Jeova, Man We i Mekem Ol Bigbigfala Samting
“Yu yu gat paoa, mo yu stap mekem ol bigbigfala samting. Yu nomo yu God.”—OL SAM 86:10.
1, 2. (a) ?Olsem wanem ol samting we man i mekem oli spolem wol? (b) ?Weples yumi save faenem wan gudfala hop blong kasem ol gudfala samting?
LONG taem blong yumi, man i save tok flas se ol wok blong hem oli bigfala tumas—ol samting we oli wokem wetem lektrik, ol telefon, video, ol trak, ol jet plen we oli kwik blong karem man, mo ol kompyuta. Ol samting ya oli pulum olgeta ples raonabaot long wol oli kam kolosap nomo. !Be hemia ol samting we oli stap kolosap long yumi! I no gat pis, plante man oli no gat naf mane mo oli no gat ol gudfala samting. Oli kilim ol man long ol faet, fasin blong brekem loa, ol teroris, fasin blong sakem doti long win mo wora, ol defren sik mo fasin pua. Mo ol nogud tul blong faet we oli hivimap long olgeta ples raonabaot long wol, oli save kilim i ded olgeta man long wol, nating se oli katemdaon namba blong ol tul ya. Ol man blong kilim man i ded, ol man blong wokem ol tul blong faet, oli stap gohed blong halpem bigfala bisnes ya long wol. Ol rijman oli stap kam rij moa, mo ol puaman oli stap kam pua moa. ?Wan man i save faenem rod blong fiksimap ol trabol ya?
2 !Yes! I gat wan Man we i mekem promes blong mekem yumi fri, “man we i hae moa long hemia we i hae,” hemia Jeova God. (Eklesiastis 5:8) Ol tok we oli stap long buk blong Ol Sam we oli kamaot from tabu speret blong Jeova, oli save leftemap tingting blong man mo oli givim waes advaes we i stret blong taem blong trabol. Long ol Sam ya, i gat Sam 86, we i karem wan taetel se: “Wan prea blong Deved.” Hem i wan prea we i save kam olsem prapa prea blong yu.
Hem i Harem Nogud Be Hem i Stanap Strong
3. ?Long taem blong yumi, wanem eksampel we i save leftemap tingting blong yumi we Deved i soemaot long yumi?
3 Deved i raetem Sam ya taem hem i harem nogud. Yumi tede, yumi stap laef tru long taem blong “ol lasdei” (NW) blong wol blong Setan, we ‘laef long wol ya i kam strong tumas,’ yumi stap fesem plante trabol we i mekem yumi harem nogud. (2 Timote 3:1; lukluk Matyu 24:9-13.) Olsem yumi, tingting blong Deved i foldaon mo trabol we hem i kasem i mekem hem i harem olsem hem i no gat paoa. Be hem i no letem ol trabol ya oli daonem fasin blong hem blong stanap strong mo trastem Man we i Wokem olgeta samting. Hem i kraeaot se: “[O Jeova, “NW”], plis yu lesin long mi, yu ansa long mi, from we mi mi no strong, mi no gat paoa. Plis yu no letem mi mi ded,, from we mi mi stap strong long yu oltaem. Plis yu sevem mi, from we mi mi man blong wok blong yu, mi trastem yu.”—Ol Sam 86:1, 2.
4. ?Olsem wanem yumi save soemaot bilif blong yumi?
4 Yumi save gat bilif, olsem Deved, se “God we i stampa blong givhan,” Jeova, bambae i tanem sora blong hem i kam long wol ya blong lesin long ol prea blong yumi. (2 Korin 1:3, 4) Taem yumi stap trastem God fulwan, yumi stap folem advaes blong Deved we i talem se: “Yufala i mas putum ol trabol blong yufala long [Jeova, NW], nao hem bambae i blokem yufala, i sevem yufala. Hem i no save letem stret man i lus.”—Ol Sam 55:22.
Frengud Wetem Jeova
5. (a) ?Olsem wanem sam man blong transletem Baebol we oli keaful oli tekemaot ol rong blong ol man we oli raetem kopi blong Loa? (b) ?Long wanem rod ol Sam 85 mo 86 i leftemap nem blong Jeova? (Lukluk futnot.)
5 Long Sam 86, Deved i yusum tok ya “O Jeova” (NW) 11 taem. !Fasin blong prea blong Deved mo fasin frengud we Deved i gat long Jeova i gudwan tumas! Biaen, ol man blong raetem Loa oli no agri long stret fasin blong yusum nem blong God, olsem ol Soferim. Oli fraet se bambae oli yusum rong nem ya. Mo tu oli sakemaot tingting ya se God i mekem man long pija blong hem, oli no wantem tingbaot se God i wokem ol man long pija blong hem, taswe oli no tingbaot ol fasin blong God we ol man tu oli soemaot. Ale long 11 ples we nem blong God i kamaot long hem long Hibru teks long Sam ya, long 7 ples oli putum taetel ya ʼAdho-naiʹ (Lod) blong jenisim nem ya YHWH (Jeova). Yumi save glad tumas from New World Translation of the Holy Scriptures, sem mak long sam narafala Baebol we oli lukaotgud blong transletem, oli putumbak nem ya long prapa ples blong hem long Tok blong God. Samting we i kamaot se, yumi stap frengud moa wetem Jeova olsem yumi mas mekem.a
6. ?Long wanem rod yumi save soemaot se nem blong Jeova i nambawan tumas long yumi?
6 Prea blong Deved i gohed se: “Plis yu sore long mi, [O Jeova, “NW”]. Mi mi stap prea long yu oltaem, i stat long moning gogo kasem long sapa. [O Jeova, “NW”], mi mi man blong wok blong yu, prea blong mi i stap go antap long yu nomo. Plis yu mekem mi mi glad.” (Ol Sam 86:3, 4) Makemgud se Deved i stap gohed blong prea long Jeova “i stat long moning gogo kasem long sapa.” I tru, plante taem hem i prea long ful naet, olsem long taem ya we hem i bin stap hem wan long drae ples. (Ol Sam 63:6, 7) Sem mak olsem tede, sam Wetnes oli bin singaot bigwan i go long Jeova taem man i traem fosem olgeta no i mekem i nogud long olgeta. Long semtaem oli bin sapraes long samting we i kamaot from.b Nem blong Jeova i nambawan long yumi, sem mak we nem ya i nambawan long “Jisas Kraes, we hem i kamaot long Deved,” taem hem i stap long wol. Jisas i tijim ol man blong hem blong prea blong mekem nem blong Jeova i tabu mo i mekem olgeta oli save mining blong nem ya.—Matyu 1:1; 6:9; Jon 17:6, 25, 26.
7. ?Wanem eksampel we yumi gat long Jeova taem hem i halpem ol man blong hem, mo olsem wanem yumi save folem?
7 Deved i givim laef blong hem, fulwan, i go long Jeova. Hem i leftemap tingting blong yumi blong mekem sem mak, hem i talem long Sam 37:5 se: “Yu mas givim laef blong yu long [Jeova, NW], yu mas trastem hem, nao bambae hem i halpem yu.” Taswe ol prea we yumi askem long Jeova blong mekem yumi glad, i no save go nating nomo. Plante man blong Jeova we oli gat fasin blong holemstrong oli gohed blong faenem bigfala glad long wok blong hem—nating se oli kasem hadlaef, ol man oli ronem olgeta, mo oli sik. Ol brata blong yumi we oli stap long ol ples we ol faet oli kamaot oltaem long hem olsem long Angola, Laeberia, Mosambik, mo Sair, oli bin gohed blong putum wok blong Jeova long fasples long laef blong olgeta.c I tru tumas se Jeova i mekem olgeta oli glad taem oli luk fulap man oli kam long trutok. Olgeta ya oli stanap strong nating se oli kasem trabol, taswe yumi save mekem olsem olgeta. (Rom 5:3-5) Mo taem yumi stanap strong, yumi save sua se: “From we vison ya bambae i kamtru long stret taem blong hem nomo. Bambae hem i hareap blong kasem en blong hem . . . Mo hem i no save let.” (Habakuk 2:3) Wetem ful bilif mo tras blong yumi long Jeova, yumi stap bisi blong mekem wok blong God olsem we yumi stap “hareap blong kasem en.”
Gudfala Fasin Blong Jeova
8. ?Wanem fasin fren yumi mas gat wetem Jeova, mo olsem wanem hem i soemaot gudfala fasin blong hem?
8 Deved i gohed blong talemaot ol strong filing we hem i gat, se: “[Yu yu gud, O Jeova, mo yu yu rere blong fogivim. Mo fasin kaen blong yu i fulap long olgeta we oli stap singaot long yu. O Jeova, “NW”], plis yu lesin long prea blong mi, yu harem mi, we mi stap krae blong yu givhan long mi. Mi mi stap singaot long yu long taem blong trabol from we yu yu stap ansa long ol prea blong mi.” (Ol Sam 86:5-7) !Tok ya, “O Jeova,” Deved i talem bakegen mo bakegen we i soemaot olsem wanem hem i frengud wetem God! Oltaem yumi mas gat sem fasin ya taem yumi prea. Deved i prea long wan narafala taem bakegen: “Plis yu fogivim mi from ol sin blong mi mo ol rabis fasin blong mi, we mi stap mekem taem mi yang yet. [O Jeova, NW], yu yu gud tumas, mo oltaem yu yu [kaengud, NW], plis yu tingbaot mi oltaem.” (Ol Sam 25:7) Gudfala fasin blong Jeova i bigwan tumas—tru long ransom sakrifaes blong Jisas, hem i stap soem fasin sore long ol man we oli tanem tingting blong olgeta from ol sin blong olgeta, mo hem i stap soemaot kaengud fasin long ol Wetnes blong hem we oli gat fasin tangkyu mo oli holemstrong long hem.—Ol Sam 100:3-5; Malakae 3:10.
9. ?Wanem samting man we i tanem tingting blong hem from ol sin blong hem i mas tingting strong long hem?
9 ?Yumi mas harem nogud from ol mastik we yumi mekem bifo? Sipos naoia yumi stretem ol rod we yumi stap wokbaot long hem, yumi haremgud taem yumi tingbaot tok we aposol Pita i talem long olgeta we oli tanem tingting blong olgeta se “yufala i mas luk long God blong hem bambae i tekemaot ol sin blong yufala.” (Ol Wok 3:19) I gud yumi stap kolosap long Jeova long prea tru long man we i givim laef blong hem olsem wan ransom, Jisas Kraes, we i talem wetem lav se: “Yufala evriwan we yufala i stap hadwok tumas, yufala i stap karem ol hevi samting, yufala i kam long mi. Bambae mi mi givim spel long yufala. Yufala i mas putum yok blong mi long solda blong yufala, blong yufala i mekem wok blong mi. Mo yufala i mas lan long mi, from we mi mi wan kwaet man, tingting blong mi i stap daon. Nao bambae yufala i faenem we tingting blong yufala i gat spel.” Tede taem ol Wetnes we oli stap holemstrong, oli prea long Jeova long nambawan nem blong Jisas, i tru tumas, oli faenem se tingting blong olgeta i gat spel.—Matyu 11:28, 29; Jon 15:16.
10. ?Olsem wanem buk blong Ol Sam i soemaot se kaengud fasin blong God i impoten?
10 Buk blong Ol Sam i tokbaot “kaengud fasin” blong Jeova i bitim wan handred taem. !I tru se kaengud fasin ya i bigwan olgeta! Long ol fo faswan vas long buk blong Sam 118, hem i askem long ol man blong God blong talem tangkyu long Jeova, we fo taem i talem bakegen tok ya “kaengud fasin blong hem i no save finis.” (NW) Sam 136 i talemaot bakegen “kaengud fasin blong hem” (NW) 26 taem. Long olgeta rod blong yumi, yumi save mekem mastik long hem—mo olsem Jemes 3:2 i talem se “plante taem yumi evriwan i mekem i no stret”—i gud yumi rere oltaem blong lukaot Jeova blong fogivim ol sin blong yumi, trastem fasin sore mo kaengud fasin blong hem. Kaengud fasin blong hem i soemaot se hem i stap holemtaet fasin ya blong laekem yumi tumas. Sipos yumi strong mo gohed blong mekem wil blong God, bambae hem i soemaot fasin lav blong hem long yumi, i givhan long yumi blong winim olgeta trabol.—1 Korin 10:13.
11. ?Olsem wanem wok we ol elda oli save mekem oli save givhan blong tekemaot nogud filing?
11 Maet yumi save foldaon from sam samting we ol narafala man oli mekem. Plante pikinini, sam man oli bin mekem nogud long olgeta long saed blong seks no kilim olgeta bitim mak, mekem se samfala oli gat trabol long filing blong olgeta no oli harem se ol man oli no nidim olgeta. Man olsemia i save singaot i go long Jeova, trastem Jeova se bambae hem i ansa long prea blong hem. (Ol Sam 55:16, 17) Wan elda we i gat kaen fasin i intres blong givhan long wan man olsem blong kasem save se trabol ya i no kamaot from fol blong hem. Mo afta, elda ya we i stap telefon oltaem i go long hem i save givhan long man no woman ya kasem taem we hem i naf blong ‘karem ol baden blong hem.’—Galesia 6:2, 5, NW.
12. ?Olsem wanem fasin blong harem nogud i stap kam antap, be yumi save mekem wanem blong winim olgeta?
12 I gat plante narafala trabol we ol man blong Jeova oli stap fesem tede. I stat long Faswan Bigfala Faet Blong Wol long 1914, ol bigfala trabol oli stat blong spolem wol ya. Olsem Jisas i talem, ol samting ya, “i olsem we woman we i gat bel i jes harem fastaem we bak blong hem i soa blong i bonem pikinini.” Fasin blong harem nogud i kam bigwan taem “fasin ya blong wol i kasem en blong hem” (NW) i stap kam moa kolosap. (Matyu 24:3, 8) “Smol taem” blong Setan, naoia i stap go blong kasem nogud en blong hem. (Revelesen 12:12) “Hem i olsem wan laeon we i stap singaot bigfala” we i stap lukaot wan narafala anamol blong kakae, bigfala Man ya blong Agens i stap yusum olgeta rod blong traem seraotem yumi long ol sipsip blong God mo blong spolem yumi. (1 Pita 5:8) !Be hem i no save win! From we, olsem Deved, yumi stap putum ful tras blong yumi long God ya, Jeova.
13. ?Olsem wanem papa mama wetem ol pikinini blong olgeta oli save haremgud long gudfala fasin blong Jeova?
13 Deved i tijim pikinini boe blong hem Solomon blong hem i mas rili dipen long gudfala fasin blong Jeova. Taswe, Solomon i save tijim ol prapa pikinini blong hem se: “Yu mas trastem Jeova long ful hat blong yu. Yu no mas stanap long prapa waes blong yu nomo. Long olgeta samting we yu yu mekem, lesin long hem, mo hem bambae i mekem ol rod blong yu oli stret. Yu no mas kam waes long prapa ae blong yu. Fraet gud long Jeova mo tanem baksaed blong yu long samting we i nogud.” (Proveb 3:5-7) Ol papa mama tede oli save mekem olsem blong tijim ol pikinini blong olgeta olsem wanem blong prea mo trastem Jeova mo olsem wanem blong winim ol trabol blong wol—olsem ol strong traem we ol pikinini oli save kasem long skul from ol fren blong olgeta mo fasin blong mekem nogud long saed blong seks. Fasin ya blong folem ol rul blong Baebol wetem ol pikinini blong yumi evri dei i save mekem se yangfala hat blong olgeta oli rili save laekem Jeova mo dipen long hem nomo long prea.—Dutronome 6:4-9; 11:18, 19.
Ol Bigbigfala Wok Blong Jeova
14, 15. ?Wanem sam long ol wok blong Jeova we yumi no naf blong skelem?
14 Wetem strong bilif Deved i talem se: “[O Jeova, “NW”], i no gat narafala god we i olsem yu, i no gat wan i stap we i stap mekem ol gudgudfala wok olsem we yu yu bin mekem.” (Ol Sam 86:8) Ol wok blong Jeova oli bigfala tumas, oli hae tumas, oli nambawan, i no gat man we i naf blong kasem save evriwan. Olsem tede, ol man blong sayens oli stap lukluk plante long ol samting we oli stap long skae—olsem wanem skae i bigwan, ol naes samting we oli stap long hem, fasin blong olgeta blong muf—oli mekem ol man i sapraes tumas, i bitim long taem blong Deved we i no gat bigfala save long wanem i stap long skae. Mo, samting ya i pusum hem blong talem se: “Skae i stap talemaot bigfala paoa blong God, mo ol samting ya long hem oli stap soemaot ol gudfala wok we God i mekem.”—Ol Sam 19:1.
15 Yumi save luk ol nambawan fasin blong Jeova long ol samting we hem i wokem, olsem ples we hem i putum wol long hem mo i reregud wol blong i save gat dei mo naet, ol kaen sisen no taem, taem blong planem sid mo taem blong tekem kakae, mo plante gudfala samting we hem i mekem blong ol man oli haremgud long hem long fyuja. !Jeova i wokem bodi blong yumi blong haremgud long ol wok blong hem we oli stap raonabaot long yumi!—Jenesis 2:7-9; 8:22; Ol Sam 139:14.
16. ?Wanem samting we i bigwan olgeta we i soemaot gudfala fasin blong Jeova, i stap lidim yumi blong mekem wanem nambawan wok?
16 Afta we Adam mo Iv tufala i brekem loa blong God, fasin blong harem nogud i spolem ol man long wol kasem taem blong yumi tede. From lav blong Jeova, hem i mekem wan gudfala wok taem hem i sanem Pikinini blong hem i kam long wol blong talemaot Kingdom blong God mo blong i ded olsem wan ransom blong pemaot olgeta man long wol. !Mo long fasin we i nambawan olgeta! Nao Jeova i mekem Kraes i laef bakegen long ded blong i joen wetem hem mo kam King ya we hem i jusum. (Matyu 20:28; Ol Wok 2:32, 34) God i jusumaot sam man tu we oli stap tru long hem blong kam “wan nyufala man” we bambae oli rul wetem Kraes olsem “nyufala heven” long kaen fasin. Bambae oli rulum wan “nyufala wol” sosaeti we plante milyan man bambae oli laef bakegen long ded. (2 Korin 5:17; Revelesen 21:1, 5-7; 1 Korin 15:22-26) !Ol wok blong Jeova bambae oli kasem wan nambawan mak! I tru tumas, yumi save talem se: “O Jeova, . . . !Yu yu fulap long gud fasin! Mo yu yu holemgud fasin ya blong givim long olgeta we oli fraet gud long yu.”—Ol Sam 31:17-19, NW.
17. ?Taem yumi lukluk ol wok blong Jeova, olsem wanem Sam 86:9 i stap kamtru?
17 Ol samting we Jeova i stap mekem tede, Deved i tokbaot tu long buk blong Sam 86:9 se: “Ol man blong olgeta kantri, yu yu bin mekem olgeta, mo bambae oli kam, oli bodaon long yu, [O Jeova, “NW”], oli presem hae nem blong yu.” Afta we hem i stap singaot ol nyufala man blong hem we oli stap yet long medel blong olgeta man, “smol kampani,” (NW) we bambae oli rul long Kingdom, Jeova i gohed blong hivimap “wan bigfala kampani” (NW) blong ol “narafala sipsip” (NW) long medel blong “olgeta nesen,” (NW) plante milyan we oli soemaot bilif blong olgeta long blad blong Jisas we i bin ron. Olgeta ya oli kam olsem wan bigfala ogenaesesen, wan sosaeti ya nomo long wol tede we i laekem pis. Folem samting ya, ol enjel blong heven oli foldaon long fored blong Jeova, mo oli talem se: “God ya blong yumi, olgeta man oli mas presem hem, oli mas leftemap nem blong hem, oli mas talemaot waes blong hem, oli mas talem tangkyu long hem, oli mas ona long hem, oli mas talemaot hae nem blong hem, mo oli mas talemaot paoa blong hem, gogo i no save finis.” Bigfala kampani tu i stap leftemap nem blong Jeova, oli stap mekem wok blong hem “long dei mo long naet,” wetem hop se oli save stap sef long en blong wol blong naoia mo blong laef foreva long wan paradaes long wol.—Luk 12:32; Revelesen 7:9-17; Jon 10:16.
Jeova i Hae Tumas
18. ?Olsem wanem Jeova i soemaot se hem ‘nomo i God’?
18 Narafala samting se Deved i stap tingtinggud long haenem blong Jeova, mo i talem se: “Yu yu [hae, “NW”], mo yu stap mekem ol bigbigfala samting. Yu nomo yu God.” (Ol Sam 86:10) Longtaem finis i kam, Jeova i bin soemaot se rili hem i stap mo ‘hem nomo i God.’ Fero i wan nogud man Ijip we i traem Moses i se: “?Hu ya Jeova, blong bambae mi mi harem voes blong hem blong letem ol man Isrel oli go? Mi mi no save Jeova nating.” !Be i no longtaem biaen hem i save se Jeova i hae olgeta! God we i gat olgeta paoa i daonem ol god blong Ijip mo ol pris blong mekem majik taem hem i sanem ol bigfala trabol, i kilim i ded ol fasbon pikinini blong Ijip mo i spolem Fero wetem ol ami blong hem long Red Si. !I tru tumas, i no gat wan long medel blong olgeta god we i olsem Jeova!—Eksodas 5:2, NW; 15:11, 12.
19, 20. (a) ?Wetaem singsing we i stap long Revelesen 15:3, 4 i kamaot bigwan olgeta? (b) ?Olsem wanem naoia yumi save joen long wok blong Jeova?
19 Olsem God ya nomo, Jeova i mekem ol nambawan wok blong rerem ol man we oli obei mo wosip long hem blong kamaot long Ijip blong naoia—wol blong Setan. Hem i gat ol Wetnes blong hem we oli stap talemaot jajmen blong hem long olgeta ples long wol tru long wok blong prij. Wok ya i bigwan tumas, i bitim ol taem bifo, we i fulumap profet tok blong Jisas long Matyu 24:14. I no longtaem, bambae “en” (NW) i mas kam, we bambae Jeova i soemaot haenem blong hem blong mekem wan bigfala samting we i no bin hapen bifo, hemia blong karemaot olgeta nogud fasin long wol ya. (Ol Sam 145:20) Ale singsing blong Moses mo singsing blong Smol Sipsip bambae i kamaot bigwan se: “?Hae God, hu man i no save ona long yu? ?Hu man i no save leftemap nem blong yu? Yu nomo yu tabu. Bambae ol man long olgeta kantri oli save kam blong mekem wosip long yu, from we yu yu soemaot finis ol stret fasin blong yu.”—Revelesen 15:3, 4.
20 I gud yumi gohed strong long rod blong yumi blong tokbaot gudfala plan blong God wetem ol narafala. (Skelem wetem Ol Wok 2:11.) Jeova bambae i gohed blong mekem ol bigfala wok we oli nambawan long taem blong yumi tede mo tu long fyuja, olsem nekis haf blong stadi blong yumi bambae i tokbaot.
[Ol futnot]
a Andrew A. Bonar, wan man we i tokbaot Baebol long 1874 i talem se: “I gat plante mo plante long olgeta fasin blong God, nem blong hem, we i kamaot long laswan haf blong Sam [85]. Hemia i kamaot from we hem i folem wan narafala Sam, ‘Wan Prea Blong Deved,’ kolosap olsem Sam 85, we hem i fulap gud wetem ol gudgudfala fasin blong Jeova. Bigfala poen long Sam ya [86] i nem blong Jeova.”
b Lukluk long Wekap! (Engglis) blong Jun 22, 1984, pej 28 we Watchtower Bible and Tract Society of New York, Inc. i prentem.
c Blong kasem moa save, luk ripot blong 1992 Sevis Yia Blong Ol Wetnes Blong Jeova raonabaot long wol we i stap long Wajtaoa, Janewari 1, 1993.”
?Yu Yu Rimemba?
◻ ?From wanem yumi mas gat sem tingting blong mekem prea olsem Sam 86 i soemaot?
◻ ?Olsem wanem yumi save frengud wetem Jeova?
◻ ?Olsem wanem Jeova i soemaot gudfala fasin blong hem long yumi?
◻ ?Wanem sam long olgeta wok blong Jeova we yumi no naf blong skelem?
◻ ?Long wanem fasin Jeova ‘God nomo’ i hae tumas?
[Tok Blong Pija Long Pej 10]
Long “nyufala wol,” we bambae i kam, ol nambawan wok blong Jeova bambae oli gohed blong talemaot glori mo ol gudfala fasin blong hem