“Traehad Long Evri Rod”
1 Taem yumi givim laef blong yumi i go long Jeova, yumi promes blong mekem bes blong yumi long wok blong hem. Aposol Pita tu i bin pulum ol Kristin long faswan handred yia blong traehad long evri rod, blong mekem se Jeova i glad long olgeta. (2 Pita 1:10) I sua se yumi wantem traehad long evri rod tede long wok blong Jeova, blong mekem hem i glad. ?Olsem wanem blong mekem olsem? Taem fasin fren blong yumi wetem Jeova i kam strong moa, mo yumi tingting dip long olgeta samting we hem i bin mekem long yumi, hat blong yumi bambae i pusum yumi oltaem blong mekem bes blong yumi long wok blong hem. Bambae yumi wantem kamgud moa long wok blong prij, mo tu, sipos i gat rod, mekem moa haoa long wok blong prij.—Sam 34:8; 2 Tim. 2:15.
2 Wan yangfala brata we i wantem mekem moa long wok blong prij i bin faenem se taem hem i stadi oltaem long Tok blong God, fasin tangkyu blong hem long Jeova i kam bigwan moa, mo hem i wantem wok strong moa. Ale, from samting ya, hem i fulumap pepa blong kam wan paenia. Wan sista i faenem se i hadwok blong toktok wetem ol strenja, nao hem i lanem sam rod blong storeyan we Reasoning buk i talem, ale i no longtaem, hem i kasem moa frut long wok blong prij. Hem i naf blong lidim wan Baebol stadi wetem wan hasban mo waef, mo biaen, tufala i kam long trutok.
3 Stap Glad Long Samting We Yu Naf Blong Mekem: Sam long yumi i gat wan samting long laef we i stap blokem yumi, olsem sik, famle i agensem yumi, yumi sot long plante samting, no ol man long ples blong yumi oli no wantem lesin long trutok. Plante narafala problem we oli fulap long wol long ol las dei ya, oli save blokem yumi tu long wok blong God. (Luk 21:34, futnot; 2 Tim. 3:1) ?Samting ya i minim se yumi no holem promes we yumi bin mekem taem yumi givim laef blong yumi long Jeova? I no olsem, sipos wok we yumi mekem, hem i bes blong yumi.
4 I no waes blong skelem yumi wan wetem ol narafala mo wok we oli save mekem. I moagud blong mekem olsem Baebol i talem, se “evri man wanwan i mas traem ol wok we hem nomo i mekem.” Sipos yumi traehad fulwan olsem yumi wanwan i naf blong mekem, bambae yumi mekem Jeova i glad, mo yumi tu i ‘gat risen blong glad.’—Gal. 6:4; Kol. 3:23, 24.
5 Yumi mas folem tok blong Pita, blong ‘traehad blong mekem we long fes blong God, laef blong yumi i klingud, i no gat poen i stap long yumi, mo yumi gat pis wetem God.’ (2 Pita 3:14) Tingting olsem bambae i mekem yumi harem se yumi stap sefgud, mo bambae yumi gat pis we Jeova nomo i save givim.—Sam 4:8.