Ol Rij Blesing Long Distrik Asembli “Ol Man Blong Karem Laet”

KOLOSAP 2,700 yia finis, profet Aesea i bin raetem se: “!Luk! Tudak hem wan bambae i kavremap wol, mo ol nesen bambae oli stap long tudak we i tudak.” (Aesea 60:2) !Ol tok ya oli kamtru! Be, i gat hop, from we Jeova i mekem laet i saenaot. Long las yia, olgeta we oli laekem laet blong God oli go long Distrik Asembli ya “Ol Man Blong Karem Laet.”

Asembli ya i stat kamaot fastaem long Jun, long Not Amerika. Long olgeta manis we oli kam biaen, asembli ya i kamaot tu long Is mo Wes Yurop, Sentrol mo Saot Amerika, Afrika, Esia, mo long ol aelan blong solwora. Plante milyan man oli kam long asembli ya. !Mo hemia wan lafet long saed blong speret we oli haremgud long hem!

“Welkam Long Yufala Ol Man Blong Karem Laet”

Long plante ples asembli ya i stat long Fraede mo i finis long Sande aftenun. Taem ol man oli sidaon kwaet long ples blong olgeta long Fraede moning, oli glad blong harem wan smol tok we i tokbaot olsem wanem laet blong Jeova i stap saenaot i kam klia moa long ol las dei ya. Nao jeaman blong asembli ya i kam long platfom. Hem i makem klia long tok blong hem se ol trufala Kristin oli mas man blong karem laet mo long kaen fasin, hem i se: “!Welkam long yufala ol man blong karem laet!” Program blong asembli ya bambae i givhan long olgeta we oli stap blong oli gohed blong mekem laet blong Jeova i saen.

Nekis tok i kavremap impoten poen long ful asembli ya. Man we i givim tok ya i talem bakegen long ol man we oli stap long asembli ya se laet i no moa saen long ol man bifo finis long garen blong Iden. Stat long taem ya, Setan i satem ae blong ol man blong oli no luk laet blong trutok. (2 Korin 4:4) Nating se i olsem, Jisas i kam olsem “wan laet long olgeta nesen.” (Aesea 42:​1-6) Hem i talemaot klia ol gyaman tijing blong ol skul, soemaot klia ol nogud wok blong tudak, hem i leftemap hae rul blong Jeova mo i talemaot gud nyus blong Kingdom. !Ol man blong Jisas oli mekem sem mak​—mo oli stap gohed yet blong mekem olsem! (Matyu 28:​19, 20) Man blong givim tok ya i pulum tingting blong ol man, i se: ‘Yumi, yumi save kam man blong karem laet, olsem Jisas. I no gat wan narafala wok we i impoten moa long taem blong yumi. Mo i no gat bigfala wok olsemia.’

Taem kolosap faswan haf blong asembli ya long Fraede i finis, i gat wan sapraes i kamaot. Jeaman blong asembli ya i kambak long platfom mo i talemaot ol fo nyufala traket we oli kamaot. Ol man oli klaphan from samting ya, mo evriwan we oli stap oli save kasem wan kopi blong ol traket ya.

Long Fraede aftenun, program blong asembli i tokbaot stampa advaes long ol Kristin man blong karem laet. Tufala faswan tok oli givim ol gudfala advaes olsem wanem blong no letem tudak blong wol i spolem olgeta. From we Setan i save jenisim hem wan i kam wan enjel blong laet, i impoten blong stap stanap strong long saed blong speret blong mekem se ol rabis fasin blong wol ya oli no save pulum yumi. (2 Korin 11:14) Pol i givim advaes ya se: “Yufala i mas no letem fasin blong yufala i kam olsem fasin blong ol man long wol. Yufala i mas letem God i jenisim tingting blong yufala, blong mekem tingting blong yufala i nyufala olgeta. Nao bambae yufala i save jusumaot ol fasin we God i wantem, wanem i gud, mo wanem God i glad long hem mo wanem i stret gud blong mekem.” (Rom 12:2) Olgeta we oli stap long asembli ya oli lanem se fasin blong wan Kristin i stap jenisim tingting blong hem, hem i wan samting we i stap gohed oltaem. Tingting blong yumi i stap gohed blong kam klin mo jenis taem yumi stap stadi Tok blong God mo mekem ol samting we yumi lanem i wok long laef blong yumi. Taswe, yumi stap kam moa blong tekem fasin olsem Jisas, we hem i “fulap long gladhat mo trutok.”​—Jon 1:14.

Ol Yangfala Man Blong Karem Laet

Seken haf blong program long Fraede aftenun i go stret long ol yangfala. Faswan tok (“Ol Yangfala​—?Yufala i Wantem Kasem Wanem Mak?”) i leftemap ol yangfala Kristin we oli gat gudfala eksampel long fasin blong holemstrong bilif. Mo tok ya i givim woning long olgeta bakegen se, olgeta ya nao we Setan i stap traem olgeta bigwan. Wan gudfala man blong spot i nidim wan man blong trenem hem. Long sem fasin, ol yangfala oli nidim help blong papa mama mo kongregesen blong oli stap gohed blong wokbaot long laet.

Gudfala drama ya Mekem Ol Samting We Oli Stret Long Ae Blong Jeova i makemgud poen ya, drama ya i finisim program blong Fraede. Eksampel blong King Josaea i impoten haf blong drama ya. Nating se hem i wan yangfala boe nomo, hem i gat strong tingting blong mekem wok blong Jeova. I gat ol rabis fren we oli stap raonabaot long Josaea, be from hae pris Hilkaea i stap lukaot long hem mo tu from we hem i laekem loa blong God, hem i mekem samting we i stret long ae blong Jeova. I gud ol yangfala Kristin tede oli stap mekem i sem mak olsem hem.

Letem Laet i Saenaot

Afta wan gudfala slip long naet, ol man oli kam long asembli ya long Sarede moning we oli rere blong kasem moa advaes blong Baebol blong mekem olgeta oli kam strong moa. Oli no harem nogud from. Afta long wan tok we i kamaot long vas blong dei, program i gohed wetem wan tok we i gat ol defren haf blong hem we i makem ol defren rod we wan Kristin i save letem laet blong hem i saenaot. (Matyu 5:​14-16) Wok blong prij i wan impoten rod blong mekem olsem, mo gudfala fasin tu i impoten tumas. Olsem man we i givim tok ya i talem, i se, “wok blong prij i soemaot long ol narafala man wanem samting yumi bilif long hem, be fasin blong soemaot lav i pruvum samting ya.”

Nao oli soemaot long ol man we oli kam long asembli wan impoten samting blong givhan long wok blong prij, hemia ol traket. Ol man we oli stap long asembli ya oli tingbaot yet mesej we i kamaot long faswan dei. Naoia oli harem ol ekspiryens we i pruvum olsem wanem ol smol tul ya oli gat paoa. Tok i leftemap tingting blong ol man we oli stap long asembli ya blong oli mas gat plante traket wetem olgeta oltaem, oli mas rere long evri jans we oli gat blong oli yusum.

Biaen tok i go stret long ol paenia, olgeta ya oli stap mekem fultaem wok blong talemaot Kingdom we oli stap wok strong blong karem laet. !Yumi rili gat fasin tangkyu long ol paenia ya blong yumi we oli stap wok strong tumas! Mo namba blong ol paenia i stap gru yet. Long ol kantri we oli jes letem fasin fri blong wosip i stap, namba blong paenia tu i gru bigwan. Tok ya i leftemap tingting blong ol paenia blong oli holemgud wok ya blong olgeta. Olgeta we oli no mekem paenia yet oli mas tingbaot ol samting we oli stap mekem naoia long laef blong olgeta. Maet olgeta tu oli save jenisim ol bisnes long laef blong olgeta blong mekem laet blong olgeta i saenaot long fultaem wok blong paenia.

Blong stap olsem wan man blong karem laet, oltaem i nidim sakrifaes, mo nekis tok i makemaot samting ya, “Mekem Wok Blong Jeova Wetem Tingting Blong Sakrifaes.” Pol i askem strong se: “Plis yufala i mas givim olgeta laef blong yufala i go nomo long God. Hemia wan presen we yufala i save givim blong mekem wosip long hem, wan presen we i laef, we i tabu, mo we God i glad blong tekem.” (Rom 12:1) Olgeta we oli stanap strong longtaem long ol trabol oli stap soemaot tingting blong sakrifaes. Ol paenia oli stap mekem sakrifaes evri dei blong oli stap long wok blong fultaem paenia. Yes, olgeta trufala Kristin oli mekem sakrifaes, oli bisi long wok blong Jeova bitim we oli stap ronem ol flas samting blong wol ya we olgeta nomo oli wantem. Fasin ya blong sakrifaes i mekem se oli kasem ol bigfala blesing long Jeova.

Tok ya i stret long narafala tok we bambae i kamaot biaen​—tok blong baptaes. Olgeta we oli baptaes long Distrik Asembli ya “Ol Man Blong Karem Laet,” bambae oli no save fogetem tok ya. Oltaem baptaes blong olgeta bambae i wan impoten samting long laef blong olgeta. Tok ya i pulum olgeta blong tingbaot bakegen se oli folem eksampel blong Jisas Kraes, we hem i baptaes taem hem i kasem 30 yia blong hem. Mo bakegen, ol man we oli tekem baptaes oli haremgud blong tingbaot se oli bin “lego long ol fasin we oli blong tudak nomo” mo oli mekem disisin finis blong “mekem wok blong Masta blong yumi.” (Rom 12:11; 13:12) Oli glad blong stanap fored long bigfala hif blong ol man long asembli ya mo oli talemaot disisin blong olgeta long pablik bifo we oli go blong tekem baptaes. (Rom 10:10) Yumi prea se blesing blong Jeova bambae i stap long olgeta we oli soemaot se oli givim laef blong olgeta long Jeova finis taem oli tekem baptaes long Distrik Asembli ya “Ol Man Blong Karem Laet.”

Sarede aftenun hem i taem blong givim sam stret woning. Ol woning ya oli kam long tok we stampa blong hem se, “Blokem Trap Blong Wantem Plante Samting Tumas,” “?Wan Man i Stap Spolem Ol Gud Fasin Blong Yu?” mo “Lukaot Long Olkaen Aedol.” Trifala tok ya i soemaot sam long ol rod we Setan i stap yusum blong mekem wan Kristin i kam slak. Judas Iskariot i wan aposol, be hem i letem Jisas i go long han blong ol enemi blong hem from mane nomo. Yangfala Samuel i gruap insaed long ples blong wosip blong Jeova, be i gat ol rabis fren we oli stap kolosap long hem. (1 Samuel 2:​12, 18-20) Fasin blong wosip long ol narafala god i save minim tu ol samting olsem fasin nogud blong seks mo blong wantem samting blong narafala man. (Efesas 5:5; Kolosi 3:5) Yes, fasin griri, fasin blong joen wetem ol nogud fren, mo fasin blong wosip long narafala god oli save mekem trabol long yumi mo yumi no mas mekem ol samting ya.

Nao program blong asembli i jenis. Nekis tok i tokbaot sam gudfala kwestin long Baebol mo i givim ansa long olgeta. Eksampel, ?yu save eksplenem sipos ol man we oli no akseptem trutok mo oli ded bifo we bigfala trabol i kam bambae oli laef bakegen? ?Wan Kristin i mas mekem wanem sipos hem i no faenem wan stret fren blong mared wetem? Blong ol man we oli stap long asembli ya oli kasem dip save moa long Baebol, tok ya i leftemap tingting blong olgeta blong oli yusumgud ol Indeks blong ol buk blong ‘Watch Tower Society,’ impoten moa long haf ya “Questions From Readers.” (Wan Kwestin)

Taem We Kraes i Stap Finis Mo Taem Hem i Kamtru

Lastok long program long Sarede i tokbaot profet tok. Tok ya i gat tri haf blong hem, “Laet We i Saenaot i Makemaot Taem We Kraes i Stap Finis Mo Taem Hem i Kamtru.” Hem i soemaot “saen” blong pruvum se Jisas Kraes i stap finis. (Matyu 24:3) Long namba tu haf blong hem, hem i tokbaot ol wok blong “slef ya we i stret mo waes” (NW) long taem blong yumi. (Matyu 24:​45-47) Hem i poenemaot se stat long 1919 grup ya we i olsem slef i lidimgud wok blong talemaot gud nyus blong Kingdom. Biaen wan bigfala hif blong ol man we oli kamaot long olgeta nesen oli joen wetem ol Kristin we tabu speret i makemaot olgeta blong mekem laet blong Jeova i saenaot. Man we i givim tok ya i finisim tok blong hem se: “I gud evriwan i gohed strong blong sapotem slef ya we i stret mo waes. Hemia nomo i rod blong mekem se wan dei i no longtaem olgeta man we oli olsem sipsip bambae oli save harem ol gudfala tok ya se: ‘Yufala i kam. Papa blong mi i mekem i gud tumas long yufala finis. Taem hem i no mekem wol ya yet we yumi stap long hem, be hem i makemaot ol ples blong yufala long [Kingdom blong hem, NW]. Yufala i kam tekem ples ya blong yufala.’”​—Matyu 25:34.

Las man blong givim tok long dei ya i tokbaot mining mo fasin ya we Jisas Kraes bambae i soemaot paoa blong hem. (1 Korin 1:7) !Wan bigfala samting bambae i hapen long taem ya we Jisas Kraes bambae i soemaot paoa blong hem! Bigfala Babilon bambae i lus olgeta. Bigfala faet, bitwin wol ya blong Setan mo Jisas wetem ol enjel blong hem, bambae i finisim rabis fasin blong naoia. Biaen, Setan hem wan bambae i kalabus mo bambae i no moa save mekem wan samting. Be ol man blong God bambae oli kasem sef, taem Smol Sipsip ya long heven i mared mo hem i mekem nyufala wol i kamtru. Man we i givim tok i mekem ol man we oli stap lesin long hem oli glad taem hem i soemaot nyufala buklet ya ?God i Rili Kea Long Yumi? !Bambae hem i givhan bigwan long ol man we tingting blong olgeta i stap daon, we oli nidim blong save long saed blong Man we i Wokem yumi mo plan blong hem long yumi!

Ol Memba Blong Kristin Famle

Naoia Sande, laswan dei blong asembli ya. Be, i gat plante samting yet blong talem. Afta long tok we i kamaot long vas blong dei, tok i go stret long ol memba blong Kristin famle, tok ya “Ol Memba Blong Kristin Famle Oli Save Givgivhan Long Olgeta” i gat tri haf blong hem. Faswan haf i givhan long ol man we oli stap long asembli ya blong oli luksave impoten samting blong mekem Kristin famle i haremgud: oli mas putum ol samting long saed blong speret fasples long laef blong olgeta. Seken haf blong tok ya i leftemap tingting blong ol famle blong oli wok tugeta, taem oli go long ol miting, go prij, mekem famle stadi, no taem oli go spel mo pleplei. Mo namba tri haf blong tok ya i pulum tingting blong ol man we oli stap long asembli ya blong oli tingbaot wok ya mo responsabiliti blong olgeta blong lukaotgud long ol olfala. Man we i givim tok ya i talem se, “Ol olfala brata mo sista blong yumi oli givhan bigwan long kongregesen.” I gud yumi yusumgud ol ekspiryens mo folem fasin blong olgeta we oli stap holemstrong bilif longtaem.

Nekis tok i tokbaot mining blong tok ya “tingting . . . i klia gud.” (1 Pita 4:7) Man we tingting blong hem i klia hem i skelgud, hem i tingtinggud, hem i rere blong lesin long tingting blong narafala, tingting blong hem i stap daon, mo hem i naf blong mekem ol gudfala disisin. Hem i luksave wanem i stret mo wanem i rong, wanem i tru mo wanem i gyaman. Mo tu, hem i traehad blong stapgud long saed blong speret.

Laswan tok long Sande moning i tokbaot fasin blong stap aninit long God mo Kraes. Man we i givim tok ya i talem se, “Yumi no save bitim mak long fasin blong stap aninit long Jeova God mo Pikinini blong hem, Jisas Kraes.” Hem i gohed blong soemaot olsem wanem samting ya i gat paoa long olgeta laef blong yumi. ?Wanem samting bambae i givhan long yumi blong stap aninit long tufala? I gat fo fasin: lav, fasin fraetgud long God, bilif, mo tingting daon.

Sande Aftenun

I no longtaem, Sande aftenun i kam mo hemia taem blong laswan haf blong asembli ya. Long tingting blong plante man, i luk olsem we asembli ya i jes stat nomo, mo kwiktaem hem i kam long en blong hem.

Stampa blong pablik tok se “Folem Laet Blong Wol.” Olgeta we oli stap oli harem gudfala tok we i soemaot fasin blong laet we san i givim blong mekem laef i stap. Biaen man we i givim tok ya i tokbaot bigfala impoten samting we laet long saed blong speret i mekem. Laet we i kamaot long san i mekem ol man oli laef long sam yia nomo, be laet long saed blong speret i save mekem yumi i stap laef gogo i no save finis. Wan impoten haf blong tok ya, hemia fasin blong eksplenem ol wanwan vas long Jon 1:​1-16, we i makemaot Jisas olsem laet blong wol. Tede, long ol laswan yia blong rabis fasin blong naoia, i impoten moa bitim bifo blong folem Jisas long fasin ya blong hem.

Afta long wan tok we i kavremap haf blong Wajtaoa Stadi long wik blong asembli, nao i taem blong laswan tok. Man we i givim tok ya i talemaot se i gat plante samting blong stap wet from long fyuja. Eksampel, hem i talem se i gat wan nyufala kaset, hemia drama Mekem Wil Blong God Wetem Strong Tingting. Mo i no hemia nomo. Bambae i gat ol nyufala video kaset we taetel blong hem se Baebol​—Wan Buk Blong Ol Trufala Samting Mo Profet Tok, fas haf i tokbaot Baebol​—Stret Wetem Histri, Trastem Ol Profet Tok Blong Hem.

Laswan samting, man we i givim tok i talemaot se long 1993 bambae i gat distrik asembli long fo dei, mo tu bambae i gat sam intenasnal asembli long Afrika, Esia, Yurop, mo Saot Amerika. Nating se Distrik Asembli ya “Ol Man Blong Karem Laet” i finis, ol man we oli kam long asembli ya oli save stat blong mekemrere ol plan blong nekis yia.

Nao i taem blong ol man we oli kam long asembli ya oli gobak long ples blong olgeta. Yes, naoia oli tingting strong moa blong gohed blong mekem laet i saenaot long wol ya we i tudak. Afta long tri dei ya we i fulap long ol gudfala samting long saed blong speret, ol tok blong vas blong Baebol long laswan tok ya i gat bigfala mining, hem i se: “[Jeova, NW] hem nao i God, mo hem i mekem laet blong hem i saenaot i kam long yumi. . . . Yumi talem tangkyu long Hae God from we hem i gud tumas. Bambae hem i laekem yumi oltaem, gogo i no save finis.”​—Ol Sam 118:​27, 29.

[Tok Blong Pija Long Pej 15]

Program blong asembli long lanwis blong Rasia

[Tok Blong Pija Long Pej 16, 17]

Ol memba blong Hed Kampani oli toktok long plante asembli

Olgeta blong Japan oli stap tu long medel blong olgeta we oli hivap long asembli ya long St. Pitasbeg, Rasia

Wan nambawan drama long Baebol we i makemaot nid blong mekem samting we i stret long ae blong Jeova

Ol nyufala man blong karem laet oli tekem baptaes blong soemaot se oli givim laef blong olgeta long Jeova finis

Ol man we oli kam long asembli oli lesingud long program, long St. Pitasbeg

[Tok Blong Pija Long Pej 18]

Ol man we oli kam long asembli oli glad blong kasem nyufala buklet ya “?God i Rili Kea Long Yumi?”