Yu Save Haremgud Long Taem Blong Trabol

?WANEM tingting yumi mas gat taem yumi harem nogud? ?Sipos yumi givim laef blong yumi long Jeova finis, yu ting se hem i no stret we yumi save harem nogud, from yumi gat wan gudfala hop mo yumi gat plante samting long saed blong speret? ?Ol filing olsem i min se yumi no stret long saed blong speret blong mekem wok blong God?

Disaepol Jemes i raetem se: “Elaeja i wan man olsem yumi nomo.” (Jemes 5:17) Nating se God i stap yusum Elaeja long wan bigfala fasin, profet ya we i stap tru long God i save harem nogud long tingting blong hem. Long wan taem Elaeja i talem se, “O Jeova, !naoia i naf! Tekemaot laef blong mi, from we mi mi no stret olsem ol bubu blong mi bifo.” (1 King 19:⁠4) Job, man ya blong holemstrong bilif, Ana, we i stap tru long God, mo ol narafala man blong wok blong Jeova we oli stap tru long hem oli harem nogud long tingting blong olgeta samtaem. Mo tu Deved man blong raetem Ol Sam, mo man blong fasgud long God, i prea se: “Plis yu tekemaot ol samting we i stap mekem mi mi wari tumas, mo yu sevem mi long ol trabol blong mi.”​—⁠Ol Sam 25:⁠17.

Taem Jeova i stap yusum ol man long wok blong hem, samting ya i no mekem se oli fri olgeta long ol trabol. Oli gat ol trabol long saed blong bodi mo filing olsem ol narafala man nomo mo oli save harem nogud long tingting blong olgeta taem oli kasem traem. (Ol Wok 14:15) Be, ol man blong God oli gat rod blong winim ol wari blong olgeta bitim ol narafala man. Yumi luk sam eksampel long Baebol blong faenemaot wanem samting i givhan long olgeta blong winim tingting we i foldaon mo ol nogud filing we oli kamaot from ol trabol.

Aposol We Tingting Blong Hem i Foldaon i Haremgud

Aposol Pol i save se fasin blong harem nogud long tingting i olsem wanem. Hem i talem se: “Taem mifala i kamtru long Masedonia, be mifala i no gat spel. . . . Ol man oli wantem rao long mifala, mo mifala tu i fraet. Be God i save leftemap tingting blong man we i stap harem nogud. Mo hem i leftemap tingting blong mifala, from we hem i tekem Taetas i kamtru long mifala.” (2 Korin 7:​5, 6) Pol i harem nogud long tingting blong hem from ol trabol we oli kamaot long taem ya. I gat ‘ol man we oli wantem rao’​—⁠mo ol man oli stap ronem olgeta blong kilim olgeta. (Lukluk 2 Korin 1:⁠8.) Mo tu, oli “fraet” i min se oli wari long saed blong ol kongregesen, olsem kongregesen we i stap long Korin.

Long sam manis bifo, Pol i bin raetem faswan leta blong hem i go long ol Kristin long Korin. Long leta ya blong hem, hem i tok strong long olgeta from sam nogud fasin insaed long kongregesen mo i klia se hem i stap wari long tingting we ol man Korin oli save gat taem oli luk leta blong hem. Be, Pol i haremgud taem Taetas i kamaot long Korin i karem gudfala ripot long saed blong tingting blong ol Kristin long Korin. Sem mak, Jeova i save yusum wan long ol man blong hem tede blong talem sam gud nyus long yumi mo i save kwaetem yumi taem yumi harem nogud long tingting blong yumi.

Wanem Tingting Yumi Mas Gat Long Ol Wok We God i Givim

Sam Kristin oli harem nogud long tingting blong olgeta from minista wok blong olgeta. Yes, sam long ol man blong Jeova oli ting se ol wok we God i givim long olgeta bambae oli strong tumas blong mekem. Eksampel, Moses i harem se hem i no naf blong go long nem blong God blong givhan long ol man Isrel we oli stap long Ijip. Mo tu, hem i talem se hem i no save toktokgud. (Eksodas 3:11; 4:10) Be taem hem i trastem God mo i tekem Eron olsem man we bambae i talemaot ol tok blong hem, Moses i stat blong mekem wok ya.

Biaen Moses i no moa dipen long Eron blong talem tok blong hem. Sem mak, fastaem sam man oli faenem i had blong mekem Kristin minista wok, be oli lanem mo biaen oli gat gudhan blong talemaot tok blong God. Eksampel, plante yangfala Wetnes blong Jeova oli stap gruap nao oli save prij fultaem olsem ol paenia mo ol misinari. I gud tumas blong save se oltaem ol Kristin minista oli save dipen long Jeova blong oli kam naf mo oli gat paoa blong mekem ol wok ya we hem i givim long olgeta.​—⁠Sekaraea 4:6; 2 Korin 2:​14-17; Filipae 4:⁠13.

Haremgud Taem Tingting i Foldaon From Sore

Maet tingting blong yumi i save foldaon from we yumi stap tingtingbak se yumi no mekem plante long wok blong Jeova. Wan brata we i no moa prij long plante yia i stat blong joen long minista wok bakegen. Be i no longtaem biaen, hem i sik bigwan mo hem i mas stap oltaem nomo long bed. Brata ya we tingting blong hem i foldaon bigwan i se: “Bifo, taem mi mi naf blong wok, mi ronwe long wok ya. Naoia, taem mi wantem mekem wok ya, sik i kasem mi mo mi no naf blong mekem.”

Ating i waes naoia blong yumi traehad blong mekem wok bitim we yumi stap mekem tingting blong yumi i harem nogud long samting we i kamaot bifo finis. Ol brata blong Jisas, hemia Jemes mo Jud tufala i no kam man blong bilif kam kasem afta long ded mo laef bakegen blong Jisas. Maet oli sore we oli no kam man blong bilif bifo, be samting ya i no blokem olgeta blong oli kam man blong God mo blong oli raetem Baebol tu.

Yu No Mas Fogetem Prea

Taem ol man blong God oli harem nogud long tingting blong olgeta, oli mas prea wetem ful hat blong olgeta. Baebol i tokbaot plante prea we ol man oli mekem taem oli harem nogud long tingting blong olgeta. (1 Samuel 1:​4-20; Ol Sam 42:⁠8) Be maet sam man oli save ting se: ‘Mi no save prea from we mi harem nogud tumas long tingting blong mi.’ Traem tingbaot Jona. Taem hem i stap long bel blong fis, hem i se: “Taem mi mi harem nogud long laef blong mi, mi stap tingbaot Jeova nomo. Nao mi prea long yu, mi prea long yu long tabu tempel blong yu. . . . Voes blong mi blong talem tangkyu long yu bambae i olsem wan sakrafaes long yu. Wanem samting mi mi promes long yu blong mekem, bambae mi mekem. Jeova nomo i stap sevem ol man.” (Jona 2:​4-9) Yes, Jona i prea, mo God i mekem hem i haremgud mo i sevem hem.

Wan sista long Sweden we i bin wok olsem paenia long plante yia finis, tingting blong hem i foldaon kwiktaem nomo mo hem i harem se hem i les, nating se hem i kasem gudfala frut long minista wok blong hem. Hem i prea long Jeova blong talemaot tingting blong hem. Sam dei biaen, wan brata long Watch Tower Sosaete brenj ofis i telefon long hem. Hem i askem sista ya sipos hem i save go long brenj blong givhan long wan dei long wan wik taem oli stap bildim Betel blong i kam bigwan moa. Biaen sista ya i talem se: “Laef long Betel mo jans ya we mi gat blong luk wok blong mekem Betel i kam bigwan mo taem mi stap givhan long wok ya tu, samting ya i givim moa paoa we mi nidim.”

Sipos yumi harem nogud long tingting blong yumi, i gud blong tingbaot se prea i wan rod blong agensem tingting ya. (Kolosi 4:⁠2) Taem Jeova i ansa long ol prea blong yumi, maet hem i save lidim yumi blong mekem moa long wok blong hem, no maet hem i save blesem minista wok blong yumi blong karem plante moa frut. (1 Korin 16:​8, 9) Long olgeta samting we yumi mekem, “blesing blong Jeova, hemia nao samting we i mekem man i rij. Mo hem i no givim soa wetem.” (Proveb 10:22) Samting ya i leftemap tingting blong yumi.

?Tingting i Harem Nogud From Bilif i Hafhaf?

Samtaem, bilif blong sam man blong Jeova i hafhaf. Sipos samting ya i hapen long yumi, yumi no mas ting se God i no moa laekem yumi. Jisas i no sakemaot aposol Tomas from we hem i no bilif taem hem i harem se Masta blong hem i laef bakegen long ded. Be, Jisas i laekem Tomas mo i givhan long hem blong i winim bilif blong hem we i hafhaf. !Mo Tomas i sapraes taem i luk we Jisas i laef bakegen long ded!​—⁠Jon 20:​24-29.

“Sam man we oli agensem God” oli kam insaed long kongregesen blong Kristin long faswan handred yia, oli stap tijim ol gyaman tijing, oli toktok nogud, mo oli mekem ol narafala samting olsem mo oli mekem bilif blong sam man long kongregesen i hafhaf mo oli harem nogud from. Taswe, disaepol ya Jud i raetem se: “I gat sam man we bilif blong olgeta i no strong, oli gat ol narafala tingting, nao yufala i mas gat sore long olgeta . . . yufala i mas sevem olgeta, olsem we yufala i pulumaot olgeta long faea.” (Jud 3, 4, 16, 22, 23) Blong gohed blong kasem fasin sore blong God, olgeta we oli stap wosip wetem Jud​—⁠hemia ol elda long kongregesen​—⁠oli mas soemaot fasin sore long ol man we bilif blong olgeta i hafhaf. (Jemes 2:13) Sipos oli gohed olsem oli no save kasem laef we i no save finis, from “faea” ya i save spolem olgeta blong olwe. (Lukluk Matyu 18:​8, 9; 25:​31-33, 41-46.) !Mo i gud tumas taem oli givhan long ol man we bilif blong olgeta i hafhaf mo oli kam strong bakegen long saed blong speret!

Sipos ol strong traem oli mekem se yumi no moa bilif se God i stap wetem yumi, yumi mas talem stret taem yumi prea. Long taem olsem, yumi mas gohed blong askem Jeova blong givim waes long yumi. Hem i glad blong givim, hem i no save kros long yumi from we yumi no gat waes mo taem yumi askem long prea. Yumi mas gohed blong “askem long God, . . . we tingting blong yufala i no hafhaf” from we wan man we bilif blong hem i hafhaf “hem i olsem solwora nomo. Taem win i blu, solwora bambae i save go olbaot, olsem we win i pusum.” Ol man olsem oli no kasem samting long God from we oli no save mekem disisin, ‘oltaem oli stap tingbaot blong go long tu rod’ long prea mo long ol rod blong olgeta. (Jemes 1:​5-8) Taswe i gud yumi mas bilif se Jeova bambae i givhan long yumi blong yumi gat stret tingting long ol traem we yumi kasem mo blong stanap strong blong winim olgeta. Maet yumi luk sam vas long Baebol we ol fren oli talem long yumi no long taem blong Baebol stadi. God i save jenisim ol samting blong givhan long yumi blong luksave wanem yumi mas mekem. Maet ol enjel oli save lidim yumi, no tabu speret i save givhan long yumi. (Hibrus 1:14) Impoten samting se yumi mas prea from waes mo trastem fulwan God blong yumi we i gat lav.​—⁠Proveb 3:​5, 6.

Tingbaot Se Jeova i Stap Givhan Long Man

Pol i stap prea mo i dipen long Jeova, hem i save se Jeova i Stampa blong givhan. Aposol Pol i raetem se: “I gud yumi stap talem tangkyu long God ya we i God mo Papa blong Jisas Kraes, Masta blong yumi. Hem i Papa blong yumi we i gat sore, hem i God we i stampa blong givhan. Hem i stap givhan long mifala long olgeta trabol blong mifala, blong mekem mifala i harem gud. Nao taem ol narafala man oli gat trabol, mifala i save givhan long olgeta, blong mekem olgeta oli harem gud long sem fasin, from we God i givhan finis long mifala.”​—⁠2 Korin 1:​3, 4.

God ya we i stap givhan long ol man i luksave trabol we ol man blong hem oli stap kasem mo hem i wantem givhan long olgeta. Long saed blong Pol we hem i wari tumas from ol Kristin long Korin, hem i haremgud taem Kristin fren blong hem Taetas i kam luk hem. Hemia wan rod we yumi save haremgud long hem tu tede. Taem yumi harem nogud long tingting blong yumi, yumi no mas stap yumi wan nomo. (Proveb 18:⁠1) Fasin joen wetem ol narafala Kristin i wan rod we God i yusum blong mekem yumi haremgud. Maet yumi save ting se: ‘Mi mi no naf blong stap wetem ol Kristin fren blong mi from we tingting blong mi i foldaon tumas.’ Be, yumi mas agensem ol filing olsem mo yumi no mas blokem ol narafala man blong bilif blong oli givhan long yumi.

!Yu No Mas Kam Slak!

Sam long yumi maet oli no kasem wan traem we i mekem olgeta oli harem nogud tumas long tingting blong olgeta. Be sik, ded blong waef no hasban, no ol narafala samting olsem, oli save mekem yumi harem nogud long tingting mo filing blong yumi. Sipos samting olsem i kamaot, i nogud blong ting se yumi rili sik long saed blong speret. Wan man we tingting blong hem i foldaon maet hem i naf blong mekem wok blong God, hem i save givhan long ol narafala man long saed blong speret. Pol i askem ol brata blong hem blong “givhan long olgeta we oli no gat paoa,” be oli no mas ting se olgeta ya oli mekem rabis fasin mo oli sik long saed blong speret. (1 Tesalonaeka 5:14) I tru se samtaem man i harem nogud long tingting blong hem from rabis fasin we hem i mekem, be samting ya i no tru long saed blong ol man we oli stap mekem wok blong God wetem gudfala hat. God i agri long wosip we olgeta oli stap traehad blong mekem. Hem i laekem olgeta mo i wantem givhan long olgeta long ol samting we oli nidim mo blong mekem olgeta oli haremgud.​—⁠Ol Sam 121:​1-3.

Olgeta we oli haf blong Isrel long saed blong speret oli harem nogud long ol traem long 1918. (Lukluk Galesia 6:16.) Kolosap wok blong prij we oli stap mekem i finis olgeta, ol man oli putum sam long olgeta long kalabus from nating nomo, mo plante long ol fren blong olgeta bifo oli no moa stap tru long olgeta, oli kam man blong apostasi.a Mo tu, ol Kristin ya we tabu speret i makemaot olgeta oli no save from wanem God i letem ol samting ya oli kam traem olgeta. Long taem ya “oli stap planem garen blong olgeta, oli stap harem nogud, oli krae” be oli no stop long wok ya. Oli gohed blong mekem wok blong Jeova mo skelemgud laef blong olgeta tu. ?Wanem samting i kamaot from? “Oli kambak wetem kakae blong hem, bambae oli singsing from we oli glad long kakae ya.” (Ol Sam 126:​5, 6) Ol Kristin we tabu speret i makemaot olgeta naoia oli luksave se God i letem ol traem ya blong hem i klinim olgeta blong oli mekem bigfala wok ya we i stap kam hemia wok blong karem ol kakae long garen.

Sipos yumi harem nogud long tingting blong yumi from we yumi kasem samkaen traem, yumi save haremgud long ekspiryens blong ol Kristin we tabu speret i makemaot olgeta. Yumi no mas stop, yumi mas gohed blong mekem samting we i stret, nating se yumi save krae sipos yumi mas mekem olsemia. From we i gat taem i stap kam, bambae i gat rod blong winim ol traem ya, mo bambae yumi ‘kambak wetem kakae blong hem, bambae yumi singsing from we yumi glad long kakae ya.’ Yes, glad ya​—⁠i wan frut blong tabu speret blong God​—⁠bambae hem i blong yumi from we yumi stanap strong oltaem long ol traem blong yumi. Jeova bambae i pruvum se hem i “God we i stampa blong givhan” long yumi.

[Futnot]