“Yufala i Mas Jusum Wanem God We Bambae Yufala i Wosipim”

1. ?Yumi mas mekem wanem blong yumi glad long laef blong yumi, mo from wanem? (Aesea 48:​17, 18)

PAPA blong yumi long heven i lavem yumi tumas, mo hem i wantem se yumi glad long laef blong yumi naoia mo long fiuja. (Pri. 3:​12, 13) Taem hem i wokem yumi, hem i mekem se yumi naf blong mekem plante samting. Be hem i no wokem yumi blong yumi lidim yumi wan, o blong yumi jusum samting we i stret mo samting we i no stret. (Pri. 8:9; Jer. 10:23) Hem i save se blong yumi glad long laef blong yumi, yumi mas wosipim hem mo obei long ol rul we hem i putum.—Ridim Aesea 48:​17, 18.

2. ?Setan i wantem se yumi gat wanem tingting? ?Mo Jehova i mekem wanem blong soemaot se Setan i giaman?

² Setan i wantem yumi gat tingting ya se yumi no nidim Jehova blong yumi glad, mo se ol man oli naf blong rulum olgeta wan. (Jen. 3:​4, 5) Jehova i soemaot se Setan i wan man blong giaman, taem hem i letem ol man oli rulum olgeta wan blong smoltaem. Ol samting we oli hapen oli soemaot klia se ol man oli no naf blong rulum olgeta wan. Mo tu, Baebol i tokbaot eksampol blong plante man mo woman we oli glad taem oli wosipim Jehova. Beswan eksampol, hemia Jisas Kraes. Fastaem, bambae yumi tokbaot from wanem hem i jusum blong wosipim Jehova. Biaen, bambae yumi tokbaot from wanem yumi mas wosipim Jehova. Mo laswan, bambae yumi tokbaot from wanem yumi jusum blong wosipim Jehova.

?FROM WANEM JISAS I JUSUM BLONG WOSIPIM JEHOVA?

3. ?Setan i talem wanem long Jisas? ?Mo Jisas i jusum blong mekem wanem?

³ Taem Jisas i stap long wol, hem i mas jusum se bambae hem i wosipim hu. Jes afta we hem i baptaes, Setan i talem se bambae hem i givim olgeta kingdom blong wol long Jisas, sipos hem i bodaon long hem blong mekem wosip long hem. Be Jisas i ansa se: “!Setan yu gowe! Baebol i talem se: ‘Yu mas mekem wosip long Jehova nomo we i God blong yu, mo yu mas mekem tabu wok blong hem nomo.’” (Mat. 4:​8-10) ?From wanem Jisas i jusum blong wosipim Jehova? Bambae yumi tokbaot sam risen.

4-5. ?Wanem sam risen from wanem Jisas i jusum blong wosipim Jehova?

⁴ Bigfala risen from wanem Jisas i wosipim Jehova, hemia from we hem i lavem tumas Papa blong hem. (Jon 14:31) Mo tu, Jisas i save se i stret blong wosipim Jehova. (Jon 8:​28, 29; Rev. 4:11) Hem i save se Jehova nao i Stamba blong laef, i glad blong givim evri gudfala samting, mo man i save trastem Hem. (Sam 33:4; 36:9; Jem. 1:17) Oltaem Jehova i tok tru long Jisas mo i givim evri gudfala samting long hem. (Jon 1:14) Be Setan i defren, hem i pulum ol man blong mekem sin, nao oli ded. Hem i wan man blong giaman we i tingbaot hem wan nomo mo i griri. (Jon 8:44) From we Jisas i save ol samting ya, hem i no wantem nating blong folem Setan mo rebel agensem Jehova.—Fil. 2:​5-8.

⁵ Wan narafala risen from wanem Jisas i jusum blong wosipim Jehova, hemia from we hem i tingbaot ol gudfala samting we bambae i kamaot from. (Hib. 12:2) Hem i save se sipos hem i holemstrong long Jehova, bambae hem i leftemap nem blong Papa blong hem, mo i mekem se ol man oli kam fri long sin mo ded.

?FROM WANEM YUMI MAS WOSIPIM JEHOVA?

6-7. ?From wanem plante man tede oli no wosipim Jehova? ?From wanem yumi mas wosipim Jehova nomo?

⁶ Plante man tede oli no wosipim Jehova from we oli no save yet ol gudfala fasin blong hem, mo ol samting we hem i mekem blong olgeta. Hemia i sem mak long ol man Atens we aposol Pol i prij long olgeta.—Wok 17:​19, 20, 30, 34.

⁷ Pol i eksplenem long ol man Atens se Jehova nao “i givim laef long olgeta man, mo i givim win we oli pulum, mo i givim olgeta samting.” Mo tu, hem i talem se: “Hem nomo i mekem se yumi gat laef, yumi stap, mo yumi muvmuv.” God nao i wokem yumi, “i mekem wan man nomo, nao olgeta man long wol oli kamaot long man ya,” taswe yumi mas wosipim Hem nomo.—Wok 17:​25, 26, 28.

8. ?Jehova bambae i neva mekem wanem? Yu eksplenem.

⁸ From we Jehova i Krieta blong yumi mo i Hae Masta blong heven mo wol, hem i save fosem ol man blong wosipim hem. Be Jehova bambae i neva mekem olsem. Defren olgeta, hem i givim ol pruf long yumi we i soemaot se hem i stap, mo se hem i lavem yumi wanwan. Hem i wantem se olgeta man oli jusum blong kam ol fren blong hem blong olwe. (1 Tim. 2:​3, 4) Taswe, Jehova i trenem yumi blong yumi naf blong tijim ol narafala, blong oli save ol gudfala samting we bambae hem i mekem long ol man long fiuja, mo olsem wanem bambae hem i mekem oli kamtru. (Mat. 10:​11-13; 28:​19, 20) Mo tu, hem i mekem se yumi save joen wanples long ol kongregesen, blong wosipim hem mo kasem help blong ol elda.—Wok 20:28.

9. ?Olsem wanem Jehova i soemaot se hem i lavem olgeta man?

⁹ Jehova i soemaot se hem i lavem olgeta man, taem hem i mekem i gud long olgeta tu we oli no bilif long hem. Yu traem tingbaot samting ya: Longtaem finis i kam, plante bilian man oli jusum blong folem prapa tingting blong olgeta long samting we i stret mo i no stret. Nating se i olsem, Jehova i kaen long olgeta mo i givim samting we oli nidim blong harem gud long laef blong olgeta. (Mat. 5:​44, 45; Wok 14:​16, 17) Hem i mekem se oli save gat ol fren mo famle we i lavem olgeta, oli save gat ol pikinini, oli save wok, mo harem gud long laef blong olgeta. (Sam 127:3; Pri. 2:24) Hemia i soemaot klia se Papa blong yumi long heven i lavem olgeta man. (Eks. 34:6) Naoia i gud yumi tingbaot bakegen sam long ol risen from wanem yumi jusum blong wosipim Jehova, mo olsem wanem hem i blesem yumi taem yumi wosipim hem.

?FROM WANEM YUMI JUSUM BLONG WOSIPIM JEHOVA?

10. (1) ?Wanem bigfala risen from wanem yumi wosipim Jehova? (Matiu 22:37) (2) ?Fasin blong Jehova blong fogivim yumi i givhan long yu olsem wanem? (Ol Sam 103:​13, 14)

¹⁰ Olsem Jisas, bigfala risen from wanem yumi wosipim Jehova, hemia from we yumi lavem Hem tumas. (Ridim Matiu 22:37.) Taem yumi save ol gudfala fasin blong Jehova, hemia i pulum yumi blong wantem kam klosap long hem. Eksampol, traem tingbaot fasin blong Jehova blong fogivim yumi. Taem ol man Isrel oli no obei long hem, hem i talem long olgeta se: “Plis yufala i tanem baksaed long ol nogud fasin blong yufala.” (Jer. 18:11) Jehova i tingbaot se yumi ol sinman, mo se yumi kamaot long das nomo. (Ridim Ol Sam 103:​13, 14.) Taem yu tingting dip long fasin blong Jehova blong fogivim yu, mo ol narafala gudfala fasin blong hem, hemia bambae i pulum yu blong wantem wosipim hem blong olwe.

11. ?Wanem sam narafala risen from wanem yumi jusum blong wosipim Jehova?

¹¹ Wan narafala risen we i pulum yumi blong wantem wosipim Jehova, hemia from we yumi save se i stret blong mekem olsem. (Mat. 4:10) Mo tu, yumi save ol gudfala samting we bambae i kamaot sipos yumi wosipim hem. Taem yumi holemstrong long Jehova, bambae yumi leftemap nem blong hem, yumi pruvum se Setan i wan man blong giaman, mo yumi mekem Jehova i glad. Mo sipos yumi jusum blong wosipim Jehova naoia, bambae yumi save gohed blong wosipim hem olwe.—Jon 17:3.

12-13. ?Yumi lanem wanem long ekspiriens blong Jane mo Pam?

¹² Yumi save lanem blong lavem Jehova stat taem yumi yang, mo lav ya bambae i gohed blong kam strong moa taem ol yia oli pas. Traem tingbaot stori blong tu gel we tufala i stret sista, nem blong tufala Jane mo Pam.a Jane i gat 11 yia mo Pam i gat 10 yia taem tufala i stat blong stadi Baebol. Nating se papa mo mama blong tufala i no intres blong stadi, be tufala i letem blong Jane mo Pam i stadi wetem ol Witnes sipos tufala i gohed blong go long jej wetem famle long wiken. Jane i talem se: “Ol tijing blong Baebol we ol Witnes oli tijim mi long hem, i givhan long mi blong mi talem no taem ol fren long skul oli traem pulum mi, blong mi tekem ol drag mo mekem doti fasin blong seks.”

¹³ Afta we Jane mo Pam i stadi blong sam yia, tufala tugeta i kam ol pablisa. Biaen, tufala i statem wok blong paenia, mo long semtaem tufala i lukaot long papa mo mama blong tufala we i stap kam olfala. Taem Jane i tingtingbak long ekspiriens blong hem, hem i talem se: “Mi luksave se oltaem Jehova i lukaot gud long ol fren blong hem, mo se ‘Jehova i save ol man blong hem,’ olsem we 2 Timoti 2:19 i talem.” Yes, oltaem Jehova i lukaot gud long olgeta we oli jusum blong lavem mo wosipim hem.

14. ?Olsem wanem yumi save leftemap nem blong Jehova tru long ol toktok mo aksen blong yumi? (Mo tu, yu luk ol pija.)

¹⁴ Yumi wantem leftemap nem blong Jehova, mo pruvum se ol nogud samting we ol man oli stap talem long saed blong hem i no tru. Traem tingbaot se yu gat wan gudfala fren we i kaen, i glad blong givim samting long narafala, mo i fogivim narafala. Be wan dei, yu harem we wan man i stap talem ol giaman tok long saed blong fren blong yu, se hem i wan rabis man mo i wan man blong giaman. ?Bambae yu yu mekem wanem? Bambae yu wantem pruvum se hemia i no tru. Long sem fasin, taem Setan mo ol man we hem i kontrolem olgeta oli sakem ol giaman tok agensem Jehova blong spolem nem blong Hem, yumi wantem pruvum se samting we oli talem i no tru, mo talemaot trutok long saed blong Hem. (Sam 34:1; Aes. 43:10) Yumi soemaot long ol toktok mo aksen blong yumi, se yumi wantem wosipim Jehova wetem fulhat blong yumi.

15. ?Wanem sam blesing we aposol Pol i kasem from we hem i mekem ol jenis long laef blong hem? (Filipae 3:​7, 8)

¹⁵ Yumi glad nomo blong mekem ol jenis long laef blong yumi, blong yumi save mekem Jehova i glad mo mekem moa long wok blong hem. Aposol Pol tu i rere blong lego hae posisen we hem i gat long komuniti, blong hem i save kam wan disaepol blong Kraes mo wosipim Jehova. (Gal. 1:14) From samting ya, hem i gat wan gudfala laef mo i kasem janis ya blong rul wetem Jisas long heven. I sua se hem i glad long desisen we hem i bin mekem blong wosipim Jehova, mo yumi tu bambae yumi glad sipos yumi mekem olsem.—Ridim Filipae 3:​7, 8.

16. ?Yumi lanem wanem long ekspiriens blong Julia? (Mo tu, yu luk ol pija.)

¹⁶ Sipos bigfala samting long laef blong yumi hemia blong wosipim Jehova, yumi save gat wan gudfala laef naoia mo long fiuja. Traem tingbaot ekspiriens blong wan sista we nem blong hem Julia. Stat taem Julia i smol, hem i joen long wan grup blong singsing long jej blong hem. Wan dei, wan man we i save singsing gud i luksave se Julia i naf blong singsing gud, nao i stat blong trenem hem. Sloslo, ol man oli stat blong save gud Julia, mo hem i stap singsing long ol spesel ples we plante man oli save go blong wajem hem. Taem hem i stap go long wan skul we i tijim miusik, wan fren long skul i stat blong tokbaot God long hem, mo i eksplenem se God i gat wan nem, hemia Jehova. Biaen, Julia i stat blong stadi Baebol tu taem long wan wik. Ale, hem i mekem desisen blong yusum laef blong hem blong mekem wok blong Jehova, be i no blong singsing. Be desisen ya i no isi. Hem i talem se: “Plante man oli talem long mi se mi no sud stop blong singsing. Be mi wantem yusum ful laef blong mi blong mekem wok blong Jehova.” ?Tede, Julia i gat wanem tingting long desisen ya we hem i bin mekem bitim 30 yia i pas? Hem i talem se: “Mi mi glad tumas long desisen ya we mi bin mekem blong wosipim Jehova, mo mi save se long fiuja Jehova bambae i givim olgeta samting we mi wantem tumas.”—Sam 145:16.

GOHED BLONG WOSIPIM JEHOVA

17. Taem yumi kasemsave se yumi stap laef klosap long en, ?hemia i givhan long yumi olsem wanem?

¹⁷ Yumi laef klosap nomo long en. Aposol Pol i talem se: “From we ‘klosap’ nao ‘man ya we i stap kam, bambae i kamtru, mo bambae hem i no let.’” (Hib. 10:37) Taem yumi kasemsave long samting ya, ?hemia i givhan long yumi olsem wanem? Yumi save se naoia i gat smoltaem nomo i stap blong ol man oli jusum blong wosipim Jehova. (1 Kor. 7:29) Mo sipos yumi mekem desisen finis blong wosipim Jehova, yumi save se nating sipos yumi mas fesem ol trabol, be “klosap” nao, bambae ol trabol ya oli finis.

18. ?Jisas mo Jehova i wantem se yumi mekem wanem?

¹⁸ Jisas i leftemap tingting blong ol man blong oli kam ol disaepol blong hem, mo blong oli gohed blong folem hem. (Mat. 16:24) Taswe, sipos yumi bin mekem wok blong Jehova blong plante yia finis, i gud yumi gat strong tingting blong no lego. Yumi mas traehad blong holem promes we yumi bin mekem blong wosipim hem. Maet bambae i no isi, be bambae yumi glad mo kasem plante blesing long fiuja, mo naoia tu.—Sam 35:27.

19. ?Yumi lanem wanem long ekspiriens blong Jin?

¹⁹ Samfala oli ting se sipos oli wosipim Jehova, bambae oli no save harem gud long laef blong olgeta. Sipos yu yu wan yangfala, ?yu tu yu gat tingting olsem? Wan yangfala brata we nem blong hem Jin, i talem se: “Mi mi harem se from we mi wan Witnes blong Jehova, mi no save gat gudtaem. I luk olsem se plante long ol yangfala we mi gruap wetem olgeta oli harem gud long plante samting, olsem oli go long ol pati, oli fren, mo oli plei ol gem blong faet. Be mi mi mas spenem taem blong mi blong go long ol miting mo prij nomo.” ?Tingting ya i pulum Jin blong mekem wanem? Hem i talem se: “Mi stat blong mekem ol nogud samting we ol narafala yangfala ya oli stap mekem, mo mi harem gud blong smoltaem. Be mi no kasem trufala glad. Ale, mi stat blong tingbaot bakegen ol trutok blong Baebol we mi no bin tinghevi long hem fastaem, mo mi mekem desisen blong wosipim Jehova wetem fulhat blong mi. Stat long taem ya, mi luksave se Jehova i ansarem evri prea blong mi.”

20. ?I gud yumi gat strong tingting blong mekem wanem?

²⁰ Wan man blong raetem sam i singsing i go long Jehova se: “Man we yu jusum mo yu tekem hem i kam klosap, blong i stap long yad blong yu, hem i glad.” (Sam 65:4) I gud yumi gohed blong gat sem tingting olsem Josua, we i talem se: “Mi wetem ol famle blong mi bambae mifala i wosipim Jehova.”—Jos. 24:15.