?Bambae God i Tekem Yu i Go Long Heven?

PLANTE man oli bilif se bambae oli go long heven taem oli ded. Be samfala oli ting se bambae Kraes i tekem olgeta oli go long heven long wan fasin we oli kolem ‘rapja.’ ?Yu ting se samting ya i save hapen?

!‘Rapja’ i olsem se “plante taosen taosen man oli lus wantaem be i no gat samting i stap blong soem se oli go long weples.” Wan misinari blong Protestan i talem olsemia nao long Evangelical Dictionary of Theology, wod ya “rapja” i stret long “fasin blong jyos i joen wetem Kraes long taem we bambae hem i kambak bakegen.”

Samfala oli ting se i no stret blong livim ol fren mo ol famle blong olgeta i stap mo oli go mitim Jisas Kraes. Nating se i olsem, be plante man oli bilif se ‘rapja’ i mas kamtru. ?Be olsem wanem, bambae hem i kamtru? Sipos i tru, ?be wetaem?

Ol Defren Tingting Long Saed Blong ‘Rapja’

Baebol i soemaot se bifo long stat blong Wan Taosen Yia Rul blong Kraes, i gat wan taem we Baebol i kolem se, taem blong “bigfala trabol.” Jisas i talem se: “Long taem ya, bambae i gat bigfala trabol tumas, we neva man i luk olsem bifo, i stat long taem we God i mekem wol, i kam kasem tede. Yes, mo bambae i no moa gat sam bigfala trabol olsem bakegen samtaem.” (Matyu 24:21; Revelesen 20:6) Samfala oli talem se bambae ‘rapja’ i kamaot bifo long taem blong bigfala trabol. Sam narafala man oli ting se bambae hem i kamaot stret long taem blong bigfala trabol. Be i gat sam narafala we oli ting se bambae ‘rapja’ i kamaot afta long bigfala trabol ya we neva man i bin luk bifo.

Tingting ya se ‘rapja’ bambae i kamaot afta long bigfala trabol, i bin stap strong kam kasem yia 1800. Long taem ya wan grup blong man i gru long Engglan, Jon Nelson Darbe we bifo hem i wan hae man blong jyos blong Aerlan, i lukaotem. Hem wetem ol man blong Anglikan we oli gat sem tingting wetem hem, we biaen ol man oli kolem olgeta se ‘Bretren.’ Darbe i stat blong prij long taon ya Plimat, ples ya we jyos blong hem i stap, i go long Swiselan mo ol narafala ples long Yurop. Hem i stap talemaot se fasin blong Kraes blong kambak bambae i kamaot long tu defren kaen rod. Bambae fastaem ‘rapja’ i stat wetem wan fasin haed, blong tekem “ol tabu man” oli go bifo seven yia blong bigfala trabol we bambae i spolem wol. Mo biaen yumi save luk Kraes i kamaot, we i joen wetem ol “tabu man ya,” mo olgeta evriwan bambae oli rul long wol ya blong wan taosen yia.

Darbe i talemaot long olgeta from wanem i impoten blong no joen long fasin blong wol, mo olgeta we oli folem ol tingting blong hem oli kam olsem ol ‘Eksklusif Bretren.’ B. W. Newton hem i hed long wan narafala grup blong man we oli bilif long ‘rapja’ be i no se bambae i kamaot bifo long bigfala trabol. Aleksanda Ris we hem i talemaot tingting ya se ‘rapja’ bambae i kamaot afta long taem blong bigfala trabol, hem i talem se, “ol tijing blong ‘rapja’ se bambae hem i kamaot long fasin haed i spolem hop blong ol man se bambae Kraes i kambak.”

Olgeta we oli ting se bambae ‘rapja’ i kamaot bifo long bigfala trabol oli bilif se ol defren tingting olsem oli save spolem “ol samting we oli save mekem blong soemaot hop blong olgeta we i joen wetem fasin blong Kraes blong kambak bakegen.” Samfala oli bilif se “‘rapja’ i blong wan grup blong man,” oli stap bilif se olgeta we oli stap holemstrong long Kraes bambae hem i tekemaot olgeta oli go antap fastaem mo olgeta we oli laekem moa fasin blong wol ya bambae hem i tekemaot olgeta biaen.

Plante grup blong man we oli stap talemaot gud nyus oli talem se ‘rapja’ i save kam enitaem nomo long olgeta Kristin we oli gat strong bilif. Be, from we i gat ol defrenkaen tingting, Elim Pentekostal Jyos blong Engglan i mekem wan buklet we i talem se: “Nating se mifala evriwan i bilif long ol samting we oli joen long fasin ya we bambae Jisas i kambak bakegen . . . , man i fri blong talemaot mining blong profet tok stret olsem bilif blong hem wan. Plante oli no strong blong talemaot mining blong profet tok oli stap wet nomo blong ol samting we oli kamaot oli soemaot mining blong profet tok ya.

Tok blong God, Baebol, hemia nao tul we yumi mas yusum blong faenemaot trufala bilif. (2 Timote 1:13; 3:​16, 17) ?Taswe, Baebol i talem wanem long saed blong ‘rapja’?