?Yu Yu Tingbaot?

?Yu yu stap tingtinggud long ol Wajtaoa we oli kamaot i no longtaem? Sipos yes, bambae yu intres blong tingbaot olgeta:

▫ ?Wanem ya “wan saen we i minim gud fasin” we Jeova i wokem long ol man we oli folem trak blong leg blong Jisas? (Ol Sam 86:17, NW)

Hem i “tabu speret i mekem olgeta i haremgud tumas” blong mekem ol Kristin bifo oli stanap strong longtaem, long ol defren traem we oli kasem. (1 Tesalonaeka 1:6) I sem mak tede, mo Jeova, Man we i Givim “olgeta presen we i gud we oli aot long heven oli kamdaon,” i glad blong “givim tabu speret blong hem long olgeta we oli askem hem.” (Jemes 1:17; Luk 11:13) Taswe hem i fasin glad we i kamaot from tabu speret i givhan long ol man blong Jisas olsem “wan saen we i minim gud fasin.”​—12/15, pej 18-19.

▫ ?From wanem i impoten long yumi blong akseptem tingting blong God long fasin blong gyaman?

Ol Sam 5:6 i talem se God bambae i “spolem ol man blong gyaman.” Revelesen 21:8 i gohed i talem se ol man blong gyaman bambae oli go blong kasem “seken ded.” Taswe, sipos yumi akseptem tingting blong God long saed blong fasin gyaman, samting ya bambae i givim strongfala risen long yumi blong tok tru mo blong kasem presen blong laef.​—12/15, pej 23.

▫ ?Wanem i stampa blong wosip blong ol man Sameria? (Jon 4:20)

Long saed blong wosip blong ol man Sameria we i olbaot, oli akseptem ol faef faswan buk blong Moses nomo, hemia Pentateuch. Samwe long yia 300 B.K.T., oli putumap wan tempel long Hil ya Gerasim, blong i winim tempel blong God long Jerusalem. Nating se ol man oli spolem tempel blong ol man Sameria, kam kasem tede, evri yia oli stap holem lafet ya blong Pasova long Gerasim yet.​—1/1, pej 25.

▫ ?Ol Kristin oli mas joen blong agensem fasin blong sakem doti long wora mo win no blong klinimap ol ples?

Taem Jisas i stap long wol, hem i no traem blong winim ol trabol long taem ya blong hem. Taem Jeova i yusum Kingdom blong Mesaea blong mekem ol stret rul blong hem i kamaot long olgeta ples long wol, ol trabol long saed blong doti long wora mo win bambae i finis blong olwe. Taswe, ol Wetnes blong Jeova oli gat stret tingting long saed ya. Lav we oli gat long ol man raonabaot i pusum olgeta blong soem respek long ol samting blong ol narafala man, be i stret we oli putum wok blong talemaot mesej blong Kingdom blong God fasples long laef blong olgeta. (Matyu 6:33)​—1/1, pej 31.

▫ ?Olsem wanem Jisas i mekem wok olsem man blong karem laet? (Jon 8:12)

Jisas i givim laef blong hem blong talemaot gud nyus blong Kingdom blong God. (Luk 4:43; Jon 18:37) Hem i talemaot ol gyaman fasin blong ol skul mo hem i mekem ol man we oli stap kalabus long ol gyaman skul oli fri long saed blong speret. (Matyu 15:​3-9) Antap moa, hem i olsem laet blong wol taem hem i givim laef ya blong hem we i stretgud olgeta, olsem wan ransom. (Matyu 20:28; Jon 3:16)​—1/15, pej 10-11.

▫ ?Wanem sam long ol risen se yumi mas stap aninit long Jeova God?

Jeova hem i Hae Masta long heven mo wol, mo from samting ya yumi mas stap aninit long hem. Mo tu, from we Jeova hem i Hae God, i no gat man we i save agensem hem mo winim hem, taswe yumi no mas fogetem fasin ya we yumi mas stap aninit long hem. God i Wokem man blong man i stap mekem ol samting we God i wantem, mo from samting ya ol man oli mas stap aninit long God long olgeta samting.​—2/1, pej 10-11.

▫ ?Wanem samting i givhan long Josef blong hem i no slip wetem waef blong Potifa?

I gat wan paoa we i wok strong long tingting blong Josef. Hem i stap tingbaot fasin fren blong hem wetem Jeova mo hem i luksave se fasin blong slip wetem waef blong narafala man hem i wan sin agens long hasban blong woman ya, be tu hem i agensem God.​—2/15, pej 21.

▫ ?Jisas i minim wanem taem hem i talem se: “Trutok ya, mi ya.”? (Jon 14:6)

Jisas i no talem mo tijim trutok nomo; laef blong hem i soemaot trutok. Taswe, fasin blong trufala Kristin i no wan save nomo; be hem i wan fasin blong laef.​—3/1, pej 15.

▫ ?Wanem gudfala lesen i stap long Ol Sam 51?

Sam ya i givhan long yumi blong luksave se sipos yumi foldaon long sin be yumi rili tanem tingting blong yumi, Papa blong yumi long heven we i laekem yumi tumas i save harem krae blong yumi blong hem i sore long yumi mo sevem yumi from tingting we i foldaon. Be, yumi mas tingbaot moa sipos sin blong yumi i bin sakem doti long nem blong Jeova.​—3/15, pej 18.

▫ ?From wanem i no waes blong traem faenemaot se hu long olgeta we oli bin ded finis oli save laef bakegen, no no gat?

Hemia i no wan samting we yumi gat raet blong mekem. I waes moa long yumi blong wet long ol disisin blong ol stret man blong Jaj, Jeova God mo Jisas Kraes. Samting ya bambae i givim pis long tingting blong yumi mo i save givhan long yumi blong tingtinggud moa long wok we yumi mas mekem. (Matyu 28:​19, 20)​—3/15, pej 31.

▫ ?Baptaes long wora i minim wanem?

Baptaes hem i blong soemaot se wan man i bin givim laef blong hem long Jeova God. Taem oli go aninit long wora samting ya i soemaot se olgeta oli ded long laef we i blong olgeta nomo. Taem oli kamaot long wora samting ya i soemaot se naoia oli stap laef blong mekem wil blong God, oli putum samting ya long fasples long laef blong olgeta. (Matyu 16:24)​—4/1, pej 5-6.