!Ol Nyufala Wok Oli Kamtru!

WAES King Solomon i bin talemaot wan taem, i se: “I no gat wan nyufala samting aninit long san.” (Eklesiastis 1:9) Hemia i tru long saed blong ol samting long wol we yumi stap long hem, ?be olsem wanem long ples ya blong ol samting long saed blong speret we Jeova i wokem? Long ples ya, man we i hae moa long Solomon, yes, hemia we i hae moa long olgeta man, hem i kam nambawan man long nyufala wok blong God. ?Olsem wanem samting ya i kamaot?

Long yia 29 K.T.,a Jisas, man ya we i stretgud olgeta i givim hem wan long Jon blong i baptaesem hem long Jodan Reva. “Taem Jisas i baptaes finis, hem i kamaot long wora, nao wantaem nomo skae i open long hem, mo hem i luk Speret blong God i stap kamdaon olsem we wan sotleg i kamdaon, i kam kasem hem. Nao God i talem se ‘Hemia pikinini blong mi, we mi laekem hem tumas. Tingting blong mi i harem gud tumas long hem.’” (Matyu 3:​16, 17) Taswe, man ya Jisas Kraes i faswan long ol nyufala samting we God i wokem, tabu speret i makemaot hem blong hem i mekem wil blong God. Biaen, folem ded blong Jisas olsem wan sakrifaes, Jisas i kam man blong karem wan nyufala kontrak bitwin God mo wan grup blong ol man we i jusumaot olgeta. Wanwan long olgeta ya oli kam ol “nyufala man” we God i wokem, tabu speret blong God i mekem olgeta oli kam olsem pikinini blong hem blong oli gat hop blong go long heven, wetem tingting ya blong rul wetem Jisas long Kingdom blong heven.​—2 Korin 5:17; 1 Timote 2:​5, 6; Hibrus 9:15.

Bitim plante handred yia finis, olgeta Kristin ya we tabu speret i makemaot olgeta, oli joen wetem Kraes olsem trufala Kristin kongregesen, hemia wan nyufala wok we God i mekem. God i tekemaot kongregesen ya long wol blong i mekem wan samting, olsem aposol Pita i talem, i se: “Yufala, God i bin jusumaot yufala blong yufala bambae i laen blong hem. Yufala i olsem ol pris blong King. Yufala i olsem ol man blong wan ples nomo, we yufala i tabu man blong God. Yufala i olsem ol man we God i tekem yufala i blong hem nomo. God i mekem olsem long yufala, blong bambae yufala i save talemaot oli gudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.” (1 Pita 2:9) Jisas Kraes, faswan man long nyufala wok blong God i gat wok blong mekem. Sem mak, grup ya we i nyufala wok blong God i gat wan impoten wok blong talemaot gud nyus. (Luk 4:​18, 19) Wanwan memba insaed long hem we i kasem 144,000 man nomo, oli mas putum ‘nyufala laef we God i wokem long olgeta, we i stret wetem laef blong hem. Ol fasin blong nyufala laef ya oli stret, oli gud, oli tabu, from we oli kam long trutok nomo.’ (Efesas 4:24; Revelesen 14:​1, 3) Olgeta oli mas wokem frut blong “tabu speret,” we Galesia 5:​22, 23 i stap tokbaot, mo oli mas lukaotgud blong holemstrong long wok blong olgeta.​—1 Korin 4:2; 9:16.

?Olsem wanem long nyufala wok blong God long taem blong yumi? Long 1914, hemia taem we Baebol i makemaot, ol tok blong Revelesen 11:15 oli kamtru, se: “Ol kingdom blong wol ya oli stap aninit long paoa blong Hae God blong yumi, wetem Mesaea blong hem. Mo hem i holem nem blong king, we bambae i rul gogo i no save finis.” Faswan wok blong Kraes olsem wan nyufala King, i blong sakemaot Setan mo ol rabis enjel blong hem long heven oli kamdaon long wol. Samting ya i mekem trabol i kamaot long “wol,” olsem ol trabol we oli kamaot from faswan bigfala faet blong wol.​—Revelesen 12:​9, 12, 17.

Samting ya i olsem wan saen blong soemaot long haf blong olgeta we oli nyufala wok blong God long wol se oli mas joen blong mekem profet tok blong Jisas i kamtru, se: “Mo gud nyus ya blong kingdom [we i stanap finis], bambae oli talemaot long olgeta ples long wol we i gat man long hem, blong oli wetnes long olgeta nesen. Nao biaen, en bambae i kam.” ?Wanem ya “en”? Jisas i gohed blong eksplenem se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem. Be Hae God i tingbaot finis blong katem taem blong trabol ya. Sipos no bambae i no gat man i save stap laef. Be hem i katem taem ya blong bambae i sevem ol man we hem i jusumaot olgeta finis, se oli man blong hem.”​—Matyu 24:​3-14, NW; 21, 22.

Speret blong Jeova i pusum ol man blong nyufala wok blong God, we tabu speret i makemaot olgeta blong oli bisi long bigfala wok blong prij we neva ol man oli bin mekem finis long wol ya. Stat wetem sam taosen man nomo long 1919, namba blong ol man we oli holemstrong tingting blong talemaot Kingdom i gru kasem 50,000 long ol yia 1934​—1936. Olsem profet tok i talem, i se: “Tok blong olgeta i goaot finis, i go long olgeta ples long wol. Tok ya we oli talemaot, i kasem ol las ples blong wol finis.”​—Rom 10:18.

?Olsem wanem, smol haf blong ol man we oli nyufala wok blong God nomo, bambae oli hivap blong kasem sef? No gat, from we profet tok i talem se ol enjel bambae oli holemtaet ol win blong bigfala trabol gogo oli hivimap laswan memba blong Isrel long saed blong speret we oli blong go long heven, be tu long ol “bigfala hif blong man, we olgeta i plante tumas, i no gat man i save kaontem olgeta. Ol man ya oli kamaot long olgeta kala mo long olgeta laen, mo long olgeta kantri, mo long olgeta lanwis.” ?Bambae olgeta ya oli go wea? Yes, bambae olgeta ya oli “kasem bigfala trabol, we ol man oli spolem olgeta tumas, be naoia oli winim ol trabol ya finis.” !Blong kasem laef we i no save finis long wan paradaes long wol!​—Revelesen 7:​1-4, 9, 14.

I gud tumas se, bigfala hif blong ol man ya, oli kamaot long 229 kantri, mo namba blong olgeta kolosap 4,500,000 Wetnes. Plante moa oli stap kam yet, olsem 1,431,171 we oli kam long lafet blong tingbaot ded blong Jisas long Epril 17 long las yia. Long olgeta plante milyan man ya, 8,683 nomo we oli haf blong ol man long nyufala wok blong God we oli stap long wol, oli kakae bred mo waen long Memoriol. Smol grup ya oli no save mekem bigfala wok ya blong prij tede, olgeta nomo. Plante milyan man blong bigfala kampani naoia oli stap wok olsem solda blong wan i joen long solda blong narawan blong oli finisim wok ya wetem olgeta. (Sefanaea 3:9) Mo tu, olgeta memba blong bigfala kampani oli langud blong lukaot long ol wok mo ol narafala responsabiliti kolosap long Hed Kampani blong Isrel long saed blong speret, olsem ol Netinim we oli no man Isrel be oli stap wok wanples wetem ol pris blong bildim bakegen stonwol blong Jerusalem.​—Nehemaea 3:​22-26.

Wokem “Nyufala Heven Mo Nyufala Wol”

!Glad i kamaot from wok ya! Hemia i olsem we Jeova i bin talemaot finis, se: “Mi mi wokem nyufala heven mo nyufala wol. Mo bambae yufala i no moa tingtingbak long ol olfala samting, mo bambae oli no moa girap long hat blong yufala. Be yufala i mas harem gud, yufala i mas glad blong olwe from ol samting we mi mi stap wokem. From we mi stap wokem Jerusalem blong ol man oli save glad, mo mi stap wokem ol man we oli stap long hem blong ol man oli harem gud tumas. Mo bambae mi mi glad long Jerusalem mo mi mi harem gud tumas long ol man blong mi. Mo bambae i no moa gat noes blong man we i krae mo blong man we i singaot from we hem i harem nogud.” (Aesea 65:​17-19) Kraes Jisas mo ol 144,000 man we oli memba blong nyufala wok blong God, we oli laef bakegen long ded, bambae oli stap long nyufala heven ya long wok blong Jeova. Long 1900 yia finis, God i tekemaot olgeta long ol man long wol. Hem i gudwan moa bitim eni gavman long wol we i stap rul long Jerusalem long wol, i gudwan moa bitim taem ya we Solomon i stap rul tu. Hem i Nyufala Jerusalem, we i stap long heven, olsem Revelesen japta 21 i tokbaot ol naes samting we oli stap long hem.

Nyufala Jerusalem hem i woman blong Kraes long saed blong speret, hemia 144,000 man blong hem we tabu speret i makemaot olgeta, we oli joen wetem Man blong olgeta long heven afta we oli ded mo oli laef bakegen long saed blong speret. Revelesen 21:​1-4 i tokbaot olgeta se oli ‘kamaot long God, oli aot long heven oli kam,’ olsem we, God i yusum blong givim ol blesing long ol man long wol. Long rod ya profet tok i save kamtru se: “!Yu luk! Naoia God i mekem ples blong hem wetem ol man. Hem bambae i stap oltaem wetem olgeta, nao olgeta bambae oli man blong hem. God bambae i kampani wetem olgeta, mo hem bambae i God blong olgeta. Hem bambae i ravemaot wora blong ae blong olgeta. Nao bambae i no moa gat man i ded mo man we i krae from ded. Bambae i no moa gat man i krae, mo man i harem nogud long bodi blong hem. Ol samting ya blong bifo oli lus olgeta.”

!Yumi save glad from nyufala heven we God i wokem! I no olsem fasin blong rul blong ol man we longtaem finis i kam oli stap spolem ol man. Gavman ya we God i stanemap bambae hem i stanap blong olwe. Nyufala wok ya blong God wetem ol pikinini blong olgeta long saed blong speret, bigfala kampani, oli glad from narafala promes blong God, se: “‘Olsem we nyufala heven mo nyufala wol we mi mi mekem promes finis long hem,’ hemia tok blong Jeova, ‘sem mak long ol pikinini blong yufala ol man mo nem blong yufala bambae i stanap blong olwe.’”​—Aesea 66:22.

“Nyufala wol” i stat wetem ol man ya we oli pikinini blong ol nyufala man we tabu speret i makemaot olgeta. Hemia wan nyufala sosaeti blong ol man we oli fraetgud long God. Fasin blong no laekem man, fasin blong kilim man, raf fasin, kruked fasin, mo rabis fasin long saed blong seks tede long wol i soem se ol man oli nidim ful jenis long wan nyufala sosaeti blong man long wol, we i wok aninit long rod we nyufala heven i soemaot long hem. Hemia nao plan blong Jeova. Olsem we hem i wokem nyufala heven, long sem fasin hem i wokem nyufala wol sosaeti we i gat pis long hem. Sosaeti ya nomo bambae i laef tru long “bigfala trabol.”​—Revelesen 7:14.

?Wanem samting bambae i kamaot biaen long bigfala trabol ya? Taem Jisas i toktok long ol aposol blong hem, we oli haf blong nyufala heven we bambae hem i rulum wol, hem i promes se: “Tru mi talem long yufala, long nyufala wol ya we bambae i kam, mi, mi Pikinini blong man, bambae mi king, mi sidaon long bigfala jea blong mi. Nao long taem ya, yufala twelef we yufala i biaen long mi, bambae yufala tu i king, yufala i save sidaon long ol bigfala jea blong yufala, we oli olsem jea blong king.” (Matyu 19:28) Olgeta 144,000 man blong Nyufala Jerusalem bambae oli joen wetem Jisas Kraes blong jajem ol man. Lav bambae i tekem ples blong fasin blong man i tingbaot hem nomo mo fasin blong no laekem narafala man olsem stampa blong sosaeti blong man. Ol trabol long saed blong laen, kala, mo kantri blong ol man bambae i finis blong olwe. Sloslou ol fren we oli ded finis bambae oli laef bakegen long ded. Plante milyan man we oli stap holemstrong long God bambae oli kam wan bigfala kampani, we oli joengud olsem famle, blong oli kasem laef we i no save finis long wol taem hem i kam wan paradaes.

Hemia bambae i gud moa bitim wan ples ya (Utopia no Shangri-la) we ol man oli stap tokbaot long tingting blong olgeta nomo. Bambae hem i wan wok we i stap blong olwe​—“promes we God i mekem finis, yumi stap wet long nyufala heven mo nyufala wol, we stret fasin nomo bambae i stap long hem.” (2 Pita 3:​13, NW) Tru ya, hemia wan gudfala samting, wan nambawan promes blong man ya we i talem se, “!Yu luk! Mi mi stap mekem olgeta nyufala samting,” mo hem i gohed i se: “Tok blong mi i tru, mo ol man oli save bilif long hem.”​—Revelesen 21:5.

[Futnot]