Hop i Lukaotgud Long Yu Long Wan Wol We i Gat Trabol
Wan yangfala boe blong Korea i wantem givhan long mama blong hem blong pulum tingting blong wan studen blong kolej blong luksave olsem wanem hop long fyuja i impoten tumas. Boe ya i tingbaot wan pijatok we hem i harem long wan Kristin miting, nao hem i askem studen ya sipos hem i wantem givim ansa long wan ridel. Gel ya i agri. Nao boe ya i talem se: “I gat tu famle i stap. Tufala evriwan i pua. Bigfala ren i kam, mo ol ruf blong haos blong tufala wanwan oli lik. Wan famle i harem nogud bigwan, mo olgeta long famle oli mekem plante toktok long saed blong ruf we i stap lik. Be narafala famle hem i glad mo i haremgud taem hem i stap blokem ol hol long ruf blong haos blong olgeta. ?From wanem tufala famle ya oli gat ol defren tingting?” Yangfala woman ya i talem se hem i no save from wanem i olsem. Boe ya i talem se, “Yes, seken famle ya i glad from we oli jes kasem wan leta long wan gavman blong taon, se bambae oli givim wan nyufala haos long olgeta. Olsemia nao oli gat hop. Hemia nao samting we i makem se tufala famle oli defren!”
RIDEL blong boe ya i tijim wan trutok: Hop i save jenisim filing we man i gat long laef blong hem, nating se man i haremgud no i harem nogud long laef. Olsem tufala famle we boe ya i tokbaot, plante long yumi tede yumi mas laef tru long ol hadtaem—ol sik, ol wari long saed blong mane, ol trabol long famle, fasin blong brekem loa, mo ol narafala trabol mo fasin blong spolem man. Samtaem, yumi no save mekem ol trabol ya oli finis sem mak olsem we yumi no save talem long tanda we i stap faerap long ples blong yumi blong i finis. Taswe maet yumi save harem nogud, yumi stap yumi wan—i olsem we i no gat man i save givhan long yumi. Samting we i moa nogud, se maet oli tijim yumi long jyos se fyuja blong plante sinman i no klia, se maet oli kasem panis blong olwe tu.
Ol man oli talem se sipos i no gat hop mo i no gat help bambae tingting blong ol man i stap foldaon. Be yumi save winim wan long ol tufala samting ya; yumi save gat hop. Mo hop nomo i save winim narafala tingting ya se i no gat help. Sipos yumi gat hop, yumi save stanap strong longtaem wetem kwaet tingting mo fasin glad long taem blong trabol bitim we yumi stap traehad wetem tingting we i foldaon. Yes, hop i wan impoten samting blong givhan long yumi.
?Olsem wanem, i had blong bilivim samting ya? ?Hop i rili gat paoa blong mekem wan jenis olsem? ?Mo i gat wan trufala hop long yumi evriwan?
I Olsem Wan Hat Blong Faet
Ol dokta oli stat blong luksave bigfala paoa blong hop. Dokta Shlomo Breznitz, wan man we i laef tru long ol nogud trabol blong Nasi, i talem se long saed blong plante trabol long laef, “wari i kamaot from we yumi tingbaot olsem wanem ol trabol ya oli mekem hadtaem long yumi, be i no long trabol ya hem wan. Hop i mekem se ol trabol oli no hevi tumas.” Wan haf insaed long The Journal of the American Medical Association i talem se hop i wan “strongfala meresin.” Magasin ya American Health, i ripotem se: “I gat plante eksampel blong ol sikman, olsem olgeta we oli gat kansa, oli kam sik moa taem wan samting i mekem se oli lusum hop—no oli kamgud kwiktaem taem oli faenem wan nyufala samting blong putum tingting blong olgeta i stap strong long hem.”—Lukluk Proveb 17:22.
Longtaem finis i kam ol studen blong Baebol oli save se hop i impoten. Long 1 Tesalonaeka 5:8, aposol Pol i talem long ol Kristin se: “Yumi mas putum hat blong faet, hemia hop ya blong yumi se bambae yumi sef.” ?Olsem wanem “hop ya blong yumi se bambae yumi sef” i olsem wan hat?
Tingbaot ol samting we wan hat blong faet i save mekem. Long taem blong Baebol ol soldia oli stap putum hat blong faet we oli wokem long kopa no aean, we i kavremap wan hat we oli wokem long wul no skin blong anamol. Hat blong faet ya i blokem hed blong soldia long ol ara, ol nalnal, mo ol naef blong faet. From samting ya ating i no plante soldia we oli no wantem putum hat blong faet sipos oli gat. Be, taem ol soldia oli putum hat blong faet samting ya i no min se bambae oli neva lusum faet no maet oli no save harem wan samting taem man i kilim hed blong olgeta; no gat, be hat blong faet ya i mekem plante samting we oli kasem hed blong hem oli no save kilim hem i ded.
Olsem wan hat blong faet we i lukaotgud long hed blong man, sem mak hop i lukaotgud long tingting blong man. Maet hop i no save finisim evri trabol no i mekem trabol i kam nating nomo. Be hop i mekem se ol trabol ya oli no strong tumas long yumi mo i givhan long yumi blong mekem ol trabol ya oli no spolem yumi long saed blong tingting, filing, no long speret.
Man blong bilif ya Ebraham i putum wan hat blong faet olsem. Jeova i askem hem blong kilim pikinini blong hem Aesak blong yusum olsem sakrifaes. (Jenesis 22:1, 2) I isi nomo blong tingting blong Ebraham i foldaon from, wan filing we maet i save lidim hem blong hem i no obei long God. ?Be wanem i blokem tingting blong hem long ol filing olsem? Hop i givhan long hem. Hibrus 11:19, i se “Ebraham i stap tingbaot we God i save mekem [Aesak] i laef bakegen long ded.” Sem mak, hop blong laef bakegen we Job i gat i givhan long hem blong mekem se hem i no harem nogud tumas long tingting blong hem, we i save lidim hem blong tok nogud long God. (Job 2:9, 10; 14:13-15) Taem Jisas Kraes i stap harem nogud long bodi blong i ded, hem i kasem paoa mo kwaet tingting long gudfala hop blong hem long fyuja. (Hibrus 12:2) Faondesen blong trufala hop hemia bilif se God bambae i neva mekem i rong, oltaem hem i stap mekem promes blong hem i kamtru.—Hibrus 11:1.
Stampa Blong Trufala Hop
Trufala hop i sem mak olsem bilif, hem i stanap long ol samting we oli rili stap, mo trutok. Maet samting ya i save mekem sam man oli sapraes. Olsem wan man blong raet i talem, “plante man oli ting se hop i wan krangke samting we i agensem trutok.” Be, trufala hop i no wan gyaman samting we i mekem man i haremgud, wan smol bilif se bambae yumi kasem eni samting we yumi wantem no evri smosmol samting bambae i kamgud. Samting we i kamtru long laef hem i save finisim ol gyaman tingting olsem.—Eklesiastis 9:11.
Trufala hop i defren. Hem i kamaot from save, be i no from samting we man i wantem. Tingbaot seken famle long ridel blong boe we yumi bin tokbaot finis long stat blong haf ya. ?Oli save gat hop sipos oltaem gavman blong olgeta i no stap mekem ol promes blong hem? No gat. Be, promes wetem pruf blong soem se man i save trastem, oli save givim famle ya wan trufala hop.
Sem mak, ol Wetnes blong Jeova tede oli gat wan hop long wan gavman—Kingdom blong God. Kingdom ya i stampa blong mesej blong Baebol. Long plante taosen yia finis Kingdom ya i stampa blong hop long ol woman mo ol man olsem Ebraham. (Hibrus 11:10) God i promes se tru long Kingdom blong hem, bambae hem i finisim rabis fasin blong wol ya mo putum wan nyufala fasin blong wol. (Rom 8:20-22; 2 Pita 3:13) Kingdom hop ya i tru, hem i no wan drim. Stampa blong hop ya—Jeova God, Hae Masta blong heven mo wol—hem i no gyaman. Ol samting we God i wokem oli naf nomo blong soem se hem i rili stap mo hem i gat naf paoa blong mekem ol promes blong hem oli kamtru. (Rom 1:20) Yumi mas ridimgud nomo ol store blong ol samting we hem i stap mekem long ol man blong luk se ol tok blong Hem neva oli mestem samtaem.—Aesea 55:11.
Be sore tumas, plante man we oli stap talem se oli Kristin oli lusum trufala hop. I no longtaem i pas oli raetem tok blong Paul Tillich wan man we i stadi long saed blong ol fasin blong wosip long God se: “Ol Kristin [bifo] oli lanem blong stap wet long en. Be sloslou oli no moa wet. . . . Tingting blong luk nyufala fasin long wol i kam slak, nating se man i stap prea from taem oli mekem Prea blong Masta se—!Mekem wil blong yu i kamaot long wol ya olsem we i bin kamaot long heven!”
!Trabol ya! Plante milyan milyan man we oli nidim tumas hop oli no kasem, be hop ya i stap nomo wetem olgeta insaed long prapa Baebol blong olgeta. !Traem luk ol nogud frut we oli kamaot! From we oli no gat gudfala hop blong lukaotgud long tingting blong olgeta, yumi no sapraes se “krangke tingting” i pulum plante man olsem blong spolem wol ya wetem ol rabis fasin blong seks mo ol raf fasin. (Rom 1:28) I impoten se neva yumi mas foldaon long sem trap. I nogud blong tekemaot hop ya we i olsem hat blong faet blong yumi, oltaem yumi mas mekem hop ya i kam strong moa.
Olsem Wanem Blong Bildimap Hop
Gudfala rod blong bildimap hop i blong luksave stampa blong hem, hemia Jeova God. Stadi oltaem long Tok blong hem, Baebol. Rom 15:4 i talem se: “Olgeta tok ya we oli raetem long Baebol bifo, oli raetem blong tijim yumi. Nao tingting blong yumi i save stap strong from we tok ya blong Baebol i stap mekem yumi haremgud, i stap mekem tingting blong yumi i longfala.”
Mo tu, yumi mas mekem sua se hop blong yumi long fyuja i no wan samting nating nomo long tingting blong yumi. Yumi mas mekem hop ya i olsem wan trufala samting long tingting blong yumi. ?Yu yu gat hop blong laef foreva long Paradaes long wol? ?Yu yu wantem luk ol fren blong yu we oli ded finis, taem oli laef bakegen long wol? ?Sipos yes, yu yu stap tingbaot se bambae yu stap long taem ya? Eksampel, Aesea 65:21, 22 i tokbaot ol man se oli stap bildim prapa haos blong olgeta mo oli stap long olgeta. ?Yu save satem ae blong yu mo traem tingbaot se yu stap wokem ruf long nyufala haos blong yu, yu stap nilim ol laswan kapa long haos blong yu? Nao yu stap lukluk ol frut blong hadwok mo plan blong yu we oli stap raonabaot long yu. I no moa gat noes long wok blong bildim, yu lukluk ples raonabaot long yu taem sado blong ol hil i stat blong kavremap ples. Win i blu i kam nao i mekem ol tri oli muvmuf smol mo i mekem yu yu harem kolkolgud from we yu harem i hot taem yu wok. Yu harem ol pikinini oli laf, mo ol pijin oli singsing. Yu yu harem ol famle blong yu oli stap storeyan insaed long haos.
Tingting long wan gudfala taem olsem i no wan krangke tingting; be hemia wan tingting dip long wan profet tok we bambae i kamtru. (2 Korin 4:18) Sipos fyuja ya i kam moa olsem wan prapa samting long tingting blong yu, bambae hop blong yu i kam strong moa se bambae yu stap long taem ya. Wan strong trufala hop olsem bambae i lukaotgud long yu blong yu no “sem from gud nyus,” we maet i save mekem yu yu lego wok blong talemaot gud nyus long ol narafala man. (Rom 1:16) Be, bambae yu wantem ‘tok flas from hop ya’ olsem aposol Pol i mekem, taem yu gat strong tingting blong talemaot long ol narafala man.—Hibrus 3:6.
I no laef ya nomo we i no save finis long fyuja i givim hop long yu, no gat. I gat ol stampa blong hop naoia tu. ?Olsem wanem? Cassiodorus, (wan haeman blong Rom long yia 1400 K.T.) i talem se: “Man we i luksave wan blesing we i stap kamaot naoia, hem i kasem hop long ol blesing we oli save kamaot long fyuja.” !Ol waes toktok ya! ?Olsem wanem bambae yumi haremgud long ol promes blong blesing long fyuja sipos yumi no gat fasin tangkyu long ol blesing naoia?
Prea tu i bildimap hop naoia. Antap bakegen long fasin blong prea from fyuja ya we i no save finis, yumi mas prea tu from ol samting we yumi nidim naoia. Maet yumi hop mo prea blong frengud moa wetem ol memba blong famle blong yumi mo ol narafala Kristin man, prea from ol kakae blong yumi long saed blong speret, mo from ol samting we yumi nidim long saed blong bodi. (Ol Sam 25:4; Matyu 6:11) Sipos yumi putum hop blong yumi long han blong Jeova, samting ya bambae i givhan long yumi blong evri dei yumi save stanap strong longtaem. (Ol Sam 55:22) Taem yumi stap holemstrong longtaem bambae samting ya i mekem hop blong yumi we i olsem hat blong faet i kam strong moa.—Rom 5:3-5.
Gat Hop Long Ol Man
Tingting we i stap long nogud saed blong evri samting i olsem rosta we i stap long hat blong faet we i olsem hop blong yumi. Hem i save spolem hop blong yumi, nao sloslou hem i save mekem se hat blong faet ya i no moa save givhan long yumi. ?Yu yu traem luksave ol nogud tingting ya mo yu traem blokem olgeta? No letem tingting ya se ol man oli mekem gudfala samting blong kasem samting blong olgeta nomo, fasin blong toktok smol mo tingbaot ol nogud saed long wan bisnes i sem mak olsem waes, i trikim yu. Yes, i no nidim plante waes blong tingbaot nogud saed blong evri samting.
I isi tumas blong yumi no save gat hop long ol man raonabaot long yumi. Sam man oli kasem ol nogud ekspiryens wetem ol narafala man, nao tingting blong olgeta i foldaon oli ting se ol narafala man oli no moa wantem givhan long olgeta no i leftemap tingting blong olgeta. Tingting blong olgeta se “harem nogud wantaem i naf.” Maet oli fraet blong go luk ol Kristin elda blong givhan blong winim trabol blong olgeta.
Baebol i givhan long yumi blong gat wan tingting we i skelgud long saed blong ol man. Tru, i no waes blong putum ful hop blong yumi long ol man. (Ol Sam 146:3, 4) Be insaed long Kristin kongregesen, Jeova i givim ol elda olsem “ol presen oli go nomo long ol man.” (Efesas 4:8, 11) Oli gat tingting, oli ekspiryens Kristin we oli rili wantem blong stap olsem “wan ples blong haed long hem taem i gat bigfala win, mo olsem wan sefples taem bigfala ren i foldaon.”—Aesea 32:2.
Plante narafala insaed long Kristin kongregesen tu oli wantem tumas blong ol narafala oli trastem olgeta. Tingbaot hamas taosen long olgeta we naoia oli stap olsem ol mama, ol papa, ol sista, ol brata, ol pikinini long olgeta we oli bin lusum prapa famle blong olgeta; tingbaot plante long olgeta we oli stap fren long olgeta we oli harem nogud long tingting blong olgeta, “oli fasgud long ol fren blong olgeta moa, i bitim wan stret brata.” —Proveb 18:24; Mak 10:30.
Sipos yu yu prea long Jeova blong givhan long yu, yu no mas lusum hop blong yu. Hem i save ansa long yu; maet i gat wan elda no wan narafala Kristin bigman we hem i rere naoia blong givhan long yu sipos yu yu talemaot nid blong yu long hem. Wan hop we i skelgud long saed blong ol man i lukaotgud long yumi blong yumi no stap yumi wan tumas, fasin ya i save lidim yumi blong tingbaot yumi nomo, mo blong mekem ol fasin we i krangke.—Proveb 18:1.
Mo tu, sipos yumi gat wan trabol wetem narafala Kristin, i nogud blong yumi lusum hop, gat ol nogud tingting taem yumi wantem winim trabol ya. Be, “man we i stap laekem ol man tumas . . . oltaem hem i stap bilif strong long God, mo i stap putum tingting blong hem i strong long God oltaem.” (1 Korin 13:4-7) Traem lukluk ol Kristin brata mo sista olsem Jeova i lukluk olgeta—wetem hop. Tingbaot ol gudfala fasin blong olgeta, trastem olgeta, mo traem blong winim ol trabol blong yu. Hop olsem i lukaotgud long yumi long fasin blong seraot mo ol rao, we oli blong spolem man nomo.
Yu no mas letem olfala wol ya we i no gat hop i pulum yu. Hop i stap ya—long saed blong fyuja we i no save finis mo hop blong winim ol trabol blong yumi naoia. ?Bambae yu yu holemtaet hop? Sipos yumi putum hat blong faet we i olsem hop we bambae yumi kasem sef blong i lukaotgud long yumi, i no gat wan man blong Jeova we hem i no gat hop—nating se wanem trabol hem i kasem hem. Sipos yumi no lego long hop ya, i no gat wan samting we i stap long heven no long wol we hem i save tekemaot hop we Jeova i givim long yumi.—Lukluk Rom 8:38, 39.