Wokbaot Wetem Fulhat

“O Jeova, tijim mi . . . Mekem hat blong mi i fulwan blong mi fraet long nem blong yu.”​—OL SAM 86:11, NW.

1. ?Olsem wanem Jeova i givim pei long ol man we oli holemstrong long hem?

‘O JEOVA, yu nomo, yu God.’ (Ol Sam 86:​8, 10) Deved i presem God wetem hat we i fulap long fasin tangkyu. Bifo we Deved i kam king long ol man Isrel, Jeova i sevem hem from Sol mo from ol man Filistia. Taswe, hem i save sing olsem se: “Jeova i ples blong haed blong mi mo hem i strongfala sefples blong mi mo hem i sevem mi long ol enemi blong mi. Wetem man we i stap holemstrong long yu bambae yu yu gud long hem.” (2 Samuel 22:​2, 26) Jeova i sevem trufala man blong hem long ol plante traem. Deved i save trastem mo holemstrong tingting long God blong hem, be i no naf oltaem hem i nidim God blong i soem rod long hem. Nao Deved i askem God se: “O Jeova, tijim mi long rod blong yu.”​—Ol Sam 86:11, “NW.”

2. ?Jeova i yusum wanem blong tijim yumi?

² Deved i sakemaot ol tingting blong wol mo ol waes tok blong wol. Hem i wantem “Jeova i tijim” hem, olsem we biaen profet blong God i talem. (Aesea 54:13) Long taem blong Deved, i gat naen buk nomo blong Baebol we hem i save tingting dip long olgeta. !Be, save ya long Jeova i impoten tumas long hem! Tede yumi save tingting dip long olgeta 66 buk blong Baebol mo tu long plante buk blong Kingdom we “slef ya we i stret mo waes” i stap givim blong tijim yumi. (Matyu 24:45) Olsem Deved, yumi save askem Jeova, blong tabu speret blong hem i save givhan long yumi blong stadi dip long ol ‘samting we oli rere finis blong ol man we oli laekem [God] tumas. . . . Olgeta samting we i haed.’​—1 Korin 2:​9, 10.

3. ?Olsem wanem save blong Baebol i givhan long yumi?

³ Baebol i gat ansa long evri kwestin mo trabol we oli save kam long laef blong yumi. “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong, from we tok ya blong Baebol i stap mekem yumi harem gud, i stap mekem tingting blong yumi i longfala.” (Rom 15:4) Fasin blong tingbaot save we i kam long Jeova bambae i givim paoa long yumi blong winim ol hadtaem, i leftemap tingting blong yumi taem yumi harem nogud, mo i mekem hop blong yumi long Kingdom i stap strong long hat blong yumi. I gud yumi glad taem yumi ridim mo tingting dip long Tok blong God “long dei mo long naet,” from waes blong Baebol i olsem “wan tri blong laef long olgeta we oli kasem, mo long olgeta we oli holemtaet long hem oli save haremgud.”​—Ol Sam 1:​1-3; Proveb 3:​13-18; lukluk tu long Jon 17:3.

4. ?Long saed blong fasin blong yumi, Jisas i givim wanem eksampel long yumi?

⁴ Oltaem Pikinini blong God, Jisas, oli kolem hem tu se “Laen blong Deved,” i stap dipen long Jeova blong i tijim hem. (Matyu 9:27)a Hem i talem se: “Mi, mi Pikinini blong God, mi no save mekem wan samting nating long tingting blong mi nomo. Mi mi save mekem ol samting ya nomo we mi luk Papa blong mi i stap mekem. Ol samting we Papa blong mi i mekem, mi, mi Pikinini blong hem, mi tu mi mas mekem.” “Mi mi no mekem wan samting nating, mi wan. Mi mi stap talemaot ol samting ya nomo we Papa blong mi i tijim mi finis long hem.” (Jon 5:19; 8:28) Jisas i givim wan eksampel long yumi ‘blong bambae yumi biaen long hem.’ (1 Pita 2:21) !Traem tingbaot! Sipos yumi stadi olsem Jisas i mekem, long eni traem we yumi stap long hem bambae yumi save mekem samting olsem we Jeova bambae i wantem yumi mekem. Oltaem rod blong Jeova i stret rod.

5. ?Wanem ya “trutok”?

⁵ Biaen Deved i talem se: “Bambae mi obei long yu, mi holem ol trutok blong yu.” (Ol Sam 86:​11) Wan taosen yia biaen, Paelat i toktok long Jisas, Pikinini blong Deved, i askem hem se: “?Wanem ya trutok ya?” Be Jisas i jes ansa long kwestin ya i no longtaem, hem i talem long Paelat se: “Mi mi no King olsem ol king blong wol ya,” mo bakegen i se: “Yu ya yu talem we mi mi king. Mi mi bon, mi kam long wol ya blong wan samting nomo, blong mi talemaot ol tok blong leftemap trutok.” (Jon 18:​33-38) Olsemia nao, Jisas i talemaot se trutok i stap poen i go long Kingdom blong Mesaea. Yes, ful stampa tok blong Baebol hemia Kingdom we bambae i mekem nem blong Jeova i tabu.​—Esikel 38:23; Matyu 6:​9, 10; Revelesen 11:15.

6. ?Taem yumi wokbaot long trutok, wanem samting yumi mas lukaotgud long hem?

⁶ ?Blong wokbaot long trutok, samting ya i minim wanem? Hem i min se yumi mas mekem Kingdom hop i bigfala samting long laef blong yumi. Laef blong yumi i mas laenap wetem trutok blong Kingdom. Tingting blong yumi i no mas hafhaf taem yumi putum ol intres blong Kingdom long fasples long laef blong yumi, yumi mas gat strong tingting blong talemaot trutok blong Kingdom long evri jans we yumi gat, olsem Jisas i mekem. (Matyu 6:33; Jon 18:37) Yumi no save tekem smoltaem nomo long trutok, mekem smol wok nomo blong ol man oli luk, be biaen yumi tekem narafala rod yumi mekem ol samting we yumi nomo yumi wantem, yumi tekem plante taem long spel mo pleplei no tekem wan wok we i kakae taem blong yumi no yumi slef “blong mane.” (Matyu 6:24) Yumi save lus long wan long olgeta rod ya, neva yumi save faenem rod blong gobak long ‘get ya we i smol nomo blong go kasem laef.’ !Yumi no mas lego rod ya! (Matyu 7:​13, 14) Bigfala Tija blong yumi, Jeova, i yusum Tok blong hem mo ogenaesesen blong hem, blong mekem laet i saen long rod ya. Hem i se: “‘Hemia rod ya. Wokbaot long hem, yufala ol man,’ i nogud bambae yufala i go long raetsaed no yufala i go long lefsaed.”​—Aesea 30:21.

Fasin Fraet We i Stret

7. ?Olsem wanem yumi save mekem hat blong yumi i “fulwan”?

⁷ Prea blong Deved i gohed long vas 11, se: “Mekem hat blong mi i fulwan blong mi fraet long nem blong yu.” (NW) Olsem Deved, yumi mas wantem gat wan tingting nomo, taem yumi mekem wil blong God. Samting ya i laenap wetem advaes blong Moses, se: “?Mo naoia, O Isrel, Jeova God blong yufala i askem blong yufala blong fraet long Jeova, God blong yufala, blong bambae yufala i save wokbaot long ol rod blong hem mo blong yufala i laekem hem mo blong bambae yufala i mekem wok blong Jeova God blong yufala wetem olgeta hat blong yufala mo wetem olgeta sol blong yufala, blong yufala i holem ol loa blong Jeova mo ol rul blong hem we mi mi stap talemaot long yufala tede, blong yufala i haremgud?” (Dutronome 10:​12, 13) Yes, hem i gud long yumi sipos yumi givim hat mo sol blong yumi blong mekem wok blong Jeova. Olsemia nao yumi soemaot fasin fraet we i stret long bigfala nem blong hem. Nem blong Jeova i minim “Hem We i Wokem,” hem nao i laenap wetem wok blong mekem ol bigfala plan blong hem oli kamtru. Nem ya i minim bigfala rul blong hem tu long olgeta ples long heven mo wol. Sipos yumi luksave haenem blong God taem yumi mekem wok blong hem, bambae fasin fraet long man i no save pulum yumi blong lego rod ya. Tingting blong yumi bambae i no hafhaf. Be, bambae yumi fraet blong mekem samting we Jeova, Bigfala Jaj mo Hae Masta, we hem i holem laef blong yumi long han blong hem, i no glad long hem.​—Aesea 12:2; 33:22.

8, 9. (a) ?Blong no kam olsem ol “man blong wol ya”, samting ya i minim wanem? (b) ?Wanem samting yumi mas mekem from we yumi stap “long fes blong olgeta enjel mo long fes blong olgeta man long wol”?

⁸ Nating se yumi kasem ol rabis tok mo ol man oli ronem yumi, bambae yumi folem eksampel blong Jisas we hem i no fraet blong stap olsem man we i no joen long ol rabis man blong wol ya we oli stap raonabaot long yumi. (Jon 15:​17-21) Samting ya i no min se ol disaepol blong Jisas oli mas stap olgeta nomo no oli stap haed long wan bigfala haos. Jisas i talem long Papa blong hem long prea se: “Mi mi no askem long yu blong yu tekemaot olgeta long wol ya. Mi wantem blong yu blokem prapa man nogud ya Setan i no kam spolem olgeta, yu holem olgeta oli sef. Olsem we mi mi no man blong wol ya, olgeta ya tu oli no man blong wol ya. Plis yu makemaot olgeta long trutok, blong oli tabu, oli man blong yu. Tok blong yu, hemia trutok ya. Olsem we yu yu sanem mi mi kam long wol, oraet, long sem fasin mi mi sanem olgeta ya oli go long wol.” (Jon 17:​15-18) Olsem Jisas, yumi mas go long olgeta ples long wol blong talemaot trutok blong Kingdom. Ol man oli save kam luk Jisas. Ol man oli haremgud long fasin we hem i stap tij long hem. (Lukluk Matyu 7:​28, 29; 11:​28, 29; Jon 7:46.) Ol man oli mas harem olsem tu taem oli stap wetem yumi.

⁹ Fasin blong frengud wetem ol narafala man, fasin blong lukaotgud long hea mo lukluk blong yumi, talem ol tok we oli kaen mo oli klin, oli mas pulum ol man we hat blong olgeta i stret blong oli laekem yumi mo mesej blong yumi. Yumi mas klin, yumi no mas putum ol klos we oli pulum ae, yumi no mas kampani wetem ol fren we oli save pulum yumi blong joen long ol rabis fasin blong wol, mo krangke fasin, fasin blong brekem loa we ol man raonabaot long yumi oli stap mekem. From we yumi “stap stanap long fes blong olgeta enjel mo long fes blong olgeta man long wol tu, blong oli lukluk ol trabol blong” yumi, yumi mekem wok blong hem 24 haoa evri dei mo yumi mas gat gudfala Kristin fasin. (1 Korin 4:9; Efesas 5:​1-4; Filipae 4:​8, 9; Kolosi 4:​5, 6) Hat blong yumi i mas fulwan long saed ya.

10. ?Olsem wanem Jeova i tingbaot ol man we hat blong olgeta i fulwan long wok blong hem?

¹⁰ Yumi ya we yumi gat fulhat blong fraet long nem blong Jeova, yumi tingting dip long ol bigfala plan blong hem mo yumi stap mekem tabu wok blong hem, bambae hem i tingbaot yumi. “From we ae blong Jeova i stap lukluk i go long olgeta ples long wol, nao hem i yusum paoa blong hem blong givhan long olgeta we oli ona long hem long ful hat blong olgeta.” (2 Kronikel 16:9) Profet tok ya long Malakae 3:​16, i stap tokbaot taem blong yumi, i se: “Long taem ya, olgeta we oli fraet gud long Jeova oli stap toktok tugeta, wanwan long fren blong hem. Mo Jeova i stap harem toktok ya mo i lesing gud. Nao oli stat raetem tok long buk blong rimemba we i stap long fored blong hem, blong rimemba long olgeta we oli fraet gud long Jeova, mo olgeta we oli tingbaot nem blong hem.” !I gud yumi mekem hat blong yumi i fulwan blong yumi fraetgud long Jeova!

Kaengud Fasin Blong Jeova

11. ?Olsem wanem bambae kaengud fasin blong Jeova i stap long olgeta we oli stap holemstrong long hem?

¹¹ !Prea blong Deved i dip! Hem i gohed i se: “Mi stap presem yu, O Jeova God blong mi, wetem olgeta hat blong mi, mo bambae mi leftemap nem blong yu gogo i no save finis, from we kaengud fasin blong yu i bigwan tumas long mi, mo yu yu sevem sol blong mi from Seol, ples blong hem we i daon olgeta.” (Ol Sam 86:​12, 13, “NW”) Namba tu taem long Sam ya, Deved i presem Jeova from kaengud fasin blong Hem​—trufala lav blong Hem. Lav ya blong hem i bigwan tumas mekem se i save sevem man long ol trabol we oli luk olsem se oli strong tumas. Taem Sol i stap lukaotem Deved long drae ples, maet Deved i harem se hem i stap go kolosap long ded. I olsem we hem i stap lukluk Seol ya we i daon we i daon​—hemia hol blong beregraon. !Be Jeova i sevem hem! Long sem fasin, oltaem Jeova i stap sevem ol man blong wok blong hem tede long fasin we i nambawan, mo hem i stap givhan tu long ol man we oli stap holemstrong bilif blong olgeta longtaem go kasem ded. Olgeta we oli holemstrong long hem bambae oli kasem pei blong olgeta, sipos oli ded bambae oli save kasem pei ya laef bakegen.​—Lukluk Job 1:​6-12; 2:​1-6, 9, 10; 27:5; 42:10; Proveb 27:11; Matyu 24:​9, 13; Revelesen 2:10.b

12. ?Olsem wanem ol lida blong skul oli flas mo oli man blong mekem trabol, mo wanem pei bambae oli kasem?

¹² Long saed blong ol man blong ronem man Deved i singaot bigwan se: “O God, ol flas man oli agensem mi. Mo grup blong ol rabis man oli stap lukaotem sol blong mi, mo olgeta ya oli no stap tingbaot yu nating.” (Ol Sam 86:​14, “NW”) Tede, ol lida blong Krisendom tu oli haf blong ol man ya we oli stap ronem man. Olgeta ya oli stap talem se oli wosip long God be oli stap tekemaot tabu nem blong hem long Baebol mo oli putum tok ya “Masta” mo oli talem se hem i olsem wan tokhaed ya Triniti. Tok ya yu no save faenem long Baebol. !Oli flas man stret! Antap long hem, oli traem blong pulum ol haeman blong politik blong oli blokem mo putum ol Wetnes blong Jeova long kalabus, olsem we oli stap mekem yet long plante kantri long wol. Ol lida ya blong ol skul we oli stap tok nogud long nem blong God bambae oli kasem pei blong olgeta, wetem olgeta haf blong Bigfala Babilon we i olsem woman blong rod.​—Revelesen 17:​1, 2, 15-18; 19:​1-3.

13. ?Wanem fasin Jeova i soemaot taem hem i talemaot gud fasin blong hem?

¹³ Be wetem fasin glad Deved i gohed i prea se: “Be yu Jeova, yu yu wan God we i gat sore mo i fogif. Yu yu slou blong kam kros, mo yu yu fulap long kaen gud fasin mo trutok.” (Ol Sam 86:​15, “NW”) Yes, ol fasin ya blong God blong yumi oli nambawan tumas. Ol tok ya oli mekem yumi tingbaot taem ya long Hil blong Sinae taem Moses i askem blong luk bigfala laet blong Jeova. Jeova i ansa se: “Bambae mi mi letem yu yu luk bigfala laet ya we i soemaot se mi mi stap, mo long fes blong yu, bambae mi talemaot tabu nem blong mi long yu.” Be hem i givim woning long Moses se: “Be bambae mi no save letem yu yu luk fes blong mi, from we sipos wan man i luk fes blong mi, man ya bambae i ded from.” Biaen Jeova i kamdaon long klaod, mo i talemaot se: “Mi mi [Jeova, NW], mi Masta blong yufala. Mi mi no olsem ol narafala god ya. Fasin blong mi, oltaem mi gat sore long man, mo mi stap givhan long man long gladhat blong mi. Mi mi no save kros kwik. Oltaem mi stap laekem man tumas, mo oltaem mi stap holemstrong promes blong mi.” (Eksodas 33:​18-20; 34:​5, 6) Deved i talem ol tok ya bakegen long prea blong hem. !Ol fasin ya blong Jeova oli gat bigfala mining long yumi i bitim olgeta samting we yumi save luk! ?Olsem wanem long prapa ekspiryens blong yumi, yumi gat fasin tangkyu from gudfala fasin blong Jeova olsem we ol tok ya oli soemaot?

“Wan Saen We i Minim Gud Fasin”

14, 15. ?Olsem wanem Jeova i mekem ‘wan saen we i minim gud fasin’ wetem ol man blong hem?

¹⁴ Bakegen Deved i askem blesing blong Jeova, hem i se: “Luk long mi mo soem sore long mi. Givim paoa blong yu long man blong wok blong yu, mo sevem pikinini boe blong gel blong wok blong yu. Soemaot wan saen long mi we i minim gud fasin, blong olgeta we oli no laekem mi nating oli save luk mo oli save sem from. From we yu, Jeova, yu save givhan long mi mo yu stap mekem mi mi haremgud.” (Ol Sam 86:​16, 17, “NW”) Deved i luksave se hem i ‘pikinini blong gel blong wok blong Jeova,’ from samting ya hem tu i blong Jeova. I sem mak long yumi evriwan tede we yumi givim laef blong yumi finis long Jeova mo yumi slef long wok blong hem. Yumi nidim tabu speret blong Jeova we hem i stap yusum blong sevem ol man. Taswe, yumi askem God blong yumi blong wokem ‘wan saen we i minim gud fasin’ wetem yumi. Gudfala fasin blong Jeova hemia olgeta gudfala fasin we yumi jes tokbaot. ?Antap long samting ya, wanem saen yumi wantem Jeova i givim long yumi?

¹⁵ Jeova i Man blong Givim “evri samting we oli gud mo evri presen we oli nambawan oli aot long heven nomo, oli kam long yumi” mo long gladhat, olsem we Jisas i talem, from we hem i “givim Tabu Speret long olgeta we oli askem long hem.” (Jemes 1:17; Luk 11:13) !Tabu speret​—hemia wan nambawan presen we i kam long Jeova! From tabu speret, Jeova i save mekem ol man blong hem oli haremgud long hat blong olgeta, nating se ol man oli stap ronem olgeta. Olsemia nao, taem ol aposol blong Jisas oli stanap long fes blong Kaonsel blong jajem olgeta se oli mas ded, oli save haremgud blong talemaot se Jeova i givim tabu speret long olgeta we oli stap obei long hem olsem rula blong olgeta. (Ol Wok 5:​27-32) Glad we i kamaot from tabu speret i mekem oltaem ‘wan saen we i minim gud fasin,’ wetem olgeta.​—Rom 14:​17, 18.

16, 17. (a) ?Wanem saen blong gudfala fasin blong Jeova we hem i givim long Pol mo Banabas? (b) ?Wanem saen hem i givim long ol Kristin long Tesalonaeka we ol man oli stap ronem olgeta?

¹⁶ Long misinari trip i go long Esia Maena, Pol mo Banabas tufala i fesem ol hadtaem, ol man oli ronem tufala tu. Taem tufala i prij long Antiok long Pisidia, ol man Jyu oli no wantem lesin long mesej blong tufala. Taswe, tufala i go luk ol man blong nesen. ?Wanem samting i kamaot from? “Taem ol hiten man oli harem tok ya, oli harem i gud tumas, nao oli stap presem tok ya blong Masta blong yumi. Mo olgeta we God i jusumaot olgeta finis blong oli kasem laef ya we i no save finis, olgeta ya oli bilif long hem.” Be ol man Jyu oli mekem rao i kamaot, nao oli sakemaot ol misinari ya long kantri ya. ?Olsem wanem, tufala ya mo ol nyufala man blong bilif ya oli harem nogud from? No gat, “ol man blong Jisas long Antiok oli stap harem i gud tumas, mo Tabu Speret i fulap long olgeta.” (Ol Wok 13:​48, 52) Jeova i givim saen ya blong gud fasin blong hem.

¹⁷ Biaen, ol man oli stap ronem nyufala kongregesen long Tesalonaeka. Samting ya i mekem se aposol Pol i raetem wan leta blong leftemap tingting blong olgeta, toktok gud long fasin we oli stap holemstrong longtaem long taem blong trabol. Olgeta oli ‘kasem tok ya blong gud nyus, i tru se olgeta i kasem plante trabol, be tabu speret i mekem olgeta i harem gud tumas.’ (1 Tesalonaeka 1:6) ‘Tabu Speret i mekem olgeta i harem gud tumas’ i gohed blong givim paoa long olgeta olsem wan klia saen we i kam long God we hem i gat fasin sore mo hem i kaen, hem i slou blong kam kros, mo hem i fulap long kaengud fasin, mo trutok.

18. ?Olsem wanem ol brata blong yumi long Is Yurop oli soemaot fasin tangkyu long gudfala fasin blong Jeova?

¹⁸ I no longtaem i pas, Jeova i soemaot gud fasin blong hem long ol brata blong yumi long Is Yurop we oli stap holemstrong bilif, hem i daonem olgeta we oli no laekem ol brata ya​—we bifo oli stap ronem mo kilim ol brata. Nating se i no longtaem i pas oli kam fri long ol trabol we oli stap kasem long plante yia finis, ol gudfala brata ya oli mas gohed blong stanap strong longtaem, from we plante oli fesem hadtaem long saed blong mane. Be, ‘Tabu Speret i mekem olgeta i harem gud tumas.’ Oli glad tumas blong yusum fasin fri ya blong olgeta blong mekem moa long wok blong prij. Plante man oli stap lesin long olgeta, olsem ol ripot long ol asembli mo namba blong ol man we oli baptaes i soemaot.​—Lukluk Ol Wok 9:31.

19. ?Olsem wanem yumi save folem ol tok long Ol Sam 86:11?

¹⁹ Ol samting ya we yumi bin tokbaot long haf ya mo long faswan haf oli talemaot bakegen dip prea blong Deved long Jeova, se: “O Jeova, tijim mi . . . Mekem hat blong mi i fulwan blong mi fraet long nem blong yu.” (Ol Sam 86:​11, NW) I gud yumi tingbaot ol tok ya blong teks blong yia 1993 taem yumi stap wok wetem fulhat blong yumi blong sapotem ol intres blong Kingdom mo taem yumi soemaot fasin tangkyu long gudfala fasin blong God blong yumi, Hae Masta Jeova.

[Ol futnot]

?Yu Ansa Olsem Wanem?

◻ ?Yumi soem wanem taem yumi prea olsem se, “O Jeova, tijim mi”?

◻ ?Wanem mining blong tok ya se hat blong yumi i fulwan blong yumi fraet long nem blong Jeova?

◻ ?Olsem wanem Jeova bambae i soemaot kaengud fasin long ol man we oli stap holemstrong long hem?

◻ ?Olsem wanem Jeova i mekem ‘wan saen we i minim gudfala fasin’ wetem yumi?

[Bokis blong pija long pej 16]

Teks blong yia 1993: “O Jeova, tijim mi . . . Mekem hat blong mi i fulwan blong mi fraet long nem blong yu.”​—Ol Sam 86:11, NW.

[Tok Blong Pija Long Pej 15]

Jeova i ples blong haed mo hem i wan strongfala sefples long olgeta we oli stap wokbaot long trutok

[Tok Blong Pija Long Pej 18]

Long Bigfala Asembli Blong Ol Wetnes Blong Jeova “Ol Man Blong Karem Laet” long Sen Petersbur, Rasia, long Jun, i gat 46,214 man oli kam long asembli ya mo 3,256 man oli tekem baptaes. !I gud tumas we olgeta ya oli yusumgud gudfala fasin blong Jeova, mo ‘Tabu Speret i mekem olgeta i harem gud tumas’!