Wan Kwestin
?Wanem responsabiliti ol Kristin oli gat blong traem daonem fasin blong sakem doti long win, solwora mo long graon?
Yumi olsem ol Wetnes blong Jeova yumi wari bigwan long plante nogud samting we ol man oli sakem long win mo wora we naoia i stap mekem trabol long wol blong yumi. Yumi gat strong tingting se God i mekem wol ya blong i stap klin, wan gudfala ples blong wan famle we i stretgud olgeta. Plante narafala man oli no gat tingting olsem. (Jenesis 1:31; 2:15-17; Aesea 45:18) Yumi gat strong tingting olsem God se “bambae hem i spolem ol man ya we oli stap spolem wol.” (Revelesen 11:18) Taswe i gud we yumi gat stret tingting, yumi no folem fasin blong ol man tede we oli stap spolem wol. Be, makemgud tok ya “stret tingting.” I stret long Baebol se yumi no bitim mak, no yumi wari tumas blong traem faenem rod blong mekem win, graon, wora oli stap klin.
Ol man oli stap mekem plante doti. Wan eksampel, fasin blong planem kakae, wokem kakae, mo plante taem fasin blong kakae i save mekem plante doti, we plante long ol doti ya oli save rotin. (Ol Sam 1:4; Luk 3:17) Long taem blong kakae we Jisas i mekem wetem ol disaepol blong hem afta we hem i laef bakeken, i gat fis i stap we i tan long sakol faea we i gat smok mo ases long hem, mo oli sakemaot ol bun blong fis. (Jon 21:9-13) Be wol ya i gat prapa rod blong hem wan we i naf blong tekemaot ol smol doti olsemia.
Ol man blong God oli mas tingbaot oltaem blong no spolem ol samting raonabaot long olgeta. Jeova i askem long ol man blong hem bifo blong oli yusum prapa rod blong sakem ol doti, rod ya i givhan long saed blong helt mo blong mekem win, wora mo graon i stap klin. (Dutronome 23:9-14) Mo taem yumi kasem save long tingting blong Jeova long olgeta we oli stap spolem wol, yumi no mas lego ol samting we yumi save mekem blong givhan blong mekem win, graon mo wora oli stap klin. Yumi save soemaot samting ya taem yumi putum doti long prapa ples blong hem, antap moa ol doti we oli gat posen long hem. Yumi traehad blong no joen long fasin mekem ples i doti bakegen afta we oli klinim, i tru moa taem Sisa (gavman) i askem blong mekem olsem. (Rom 13:1, 5) Mo samfala man oli glad blong mekem moa, olsem disisen blong no yusum ol samting we doti blong hem i save stap longtaem, we i no save rotin, be i go stap long bigfala hif blong doti no blong man i sakem i go long solwora.
Be, sipos gavman i no putum wan loa long saed ya, i stap long tingting blong ol Kristin wanwan sipos oli wantem folem fasin ya blong go moa no nogat. Ol nyuspepa mo radyo oli soemaot klia se i isi blong ol man we oli no stretgud olgeta oli foldaon long trap ya blong bitim mak long fasin ya. Advaes blong Jisas i stret se: “Bambae yufala i no jajem narafala man . . . ?Olsem wanem yu stap lukluk pis wud ya we i smol nomo, we i stap long ae blong brata blong yu, be yu no save luk bigfala timba ya we i stap long ae blong yu?” (Matyu 7:1, 3) Sipos yumi stap tingbaot tok ya oltaem, bambae yumi no save fogetem ol impoten tok ya.
Profet Jeremaea i raetem se: “O Jeova, mi mi save gud we man blong graon i no masta blong rod blong hem. Man i no naf blong jusum wanem rod hem i mas wokbaot long hem.” (Jeremaea 10:23) Ol man oli sakemaot rul ya, mekem se oli fesem wan ‘laef we i kam strong tumas,’ olsem 2 Timote 3:1-5 i talem. Mo tok blong God we i stap long Revelesen 11:18 i soemaot se fasin traehad we ol man oli stap mekem blong tekemaot ol trabol long ol samting we i stap givim laef blong yumi, olsem fasin blong sakem posen long win mo wora, bambae oli no save winim. Ol man oli save gohed blong mekem sam moa doti long ples blong yumi no long narafala ples, taswe yumi nidim God nomo blong fiksimap trabol ya blong olwe.
From samting ya i gud moa blong yusum ful paoa blong yumi blong sapotem rod we God bambae i yusum blong tekemaot olgeta trabol ya, bitim we yumi stap fiksimap sam samting nomo. Long fasin ya yumi stap folem eksampel blong Jisas, we hem i spenem plante taem long minista wok blong hem blong “leftemap trutok.” (Jon 18:37) Hem i no givim kakae long olgeta man long wol mo hem i no traem tekemaot olgeta trabol long sosaeti blong man—olsem fasin blong sakem posen long win mo wora—Jisas i tokbaot wan rod nomo we i save fiksimap olgeta trabol we oli stap kasem olgeta man.—Jon 6:10-15; 18:36.
Taem yumi gat tingting blong laekem ol man, samting ya i save pulum yumi blong traehad blong no ademap doti long graon, win mo wora, long semtaem yumi gohed blong talemaot trutok. Hemia i olsem fasin blong tijim ol man blong folem ol trutok blong Baebol blong oli save lego ol samting we oli save spolem bodi blong olgeta, olsem blong smok, fasin blong drong, no ol drag. Olsem plante milyan nyuwan we oli kam disaepol, oli bin lanem fasin blong stap klin mo blong tingbaot ol narafala man. Taswe wok blong prij i daonem bigwan fasin blong sakem doti long win, wora mo graon tede. Be samting we i moa impoten, ol Kristin disaepol oli mas jenisim fasin mo laef blong olgeta naoia blong mekem se oli save naf blong stap long klin Paradaes long wol we bambae God i givim long ol man we oli stap mekem wosip long hem.