Oli Mekem Samting We Jeova i Wantem

Moses Mo Eron—Oli No Fraet Blong Talemaot Tok Blong God

TINGBAOT samting ya: Moses we i gat eite yia, mo brata blong hem, Eron, tufala i stap stanap long fored blong man we i gat moa paoa bitim ol narafala man long wol​—Fero blong Ijip. Long tingting blong ol man Ijip, man ya i no jes wan man blong wok blong ol god, hem i hae moa. Oli bilif se Fero i wan god. Oli ting se hem i god ya Horus, wan god we i gat hed blong wan pijin, mo i tekem bodi blong man blong wol ya. God ya Horus, wetem Isis mo Osiris, oli stap olsem bigfala triniti god blong olgeta god mo woman god blong ol man Ijip.

Wan man we i go kolosap long Fero i save lukluk klia, hed blong snek ya kobra, we i stap kamaot long medel blong hat blong king ya. Oli talem se snek ya i save spet, nao faea bambae i kamaot long maot blong hem blong kilim i ded ol enemi blong Fero. Ale, Moses mo Eron tufala i kam long fored blong king ya we i olsem wan god, blong askem wan samting we neva wan man i bin askem olsem bifo. Tufala i askem long hem blong letem ol man Isrel we oli olsem slef, oli gofri blong mekem wan lafet long God blong olgeta, Jeova.​—Eksodas 5:1.

Jeova i talemaot finis se hat blong Fero bambae i strong. From samting ya, Moses mo Eron tufala i no sapraes long strong ansa we hem i givim: ‘?Hu ya Jeova? ?Weswe mi mi mas harem hem? ?From wanem mi mi mas letem ol man blong hem oli go? Mi mi no save Jeova, mo mi no save letem yufala i go.’ (Eksodas 4:21; 5:2) Ale, samting ya i statem wan bigfala faet. Long nekis taem we Moses mo Eron i kamtru long Fero, tufala i soemaot klia pruf se tufala i man blong trufala God ya we i gat olgeta paoa.

Wan Merikel i Kamaot

Folem samting we Jeova i talem, Eron i wokem wan merikel, we i pruvum se Jeova i hae moa long olgeta god blong Ijip. !Hem i sakem stik blong hem i godaon long fored blong Fero, mo wantaem nomo, stik ya i kam wan bigfala snek! Merikel ya i mekem tingting blong Fero i fasfas, nao hem i singaotem ol pris blong hem we oli save wokem majik.a From paoa blong ol rabis speret, olgeta ya oli mekem semfala merikel wetem ol stik blong olgeta.

Sipos Fero mo ol pris blong hem oli ting se oli win finis, hemia blong smoltaem nomo. !Tingbaot fes blong olgeta taem snek blong Eron i solemdaon olgeta narafala snek ya, wan afta narawan! Olgeta man we oli stap long taem ya, oli luksave klia se ol god blong ol man Ijip oli no gat bigfala paoa olsem trufala God, Jeova.​—Eksodas 7:​8-13.

Be, nating se ol samting ya i kamaot finis, hat blong Fero i stap strong yet. Ale, God i sakem ten bigfala trabol long Ijip. Afta long samting ya nomo, Fero i talem long Moses mo Eron se: ‘!Yutufala i aot long ples ya! !Yutufala i tekem ol man blong yutufala, yufala i go! !Yufala i mas gowe long ol man blong mi! Yufala i save go mekem wosip long Jeova olsem we yutufala i stap askem.’​—Eksodas 12:31.

Ol Samting We Yumi Lanem From Store Ya

?Wanem samting i mekem se Moses mo Eron tufala i naf blong stanap long fored blong Fero blong Ijip we i gat bigfala paoa? Fastaem, Moses i talem se hem i no naf. Hem i talem se hem i “no save toktokgud nating.” Nating se Jeova i promes blong sapotem hem, be hem i askem se: “Plis, yu sanem narafala man i go.” Yes, Moses i askem strong long God blong i sanem narafala man i go blong toktok. (Eksodas 4:​10, 13) Be, Jeova i yusum Moses we i gat tingting daon. Hem i givim waes mo paoa we Moses i nidim blong mekem wok ya.​—Namba 12:3.

Tede, ol man blong Jeova God mo Jisas Kraes oli stap folem oda ya blong “go long ol man long olgeta ples long wol, blong pulum olgeta oli kam man blong mi.” (Matyu 28:​19, 20) Yumi mas yusum fulwan ol save blong Baebol mo ol narafala fasin we yumi gat, blong mekem wok ya folem oda we yumi kasem. (1 Timote 4:​13-16) Bitim we yumi tingting tumas long ol samting we yumi no naf blong mekem, yumi mas agri wetem bilif, blong mekem eni wok we God i givim long yumi. Hem i save mekem yumi naf, mo givim paoa long yumi blong mekem samting we hem i wantem.​—2 Korin 3:​5, 6; Filipae 4:13.

From we Moses i mas stanap strong tru long ol fasin agens blong ol man mo ol rabis speret, hem i nidim tumas, paoa we i bigwan moa bitim paoa blong man. From samting ya, Jeova i mekem tingting blong hem i strong, i se: “Taem yu go luk king ya, bambae mi mi mekem yu yu olsem wan god.” (Eksodas 7:1) Yes, God i givim paoa long Moses mo i sapotem hem. Wetem speret blong Jeova long hem, Moses i no gat risen blong fraet long Fero no long ol flas haeman blong king ya.

Yumi tu, yumi mas dipen long tabu speret, no paoa blong Jeova, blong finisim olgeta wok we Hem i givim long yumi. (Jon 14:26; 15:​26, 27) Taem paoa blong God i sapotem yumi, yumi save talem ol semfala tok we Deved i talem long singsing blong hem, se: “Mi mi trastem hem, nao bambae mi no save fraet. ?Wanem samting we man nomo i save mekem long mi?”​—Ol Sam 56:11.

From we Jeova i gat fasin sore, hem i no livim Moses i stap hem wan long wok we hem i mas mekem. Be, God i talem se: ‘Brata blong yu, Eron, bambae i olsem profet blong yu. Olgeta samting we bambae mi mi talem long yu, yu mas talemaot long Eron. Mo brata blong yu Eron, bambae i talemaot olgeta samting ya long Fero.’ (Eksodas 7:​1, 2) !Jeova i soemaot bigfala lav taem hem i no traem fosem Moses blong mekem moa bitim samting we hem i naf blong mekem!

God i givim long yumi wan kampani blong ol Kristin brata mo sista, we oli glad blong mekem wok olsem ol Wetnes blong Jeova, God ya we i Antap Olgeta. (1 Pita 5:9) From samting ya, nating se yumi save kasem hadtaem, yumi mas gat sem fasin olsem Moses mo Eron, we tufala i no fraet blong talemaot tok blong God.

[Futnot]

[Tok blong pija long pej 25]

Moses mo Eron tufala i no fraet blong talemaot ol tok blong Jeova long Fero