?Yu Yu Stap Traehad?
“BAMBAE mi traem bes blong mi.” !Plante taem tok ya “be” i kam biaen long ol tok olsem mo wetem ol eskyus blong no traem bes! ?Olsem wanem taem yumi givim laef blong yumi long Jeova? ?Yumi stap mekem olsem promes we yumi bin mekem finis blong traem bes blong yumi long wok blong hem?
Blong givim laef long God, samting ya i min se ‘givim ful laef blong mekem wok no wosip long wan God no blong mekem ol tabu wok.’ Jisas i mekem plante samting blong soem se fasin blong givim laef long Jeova i minim wanem, taem hem i talem se: “Man we i wantem kam biaen long mi i mas blokem ol samting we hem nomo i wantem, nao i mas karem [pos] blong hem, i mas biaen long mi.” (Matyu 16:24) Wan man we i blokem ol samting we hem nomo i wantem mo i givim laef blong hem long God, hem i stap mekem wil blong God i impoten samting long laef blong hem.
Yumi ya we yumi givim laef blong yumi finis long God, yumi mas skelemgud laef blong yumi blong luk sipos yumi stap mekem ol samting we yumi bin givim laef blong yumi long God finis blong mekem. Pita i soem from wanem yumi mas jekem laef blong yumi, hem i leftemap tingting blong ol Kristin we tabu speret i makemaot olgeta, i se: “God i jusumaot yufala, mo i singaot yufala blong yufala i man blong hem. From ol samting ya, yufala i mas traehad moa blong mekem tufala samting ya i karem frut long laef blong yufala. Sipos yufala i mekem olsem, bambae yufala i no save foldaon samtaem.” (2 Pita 1:10) Yes, sipos yumi traehad, bambae yumi no save mestem mak long saed blong speret.
Yumi Save Traehad Moa
I olsem se olgeta man blong God we oli givim laef blong olgeta finis long hem oli mas traehad, no oli mas traem bes blong olgeta, blong mekem Jeova i glad long olgeta. Be i tru, fasin traehad blong yumi blong mekem wil blong God i save gru moa. Long wan smol boe we i gat tri yia, maet hem i traem bes blong hem blong givhan long mama blong hem taem hem i mekem wan smol wok nomo, be taem hem i stap gru i kam bigman bambae hem i save mekem plante moa samting. Sem mak wetem fasin ya we yumi stap gru long saed blong speret—wanem we bifo i olsem fasin traehad blong yumi naoia i no moa olsem. Yumi wantem mekem moa long wok blong Jeova.
Fasin tangkyu blong yumi long Jeova we i stap gru moa i pusum yumi blong yumi wantem mekem moa. Fasin tangkyu long ol samting we hem i mekem long yumi, i kam strong moa taem yumi wanwan i stadi long Tok blong Hem, Baebol. Eksampel, taem yumi stadigud mo tingting dip olsem wanem Jeova i sanem Pikinini blong hem blong givim laef blong hem blong mekem ol man oli fri long sin, samting ya i pusum yumi blong mekem wok blong Hemia we i Stampa blong ransom. (Jon 3:16, 17; 1 Jon 4:9-11) Sipos yumi go moa blong “testem mo luk we Jeova i gud,” bambae hat blong yumi i pulum yumi moa blong mekem wok blong hem.—Ol Sam 34:8, NW.
Jetter, wan fultaem minista i luksave samting ya. Blong hem i save go dip moa long ol samting we hem i stadi long hem, hem i livim wan smol rum long haos blong hem i stap blong hem i save yusum blong mekem stadi olsem. Hem i mekem rere ol samting long fasin we i isi blong tingting blong hem i wokgud taem hem i stap stadi. Hem i gat ol “Index” blong ol buk blong Wajtaoa, mo tu ol baond volyum blong Wajtaoa mo Wekap! long ples blong putum buk kolosap long hem. Hem i talem se, “Taem mi mi stap stadi dip long ol samting we mi mi intres tumas long hem, mi mi wantem tumas blong talemaot long ol narafala man.”
Be, i olsem wan man we i kakae wan bigfala kakae wanwan taem nomo i no daonem nid long saed blong kakae we hem i mas kakae long evri dei, long sem fasin wan dip stadi long Baebol wan taem nomo i no naf long nid long saed blong speret we man i mas tekem evri dei. Ruth i luksave samting ya, from we taem hem i tingbaot bifo, evri moning mo evri naet afta long kakae famle blong hem oli stap ridim Baebol tugeta. Naoia, we hem i kasem 81 yia, mo hem i spenem bitim 60 yia finis long fultaem minista wok, evri dei hem i stap ridim yet Baebol, afta we hem i girap long 6 klok moning. Taem hem i kasem Wajtaoa mo Wekap! kwiktaem hem i tekem taem blong ridim ol magasin ya. Hem i stap ridim ol haf long hem maet tri no fo taem bifo we kongregesen i stadi long Wajtaoa ya. Hem i talem se, “Fasin blong lukluk long Tok blong God hemia samting we yu nidim blong mekem yu yu stap strong long bilif.” Samting ya i givhan long hem tu blong gohed long misinari wok long plante yia.
Yumi Traehad Blong Givhan Long Ol Narafala Man
Taem yumi stadi dip oltaem long Tok blong God, strong tingting blong mekem wok blong God i gru, mo wan samting insaed long yumi i pusum yumi blong mekem moa. (Lukluk Jeremaea 20:9.) Strong tingting olsem i pusum Hirohisa blong kasem mak long minista wok blong hem fulwan. (2 Timote 4:5) Hem i stap laef wetem mama blong hem nomo, wetem fo yangfala brata mo sista blong hem. Taem Hirohisa i kasem samwe bitwin 13 mo 19 yia, hem i sapotem famle blong hem long saed blong mane. Hem i stap girap long 3 klok moning blong salem ol nyuspepa. Hem i wantem gohed moa blong tokbaot Jeova long ol narafala man, nao hem i givim nem blong hem blong mekem wok blong paenia, hemia olsem fultaem minista wok blong ol Wetnes blong Jeova. Long taem ya we hem i yangfala, hem i glad blong stap givhan long ol narafala man blong oli joen wetem hem blong oli traehad blong presem Jeova.
Fasin traehad blong givhan long ol narafala man, i min se yumi save karem frut long minista wok blong yumi. Jisas i leftemap tingting blong ol disaepol blong hem se: “Sipos yufala i stap mekem olgeta, bambae yufala i save harem gud.” (Jon 13:17) Naomi i soem wan gudfala eksampel olsem wanem yumi save folem ol advaes we ogenaesesen blong Jeova i stap givim blong kamgud moa long minista wok blong yumi. Hem i faenem i had blong toktok wetem ol man we hem i no save olgeta long ol haos wanwan mo plante taem hem i no save wanem bambae hem i talem taem hem i stanap fored long doa blong olgeta. Ol elda long kongregesen oli askem hem blong yusum ol advaes we oli stap long buk ya Reasoning From the Scriptures, long haf ya “Introductions for Use in the Field Ministry (Ol Fastok Blong Yusum Long Wok Blong Prij).”a Hem i stap tingbaot ol fastok we oli stap aninit long stampa tok ya “Family/Children (Famle/Pikinini)” mo hem i stap lanem olgeta plante taem. From samting ya, hem i save storeyan wetem wan woman we i gat bitwin 30 mo 39 yia. Bifo we Naomi i gobak blong mekem visit, woman ya i kam long Haos Kingdom. Hem i mekem plan blong stadi Baebol. Naoia woman ya wetem hasban blong hem tufala i kam Kristin we oli baptaes finis, tufala i glad long wan hapi famle laef wetem ol pikinini blong tufala.
Yumi Traehad Blong Soem Intres Long Ol Man Wanwan
Yumi save mekem olsem aposol Pol tu, hem i talem se: “Long fes blong olgeta defren kaen man, mi mekem olsem we mi tu mi gat sem fasin we olgeta oli gat, blong yusum olgeta rod evriwan blong sevem man long olgeta.”—1 Korin 9:22, 23.
Hatsumi i gat tingting ya. Taem hem i stap mekem wok blong prij, hem i mitim wan woman we i stap yusum telefon blong toktok i go afsaed long Hatsumi we i stanap long doa blong haos, woman ya i talem se hem i bisi tumas blong toktok wetem Hatsumi. Voes blong woman i kaen, taswe Hatsumi i gohed blong stap visitim hem. Oltaem woman blong haos i ansa tru long telefon nomo, hem i neva kamaot blong luk Hatsumi. Fasin ya i gohed long tu mo haf yia.
Wan dei Hatsumi i jenisim taem blong visit ya, hem i go long aftenun we i let lelebet. I no gat man i ansa long hem. Taem hem i stap rere blong gobak, hem i haremsave wan voes biaen long hem, i askem se, “?Yu yu hu?” Woman ya i jes kambak long haos blong hem. Taem hem i harem nem blong Hatsumi, hem i gohed i toktok, “O yu ya nao we yu stap visitim mi. Tangkyu tumas from we oltaem yu stap tingbaot mi.” From we woman ya i lego Baebol stadi wetem ol Wetnes blong Jeova long narafala ples finis, nao hem i sem tumas blong openem doa long Hatsumi. Hem i statem bakegen Baebol stadi, mo woman blong haos hem i gohedgud. ?Yumi rili kea long ol man we yumi stap mitim long wok blong prij long ol haos wanwan?
Yu Mas Traehad
Jeova i laekem fasin traehad blong yumi blong mekem wok blong hem. Hem i olsem wan papa we pikinini blong hem i karem wan presen i kam long hem. Long ol yia we oli stap pas, presen ya i dipen long yia we pikinini ya i gat mo rod we hem i save yusum blong givim presen ya. Olsem wan papa we i glad blong kasem enikaen samting we pikinini blong hem i givim from gladhat blong hem, sem mak Jeova i rere blong akseptem wok we yumi mekem wetem fulhat blong yumi we i laenap wetem mak we yumi kasem finis long saed blong speret.
Yes, i no nid blong skelem wok blong yumi wetem wok blong narafala man. Olsem Pol i talem, bambae yumi gat gudnem from wok we yumi nomo i mekem, “i no from wok blong sam narafala man.” (Galesia 6:4) I gud yumi gohed blong stap folem advaes blong aposol Pita se: “Yufala i mas traehad blong mekem we long fes blong God, laef blong yufala i klingud, i no gat poen i stap long yufala. Nao long fasin ya, yufala i gat pis wetem God.”—2 Pita 3:14.
[Futnot]
a ‘Watchtower Bible and Tract Society of New York, Inc.’ i wokem buk ya.
[Tok Blong Pija Long Pej 29]
?Yu yu traehad blong folem ol advaes long wok blong prij?