?Hu Ya Jeova?

“?HU YA Jeova?” Kwestin ya flas man ya Fero, king blong Ijip i bin askem 3,500 yia bifo. Fasin stronghed i pusum hem blong i gohed i se: “Mi mi no save Jeova ya.” Tu man we tufala i stap stanap fored long Fero, tufala i bin save se hu nao i Jeova. Tufala ya, Moses mo Eron, tufala i brata, tufala i blong laen blong Livae we hem i blong Isrel. Jeova i sanem tufala blong askem rula blong Ijip ya blong i sanem ol man Isrel i go long drae ples blong oli mekem wan lafet blong wosip.​—Eksodas 5:​1, 2.

Fero i no wantem harem ansa long kwestin blong hem. Aninit long rul blong hem, ol pris oli stap leftemap wosip blong plante handred long ol gyaman god. !Yes, ol man oli stap tingbaot Fero olsem wan god! Kastom store blong ol man Ijip i se, Fero i pikinini boe blong san-god ya Ra mo hem nao i god ya Orus we i gat hed olsem pijin ya falkon. Ol man oli stap yusum ol bigfala nem olsem “hae god ya” mo “hemia we i no save ded samtaem” blong singaotem Fero. Taswe yumi no sapraes se hem i save askem kwestin ya blong daonem Jeova, se: “?Hu ya Jeova? ?Weswe mi mi mas harem hem?”

I no nid blong Moses mo Eron i ansa long kwestin ya. Fero i save se Jeova hem i God ya we ol man Isrel oli stap wosip long hem. Taem ya ol man Isrel oli stap harem nogud aninit long ol man Ijip. Be Fero mo ful Ijip bambae i no longtaem oli save se Jeova hem i trufala God. Sem mak tede, Jeova bambae i mekem se olgeta man long wol oli save nem blong hem mo blong oli save se hem i God. (Esikel 36:23) Taswe yumi save lanem sam samting taem yumi tingbaot olsem wanem Jeova i soem nem blong hem long Ijip bifo.

Hae Moa Long Ol God Blong Ol Man Ijip

Taem Fero i stronghed i askem se hu ya i Jeova, hem i no gat tingting se bambae hem i kasem ol panis ya we hem i bin kasem from. Jeova hem wan i ansa long Fero, hem i mekem ten bigbigfala panis oli kamaot long Ijip. Ol panis ya oli no jes blong agensem nesen ya nomo. Oli blong agensem ol god blong Ijip tu.

Ol panis ya oli soemaot we Jeova i hae moa long ol god blong Ijip. (Eksodas 12:12; Namba 33:4) !Tingbaot bigfala krae we i kamaot taem Jeova i jenisim Nael Reva mo olgeta wora blong Ijip i kam blad! Long merikel ya, Fero mo ol man blong hem oli lanem se Jeova i hae moa long Nael-god ya, Hapi. Ded blong ol fis long Nael hem i daonem skul blong ol man Ijip, from we oli stap wosip long sam kaen fis.​—Eksodas 7:​19-21.

Biaen, Jeova i mekem wan panis blong ol frog i kamaot long Ijip. Samting ya i daonem frog-god ya blong Ijip, Heqt, we i woman god. (Eksodas 8:​5-14) Namba tri panis i mekem tingting blong ol pris blong mekem majik i fasfas, olgeta oli no save mekem merikel olsem merikel blong Jeova taem hem i tanem ol ases blong graon oli kam moskito. Oli talem se, “Hemia God ya we i mekem samting ya.” (Eksodas 8:​16-19) Thoth, god ya blong Ijip we ol man oli stap talem se hem i stampa blong fasin blong wokem kleva, i no save givhan long ol gyaman pris ya.

Fero i stap save nao hu ya Jeova. Jeova hem i God ya we i save talem plan blong hem tru long Moses mo biaen hem i mekem plan blong hem i kamtru taem hem i mekem merikel blong ol panis long ol man Ijip. Mo tu Jeova i save statem mo finisim ol panis ya olsem we hem i wantem. Be, save ya i no pusum Fero blong i lesin long Jeova. Flas king ya blong Ijip i mekem hed blong hem, i gohed blong stap agensem Jeova.

Long taem blong namba fo panis, ol flae oli stap olbaot long kantri ya, oli go insaed long ol haos, mo oli fulumap skae, we hem i wan samting we oli stap tingbaot taem oli mekem wosip long god ya Shu no woman god ya Aesis, kwin blong heven. Hibru tok blong bebet ya samfala man oli tanem i kam “gadfly,” “dog fly,” mo “beetle.” (Engglis) (New World Translation; Septuagint; Young) Sipos ol bebet ya oli olsem, ol man Ijip oli kasem panis long ol bebet ya we oli stap givim ona long olgeta, mo ol man we oli wokbaot oli no save mestem, bambae oli mas stanap long olgeta mo kilim olgeta. Long saed ya, panis ya i tijim Fero nyufala samting long saed blong Jeova. Ol god blong Ijip oli no save protektem ol man we oli stap wosip long olgeta from ol flae ya, be Jeova i save protektem ol man blong hem. Panis ya mo ol narafala panis we oli kamaot biaen oli spolem ol man Ijip be i no ol man Isrel.​—Eksodas 8:​20-24.

Namba faef panis hem i wan sik we i kamaot long ol anamol blong ol man Ijip. Samting ya i daonem Hathor, Apis, mo woman god ya blong skae, Nut, we bodi blong hem i olsem buluk. (Eksodas 9:​1-7) Namba sikis panis i givim boela long ol man mo long ol anamol, hem i daonem gud ol god ya Thoth, Aesis, mo Ptah, we ol man oli stap ting se ol god ya oli gat paoa blong mekem man i kamgud bakegen long sik.​—Eksodas 9:​8-11.

Namba seven panis hem i ol ston blong aes we i foldaon bigwan, wetem faea we i laet olbaot long ol ston ya blong aes. Samting ya i daonem gud god ya Reshpu, we oli ting se hem i bos blong laetning, mo i daonem god ya Thoth, we oli talem se hem i stap lukaot long ren mo tanda. (Eksodas 9:​22-26) Namba eit panis, hem i ol lokis, panis ya i soem se Jeova i hae moa long Min, god blong karem plante kakae, we oli talem se hem i stap lukaot gud long ol kakae long garen. (Eksodas 10:​12-15) Namba naen panis, hem i tudak we i kavremap Ijip long tri dei, i daonem ol god blong Ijip olsem ol god ya blong san, Ra mo Orus.​—Eksodas 10:​21-23.

Nating se i gat naen panis we oli spolem ol samting, Fero i no wantem lego ol man Isrel oli go fri yet. Fasin stronghed blong hem i mekem bigfala trabol i kamaot long Ijip taem God i mekem namba ten mo hem i laswan panis​—ded blong ol fasbon pikinini blong man mo anamol. Yes fasbon pikinini boe blong Fero tu i ded, nating se oli stap tingbaot hem olsem wan god. Olsemia nao Jeova i “panisim olgeta god blong ol man Ijip.”​—Eksodas 12:​12, 29.

Nao Fero i singaot Moses mo Eron mo i talem se: “!Yutufala i aot long ples ya! !Yutufala i tekem ol man blong yutufala, yufala i go! !Yufala i mas gowe long ol man blong mi! Yufala i save go mekem wosip long Hae God olsem we yutufala i stap askem. Mo yufala i save tekem ol sipsip mo ol nani mo ol buluk blong yufala tu i go. Be plis, yufala i mas prea long Hae God blong i blesem mi.”​—Eksodas 12:​31, 32.

Man Blong Sevem Ol Man Blong Hem

Ol man Isrel oli aot, be i no longtaem long lukluk blong Fero se olgeta ya oli lusum rod blong olgeta long drae ples. Nao Fero mo ol man blong hem oli askem se: “?Yumi mekem olsem wanem ya? !Yumi letem olgeta oli ronwe, be yumi lusum ol slef blong yumi ya!” (Eksodas 14:​3-5) From we oli lusum nesen ya we i stap slef long olgeta samting ya bambae i wan bigfala trabol long Ijip long saed blong ekonomik.

Fero i singaot ol ami blong hem i kam wanples mo oli kam kasem ol man Isrel long ples ya Pihahirot. (Eksodas 14:​6-9) Long saed blong faet, i luk olsem we ol man Ijip oli mas win from we ol man Isrel oli no save ronwe, oli stap bitwin solwora mo ol hil. Be, Jeova i protektem ol man Isrel taem hem i mekem klaod i stap long medel blong olgeta mo ol man Ijip. Long saed i go long ol man Ijip, “klaod ya i mekem we ples i kam tudak,” olsemia nao hem i stopem olgeta blong oli no faetem ol man Isrel. Long narasaed blong klaod ya, hem i saen, “i stap givim laet long ol laen blong Isrel.”​—Eksodas 14:​10-20.

Ol man Ijip oli wantem tumas blong faet mo spolem gud olgeta be klaod ya i blokem olgeta. (Eksodas 15:9) Taem klaod ya i kamaot, !man, i gat wan bigfala sapraes! !Wora blong Red Si i seraot, mo ol man Isrel oli wokbaot long drae graon i go long narasaed! Fero mo ol ami blong hem oli resis folem olgeta long rod ya we i pastru long Red Si, oli wantem tumas blong kasem olgeta mo stilim olting blong ol man ya we bifo oli stap slef long olgeta. Be, stronghed rula blong Ijip i no trastem God ya blong ol man Isrel. Jeova i stat blong mekem ol man Ijip oli lusum hed, hem i tekemaot ol wil long ol kat blong faet.​—Eksodas 14:​21-25a.

Ol strong man blong faet blong ol man Ijip oli singaot se, “!Yumi mas ronwe long olgeta ya!” “!Hemia [Jeova] ya! !Hem i stap faet long saed blong olgeta!” Fero mo ol man blong hem oli luksave samting ya be i let tumas. Moses we i kasem narasaed finis, i leftemap han blong hem antap long solwora, mo wora i kambak bakegen, i kilim Fero mo ol ami blong hem.​—Eksodas 14:25b-28.

Ol Lesen We Hem i Lanem From Ekspiryens

?Nao, hu ya Jeova? Flas man ya Fero i kasem ansa long kwestin ya. Ol samting we oli hapen long Ijip oli soem se Jeova nomo i trufala God, hem i defren olgeta long ol “gyaman god” we plante man oli wosip long olgeta. (Ol Sam 96:​4, 5) Long bigfala paoa blong hem, Jeova i “wokem heven mo wol.” Hem i Bigfala Man blong Sevem ol man tu, Hem nao we i ‘tekemaot ol man blong hem Isrel long Ijip, wetem ol saen, merikel, long wan strongfala han, mo bigfala fasin fraet.’ (Jeremaea 32:​17-21) !Samting ya i pruvum se Jeova i save protektem ol man blong hem!

Fero i lanem ol lesen ya tru long nogud ekspiryens. Yes, laswan lesen i mekem se hem i ded long hem. (Ol Sam 136:​1, 15) I waes moa long hem sipos hem i soem tingting daon taem hem i askem se, “?Hu ya Jeova?” Nao rula ya i save mekem ol samting i laenap wetem ansa we hem i kasem. I gud tumas se plante man we oli gat tingting daon oli stap lanem se hu nao i Jeova. Mo hem i gat wanem kaen fasin. ?Hem i wantem yumi mekem wanem? I gud nekis haf bambae i pulum yu blong gat fasin tangkyu long Hemia we nem blong hem, i Jeova.​—Ol Sam 83:18.

[Foto Credit Line blong pija long pej 3]

Pictorial Archive (Near Eastern History) Est.