?From Wanem Yu Yu Mekem Wok Blong Jeova?
“!DEI blong Jeova i kolosap! ‘Bigfala trabol’ ya i kolosap nomo, mo bambae yu no save laef tru long hem sipos yu no mekem wok blong God.” ?Sipos wan man i talem olsem long yu, bambae yu mekem wanem?—Sefanaea 2:2, 3; Matyu 24:21.
Tru ya, yumi mas tingbaot dei blong Jeova, mo yumi mas holemstrong long wok blong God blong yumi save laef tru long bigfala trabol ya we i mas kamtru i no longtaem. ?Be ol samting ya oli stampa risen blong yumi mekem tabu wok long Jeova God? ?From wanem yu yu mekem wok blong Jeova?
Yumi Nidim Stret Tingting Blong Pusum Yumi
Sipos wan man i mekem wok blong God be i no long stret tingting we i pusum hem, maet hem i save finis long wok ya sipos ol samting we hem i stap wet from oli no kamtru long wan prapa taem we hem i tingbaot. Eksampel, sam man oli stap wet se Jisas Kraes bambae i kambak bakegen long 1843 no 1844, ol yia ya oli pas be ol samting ya we oli stap putum tingting blong olgeta i strong long olgeta oli no kamtru. Long saed ya i gud blong ridim ol tok ya blong George Storrs, man blong raetem Bible Examiner mo wan fren blong Charles Taze Russell, faswan presiden blong Watch Tower Sosaeti. Long Bible Examiner blong Septemba 1846, Storrs i raetem se:
“Tingting blong mas mekem wok blong God i no kamaot from se dei ya blong Masta kolosap i finis . . . Fasin blong ol man we bambae i kamaot long taem ya sipos 1846 mo 1847 oli pas be oli no luk Jisas i kamtru mo samting ya i save hapen samting ya bambae i mekem ol man oli kros i bitim mak. Ekspiryens we i kamaot i pruvum samting ya—olsem ol ekspiryens blong 1843 mo 1844. Bigfala hif blong ol man we oli ‘wantem mekem wok blong God’ olsem we oli mas mekem from we oli harem se i kolosap taem blong Masta i kambak bakegen, ?oli stap wea naoia? Mo mi talem bakegen—!OLI STAP WEA! Naoia kolosap wan man nomo long ol ten man ya i stap holemtaet yet wok blong Kristin man. ?From wanem oli no stap? Rong tingting i pusum olgeta. Oli stap tingbaot olgeta nomo mo oli wantem kasem sam samting. Oli olsem man blong mekem sin we i ting se kolosap hem i ded long wan sikbed no i stap long solwora long taem blong hariken. Bambae hem i kam wan Kristin, sipos hem i mas ded. Sipos hem i save se trabol i no save kasem hem, bambae hem i no tingbaot nating.”
Mekem Wok Blong God Wetem Stret Tingting We i Pusum Yu
Fasin blong man i tingbaot hem nomo mo fasin fraet long ded i save pusum sam man blong oli mekem wil blong Jeova. Sam narafala maet oli glad tumas long hop ya blong laef long Paradaes nao bambae oli mekem wok blong God from risen ya nomo. Be, sipos ol man we tingting ya nomo i pusum olgeta oli ting se dei blong Jeova mo taem blong bigfala trabol i no kolosap nating, maet oli no save gat strong tingting blong mekem wok blong God.
Yes, fasin glad long ol promes blong God mo ol blesing long fyuja we hem i bin talemaot finis hemia i no fasin blong tingbaot yumi nomo. Olsem ol man blong Jisas Kraes, Pikinini blong God, Hem i wantem se yumi harem gud long fyuja we i stap fored long yumi. Aposol Pol i talem se: “From we tingting blong yufala i stap strong long God yufala i mas harem gud” mo i gohed i talem se: “Taem yufala i gat trabol, yufala i mas mekem tingting blong yufala i longfala. Mo yufala i mas stap prea oltaem.” (Rom 12:12) Mo wetem prea, “glad blong Jeova” i save givhan long yumi blong stanap strong long taem blong ol trabol mo gat longfala tingting blong wet long ol promes blong God oli kamtru. (Nehemaea 8:10) Naoia, yumi gat plante risen blong mekem wok blong Jeova. ?Wanem sam long ol risen ya?
Hem i Wan Wok Mo Wan Jans Blong Mekem
From we Jeova i Hae Rula blong heven mo wol, yumi mas mekem wosip long hem nomo. (Eksodas:4, 5) Taswe evri Kristin oli mas mekem olsemia long God nating se bigfala trabol ya bambae i stat tumora, nekis yia, no sam yia biaen. Bambae Kristin ya i mas mekem wok blong Jeova fulwan from we hem i laekem God wetem ful hat, sol, tingting, mo paoa blong hem. (Mak 12:30) Sam Kristin bifo oli ting se dei blong Jeova i kolosap nomo, oli wet be i no kamtru, mo oli ded we oli no luk taem ya. (1 Tesalonaeka 5:1-5; 2 Tesalonaeka 2:1-5) Be, sipos oli holemstrong go kasem taem oli ded, olgeta man ya blong Kraes we tabu speret i makemaot olgeta oli kasem pei blong laef bakegen long ded blong go laef long heven.—Revelesen 2:10.
Ol Wetnes blong Jeova we oli baptaes finis oli mas mekem wok blong God long bilif from we olgeta nomo oli agri blong mekem wil blong hem. !Tingbaot! Yumi save mekem wil blong Hae Rula blong heven mo wol olsem ol tabu enjel oli stap mekem. (Ol Sam 103:20, 21) Jisas i stap tinghae long wan wok olsem nao hem i talem se: “Kakae ya blong mi hemia, we bambae mi mekem ol samting we hemia we i sanem mi i wantem, mo mi finisim ol wok we hem i givim.” (Jon 4:34) Sipos yumi gat sem tingting ya, bambae yumi gat strong tingting blong tokbaot Jeova mo talemaot plan blong hem long ol narafala man, olsem Baebol i soem. Long rod ya yumi gat wan wok tu blong givhan long ol narafala man long saed blong speret. Mo tru ya, taem yumi mekem wil blong God from we yumi laekem hem hemia i wan nambawan wok, nating se yumi no save stat blong dei blong Jeova.
Fasin Tangkyu i Pusum Man
Fasin tangkyu from lav blong God taem hem i givim ransom sakrifaes blong Pikinini blong hem, i mas pusum yumi tu blong mekem wok blong Jeova. Bifo yumi stap longwe long Jeova God from sin. Be, Jisas i talem se: “God i laekem tumas ol man long wol, nao hem i givim mi, mi stret Pikinini blong hem, mi wan nomo we hem i gat, blong olgeta man we oli bilif long mi bambae oli no save lus, oli gat laef we i no save finis.” (Jon 3:16) Jeova nao i mekem faswan samting long bisnes ya, olsem Pol i raetem se: “God i laekem yumi tumas, mo i soemaot samting ya long yumi long fasin ya we Kraes i ded blong sevem yumi, long taem ya we yumi stap mekem i nogud yet.” (Rom 5:8) Fasin tangkyu from lav ya blong God i mas pusum yumi blong mekem wok blong hem wetem fulhat blong yumi.
Fasin tangkyu from ol samting we Jeova i stap givim long saed blong speret mo long bodi, i givim moa risen long yumi blong mekem wok blong God. Tok blong God i wan trufala samting blong lidim yumi—wan laet blong saenem rod blong yumi. Ol buk we oli kamaot tru long “slef ya we i stret mo waes” oli givhan long yumi blong mekem laef blong yumi i laenap wetem wil blong God. (Matyu 24:45-47, NW; Ol Sam 119:105) Mo from we yumi lukaot Kingdom blong God fastaem, Jeova i givim ol samting long saed blong bodi tu long yumi. (Matyu 6:25-34) ?Yu yu gat fasin tangkyu long ol samting ya?
Fasin tangkyu from fasin fri long ol gyaman skul we God i givim, hemia i wan narafala risen blong yumi mekem wok blong Jeova. Woman ya blong rod, Bigfala Babilon “i stap sidaon long [ol wora ya] hemia ol man blong evri kantri, mo blong evri ples long wol. Oli man blong evri kala mo blong evri lanwis.” (Revelesen 17:1, 15) Be, woman ya i no sidaon long ol man blong Jeova, i no gat paoa no hem i no kontrolem olgeta long saed blong ol skul. Eksampel, oli sakemaot gyaman tijing ya se sol blong man i no save ded. Oli save se God i wokem man “i kam wan laef sol,” mo oli save se ol ded man “oli no save wan samting nating,” mo oli save se bambae i gat laef bakegen long ded. (Jenesis 2:7; Eklesiastis 9:5, 10; Ol Wok 24:15) Taswe oli no fraet mo oli no wosip long ol ded man. ?Fasin tangkyu long fasin fri ya long saed blong speret i mekem yu yu blokem apostasi mo holemstrong long klin wosip blong Jeova?—Jon 8:32.
Fasin tangkyu from sapot blong Jeova evri dei i mas pusum tingting blong yumi moa blong mekem wok blong hem fulwan. Deved, man ya blong raetem Sam i talem se: “Yumi presem [Jeova, NW], we evri dei, hem i stap karem ol hevi samting blong yumi.” (Ol Sam 68:19) Long wan narafala ples man blong raetem Sam i talem se: “Papa mo Mama blong mi, maet tufala i save lego mi, be yu, [Jeova, NW], bambae yu stap lukaot long mi oltaem.” (Ol Sam 27:10) Yes, wan man we i holemstrong blong mekem wok blong Jeova i save putum olgeta baden blong hem, olsem ol wari mo traem, i go long God. ?Yu yu stap soemaot fasin tangkyu long sapot we Jeova i stap givim long yu oltaem taem yu stap holemstrong blong mekem wok blong hem?—Ol Sam 145:14.
Leftemap Jeova Mo Rul Blong Hem
Tingting blong wantem leftemap Jeova i mas pusum yumi tu blong mekem wok blong hem. Olgeta long heven oli stap leftemap God olsem ol tok ya oli talem: “Yu yu masta blong mifala, yu yu God blong mifala. Yu yu mekem olgeta samting blong wol fastaem, mo from we yu yu wantem olsem, yu holem olgeta samting ya oli stap, mo yu givim laef long olgeta. From samting ya, i stret nomo blong ol man oli leftemap nem blong yu.” (Revelesen 4:11) King Deved i leftemap nem blong God taem hem i se: “Jeova, yu yu bigfala tumas mo yu yu gat paoa mo yu yu gud tumas mo yu yu hae mo yu yu gat nem . . . O Jeova, kingdom hem i blong yu, . . . Olgeta rij mo ol gudfala samting oli kamaot long yu, mo yu yu jif antap long evri samting . . . O God blong mifala, mifala i stap talem tangkyu long yu mo mifala i stap presem nem blong yu.” (1 Kronikel 29:10-13) Olsem ol man blong Jeova, yumi mas leftemap nem blong hem long toktok mo wok blong yumi taem yumi stap wet long ol promes blong hem blong oli kamtru.—1 Korin 10:31.
Wan strong tingting blong tokbaot Kingdom blong God, i givim wan narafala samting blong pusum yumi blong mekem wok blong Jeova. Gudfala tingting ya i stap long tok blong man blong raetem Sam, se: “[O Jeova, NW] olgeta samting ya we yu bin mekem, bambae oli presem yu, mo olgeta man blong yu bambae oli talem tangkyu long yu. Yu yu King, mo bambae oli stap tokbaot ol gudgudfala samting we yu bin mekem long paoa blong yu, mo bambae oli stap talemaot bigfala paoa we yu yu gat, blong olgeta man bambae oli save ol bigbigfala wok blong yu, mo gudgudfala samting blong haenem blong yu, we yu yu King. Yu nomo yu King, mo bambae yu yu stap rul oltaem, gogo i no save finis.” (Ol Sam 145:10-13) Wok blong talemaot mesej blong Kingdom i wan wok blong ol Kristin mo hem i impoten moa long ol narafala wok long taem blong yumi. (Matyu 24:14; 28:19, 20) ?Yu yu gat strong tingting blong presem Jeova mo talemaot Kingdom blong hem long ol narafala man?
Wok blong mekem nem blong Jeova i tabu mo leftemap hae rul blong hem oli mas impoten tumas long yumi blong pusum yumi blong wantem mekem wok blong hem. Yumi save prea se nem blong Jeova i tabu mo leftemap hae rul blong hem. (Matyu 6:9) Mo blong mekem olsem prea blong yumi, yumi mas joen long Kristin minista wok oltaem mo taem yumi talemaot trutok long saed blong ol impoten samting ya.—Esikel 36:23; 39:7.
Glad Mo Haremgud
Taem yumi mekem wok blong Jeova, yumi haremgud blong mekem hat blong hem i glad mo yumi pruvum se Devel Setan i man blong gyaman. Setan i talem se ol man oli stap mekem wok blong God blong kasem wan samting blong olgeta nomo, be taem yumi holemstrong long wok blong yumi long Jeova from we yumi laekem hem, samting ya i pruvum se ol tok blong man ya blong jikim God oli gyaman. (Job 1:8-12) Samting ya i givim gudfala risen long yumi blong gohed blong mekem samting we i stap long Proveb 27:11 se: “Pikinini blong mi, yu mas waes, mo yu mas mekem hat blong mi i glad, blong bambae mi save ansa long hem we i stap jikim mi.” Mo tu, taem yumi holemstrong blong mekem wok blong Jeova nating se Setan i stap traehad blong blokem yumi, rod ya we yumi stap folem bambae i mekem ol narafala man blong bilif oli kam strong moa.—Filipae 1:12-14.
Fasin glad mo haremgud blong joen long wok blong karem kakae long saed blong speret i mas pusum yumi tu blong mekem wok blong Jeova. Jisas i glad taem hem i halpem ol man, i tru moa long saed blong speret. Matyu 9:35-38 i talem se: “Nao Jisas i stap wokbaot, i stap pas long ol taon mo velej, mo i stap tij insaed long ol haos blong prea blong olgeta. Hem i stap talemaot gud nyus [blong Kingdom, NW]. Mo i stap mekem olgeta we oli sik mo olgeta we bodi blong olgeta i no gud, oli gud bakegen. Mo taem hem i luk plante man we oli stap, hem i sore tumas long olgeta, from we olgeta oli trabol tumas, oli no moa gat paoa, oli olsem ol sipsip we oli no gat man blong lukaot long olgeta. Nao hem i talem ol man blong hem se ‘Tru, i gat plante kakae tumas i stap long garen, be smol man nomo oli stap blong karem i go. Yufala i mas askem strong long masta blong garen ya, blong hem i sanem sam moa man oli kam karem ol kakae ya blong hem.’ ” Sipos wok blong karem kakae long garen i gohed longtaem moa bitim we yumi stap tingbaot, samting ya bambae i givim moa taem long yumi blong faenem glad mo haremgud taem yumi givhan long ol narafala man long saed blong speret. Hemia tu i rod we yumi mas folem blong soemaot lav long ol man raonabaot long yumi.—Matyu 22:39.
?From Wanem Yu Yu Mekem Wok Blong God?
Yumi lukluk sam long ol gudfala risen nomo blong mekem wok blong Jeova. I gud blong tingting dip long prea from wanem risen nao yumi wanwan i mekem wok blong God, from we yumi wanwan bambae yumi talemaot ol samting we yumi stap mekem long fes blong hem. (Rom 14:12; Hibrus 4:13) Olgeta we oli stap gohed blong gat rong tingting we oli tingbaot olgeta nomo bambae oli no haremgud long glad hat blong God.
?Bambae yumi kasem wanem sipos yumi stap mekem wok blong God blong mekem nem blong Jeova i tabu mo i no from we yumi stap tingbaot yumi nomo? Yes, !Jeova bambae i blesem yumi mo minista wok blong yumi! (Proveb 10:22) Bambae yumi kasem laef we i no save finis tu from we yumi stap holemstrong blong mekem wok blong Jeova.
[Tok Blong Pija Long Pej 9]
Plante taosen man long Japan, oli mekem wok blong Jeova
[Tok Blong Pija Long Pej 10]
Oli stap mekem wok blong Jeova long Côte d’Ivoire
[Foto Credit Line Blong Pija Long Pej 8]
SIX SERMONS, by George Storrs (1855)