‘Go Blong Mitim Masta’​—?Olsem Wanem?

TAEM i stap go kwik blong go kasem en blong nogud fasin blong naoia. Ol haoa, ol menet, mo ol seken, oli stap pas mo ol bigfala samting we ol profet oli bin tokbaot bifo, kolosap oli kamtru nao evriwan. ?Be ‘rapja’ i wan long ol samting ya? Sipos i olsem, ?wetaem mo olsem wanem bambae hem i kamaot?

Wod ya “rapja” i no kamaot long Baebol. Be olgeta we oli bilif long hem oli tekem tok blong aposol Pol we i stap long 1 Tesalonaeka 4:​17 olsem stampa blong bilif blong olgeta. I gud yumi skelem tok ya wetem ol vas we oli stap raonabaot long hem. Pol i talem se:

“Ol brata mo sista. Mifala i wantem we bambae yufala i savegud ol trutok blong weswe long olgeta ya we oli ded finis. Mifala i no wantem we bambae yufala i stap harem nogud from olgeta ya, olsem we ol narafala man ya we tingting blong olgeta i no stap long God, oli stap harem nogud from ol ded man blong olgeta. Yumi ya, yumi bilif we Jisas i ded, nao biaen hem i laef bakegen long ded. Ale, from samting ya, yumi bilif we bambae i olsem long olgeta ya, we oli stap bilif long Jisas gogo oli ded. Bambae God i tekem olgeta ya oli kambak bakegen wetem Jisas. Tok ya we mifala i stap talem, hem i tok blong [Jeova, NW]. Hem i talem se yumi ya we bambae yumi stap laef yet, gogo kasem dei ya we hem bambae i kambak bakegen, bambae yumi no save go fastaem long olgeta ya we oli ded finis. Bambae God i tok, nao jif blong ol enjel i singaot, nao wan i blu long bigfala pupu blong God. Nao Masta blong yumi, hem bambae i aot long heven i kamdaon. Nao olgeta ya we oli stap bilif long Kraes gogo oli ded, olgeta ya bambae oli laef bakegen fastaem. Ale, biaen, yumi ya we bambae yumi stap laef yet go kasem dei ya, God bambae i tekem yumi i go antap wetem olgeta ya. Bambae yumi go long klaod blong mitim Masta blong yumi long ples ya antap. Nao bambae yumi stap oltaem wetem Masta blong yumi. From samting ya, i stret blong yufala i stap taltalem ol tok ya long yufala, blong mekem tingting blong yufala i stap strong.”​—1 Tesalonaeka 4:​13-18.

Kongregesen long Tesalonaeka i jes stat nomo taem Pol i raetem faswan leta blong hem i go long ol Kristin long ples ya long 50 K.T. Samfala memba blong kongregesen ya oli harem nogud from sam long olgeta we “oli ded finis.” Be, leta we Pol i raetem i go long ol man Tesalonaeka i leftemap tingting blong olgeta wetem hop blong laef bakegen long ded.

Kraes “i Stap”

Pol i soemaot klia se ol Kristin we oli gat strong bilif we oli ded oli save laef bakegen long ded, mo tu hem i talem se: “Yumi ya we bambae yumi stap laef yet, gogo kasem dei ya we hem bambae i [stap, NW], bambae yumi no save go fastaem long olgeta ya we oli ded finis.” (Vas 15) I gud blong makem tok blong Pol se Masta bambae i “stap” (NW) bakegen. Long ples ya ol olfala hanraet oli yusum Grik wod ya pa·rou·siʹan, we stret mining blong hem se “i stap wetem.”

Taem wan haeman blong wan kantri i visitim wan narafala kantri, oli mas talemaot long olgeta man dei ya we bambae hem i stap long ples blong olgeta. Fasin ya i stret nomo long taem we Masta Jisas Kraes i stap finis. Wajtaoa i soemaot ol pruf long olgeta studen we oli stap stadi long ol profet tok blong Baebol se Jisas i bin kasem paoa mo i bin stap olsem King blong Kingdom blong heven i stat long 1914. Ol samting we oli bin kamaot stat long taem ya oli soemaot Jisas we i stap finis we yumi no save luk wetem ae blong yumi. (Matyu 24:​3-14) Taswe tok ya se ol Kristin we bambae oli stap laef yet long taem ya bambae oli “go long klaod blong mitim Masta blong yumi long ples ya antap,” Pol i no minim se bambae oli save go long klaod we yumi save luk, be hem i tokbaot heven, long ples we Jisas i stap sidaon long raetsaed blong God we yumi no save luk wetem prapa ae blong yumi. (Hibrus 1:​1-3) ?Be hu olgeta ya?

“Isrel Blong God”

Plante vas blong Baebol oli tokbaot ol man Isrel long saed blong bodi mo tu oli tokbaot “Isrel blong God” long saed blong speret. Ol man Jyu wetem ol Hiten man we oli bilif oli kam memba blong grup ya we God i makemaot wetem tabu speret, no paoa blong hem. (Galesia 6:16; Rom 11:​25, 26; 1 Jon 2:​20, 27) Buk blong Revelesen i soemaot se fulnamba blong Isrel long saed blong speret i kasem 144,000, olgeta ya oli stap wetem Smol Sipsip, Jisas Kraes, long hil ya Saeon long heven. Bambae oli save mekem wok blong king mo pris long heven wetem Kraes. (Revelesen 7:​1-8; 14:​1-4; 20:6) Long medel blong olgeta ya i gat olgeta we oli bin joen wetem ol kongregesen long Tesalonaeka mo ol narafala ples, nating se oli kamaot long ol defren kantri.​—Ol Wok 10:​34, 35.

Bifo we wanwan long olgeta memba blong Isrel long saed blong speret oli save kasem praes blong olgeta long heven, oli mas kasem wan spesel ekspiryens. Olsem Jisas i ded long wan pos bifo we i girap i laef bakegen mo i go long heven, ale ol Kristin we oli gat hop blong laef long heven oli mas ded bifo we oli kasem pei blong olgeta. (1 Korin 15:​35, 36) Samting ya i tru long ol memba blong Isrel long saed blong speret we oli bin stap laef long ol faswan handred yia K.T. mo long olgeta tu we oli stap laef tede.

Afta we Pol i talemaot taem ya we Masta i “stap,” (NW) hem i soemaot taem we bambae ol man Isrel long saed blong speret we oli ded finis oli save kasem pei blong olgeta long heven. Pol i raetem se: “From we Masta hem wan bambae i aot long heven i kamdaon, wetem tok blong givim oda, wetem voes blong jif blong ol enjel, mo wetem pupu blong God. Nao olgeta we oli joen long Kraes gogo oli ded, bambae oli girap bakegen fastaem.” (Vas 16, NW) Taswe, stat long taem ya we Jisas i stap olsem King, yumi save se olgeta we oli blong go long heven oli stat blong laef bakegen long ded, i stat wetem ol man Isrel long saed blong speret we oli ded finis from we oli stap holemstrong long God. (1 Korin 15:23) Naoia oli stap mekem wok wetem Jisas long heven. ?Be olsem wanem long sam long ol tabu Kristin we oli stap laef yet long wol? ?Bambae oli wet long ‘rapja’?

“Tekem Yumi i Go”​—?Olsem Wanem?

Afta we Pol i tokbaot ol tabu Kristin we oli ded finis, hem i joenem tok ya mo i talem se: “Ale biaen, yumi ya we yumi stap laef yet long taem ya, bambae hem i tekem yumi i go long ol klaod, tugeta wetem ol, blong mitim Masta long win ya antap. Olsem ya nao, bambae yumi stap oltaem wetem Masta.” (Vas 17, NW) ‘Olgeta we oli stap laef,’ hemia olgeta we oli stap laef yet long taem we Kraes i stap finis. Bambae God i ‘tekem olgeta i go’ antap blong mitim Masta Jisas. Olsem ol faswan Kristin we oli gat strong bilif, oli mas ded olsem man blong oli save go joen wetem Kraes long heven.​—Rom 8:​17, 35-39.

Long leta we Pol i raetem long ol Kristin long Korin, hem i talem se: “Ol brata, hemia tok blong mi, se mit mo blad i no save go insaed long kingdom blong God. Mo bodi ya we i save rotin i no save go insaed long ples we i no gat rotin long hem. Mo naoia mi mi talem wan tok haed long yufala. I no evriwan long yumi we bambae oli slip [long ded], be bambae yumi evriwan i jenis. Wantaem nomo, olsem taem blong satem ae nomo, taem laswan pupu i krae, bambae yumi jenis. From we taem pupu ya bambae i krae, ol dedman bambae oli girap bakegen we oli no moa save rotin, mo bambae yumi jenis.” (1 Korin 15:​50-52, NW) Taem we oli stap ded from strong bilif blong olgeta long taem we Kraes i stap finis, stret long taem ya we oli ded, wanwan long olgeta long smol grup ya blong ol man Isrel long saed blong speret i kasem pei blong olgeta long heven. “Olsem taem blong satem ae nomo,” olgeta i girap bakegen olsem ol speret man mo bambae God i ‘tekem olgeta i go’ antap blong mitim Jisas mo blong wok wetem hem olsem ol man blong rul long Kingdom blong heven. ?Be olsem wanem long ol narafala we oli stap mekem wosip long Jeova? Taem we en blong ol nogud fasin blong naoia i stap kam kolosap, ?bambae olgeta tu oli go antap long heven?

Laef Tru Long Trabol—Be i No Wetem ‘Rapja’

From we Jisas i stap olsem King we i stat long 1914, yumi stap go moa insaed long “taem blong en” blong wol ya. (Daniel 12:4) Pol i givim woning se: “Ol brata mo sista. Long saed blong stret dei mo stret taem blong ol samting ya, i no gat nid blong mi raetem tok i go long yufala. From we yufala i save finis we Dei ya blong Masta blong yumi bambae i mekem ol man oli sek, olsem wan man blong stil, we i kamtru long naet. Taem ol man oli stap talem se [‘!Pis mo seftaem!’, NW] long taem ya nao bambae bigfala trabol i save kasem olgeta, i spolem olgeta. Bambae trabol ya i kasem olgeta wantaem nomo, olsem we woman i harem nogud blong bonem pikinini. Mo olgeta bambae oli no save ronwe.” (1 Tesalonaeka 5:​1-3) Be ol Kristin we oli stap lukaotgud bambae oli ronwe. ?Olsem wanem?

Ol singaot we oli mekem from “!Pis mo seftaem!” i wan saen we i soemaot taem we Jisas i kolem se “bigfala trabol.” Buk blong Revelesen i tokbaot “wan bigfala hif blong man” we oli gat strong bilif mo oli gat hop blong laef foreva long wol we bambae i kam paradaes. Hem i se: “Hemia ol man ya we oli pastru long taem blong bigfala trabol. Mo oli wasem klos blong olgeta finis blong mekem oli waet long blad blong Smol Sipsip ya.” (Revelesen 7:​9, 14, NW; Luk 23:43) Oli no nidim ‘rapja.’ No gat. Be, oli gat hop blong pastru long bigfala trabol long wol. Oli mas stap wekapgud long saed blong speret, blong rere from taem ya. ?Yu save mekem olsem wanem blong stap sef long en blong fasin blong naoia?

‘Hed blong yu i mas klia gud’ mo yu mas putum ‘klos blong faet blong blokem bodi blong yu,’ hemia bilif mo lav, mo yu mas putum “hat blong faet,” hemia hop ya blong yu se bambae yu sef. (1 Tesalonaeka 5:​6-8) Naoia i taem blong luklukgud long ol profet tok blong God we i stap insaed long Baebol. Olsem taem i stap go kwik blong go kasem en blong fasin blong wol, yumi save folem tok blong Pol we i talem se: “Mo bambae yufala i no lukluknogud long tok blong man we i talem se God i givim tok ya long hem. Yufala i mas traem olgeta samting fastaem, nao yufala i save holemstrong ol samting we oli gud.” (1 Tesalonaeka 5:​20, 21) Ol Wetnes blong Jeova oli save welkamem yu long Haos Kingdom blong olgeta, we yu save joen wetem olgeta blong stadi long ol profet tok blong Baebol mo plante narafala samting we i stap insaed long Tok blong God.

Taem yu stap kasem ol stret save mo yu gat bilif, bambae yu luksave bigfala plan blong Jeova God we i stap wok long saed blong wol ya we bambae i save mekem ol trabol oli finis mo i save mekem wol i kam paradaes. Taem yu stap soemaot bilif blong yu, yu save kam wan long olgeta ya we bambae oli pastru long bigfala trabol, yu save gat jans blong mekem welkam long ol milyan man we oli save laef bakegen long ded blong stap long wol ya. !Hemia i wan gladtaem blong laef aninit long Kingdom blong God we i stap long han blong Jisas Kraes wetem olgeta we oli rul wetem hem, we bambae oli “go long klaod blong mitim Masta” taem oli bin laef bakegen blong go long Kingdom blong heven!

Be, olgeta man we oli stap obei gud long God, ?wanem trufala hop blong olgeta long saed blong speret? Hem i no ‘rapja.’ Be, hemia laef we i no save finis long wol ya aninit long rul blong Kingdom blong God.

[Tok Blong Pija Long Pej 7]

Olgeta we oli pastru long bigfala trabol bambae oli welkamem olgeta we bambae oli laef bakegen long ded blong laef long paradaes wol aninit long rul blong Jisas mo olgeta we ‘God i tekem olgeta oli go’ long heven