Speret Blong Jeova i Lidim Ol Man Blong Hem

“Speret blong yu i gud tumas, i gud hem i lidim mi long rod we i sef.”​—OL SAM 143:10.

1, 2. ?Wanem samting i save mekem ol stret man blong Jeova oli harem nogud?

‘!MI MI harem nogud long tingting blong mi! ?Olsem wanem bambae mi haremgud bakegen? ?God i livim mi?’ ?Samtaem yu harem olsem? Sipos yu harem olsem, i no yu nomo. Nating se ol man blong Jeova oli stap long paradaes long saed blong speret, samtaem oli kasem ol nogud trabol, ol traem, mo ol samting blong pulum man we i stap pulum olgeta.​—1 Korin 10:13.

² Maet yu yu kasem ol traem we i stap longtaem no ol samting we oli mekem yu yu harem nogud. Maet yu yu sore from ded blong wan fren we yu laekem tumas mo yu harem nogud blong stap yu wan. No hat blong yu i trabol from wan fren blong yu i sik. Ol samting olsem maet oli save spolem fasin glad mo pis blong yu mo maet oli save spolem bilif blong yu. ?Bambae yu mekem wanem?

Askem God From Tabu Speret Blong Hem

3. ?Sipos wan samting i stap karemaot ol gudfala fasin ya olsem pis mo glad long yu, i waes blong yu mekem wanem?

³ Sipos wan samting i stap tekemaot pis, glad, no sam narafala gudfala fasin long yu, i waes blong prea long God blong askem tabu speret blong hem, no paoa blong hem. ?From wanem? From we tabu speret blong Jeova i givim ol gudfala frut we i givhan long wan Kristin blong fesem ol trabol, ol traem, mo ol samting blong pulum man. Afta we aposol Pol i givim woning long saed blong “ol rabis samting we tingting blong” man i wantem, hem i raetem se: “Be Tabu Speret, hem i stap mekem ol man oli gat narafala fasin. Hem i stap mekem olgeta oli laekem tumas ol man, mo oli gat glad mo pis long tingting blong olgeta. Tingting blong olgeta i longfala, mo oli gat sore long man. Fasin blong olgeta i gud nomo, mo i no save jenis. Olgeta oli kwaet man, mo oli save blokem ol samting we olgeta nomo oli wantem. I no gat loa blong blokem yufala long ol samting ya.”​—Galesia 5:​19-23.

4. ?Taem yu kasem sam traem no sam samting blong pulum man, from wanem i gud blong prea from fasin we yu nidim blong winim traem?

⁴ From ol traem we yu stap fesem, maet yu luksave se yu yu stap long wan denja blong lusum kwaet fasin, no tingting we i stap kwaet. Nao taem yu prea yu mas talemaot samting ya long Jeova God blong askem frut blong tabu speret blong hem hemia kwaet fasin. Sipos yu kasem traem we i save pulum yu blong foldaon long sin, yu rili nidim frut blong speret blong blokem ol samting we yu nomo yu wantem. Tru, i stret tu blong prea blong God i givhan long yu blong agensem ol samting we oli pulum yu blong tekemaot yu long paoa blong Setan, mo blong givim waes we yu nidim blong stanap strong longtaem long traem.​—Matyu 6:13; Jemes 1:​5, 6.

5. ?Sipos ol trabol oli mekem yu yu harem nogud tumas we yu no moa save weswan frut blong tabu speret yu mas askem, yu save mekem wanem?

⁵ Samtaem, sam samting maet oli mekem tingting blong yu i foldaon olgeta no tingting blong yu i fasfas nao yu no luksave weswan frut blong tabu speret yu rili nidim. Maet i gat denja se yu save lusum fasin glad, pis mo kwaet fasin blong yu tu wetem sam narafala gudfala fasin. ?Wanem samting bambae yu mekem? ?Olsem wanem sipos yu askem God blong givim tabu speret blong hem mo letem speret i wokem frut we yu nidim long taem ya? Maet ol frut we yu nidim hem i lav no glad no pis no plante frut blong tabu speret. Mo tu prea long God blong i givhan long yu blong folem rod we tabu speret blong hem i soemaot, from we hem i stap yusum speret ya blong lidim ol man blong hem.

Jeova i Rere Blong Givhan

6. ?Olsem wanem Jisas i soemaot long ol man blong hem se oli mas gohed oltaem blong prea?

⁶ Taem ol disaepol blong Jisas Kraes oli wantem lanem fasin blong prea, long haf blong prea ya Jisas i talem long olgeta blong oli prea blong askem tabu speret blong God. Jisas i yusum wan pijatok blong pusum olgeta blong oli stap prea oltaem. Hem i talem se: “Yufala i traem tingbaot fasin ya. Long medel naet, wan fren blong yu we i stap wokbaot, hem i kamtru long haos blong yu, mo yu yu no gat kakae blong givim long hem. Nao yu girap, yu go askem long wan man ples blong yu, se ‘?Brata, yu gat sam hafkakae i stap, we yu save letem long mi? Wan fren blong mi i jes kamtru long mi naoia, mo mi mi no gat kakae nating blong givim long hem.’ ?Bambae man ples ya i save talem olsem wanem? ?Yu ting se hem i save talem se ‘A, yu gowe. Mi mi satem doa finis. Mi wetem ol pikinini blong mi, mifala i slip finis. Mi no save girap bakegen blong givim kakae long yu’? Mi mi talem long yufala, maet hem i no wantem girap blong givim kakae long yu from we yu man ples blong hem. Be from we yu no gat sem blong askem, askem, askem long hem, bambae hem i save girap blong givim evri samting long yu we yu yu sot long hem.”​—Luk 11:​5-8.

7. ?Wanem impoten samting long tok blong Jisas long Luk 11:​11-13, mo wanem promes oli givim long saed blong God mo tabu speret blong hem?

⁷ Jeova i rere blong givhan long olgeta man blong hem we oli givim laef blong olgeta finis long hem, mo hem i stap lesin long ol prea blong olgeta. Be sipos wan man i stap ‘askem mo askem bakegen,’ olsem Jisas i talem, samting ya i soemaot se hem i rili wantem mo hem i stap soemaot fasin blong bilif. (Luk 11:​9, 10) Kraes i talem se: “?I gat wan papa long yufala we taem pikinini blong hem i askem fis long hem, be hem i no save givim fis, i givim snek long hem? ?No i gat wan papa we taem pikinini blong hem i askem eg long hem, be hem i save givim skopion long hem? Yufala i man nogud, be yufala i save givim ol gudgudfala presen long ol pikinini blong yufala. Be Papa blong yufala long heven, hem i save go moa olgeta blong givim Tabu Speret long olgeta we oli askem long hem.” (Luk 11:​11-13) Sipos wan papa mama long wol ya, we hem i olsem man nogud from hem i bon long sin hem i givim ol gudfala samting long pikinini blong hem, i tru moa se Papa blong yumi long heven bambae i go moa blong stap givim tabu speret blong hem long olgeta stret man blong hem we oli askem wetem tingting daon.

8. ?Olsem wanem Ol Sam 143:10 i stret long Deved, Jisas, mo ol man blong God tede?

⁸ Blong kasem frut long speret blong God yumi mas rere blong letem hem i lidim yumi olsem we David i mekem. Hem i prea olsem se: “Yu yu God blong mi, plis yu tijim mi blong mi mekem ol samting we yu yu wantem. Speret blong yu i gud tumas, i gud hem i lidim mi long rod we i sef.” (Ol Sam 143:10) Taem King Sol blong Isrel i mekem se loa i no moa save givhan long Deved, Deved i wantem speret blong God blong i lidim hem blong bambae hem i sua se rod blong hem i stret. Biaen Abaeata i kam wetem spesel klos blong pris nem blong hem ‘efod’ we oli yusum blong faenemaot wanem tingting blong God long wan bisnes. Olsem wan pris we i wok long nem blong God, Abaeata i talem long Deved wanem rod we hem i mas folem blong mekem Jeova i glad long hem. (1 Samuel 22:17 kasem 23:12; 30:​6-8) Olsem Deved, speret blong Jeova i lidim Jisas, mo samting ya i tru tu long ol man blong Jisas we tabu speret i makemaot olgeta olsem wan grup. Long 1918 kasem 1919, ol man oli luk olgeta olsem we oli nating nomo mo ol skul we oli enemi blong olgeta oli ting se bambae oli finisim olgeta. Ol Kristin we tabu speret i makemaot olgeta oli prea blong God i soemaot rod blong olgeta blong oli kamaot long fasin ya we oli no mekem wok nating, mo long 1919, God i ansa long ol prea blong olgeta, mo i mekem olgeta oli go fri, mo i givim paoa long olgeta blong mekem wok blong hem bakegen. (Ol Sam 143:​7-9) Yes i tru, long taem ya speret blong Jeova i givhan mo i stap lidim ol man blong hem, olsem we i stap mekem kam kasem tede.

Olsem Wanem Tabu Speret i Givhan

9. (a) ?Olsem wanem tabu speret i mekem wok olsem “Speret blong Givhan”? (b) ?Olsem wanem yumi save se tabu speret i no wan man? (Lukluk futnot.)

⁹ Jisas Kraes i tokbaot tabu speret olsem wan “Speret blong Givhan.” Eksampel, hem i talem long ol man blong hem i se: “Bambae mi mi askem long Papa blong mi, mo hem bambae i givim wan narawan i kam blong givhan long yufala. Narawan ya hem i Speret blong Givhan, we bambae hem i save stap oltaem wetem yufala. Speret ya, hem i Speret blong Trutok. Ol man blong wol ya oli no save kasem Speret ya, from we oli no save luk hem mo oli no gat rod blong save hem. Be yufala i save hem, from we hem i stap wetem yufala, mo bambae laef blong hem i save joen long laef blong yufala.” “Speret blong Givhan ya” bambae i mekem plante samting long olgeta mo bambae i tijim olgeta tu olsem Kraes i promes se: “Speret blong Givhan ya, we hemia Tabu Speret ya we bambae Papa blong mi i save sanem i kam long nem blong mi, bambae hem i save tijim yufala long olgeta samting. Bambae hem i save mekem yufala i tingbaot olgeta samting ya bakegen, we bifo mi mi stap talem long yufala.” Speret ya bambae i givim wetnes tu long saed blong Kraes, mo Kraes i talem long ol disaepol blong hem se: “I moa gud long yufala blong mi mi gowe long yufala, from we sipos mi mi no gowe long yufala, bambae Speret blong Givhan ya, hem i no save kam stap wetem yufala. Be sipos mi gowe, bambae mi sanem hem i kam stap wetem yufala.”​—Jon 14:​16, 17, 26; 15:26; 16:7.a

10. ?Olsem wanem tabu speret i wan speret blong givhan?

¹⁰ Taem Jisas i go long heven finis, hem i kafsaedem tabu speret we hem i promes, long ol man blong hem long dei blong Pentekos long yia 33 K.T. (Ol Wok 1:​4, 5; 2:​1-11) Olsem wan speret blong givhan, tabu speret i mekem se save blong olgeta i gru moa long wil blong God mo plan blong hem mo mining blong plante profet tok blong Baebol i kam klia long olgeta. (1 Korin 2:​10-16; Kolosi 1:​9, 10; Hibrus 9:​8-10) Speret ya blong givhan i givim paoa tu long ol disaepol blong Jisas blong oli wetnes long olgeta ples long wol. (Luk 24:49; Ol Wok 1:8; Efesas 3:​5, 6) Tede, tabu speret i save givhan long ol Kristin we oli givim laef blong olgeta finis long God blong oli gru long saed blong save sipos oli yusum ol samting long saed blong speret we God i givim tru long “slef ya we i stret mo waes.” (Matyu 24:​45-47, NW) Speret blong God i save halpem ol man blong Jeova taem hem i givim strong tingting mo paoa we oli nidim blong wetnes olsem ol man blong wok blong Jeova. (Matyu 10:​19, 20; Ol Wok 4:​29-31) Mo tu, tabu speret i stap givhan long ol man blong God long sam narafala rod.

“Krae We i No Gat Ol Tok”

11. ?Sipos wan Kristin i kasem wan traem we i bitim mak, hem i mas mekem wanem?

¹¹ Sipos wan Kristin i kasem wan traem we hem i bitim mak, ?bambae hem i mekem wanem samting? !Hem i mas prea from tabu speret, mo letem hem i mekem wok blong hem! “Tabu Speret tu i stap givhan long yumi, we yumi no gat paoa,” Pol i talem, “from we yumi no save wanem fasin i stret blong yumi folem blong prea. Tabu Speret ya, hem nomo i stap prea long God oltaem from yumi, hem i stap krae we i no gat ol tok we i naf blong talem tok blong hem. Mo God ya we i stap lukluk insaed long tingting blong ol man, hem i savegud [mining blong Tabu Speret ya, NW]. From we Speret ya i [askem God blong givhan long ol man, NW], stret nomo long fasin we God i wantem.”​—Rom 8:​26, 27.

12, 13. (a) ?Olsem wanem Rom 8:​26, 27 i stret long ol prea blong man we i kasem ol bigfala traem? (b) ?Pol mo ol fren blong hem oli mekem wanem taem oli kasem bigfala trabol long Esia?

¹² Olgeta ya we tabu speret blong God i stap toktok long saed blong olgeta, hemia ol man blong Jisas we tabu speret i makemaot olgeta, we oli gat hop blong go long heven. Be nating se yu yu blong go long heven no yu gat hop blong stap long wol ya, olsem wan Kristin yu yu save kasem help blong tabu speret blong God. Samtaem Jeova i mekem ansa blong wan prea olsem i klia kwiktaem. Be samtaem, maet yu harem nogud tumas mekem se yu no save talemaot ol filing blong yu be ating yu save kam long Jeova wetem ol krae we i no gat ol toktok. Sipos yu no askem tabu speret, maet yu no save wanem samting i gud long yu mo maet yu save askem wan rong samting. God i save we yu wantem mekem wil blong hem, mo hem i luksave wanem samting yu rili nidim. Antap moa, from tabu speret blong hem, hem i mekem se oli raetemdaon plante prea insaed long Tok blong hem, mo ol prea ya oli laenap wetem ol traem. (2 Timote 3:​16, 17; 2 Pita 1:21) Olsemia nao, Jeova i save tingbaot sam tingting insaed long ol prea ya we oli raetemdaon long Baebol olsem we oli tingting blong yu mo yu wantem talemaot olsem wan man blong hem mo hem i save ansa long olgeta long saed blong yu.

¹³ Pol mo ol fren blong hem maet oli no save wanem samting oli mas prea from taem oli kasem traem long Esia. Olgeta ‘i harem we ol trabol ya i bigfala tumas, i hevi tumas, nao olgeta i no moa tingbaot se bambae olgeta oli laef. Olgeta oli harem olsem we oli jajem olgeta finis, se oli mas ded.’ Be olgeta oli askem ol narafala blong prea from olgeta mo oli trastem God, se hem bambae i save mekem ol man we oli ded oli laef bakegen, mo hem i tekemaot olgeta long trabol blong olgeta. (2 Korin 1:​8-11) !Samting ya i leftemap tingting taem Jeova God i lesin mo i ansa long prea blong ol stret man blong hem!

14. ?Wanem gudfala samting i save kamaot sipos Jeova i letem wan traem i gohed blong longtaem lelebet?

¹⁴ Samtaem ol man blong God oli kasem ol traem olsem wan ogenaesesen. Olsem yumi talem finis, oli kasem traem long taem blong Faswan Bigfala Faet Blong Wol. Nating se long taem ya oli no kasem klia save long wok blong olgeta mo wanem stret samting oli mas prea from, i gat ol prea blong ol profet insaed long Tok blong Jeova we hem i stap ansa long saed blong olgeta. (Ol Sam 69, 102, 126; Aesea japta 12) ?Be olsem wanem sipos Jeova i letem trabol i traem yumi longtaem lelebet? Samting olsem i save givim wan wetnes, ating i save pusum sam man blong kam long trutok, mo i save givim jans long ol Kristin blong soemaot lav long ol brata blong olgeta taem oli prea no oli halpem ol brata blong olgeta long saed blong speret. (Jon 13:​34, 35; 2 Korin 1:11) Tingbaot se Jeova i stap lidim ol man blong hem wetem tabu speret blong hem, hem i mekem wanem we i gud long olgeta, mo oltaem hem i mekem ol samting long fasin we bambae i givim ona mo respek long nem blong hem.​—Eksodas 9:16; Matyu 6:9.

No Daonem Tabu Speret

15. ?Ol Kristin oli save dipen long tabu speret blong Jeova blong mekem wanem long saed blong olgeta?

¹⁵ Sipos yu yu wan man blong Jeova, ale, yu mas prea from tabu speret taem yu kasem ol traem mo long ol narafala taem tu. Mo yu mas sua se yu stap folem rod we hem i soemaot long yu, from we Pol i raetem se: “Yufala i mas no [daonem tabu speret blong God, NW]. From we Speret ya, hem i olsem mak we God i putum finis long yufala, i olsem wan saen we long Lasdei, God bambae i mekem yufala i fri olgeta.” (Efesas 4:30) Speret blong God hem i wan mak olsem bifo mo naoia, no wan ‘saen blong soemaot we ol promes blong God bambae oli kamtru long’ ol Kristin we tabu speret i makemaot olgeta​—hemia we, bambae oli laef long heven mo oli no moa save ded bakegen samtaem. (2 Korin 1:22; Rom 8:15; 1 Korin 15:​50-57; Revelesen 2:10) Tufala kampani evriwan, ol Kristin we tabu speret i makemaot olgeta mo olgeta we oli gat hop blong laef long wol ya, oli save dipen long speret blong Jeova blong mekem sam samting long saed blong olgeta. Hem i save lidim olgeta long wan laef we i gat strong bilif mo givhan long olgeta blong no mekem ol wok blong sin we i save mekem se God i no agri long olgeta, oli save lusum tabu speret blong hem, mo oli no save kasem laef we i no save finis.​—Galesia 5:​19-21.

16, 17. ?Olsem wanem maet wan Kristin i save daonem tabu speret?

¹⁶ ?Olsem wanem wan Kristin i save daonem tabu speret, nating we hem i save no hem i no save se hem i mekem olsem? Yes, Jeova i yusum speret blong hem blong mekem fasin joengud long kongregesen mo blong putumap ol man we oli gat wok insaed long kongregesen. Taswe, sipos wan man long kongregesen i stap toktok smosmol agens long sam elda we oli putumap olgeta, oli talem sam gyaman toktok long saed blong narafala, mo ol narafala samting olsem, hem i no stap folem rod we speret blong God i stap lidim blong gat pis mo fasin joengud. Long rod ya, hem i stap daonem tabu speret.​—1 Korin 1:10; 3:​1-4, 16, 17; 1 Tesalonaeka 5:​12, 13; Jud 16.

¹⁷ Taem Pol i stap raetem leta long ol Kristin long Efesas, hem i givim woning agensem fasin blong gyaman, holem kros longtaem, fasin blong stil, ol nogud tok, tingting blong mekem no wantem mekem nogud wetem woman, rabis fasin we i save mekem man i sem, ol tok plei we i no stret. Sipos wan Kristin i letem ol samting ya oli pulum hem, hem i stap agensem ol advaes ya blong Baebol we speret i givim. (Efesas 4:​17-29; 5:​1-5) Yes, from samting ya bambae hem i stap daonem tabu speret blong God.

18. ?Wanem samting i save kamaot long wan Kristin we i stat blong no lesin long ol advaes blong Tok blong God we speret i givim?

¹⁸ Tru ya, wan Kristin we i stat blong no wantem lesin long advaes blong Jeova we tabu speret i givim maet hem i stat blong gat ol fasin no ol tingting we oli save pusum hem blong mekem sin mo God i no moa save glad long hem. Maet hem i no stap mekem sin naoia, be hem i stap go blong mekem. Wan Kristin olsem hem i stap go agensem fasin we tabu speret i stap lidim yumi long hem mo hem i save daonem tabu speret. Olsemia nao, bambae hem i agensem Jeova mo hem i save mekem Jeova, we hem i Stampa blong tabu speret, i harem nogud. !Neva wan man we i laekem God i wantem mekem olsem!

Gohed Blong Prea From Tabu Speret

19. ?From wanem ol man blong Jeova tede oli rili nidim tabu speret?

¹⁹ Sipos yu yu wan man blong Jeova, yu gohed blong askem tabu speret blong hem long prea. I tru moa long ol “Lasdei” ya, we laef blong wol ya i kam strong tumas blong winim, ol Kristin oli nidim tumas tabu speret blong God blong halpem olgeta. (2 Timote 3:​1-5) Devel Setan wetem ol rabis enjel blong hem, oli aot finis long heven mo naoia oli stap olbaot long wol, mo oli stap wok agens long ogenaesesen blong Jeova. Taswe, tede bitim bifo, ol man blong God oli nidim tabu speret blong hem blong lidim olgeta, no soemaot rod long olgeta, mo mekem se oli save stanap strong long ol trabol mo traem.​—Revelesen 12:​7-12.

20, 21. ?From wanem i gud blong folem rod we Tok blong Jeova, speret, mo ogenaesesen blong hem i soem?

²⁰ Oltaem yu mas glad long help we Jeova God i stap givim tru long tabu speret blong hem. Yu mas folem rod we tabu speret blong hem i soemaot long Tok blong hem, Baebol. Yu mas wok tugeta fulwan wetem ogenaesesen blong God long wol we tabu speret i stap lidim. Neva yu mas letem yu wan blong goaot long rod we i no folem Baebol we fasin ya i save daonem tabu speret, from se samting ya i save mekem se tabu speret i aot long yu mo yu save kasem trabol long saed blong speret.​—Ol Sam 51:11.

²¹ Wan rod nomo blong mekem Jeova i glad mo blong gat pis, mo hapi laef, hemia we yu letem speret blong Jeova i lidim yu. Tingbaot tu, se Jisas i singaot tabu speret olsem “Speret blong Givhan,” no blong “leftemap tingting.” (Jon 14:​16, New World Translation Reference Bible, futnot) From tabu speret nao, God i stap leftemap tingting blong ol Kristin mo mekem olgeta oli strong blong winim ol traem blong olgeta. (2 Korin 1:​3, 4) Speret i givim paoa long ol man blong Jeova blong oli talemaot gud nyus mo i halpem olgeta blong tingbaot ol poen long Baebol bakegen taem oli nidim olgeta blong givim wan gudfala wetnes. (Luk 12:​11, 12; Jon 14:​25, 26; Ol Wok 1:​4-8; 5:32) Tru long prea mo rod we tabu speret i soemaot, ol Kristin oli save fesem ol traem long saed blong bilif wetem waes we i kamaot long heven. Taswe, long olgeta samting long laef, oli stap gohed blong prea from tabu speret blong God. From samting ya, tabu speret blong Jeova i stap lidim ol man blong hem.

[Futnot]

?Wanem Ol Ansa Blong Yu?

◻ ?From wanem yu mas prea from tabu speret blong Jeova?

◻ ?Olsem wanem tabu speret i wan speret blong givhan?

◻ ?Daonem tabu speret i minim wanem, mo olsem wanem blong yumi no mekem samting ya?

◻ ?From wanem yumi mas gohed oltaem blong prea from tabu speret mo folem rod we hem i lidim yumi long hem?

[Tok Blong Pija Long Pej 15]

Olsem wan papa we i gat lav i stap givim ol gudfala samting long pikinini boe blong hem, sem mak Jeova i stap givim tabu speret blong hem long ol man blong hem we oli prea blong askem

[Tok Blong Pija Long Pej 17]

?Yu save olsem wanem tabu speret blong God i stap tok long saed blong ol prea blong ol Kristin?