?Kakae Ya i Save Gat Mining Long Yu?

FUL mun i kavremap ples wetem laet blong hem. Insaed long wan rum antap long wan haos long Jerusalem bifo, 12 man oli hivap raon long wan tebel. Leven man oli lesingud taem Tija blong olgeta i statem wan impoten lafet mo i talem ol tok we oli gat bigfala mining. Store i talem se:

“Jisas [Kraes] i tekem bred, i prea blong talem tangkyu long God from. Nao i brekem, i givim long ol man blong hem, i talem se ‘Yufala i tekem, yufala i kakae. Hemia i bodi blong mi.’ Mo i tekem kap, i talem tangkyu long God from, nao i pasem i go long olgeta, i talem se ‘Yufala evriwan, yufala i dring long hem. From we hemia i blad blong mi, we i blong mekem promes blong God i stanap. Blad blong mi bambae i ron blong tekemaot ol sin blong plante man. Mi mi talem long yufala, bambae mi mi no moa save dring waen ya bakegen, gogo bambae mi dring nyufala waen wetem yufala, long nyufala wol ya we Papa blong mi i king long hem.’ Nao oli sing long wan Sam, mo biaen oli goaot, oli go long hil ya, nem blong hem Hil blong ol Oliftri.”​—Matyu 26:​26-30.

Samting ya i kamaot afta we san i godaon finis long namba 14 Naesan, manis blong ol man Jyu, long yia 33 Kristin Taem. Jisas mo ol aposol blong hem oli jes mekem finis lafet blong Pasova, hemia lafet blong tingbaot taem we Isrel i aot long kalabus long Ijip afta 1500 B.K.T. Kraes i bin sanemaot Judas Iskariot, we hem i wantem salem hem i go long enemi blong hem. Taswe, Jisas nomo wetem ol 11 aposol we oli stap tru long hem, oli stap long taem ya.

Kakae ya i no joen wetem lafet blong Pasova we ol man Jyu oli stap holem. Hem i wan nyufala samting we nem blong hem se Kakae Blong Masta. Long saed blong lafet ya, Jisas i talem long ol man blong hem i se: “Yufala i mas stap mekem samting ya blong tingbaot mi bakegen.” (Luk 22:​19, 20; 1 Korin 11:​24-26) ?From wanem hem i talem olsem? ?Mo olsem wanem samting ya we i blong bifo finis i save gat mining long yu?