. Hem i God ya we i hae, i gat bigfala paoa mo i save mekem man i fraet. Hem i mekem i stret nomo long olgeta man, mo hem i no save tekem doti mane. Hem i mekem i stret long boe we i no gat papa mo wido mo hem i kea long ol man blong narafala kantri blong givim bred mo klos long olgeta.”—Dutronome 10:17, 18.
2 !Hemia wan stret fasin ya! Wan bigfala, strongfala, God we man i save fraet long hem, be hem i stap mekem i stret nomo long olgeta man mo hem i givhan long ol pikinini we oli no gat papa mo mama, ol wido, mo ol man we oli stap long kantri we i no blong olgeta. ?I gat man we i wantem wan Jaj we i gat fasin blong lav bitim Jeova? Blong soemaot se hem i gat wan bisnes blong stretem wetem olgeta nesen long wol blong Setan, Jeova i singaot long ol man blong hem long wol blong oli wetnes blong hem. (Aesea 34:8; 43:9-12) Hem i no dipen long tok blong olgeta blong oli pruvum se hem i God mo blong soemaot raet blong hem olsem Hae Rula. Hem i givim wan nambawan wok long ol wetnes blong hem blong talemaot long ol man se oli luksave hae rul blong hem. Ol wetnes blong hem oli stap aninit long stretfala hae rul blong hem, mo taem oli mekem wok blong prij long pablik, oli givhan long ol narafala man blong olgeta tu oli save stap aninit long paoa blong Bigfala Jaj.
Rod Blong Jeova Blong Jajem Ol Man
3. ?Rod we Jeova i yusum blong jajem ol man i olsem wanem, mo olsem wanem ol samting ya i kamaot long saed blong Adam mo Iv?
3 Stat long histri blong ol man, Jeova nomo i stap jajem ol man we oli brekem loa blong hem. Eksampel blong hem blong stretem ol bisnes olsem i givhan long ol man blong hem we biaen bambae oli gat wok blong jajem ol bisnes long medel blong ol man blong hem. (Ol Sam 77:11, 12) Rod blong hem blong jajem ol man maet yumi save tokbaot olsem se: hem i strong long ol man sipos i nidim blong mekem olsem, mo hem i sore long ol man sipos i stret blong mekem olsem. Long saed blong Adam mo Iv, tufala faswan man we tufala i stretgud olgeta, tufala i jusum blong agensem hem, taswe i no nid blong God i sore long tufala. Jeova i jajem tufala se tufala i mas ded. Be hem i sore long ol pikinini blong tufala. Jeova i tekem taem blong jajem tufala i ded, i letem Adam mo Iv tufala i gat ol pikinini. Hem i givim hop blong sevem laen blong tufala long sin mo ded.—Jenesis 3:15; Rom 8:20, 21.
4. ?Jeova i mekem wanem long Ken, mo from wanem samting ya i impoten?
4 I gud blong save samting we Jeova i mekem long Ken from we hem i faswan taem we samting olsem i kamaot long laen blong Adam mo Iv we oli no stretgud olgeta, hem i olsem “slef nomo we fasin blong sin i masta” blong hem. (Rom 7:14) ?Samting we Jeova i mekem long Ken i defren long samting we hem i mekem long papa mama blong hem? ?Samting ya i save givhan long ol Kristin man blong lukaot long kongregesen tede? Yumi traem luk. Taem Jeova i luksave rong tingting blong Ken taem we hem i no akseptem sakrifaes blong hem, hem i givim woning long hem. Wan olfala proveb i se: ‘Fasin blong blokem trabol i gud moa bitim fasin blong winim trabol.’ Jeova i gohed olsem taem hem i givim woning long Ken blong hem i no letem rabis fasin blong sin i masta long hem. Hem i traehad blong givhan long hem blong “winim hem.” (Jenesis 4:5-7) Hemia i fastaem we God i singaot long wan man we i no stretgud olgeta blong tanem tingting blong hem long rabis fasin blong hem. Afta we Ken i soemaot se hem i no moa wantem tanem tingting blong hem long rabis fasin blong hem mo i gohed blong kilim brata blong hem, Jeova i jajem hem se hem i mas goaot, hem i no mekem i strong tumas long hem taem hem i talem se ol narafala man bambae oli no save kilim hem.—Jenesis 4:8-15.
5, 6. (a) ?Jeova i mekem wanem long ol man we oli laef bifo long Bigfala Wora we i ron? (b) ?Jeova i mekem wanem bifo we hem i jajem olgeta man we oli stap long Sodom mo Gomora?
5 Bifo we Bigfala Wora i ron, taem “[Jeova, NW] i luk samting ya, tingting blong hem i kam nogud.” (Jenesis 6:5, 6) Hem “i tingbaot we hem i bin mekem olgeta” taswe hem i sore from we bifo Bigfala Wora i ron plante man oli no yusumgud fasin fri blong olgeta blong jusum ol samting we oli stap mekem mo hem i mas jajem olgeta from. Be hem i givim inaf woning long olgeta, hem i yusum Noa we long plante yia hem i “wan prija blong talemaot stret fasin.” Biaen, Jeova i no moa gat risen blong ‘letem ol man ya we oli no obei long hem oli go fri.’—2 Pita 2:5.
6 Mo tu Jeova i mas jajem ol rabis fasin blong ol man Sodom mo Gomora. Be makem olsem wanem hem i mekem samting ya. Hem i harem “ol poen we i nogud olgeta, we ol man oli stap talemaot agens” long ol rabis fasin blong ol man ya nating se stret man ya Lot nomo i stap prea from. (Jenesis 18:20; 2 Pita 2:7, 8) Bifo hem i mekem wan samting, hem i “godaon long tufala taon ya” blong lukluk ol poen ya we hem i harem blong faenemaot sipos oli tru no no gat, hem i yusum ol enjel blong hem blong mekem samting ya. (Jenesis 18:21, 22; 19:1) Mo tu hem i tekem taem blong toktok wetem Ebraham blong soemaot se bambae hem i mekem jajmen ya long stret fasin nomo.—Jenesis 18:23-32.
7. ?Wanem samting ol elda long ol kot komiti oli save lanem folem eksampel blong Jeova blong jajem man?
7 ?Ol elda tede oli save lanem wanem samting from ol eksampel ya? Long saed blong Adam mo Iv, Jeova i soemaot lav mo i tingbaot ol man we oli no gat fol olsem tufala ya. Hem i sore long ol pikinini blong Adam mo Iv. Long saed blong Ken, Jeova i luksave finis trabol we Ken i stap long hem mo i toktok wetem hem, hem i traem talem long Ken blong bambae hem i no mekem sin. Nating se hem i ronemaot hem, be afta, Jeova i tingbaot Ken. Mo tu Jeova i jajem ol man we oli laef bifo long Bigfala Wora afta we hem i stap soemaot longfala tingting long olgeta. Taem Jeova i luk se ol man oli no wantem jenisim rabis fasin blong olgeta, “tingting blong hem i kam nogud.” Hem i sore we ol man oli agensem ol stret rul blong hem mo hem i mas jajem olgeta from. (Jenesis 6:6; lukluk Esikel 18:31; 2 Pita 3:9.) Long saed blong Sodom mo Gomora, Jeova i stretem bisnes ya afta we hem i jekem ol samting we oli kamaot long tufala taon ya blong luk sipos oli tru no no gat. !Hemia ol gudfala eksampel blong ol man we oli stap jajem ol bisnes blong ol narafala man blong stretem olgeta oli mas folem!
Ol Jaj Long Taem Olsem Blong Ebraham
8. ?Wanem stampa loa blong Jeova we ol man blong bifo oli save long hem?
8 Nating se bifo long taem ya i no gat loa we oli raetemdaon, ol man long taem olsem blong Ebraham oli savegud ol stampa loa blong Jeova, mo ol man blong God oli mas folem ol loa ya. (Lukluk Jenesis 26:5.) Samting we i kamaot long Iden i soemaot se man i mas obei mo stap aninit long hae rul blong Jeova. Long saed blong Ken, samting ya i soemaot we Jeova i no laekem fasin blong kilim man i ded. I no longtaem afta long Bigfala Wora we i ron, God i givim loa long ol man long saed blong laef i tabu, fasin blong kilim ded man, mo panis we ol man oli mas kasem from, mo loa long saed blong kakae blad. (Jenesis 9:3-6) Store blong Ebraham, Sera, mo Abimelek king blong Gerara kolosap long Gasa i soemaot se Jeova i no laekem nating fasin blong man i slip wetem woman blong narafala man.—Jenesis 20:1-7.
9, 10. ?Wanem eksampel i soemaot se i gat rod blong jajem ol bisnes long taem blong bifo?
9 Long taem ya ol hed blong famle oli olsem ol jaj mo oli stap stretem ol trabol. Jeova i tokbaot Ebraham, i se: “Mi mi jusumaot hem blong i save talem strong long ol pikinini blong hem mo long olgeta we bambae oli kamaot biaen long hem, blong oli obei long mi, mo blong oli mekem ol fasin nomo we oli stret mo oli gud. Mo sipos olgeta ya oli mekem olsem, bambae mi mi mekem olgeta samting ya we mi promes finis blong mekem long hem.” (Jenesis 18:19) Ebraham i no stap tingbaot hem wan mo hem i gat fasin luksave taem hem i stretem rao we i kamaot long ol man blong lukaot sipsip blong hem mo olgeta we oli stap lukaot long sipsip blong Lot. (Jenesis 13:7-11) Juda hem i olsem hed mo jaj, hem i tok strong long woman blong pikinini blong hem Tamara blong oli stonem hem i ded mo bonem hem, hem i ting se woman ya i stap slip wetem narafala man. (Jenesis 38:11, 24; lukluk Josua 7:25.) Be taem hem i faenemaot ol trufala storeyan blong bisnes ya, hem i talem se woman ya i mekem i stret bitim hem. (Jenesis 38:25, 26) !Hem i impoten blong faenemaot ol trufala store blong wan bisnes bifo we yumi mekem wan stret disisin!
10 Buk blong Job i soemaot fasin blong mekem kot blong jajem ol samting mo i soemaot se ol man oli wantem jajmen we i stret nomo long evri man. (Job 13:8, 10; 31:11; 32:21) Job i stap tingbaot taem ya we hem i stap sidaon long get blong taon blong jajem ol bisnes blong ol man mo i lukaotgud long ol wido mo ol pikinini we oli no gat papa. (Job 29:7-16) Taswe, long taem blong ol man bifo olsem Ebraham, “ol lida” blong ol man ya oli wok olsem ol jaj long medel blong ol laen blong Ebraham mo tu hemia bifo we oli wokbaot long drae ples mo God i givim loa long olgeta olsem nesen blong Isrel. (Eksodas 3:16, 18) Mo tu kontrak blong Loa, Moses i givim long “ol lida” no ol olfala, blong Isrel, blong oli talemaot long ol man.—Eksodas 19:3-7.
Rod We Ol Man Isrel Oli Yusum Blong Jajem Ol Bisnes
11, 12. ?Long saed blong tu man we i save Baebol, wanem samting i soemaot se rod blong ol man Isrel blong stretem bisnes i defren long ol narafala nesen?
11 Fasin blong mekem jajmen long Isrel i defren long fasin we ol narafala kantri raonabaot long hem oli stap mekem. Loa blong kantri mo ol loa we oli agensem fasin blong brekem loa tufala i sem mak nomo. Tufala evriwan i joen long ol loa blong fasin mo wosip. Sipos wan man i mekem nogud long fren blong hem, hem i mekem i nogud long Jeova. Long buk blong hem (The People and the Faith of the Bible) André Chouraqui i talem se: “Fasin blong jajem ol bisnes blong ol man Hibru i defren long ol kantri raonabaot long olgeta, i no long saed blong loa mo panis we bambae oli kasem taem oli brekem loa ya be tingting no mining blong ol loa tu. . . . Loa ya Torah i no defren long fasin blong laef blong ol man long evri dei. Hem i kontrolem ol samting we man i mekem mo fasin blong laef blong ol man, oli save haremgud from no oli save kasem trabol from. . . . Long Isrel . . . i hadwok blong luksave wok blong ol kot long taon ya. Wok blong kot i haed long fasin blong laef blong olgeta, mo oli wok tugeta from wan samting nomo, blong mekem wil blong God ya we i stap laef.”
12 Samting ya i mekem wok blong mekem kot long Isrel blong stretem ol bisnes i nambawan moa long ol nesen raonabaot long hem. Wan studen blong Baebol, Roland de Vaux i raetem se: “Loa blong ol man Isrel i defren long ol loa blong ol man long Medel Is nating we i luk olsem se oli sem mak, ol tok blong hem oli defren long ‘ol loa’ mo ol haf long ol ‘loa ya’ blong olgeta. Loa blong ol man Isrel i fasin blong wosip. . . . I no gat loa long Medel Is i sem mak long loa blong ol man Isrel, we i talem se God nao i stampa blong hem. Sipos hem i gat ol loa, mo i meksemap ol loa ya, wetem ol rul long fasin blong ol man mo ol rul long fasin blong wosip, hemia from we hem i kavremap olgeta samting we i stap long Loa blong God, mo from we Loa ya i lukaotgud long fasin blong ol man wetem ol narafala man mo wetem God.” Taswe Moses i save askem se: “?Wanem bigfala nesen i stap we i gat ol loa we i stret mo i save jajem ol bisnes olsem loa ya we mi mi putum long fored blong yufala tede?”—Dutronome 4:8.
Ol Jaj Long Isrel
13. ?Olsem wanem Moses i wan gudfala eksampel blong ol elda tede?
13 From nambawan fasin ya blong jajem ol bisnes long Isrel bifo, ?hu man nao i save mekem wok olsem wan jaj? Baebol i talem se faswan jaj long Isrel bifo, hemia: “Man ya Moses, tingting blong hem i stap daon moa i winim ol narafala man long wol long taem blong hem.” (Namba 12:3) Hem i no trastem hem wan i bitim mak. (Eksodas 4:10) Nating se hem i mas jajem ol man, samtaem hem i mas stanap long fes blong God blong talem ol samting we ol man oli wantem, mo bambae i askem God blong fogivim olgeta mo tu hem i rere blong givim laef blong hem from olgeta. (Eksodas 32:11, 30-32) Hem i talem se: “Tok blong mi bambae i foldaon olsem wora blong moning, olsem smosmol ren we i foldaon long gras mo tu olsem bigfala ren we i foldaon long ol tri.” (Dutronome 32:2) Moses i no dipen long waes blong hem nomo blong jajem ol man, hem i talem se: “Mo taem tu man i gat trabol, tufala i save tekem trabol ya i kam long mi, blong mi jajem, se hu long tufala i mekem i no stret. Long fasin ya mi stap mekem olgeta oli save ol loa blong God wetem ol rul we hem i mekem.” (Eksodas 18:16) Taem hem i no save olsem wanem blong stretem wan bisnes, hem i putum bisnes ya long han blong Jeova. (Namba 9:6-8; 15:32-36; 27:1-11) Moses hem i wan nambawan eksampel long ol elda tede we oli ‘lukaot long ol sipsip blong God’ mo oli jajem ol bisnes blong olgeta. (Ol Wok 20:28) I gud we fasin frengud blong olgeta wetem ol brata sista i olsem “smosmol ren we i foldaon long gras.”
14. ?Taem Moses i jusumaot ol jaj long Isrel, wanem mak long saed blong speret we ol man ya oli mas kasem?
14 Afta we taem i pas Moses i no moa naf blong jajem ol bisnes blong ol man hem wan. (Eksodas 18:13, 18) Hem i agri long advaes blong palika blong hem blong tekem sam moa man blong givhan long hem. ?Nao, wanem kaen man hem i mas jusum? Yumi ridim se: “Yu jusumaot sam gudfala man, yu putumap olgeta blong oli lida blong ol man ya. Sam bambae oli lida blong wan taosen man, mo sam bambae oli lida blong wan handred man, mo sam bambae oli lida blong fefte man, mo sam bambae oli lida blong ten man. Olgeta ya bambae oli mas man blong ona long God, mo oli mas man we ol man oli trastem olgeta. Mo bambae oli mas man we oli no save tekem pei blong haedem rong blong man. Olgeta ya nao bambae oli stap jajem ol man, mo hemia bambae i wok blong olgeta. Ol trabol nomo we oli no naf blong stretem, bambae oli save tekem i kam long yu blong yu stretem. Be ol smosmol trabol, olgeta nomo bambae oli save stretem.”—Eksodas 18:21-26.
15. ?Wanem mak ol jaj blong Isrel oli mas kasem?
15 I luk olsem yia blong man i no rod ya nomo we oli stanap long hem blong jusum ol man blong mekem wok olsem ol jaj. Moses i talem se: “Tekem ol waes man, ol man we oli gat fasin luksave mo ol man we oli gat ekspiryens aot long ol laen blong yufala, blong bambae mi save putumap olgeta olsem lida blong yufala.” (Dutronome 1:13) Moses i savegud tok blong yangfala man ya Elaehu we i bin talem plante yia bifo, i se: “I no se olgeta nomo we oli gat plante yia oli waes, no olgeta we oli olfala oli save luksave fasin blong stretem man.” (Job 32:9) Taswe, ol man ya we oli makemaot blong mekem wok ya oli mas man we “oli gat ekspiryens.” Be antap long olgeta samting ya, oli mas naf blong mekem wok, oli fraetgud long God, ol man oli save trastem olgeta, oli no laekem winim sam samting long narafala man mo ol man ya oli waes mo oli gat fasin blong luksave. I klia se “ol lida” mo “ol jaj” we Josua 23:2 mo 24:1 i tokbaot oli sem mak long “ol olfala man” we ol vas ya oli tokbaot, oli bin jusumaot olgeta long medel blong ol man.—Lukluk Insight on the Scriptures, Volyum 2, pej 549.
Jajem Ol Man Long Stret Fasin
16. ?Tede yumi mas makem wanem tok we Moses i talem long ol nyufala jaj we hem i makemaot?
16 Moses i talem long ol man we oli makemaot olgeta olsem ol jaj, i se: “Mi bin givim oda long ol jaj blong yufala long taem ya, se, ‘Taem yufala i harem wan trabol long medel blong ol brata blong yufala, yufala i mas jajem bisnes ya blong man wetem brata blong hem no wetem wan man blong narafala kantri we i stap wetem yufala long stret fasin. Yu mas mekem i sem mak nomo long evri man taem yu jajem olgeta. Yu mas harem man we i no gat nem mo wan man we i gat nem. Yu no mas fraet long man, from we fasin ya blong jajem man hem i blong God. Sipos i strong tumas blong stretem wan bisnes, yu mas givim long mi [Moses], mo mi mas luk.’”—Dutronome 1:16, 17.
17. ?King Jeosafat i makemaot hu blong oli kam jaj, mo hem i givim wanem woning?
17 Tru ya, wan bisnes we oli no save stretem oli save givim nomo long Moses long taem ya we hem i stap laef yet. Biaen oli mekem ol rod blong talem ol bisnes we oli strong blong stretem i go long ol pris, ol Livaet, mo speseli long ol man we oli makemaot olgeta olsem ol jaj. (Dutronome 17:8-12; 1 Kronikel 23:1-4; 2 Kronikel 19:5, 8) King Jeosafat we i makemaot ol jaj long ol taon blong Juda, i se: “Lukaotgud long samting we yufala i stap mekem, from we wok ya blong jajem ol man i no blong ol man be hem i blong Jeova . . . Yufala i mas mekem wok ya we yufala i fraetgud long Jeova mo yufala i stap tru long hem mo wetem fulhat blong yufala. Long evri bisnes we bambae ol brata blong yufala long taon blong olgeta oli talemaot long yufala, . . . yufala i mas givim woning long olgeta se oli no mas mekem i rong agensem Jeova mo trabol bambae i no save kasem yufala mo ol brata blong yufala. Hemia samting we yufala i mas mekem blong bambae yufala i no save gat fol.”—2 Kronikel 19:6-10.
18. (a) ?Wanem sam long ol rul we ol jaj long Isrel oli mas folem? (b) ?Ol jaj oli mas tingbaot wanem, mo wanem vas long Baebol i soemaot frut we oli save kasem sipos oli fogetem?
18 Sam long ol rul ya we ol jaj long Isrel oli mas mekem, oli olsem ya: oli mas jajem ol rijman mo ol puaman i sem mak nomo (Eksodas 23:3, 6; Levitikas 19:15), oli no mas mekem i defren long ol defren kaen man (Dutronome 1:17), oli no mas tekem doti mane. (Dutronome 16:18-20) Oltaem ol jaj oli mas tingbaot se ol man ya we oli stap jajem olgeta oli sipsip blong Jeova. (Ol Sam 100:3) Wan long olgeta risen from wanem Jeova i sakemaot Isrel se ol pris mo ol man blong lukaot olsem man blong lukaot sipsip oli no jajem ol man long stret fasin mo oli strong tumas long olgeta.—Jeremaea 22:3, 5, 25; 23:1, 2; Esikel 34:1-4; Malakae 2:8, 9.
19. ?From wanem i impoten blong jekemap ol mak blong Jeova blong jajem ol man bifo, mo wanem samting yumi save tingbaot long nekis stadi?
19 Jeova i no jenis. (Malakae 3:6) Taem yumi tingtingbak long rod ya we wok blong ol jaj long Isrel oli mas folem mo tingting we Jeova i gat taem oli no mekem long stret fasin i mas mekem ol elda tede oli tingtinggud long wok we oli stap mekem taem oli sidaon blong mekem disisin blong stretem ol trabol. Eksampel blong Jeova olsem wan Jaj, mo rod ya blong jajem man long Isrel we hem i stanemap, oli givim ol rul we Kristin kongregesen i save folem blong lukaotgud long fasin blong jajem man insaed long kongregesen. Bambae yumi luk samting ya long nekis stadi.
Ol Kwestin Blong Tingtingbak
◻ ?Yumi save talem wanem long rod blong Jeova blong jajem man?
◻ ?Taem Jeova i toktok wetem Ken mo ol man we oli laef bifo Bigfala Wora i ron, samting ya i soemaot wanem?
◻ ?Hu oli wok olsem ol jaj long taem bifo, mo olsem wanem?
◻ ?Wanem samting i makem se rod blong ol man Isrel blong jajem ol man blong stretem bisnes i defren long ol narafala nesen?
◻ ?Wanem kaen man oli makemaot olgeta blong oli mekem wok olsem jaj long Isrel, mo wanem rul oli mas folem?
[Tok Blong Pija Long Pej 10]
Long taem bifo mo long taem blong Isrel, ol olfala man we oli jusumaot olgeta oli lukaot fasin blong stretem ol bisnes long get blong taon