From Wanem i Impoten Blong Go Long Ol Kristin Miting

LONG plante manis, woman ya Rosario, we i stap laef long Saot Amerika, i glad blong stadi Baebol wetem Elizabeth. Save long Kingdom blong God mo olsem wanem Kingdom ya bambae i mekem Paradaes i kam long wol i mekem hat blong Rosario i jyajyam from glad. Be, taem Elizabeth i askem hem blong kam long miting long Haos Kingdom, hem i no wantem. Hem i harem se hem i save stadi Baebol long haos mo mekem ol samting we Baebol i talem i wok long laef blong hem, be i no nid blong go long ol kongregesen miting. ?Yu tu yu stap tingting sipos ol Kristin miting oli rili givhan long yu? ?From wanem God i wantem se ol man blong hem oli joen tugeta?

Ol Kristin long faswan handred yia oli defren tumas long ol man raonabaot long olgeta, taswe blong oli kasem laef, i impoten blong oli gat ol gudfala fren. Aposol Pol i raet long wan kongregesen blong ol Kristin bifo i se: ‘Tingting blong yufala i klin gud, mo i no gat poen long yufala. Yufala i olsem ol pikinini blong God we yufala i stret gud olgeta, be yufala i stap long medel blong ol man we oli gat ol krangke fasin, mo oli agens long evri samting. Long medel blong olgeta ya, bambae yufala i saenaot olsem ol sta we oli stap saenaot long skae.’ (Filipae 2:15) Ol Kristin oli kasem wan hadtaem long Judia, mo Pol i raet long olgeta i se: “I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong [kongregesen], olsem we sam long yumi oli mekem finis. Oltaem yumi mas stap toktok long yumi blong mekem tingting blong yumi i kam strong moa, from we yufala i luk we Dei ya we Masta blong yumi bambae i jajem olgeta man, hem i kam kolosap finis.” (Hibrus 10:​24, 25) ?Olsem wanem yumi givgivhan long yumi blong mekem yumi strong blong laekem man mo blong mekem ol gudfala fasin taem yumi joen tugeta?

Olsem Wanem Ol Kristin Oli Stap “Sapenem” Olgeta

Grik tok ya we Pol i yusum mo we oli tanem i kam “givgivhan” i rili minim “wok blong sapenem.” Wan Baebol proveb i eksplenem olsem wanem ol Kristin oli stap “sapenem” olgeta taem hem i talem se: “Aean i save sapenem aean. Olsemia nao wan man i sapenem fes blong narafala.” (Proveb 27:17; Eklesiastis 10:10) Yumi olsem ol naef, we i nidim man blong i sapenem oltaem. Fasin blong soem lav long Jeova mo mekem ol disisen we oli stanap long bilif blong yumi, i min se yumi stap defren long ol man blong wol, from samting ya oltaem i olsem we yumi mas katem wan rod we i defren long rod ya we plante man oli stap folem.

Fasin traehad ya blong stap defren i save daonem strong tingting blong yumi blong mekem ol gudfala wok, i olsem we yumi no moa sap. Be taem yumi joen wetem ol narafala we oli laekem Jeova, yumi stap sapenem yumi wanwan​—yumi stap givgivhan long yumi blong mekem yumi strong blong laekem ol man, mo blong mekem ol gudfala fasin. Defren nao, taem yumi stap yumi wan nomo, yumi stap tingting tumas long yumi wan. Rabis fasin blong seks, fasin blong man i tingbaot hem wan, no ol krangke tingting oli save kam insaed long tingting blong yumi. “Hemia we i stap hem wan oltaem bambae i tingbaot hem wan nomo; bambae hem i agens long ol waes ya we i save wok.” (Proveb 18:1) From samting ya Pol i raet long kongregesen blong taon ya Tesalonaeka, i se: “Yufala i mas stap toktokgud long yufala blong mekem tingting blong yufala i strong, mo yufala i mas givgivhan long yufala, olsem we yufala i stap mekem naoia.”​—1 Tesalonaeka 5:11.

Taem Rosario i finisim stadi blong hem long ol stampa tijing blong Baebol, hem i no wantem joen yet wetem kongregesen. Nao, Elizabeth i no moa visitim hem, from we hem i no moa gat rod blong givhan moa long hem. Sam manis biaen wan elda we i stap goraon i visitim Rosario mo i askem hem, i se: “?Nating sipos wanwan memba blong famle oli stap kakae ol gudfala kakae long ol restoron, bambae olgeta memba blong famle ya oli mestem wanem, sipos oli no kakae tugeta long haos?” Rosario i ansa se: “Bambae oli mestem fasin joen long famle.” Hem i luksave poen mo hem i stat blong kam oltaem long ol miting. Hem i faenem se miting i givhan bigwan long hem mekem se stat long taem ya kolosap hem i no mestem wan miting.

Taem yu harem ol narafala oli tokbaot sem samting we yu yu bilif long hem, mo tu taem yu luk we bilif olsem i jenisim fasin blong laef blong olgeta samting ya i leftemap tingting. Pol i save samting ya from prapa ekspiryens blong hem, mo hem i raet long kongregesen ya long Rom se: “Mi mi wantem tumas blong kam luk yufala, blong bambae God i yusum mi blong givhan long yufala blong yufala i kasem paoa ya we Tabu Speret i stap givim blong mekem yufala i strong. Mo bakegen, mi wantem kam joen long yufala, blong bambae bilif blong yufala i save givhan long mi, olsem we bilif blong mi tu i save givhan long yufala.” (Rom 1:​11, 12) Yes, plante yia i pas bifo we Pol i save visitim Rom, mo taem hem i visitim Rom, hem i stap olsem wan prisin man long han blong ol man Rom. Be taem Pol i luk ol brata blong Rom we oli aot long taon oli wokbaot bitim 60 kilomita blong luk hem, “hem i talem tangkyu long God from, mo tingting blong hem i kam strong moa.”​—Ol Wok 28:15.

Faenem Kakae Long Saed Blong Speret Long Ol Hadtaem

Taem Pol i stap long wan haos we oli stap gad long hem, long Rom, hem i raet long ol man Isrel blong oli no lego ol miting ya we oli stap joen tugeta long hem. Hem i impoten long yumi se hem i ademap ol tok ya se: “From we yufala i luk we Dei ya we Masta blong yumi bambae i jajem olgeta man, hem i kam kolosap finis.” (Hibrus 10:25) Ol Wetnes blong Jeova oli bin soemaot oltaem long Baebol se yia 1914 i makem stat blong lasdei blong wol mo “Dei we God bambae i jajem ol man we oli no obei long hem, nao oli lus” i kam kolosap. (2 Pita 3:7) Folem Baebol buk blong Revelesen, taem oli sakemaot Devel Setan long heven long stat blong taem ya blong lasdei, hem i kros tumas mo “hem i go faetem ol narafala [we oli stap yet] . . . Hemia olgeta ya we oli stap obei long ol loa blong God, mo we oli stap holem trutok we Jisas i wetnes long hem se i tru.” (Revelesen 12:​7-17) Taswe, i hadwok moa naoia blong obei long ol loa blong God; yumi mas joen moa wetem ol narafala fren blong bilif. Ol miting bambae oli givhan long yumi blong mekem bilif mo lav blong yumi long God i kam strong moa blong yumi blokem ol samting we Setan i mekem blong faetem yumi.

Fasin blong laekem God mo bilif oli no olsem haos we taem man i wokem finis, hem i save stap blong olwe. Be, oli olsem ol laef samting we sloslou oli stap gru taem oli stap kakae oltaem, be oli save kam drae no ded sipos oli hanggri. From samting ya Jeova i stap givim kakae long speret long ol man blong hem oltaem blong mekem olgeta oli kam strong. Yumi evriwan yumi nidim kakae olsem, be yumi no save faenem long narafala ples, yumi save faenem nomo long ogenaesesen blong God mo long ol miting blong hem.​—Dutronome 32:2; Matyu 4:4; 5:3.

Jisas i askem wan kwestin we i save givhan long yumi blong luksave olsem wanem hem i stap givim kakae long Kristin kongregesen. Hem i askem se: ‘?Hu i rili slef ya we i stret mo waes, we i save holem ol wok blong masta blong hem? Man blong wok olsem, masta blong hem i save putumap hem i bos blong ol narafala man blong hem, blong i givim kakae long olgeta long stret taem blong hem. Taem masta blong man olsem i kamtru, i faenem we hem i stap mekem ol wok olsem, man ya bambae i save haremgud.’ (Matyu 24:​45, 46) ?Jisas i putumap hu long faswan handred yia blong i givim kakae long ol man blong hem? ?Mo Jisas i faenem hu man we i stap holemstrong wok blong givim kakae long olgeta, taem hem i kambak long Kingdom paoa? I klia se, i no gat man we i save laef long ol handred yia we oli pas kam kasem tede. Pruf i makem slef ya olsem kongregesen ya blong ol Kristin we tabu speret i makemaot olgeta, sem mak we nesen ya blong Isrel i olsem man blong wok blong God, bifo taem blong ol Kristin. (Aesea 43:10) Yes, Jisas i stap givim kakae long yumi long saed blong speret tru long bigfala ogenaesesen blong ol Kristin we tabu speret i makemaot olgeta, we tede hem i sanem kakae long saed blong speret tru long ol lokol kongregesen blong ol Wetnes blong Jeova.

Aposol Pol i go moa blong tokbaot rod ya we Jisas i yusum blong givim kakae long saed blong speret, i se: ‘ “Taem hem i go antap long heven, hem i go olsem king we i winim ol enemi blong hem finis, mo i givim ol presen oli go nomo long ol man.” Long sam man, hem i givim paoa blong oli aposol. Long sam narafala man, hem i givim paoa blong oli profet. Long sam narafala man, hem i givim paoa blong oli talemaot gud nyus blong Kraes. Mo long sam narafala man bakegen, hem i givim paoa blong oli man blong lukaot mo tija insaed long kongregesen. Kraes i mekem olsem blong bambae ol man blong hem oli rere blong mekem ol wok blong hem, blong bambae olgeta ya we oli olsem bodi blong hem, oli strong moa.’​—Efesas 4:​8, 11-13.

Hem i insaed long ol lokol kongregesen​—long taem blong ol miting—​we olgeta ya we ‘oli kasem paoa olsem presen’ oli save bildimap ol brata. Eksampel, long Antiok, “Judas mo Saelas, tufala ya i profet. Nao tufala i stap toktok longtaem long ol brata ya blong yumi. Tufala i stap leftemap tingting blong olgeta, mo tufala i stap mekem olgeta oli strong.” (Ol Wok 15:32) Ol tok blong ol man tede we oli bigman long saed blong speret bambae oli givhan tu long bilif blong yumi blong mekem se bambae bilif i no kam slak no i ded.

Maet i tru se yumi gohed gud from wan memba blong kongregesen i stap givhan long yumi wanwan nating se yumi no stat yet blong go long ol miting. Baebol i talem se i gat wan taem we “i mas gat sam man yet blong tijim yufala long stampa blong ol tok ya. I olsem we yufala i gobak bakegen, we yufala i no save kakae strong kakae, yufala i stap dring melek nomo.” (Hibrus 5:12) Be wan man i no save stap olsem we i stap dring melek nomo. Ol Kristin miting oli gohed blong stap givim wan program blong Baebol tijing we i stret blong holemtaet lav long God mo bilif i stap long man ya mo tu miting i givhan long hem blong mekem “olgeta samting we God i wantem.” (Ol Wok 20:27) Hemia i bitim “melek.” Baebol i gohed i se: “Strong kakae i blong olgeta we oli kam bigman finis, we oli stap traehad longtaem finis, nao oli kam we oli naf blong jusumaot wanem fasin i gud mo wanem fasin i nogud.” (Hibrus 5:14) Long ol miting, oli tokbaot plante samting we maet oli no haf blong stampa tijing blong Baebol we yumi stap lanem long haos, olsem stadi long wanwan vas blong ol impoten profet tok blong Baebol mo dip stadi blong save olsem wanem yumi save gat ol fasin olsem God.

Ol Rul Blong Jeova​—I Olsem Wan Voes Biaen Long Yu

Oltaem Jeova i stap talem long yumi se yumi mas wanem kaen man, tru long ol kongregesen stadi olsem. Ol rul olsem, oli impoten tumas. Sipos i no gat rul olsem, i isi nomo blong yumi foldaon long fasin blong tingbaot yumi nomo, fasin flas, mo fasin blong wantem evri samting. Ol rul we oli kamaot long Baebol bambae oli givhan long yumi blong stap glad long gudfala fasin fren wetem ol narafala man mo wetem God hem wan. Man blong raetem Ol Sam 119:​59, i talemaot se: “Mi mi tingtinggud finis long ol fasin blong mi, nao mi mi mekem promes long yu blong folem ol rul we yu yu mekem.”

Taem yumi stap go long ol Kristin miting oltaem, yumi haremsave mining blong profet tok blong Jeova tru long Aesea, we i talem se: “Bigfala Tija blong yufala bambae i no moa haedem hem wan, mo bambae yufala i luk Bigfala Tija blong yufala. Mo bambae yufala i harem wan tok biaen long yufala i talem se: ‘Hemia rod ya. Yufala olgeta man, yufala i wokbaot long hem.’ ” Jeova i stap lukaot long fasin ya we yumi stap gohed long hem mo hem i stap stretem yumi long kaen fasin sipos yumi folem wan rod we i no stret. (Aesea 30:​20, 21; Galesia 6:1) Mo hem i go moa blong givim help bitim hemia.

Kasem Tabu Speret Tru Long Kongregesen

Taem yumi go oltaem long ol Kristin miting wetem ol Wetnes blong Jeova, tabu speret blong God bambae i mekem yumi kam strong moa, from tabu speret i stap long ol man blong hem. (1 Pita 4:14) Mo tu, tabu speret nao i putumap ol Kristin man blong lukaot we oli stap insaed long kongregesen. (Ol Wok 20:28) Speret ya we i kam long God i gat wan bigfala paoa long wan Kristin. Baebol i talem se: “Tabu Speret, hem i stap mekem ol man oli gat narafala fasin. Hem i stap mekem olgeta oli laekem tumas ol man, mo oli gat glad mo pis long tingting blong olgeta. Tingting blong olgeta i longfala, mo oli gat sore long man. Fasin blong olgeta i gud nomo, mo i no save jenis. Olgeta oli kwaet man, mo oli save blokem ol samting we olgeta nomo oli wantem.” (Galesia 5:​22, 23) Tabu Speret we i stap wok tru long ogenaesesen blong God, bambae i givhan tu long yumi blong kasem wan gudfala klia save long samting we Jeova i stap hivimap i rere long olgeta ya we oli laekem hem. Afta we Pol i eksplenem se ol haeman blong wol ya oli no save kasemsave long ol plan blong God, hem i raetem se: “Be God i yusum Speret blong hem blong soemaot ol samting ya long yumi.”​—1 Korin 2:​8-10.

Antap long kakae long saed blong speret we i stap mekem bilif i kam strong moa, kongregesen i givim trening long olgeta ya we oli wantem joen long nambawan wok blong kongregesen. ?Wanem samting ya?

Trening We Kongregesen i Givim

Kristin kongregesen i no wan klab we ol man oli stap go long hem blong stap haremgud long ol samting we oli stap luk mo maet leftemap tingting blong narafala blong gat wan laef we i gudwan moa. No gat. Jisas i givim oda long kongregesen blong tekem gud nyus blong Kingdom i go long olgeta ya we oli stap long tudak long saed blong speret. (Ol Wok 1:8; 1 Pita 2:9) Stat long dei ya we kongregesen i stanap, long Pentekos yia 33 K.T., kongregesen ya i wan ogenaesesen blong ol man blong prij. (Ol Wok 2:4) ?Yu bin gat ekspiryens ya we yu traem blong talem ol plan blong Jeova long wan man be yu no naf blong pulum hem blong i bilif? Ol miting blong kongregesen i givim trening long wanwan man long fasin ya blong tij. Taem yumi stadi long ol eksampel blong Baebol, yumi lanem olsem wanem blong stanemap wan fandesen we yumi save pulum man blong tingting long hem, olsem wanem blong yusum Baebol olsem wan rod blong toktok wetem man long fasin we i gat mining, mo olsem wanem blong yusum ol kwestin mo ol pija tok blong givhan long ol narafala blong oli tingtinggud. Ol fasin ya blong gat gudhan olsem i save givhan long yu blong glad taem yu stap givhan long narafala blong hem i kasem save long trutok blong Baebol.

Long wan wol olsemia we i gat ol trabol mo ol rabis fasin, Kristin kongregesen i wan trufala ples blong haed long saed blong speret. Nating se hem i kongregesen blong ol man we oli no stretgud olgeta, hem i wan ples blong pis mo lav. Taswe, i gud blong yu stap go oltaem long ol miting blong kongregesen mo haremsave mining blong trutok ya blong man ya we i raetem Sam, i se: “I gud tumas taem ol man blong God oli stap wanples, we oli gat wan tingting nomo. Fasin ya i gud tumas. . . . Hae God i promes finis blong givim gudfala samting blong hem long ol man blong hem, we hemia laef ya we i no save finis.”​—Ol Sam 133:​1, 3.