Japta 17

!Faenem Sefples Long Medel Blong Ol Man Blong God!

1, 2. ?Olsem wanem laef blong ol man i olsem olgeta we oli stap long wan ples we bigfala win i spolem?

TRAEM tingbaot sipos wan bigfala win i spolem ples blong yu. Haos blong yu i lus, mo olting blong yu tu. Kakae i sot. Evri samting i luk olsem we i no moa save kamgud. Be wantaem nomo, ol saplae oli kam. Fulap kakae mo klos oli kam. Samfala oli wokem wan nyufala haos blong yu. I tru se bambae yu talem bigfala tangkyu long hemia we i givim ol samting ya.

² Hemia i kolosap sem mak long samting we i stap hapen tede. Olsem win ya, Adam mo Iv tufala i spolem ol man bigwan, taem tufala i no moa obei long God. Paradaes we man i stap long hem i lus. Afta long taem ya, ol gavman blong man oli no mekem se ol man oli stap sef from ol faet, fasin blong kilim man, mo ol kruked fasin. Ol jyos oli lego plante man oli stap hanggri from gudfala kakae long saed blong speret. Be, naoia Jeova God i stap givim kakae, klos, mo sefples long saed blong speret. ?Olsem wanem hem i stap mekem olsem?

“SLEF WE I STRET MO WAES”

3. ?Olsem wanem Jeova i givim ol gudfala samting long ol man, mo wanem sam samting we i soemaot poen ya?

³ Ol saplae long taem blong trabol, ol man oli sanem i kam, tru long wan rod we oli stanemap. Jeova i yusum wan rod tu, blong givim ol saplae long saed blong speret long ol man blong hem. Eksampel, ol man Isrel oli “kongregesen blong Jeova” blong kolosap 1,500 yia. Sam long olgeta, oli olsem rod we God i yusum blong tijim ol man long Loa blong hem. (1 Kronikel 28:8; 2 Kronikel 17:7-9) Long faswan handred yia K.T., Jeova i stanemap Kristin ogenaesesen. Ol kongregesen oli stat, ale oli wok aninit long ol aposol mo ol olfala man, we oli olsem hed kampani. (Ol Wok 15:22-31) Sem mak tede, Jeova i givim ol samting long ol man blong hem, tru long wan grup we oli wok folem wan plan. ?Olsem wanem yumi save samting ya?

4. ?Long taem blong yumi, hu i soem se hem i “slef ya we i stret mo waes”? ?Olsem wanem yumi kasem ol gudfala samting long saed blong speret we God i stap givim?

⁴ Jisas i talem se, taem hem i tekem paoa blong rul long Kingdom, bambae hem i faenem se wan “slef we i stret mo waes” i stap givim ‘kakae long stret taem blong hem,’ long ol man blong Hem. (Matyu 24:45-47) Taem Jisas i kam King long heven long 1914, ?hu i soemaot se hem i “slef” ya? I no ol lida blong Krisendom.a Plante taem, oli stap fidim ol sipsip blong olgeta wetem ol toktok we i sapotem gavman blong prapa kantri blong olgeta, long Faswan Bigfala Faet blong Wol. Be, gudfala kakae long saed blong speret long stret taem blong hem, i stap kamaot long grup blong ol trufala Kristin we tabu speret blong God i makemaot olgeta. Oli haf blong wan ‘smol kampani’ we Jisas i tokbaot. (Luk 12:32) Ol tabu Kristin ya, oli stap talemaot Kingdom blong God, i no ol gavman blong man. From samting ya, long ol yia we oli pas, plante milyan “narafala sipsip” we oli laekem stret fasin, oli joen wetem tabu “slef” ya blong folem trufala skul. (Jon 10:16) Tru long ‘slef ya we i stret’ mo Hed Kampani blong hem tede, God i lidim ogenaesesen blong ol man blong hem, blong oli givim kakae, klos, mo sefples long saed blong speret, long olgeta we oli wantem ol samting ya.

“KAKAE LONG STRET TAEM”

5. ?Ol man long wol oli stap olsem wanem long saed blong speret, be Jeova i stap mekem wanem blong givhan long olgeta?

⁵ Jisas i talem se: “Kakae nomo i no save mekem man i laef. Evri tok we God i talem, hemia nao samting blong mekem man i laef.” (Matyu 4:4) Be, sore tumas, bighaf blong ol man oli no stap lesin long ol tok blong God. Olsem profet blong Jeova, Emos, i talemaot se, ol man “oli hanggri, be i no blong kakae bred, mo oli tosta, be i no blong dring wora. I blong harem ol tok blong Jeova.” (Emos 8:11) Ol man we oli strong long skul blong olgeta tu, oli hanggri long saed blong speret. Jeova i wantem sevem “olgeta man, mo i wantem olgeta man bambae oli faenem trutok.” (1 Timote 2:3, 4) From samting ya, hem i stap givim fulap kakae long saed blong speret. ?Ol man oli save kasem kakae ya weples?

6. ?Olsem wanem Jeova i givim kakae long saed blong speret long ol man blong hem long taem bifo?

⁶ Long olgeta yia we oli pas, Jeova i givim kakae long saed blong speret long ol man blong hem olsem wan grup. (Aesea 65: 13) Eksampel, ol pris blong Isrel bifo, oli hivimap ol man, woman, mo pikinini, blong tijim olgeta olsem wan grup, long Loa blong God. (Dutronome 31:9, 12) Long faswan handred yia, ol Kristin we hed kampani i lidim olgeta, oli stanemap ol kongregesen mo mekem ol miting, blong tijim mo leftemap tingting blong olgeta. (Rom 16:5; Faelimon 1, 2) Ol Wetnes blong Jeova oli folem eksampel ya. Mifala i glad blong singaot yu blong kam long ol miting blong mifala.

7. ?Olsem wanem fasin blong go long ol Kristin miting oltaem i joen wetem save mo bilif?

⁷ Yes, ating yu lanem plante samting finis long prapa stadi blong yu long Baebol. Maet wan i bin givhan long yu. (Ol Wok 8:30-35) Be, bilif blong yu i olsem wan tri we bambae i kam drae mo i ded, sipos yu no lukaotgud long hem. Taswe, yu mas kasem stret kakae long saed blong speret. (1 Timote 4:6) Ol miting blong ol Kristin, oli olsem wan program blong tijim man we i gohed oltaem. Oli blong fidim yu long saed blong speret, mo blong halpem yu blong kam strong moa long bilif, taem yu gohed blong kasem moa save blong God. —Kolosi 1:9, 10.

8. ?From wanem yumi kasem tok blong pulum yumi blong go long ol miting blong ol Wetnes blong Jeova?

⁸ Ol miting oli mekem wan narafala impoten wok. Pol i raetem se: ‘I gud yumi stap tingbaot yumi, blong yumi givgivhan long yumi blong mekem yumi strong blong laekem ol man, mo blong mekem ol gudfala fasin. I nogud yumi lego ol miting blong kongregesen.’ (Hibrus 10:24, 25) Grik tok long ples ya we oli tanem i kam “givgivhan,” i save minim tu se “sapenem.” Wan proveb long Baebol i talem se: “Aean i save sapenem aean. Olsemia nao, wan man i sapenem fes blong narafala.” (Proveb 27:17) Oltaem yumi evriwan i nidim samting blong ‘sapenem’ yumi. Evri dei, ol trabol blong wol i save mekem bilif blong yumi i kam olsem we i no moa sap. Taem yumi go long ol Kristin miting, yumi leftemap tingting blong ol narafala, mo oli leftemap tingting blong yumi. (Rom 1: 11, 12) Ol memba blong kongregesen, oli folem advaes blong aposol Pol, blong ‘toktokgud long narafala blong mekem tingting blong narafala i strong, mo blong givhan long narafala.’ Ol fasin ya oli sapenem bilif blong yumi. (1 Tesalonaeka 5:11) Mo tu, fasin blong go oltaem long ol Kristin miting, i soemaot se yumi laekem God tumas, mo i givim plante jans long yumi blong presem hem. —Ol Sam 35:18.

‘PUTUM FASIN LAV, OLSEM KLOS BLONG YUFALA’

9. ?Olsem wanem Jeova i givim eksampel long fasin blong soem lav?

⁹ Pol i raetem se: ‘Putum fasin lav, olsem klos blong yufala, from we fasin ya i nambawan blong joenem ol man oli kam wan nomo.’ (Kolosi 3:14) Long gladhat blong hem, Jeova i givim ol klos ya long yumi. ?Olsem wanem? Ol Kristin oli save soemaot lav, from we hem i wan long ol frut we Jeova i givim tru long tabu speret blong hem. (Galesia 5:22, 23) Jeova hem wan i soemaot lav we i bigwan olgeta, taem hem i sanem Pikinini blong hem, wan nomo we hem i gat, blong yumi save kasem laef blong olwe. (Jon 3:16) Nambawan rod ya blong soemaot lav, i givim wan eksampel long yumi olsem wanem blong soemaot fasin ya. Aposol Jon i raetem se: “From we God i laekem yumi tumas olsem, yumi tu i mas laeklaekem yumi.” —1 Jon 4:11.

10. ?Olsem wanem yumi save haremgud blong kampani wetem “olgeta Kristin man”?

¹⁰ Sipos yu go long ol miting long Haos Kingdom, bambae yu gat nambawan jans blong soem lav. Long ples ya, yu save mitim plante defren kaen man. Bambae yu laekem plante long olgeta kwiktaem nomo. I tru, ol man ya we oli stap wosip long Jeova, oli gat ol defren fasin blong olgeta wanwan. Maet long ol yia we i pas, yu no joen wetem ol man we oli gat defren fasin mo intres long yu. Be, ol Kristin oli mas “laekem tumas olgeta Kristin man.” (1 Pita 2:17) Taswe, yu mas traem blong kasem mak ya we yu save olgeta Kristin long Haos Kingdom —olgeta tu we oli no gat sem yia, fasin, kantri, mo edukesen olsem yu. Ating bambae yu faenemaot se, olgeta evriwan i gat wan nambawan fasin we yu save laekem olgeta from.

11. ?From wanem yu no mas trabol tumas from ol defren fasin blong ol man blong Jeova?

¹¹ Yu no nid blong trabol long tingting blong yu from we prapa fasin blong ol wanwan man insaed long kongregesen i no sem mak evriwan. Wan pijatok: Tingbaot sipos yu stap ron long trak, mo plante trak oli stap ron kolosap long yu. Sam long olgeta oli ron kwik, mo sam oli slou moa long yu. Sam trak oli olfala moa long hemia blong yu. Samfala oli ron plante kilomita finis. Sam narafala oli olsem yu, oli jes stat. Nating se evriwan i defren, be olgeta evriwan oli stap ron long sem rod. Sem mak long ol memba blong kongregesen. Samfala oli kwik, mo samfala oli slou, blong wokem ol fasin blong Kristin. Mo tu, samfala oli sik no oli trabol long tingting blong olgeta, samfala no gat. Samfala oli bin wosip long Jeova blong plante yia. Sam narafala oli jes stat. Be, olgeta evriwan oli stap ron long sem rod we i go kasem laef blong olwe. ‘Oli gat wan tingting nomo mo fasin blong olgeta i wan nomo.’ (1 Korin 1:10) From samting ya, yu mas lukluk ol gudfala fasin blong olgeta long kongregesen, i no ol slak fasin. Sipos yu mekem samting ya, bambae yu haremgud long hat blong yu, from we yu luksave se God i rili stap wetem ol man ya. Mo ating yu tu yu wantem stap wetem olgeta. —1 Korin 14:25.

12, 13. (a) ?Sipos wan long kongregesen i mekem yu yu harem nogud, yu save mekem wanem? (b) ?From wanem i impoten blong no holem kros longtaem?

¹² Ol man oli sinman, taswe samtaem samfala long kongregesen oli save talem no mekem samting we yu yu harem nogud from. (Rom 3:23) Disaepol Jemes i talem samting we i tru tumas, se: “Plante taem yumi evriwan i mekem i no stret. Man we i no mekem mastik samtaem long tok blong hem, hem i wan man we i stret gud olgeta.” (Jemes 3:2) ?Bambae yu mekem wanem sipos wan i mekem yu yu harem nogud? Wan proveb blong Baebol i talem se: “Fasin luksave blong wan man i save mekem hem i slou blong kam kros. Mo fasin blong hem i naes tumas sipos hem i fogetem ol mastik blong narafala.” (Proveb 19:11) Fasin luksave i minim se yu lukluk dip, yu no jes lukluk ol samting we i stap afsaed. Yu traem kasem save long ol samting we oli haed we oli mekem wan man i toktok no i mekem wan samting. Bighaf blong yumi i yusum fasin luksave blong mekem eskyus from ol mastik blong yumi. ?From wanem yumi no save yusum tu blong kasem save long ol narafala, mo kavremap ol mastik blong olgeta? —Matyu 7:1-5; Kolosi 3:13.

¹³ Yumi no mas fogetem se, yumi mas fogivim ol narafala sipos yumi wantem se Jeova i fogivim yumi. (Matyu 6:9, 12, 14, 15) Sipos yumi stap mekem trutok i wok long laef blong yumi, bambae yumi soem lav long ol narafala. (1 Jon 1:6, 7; 3:14-16; 4:20, 21) Taswe, sipos yu kasem wan problem wetem wan long kongregesen, faetem fasin ya blong holem kros longtaem. Sipos yu gat lav olsem klos blong yu, bambae yu traehad blong stretem problem ya. Mo bambae yu kwik blong talem sore long narafala, sipos yu nao yu bin mekem hem i harem nogud. —Matyu 5:23, 24; 18:15-17.

14. ?Yumi mas putum wanem fasin olsem klos blong yumi?

¹⁴ Ol klos blong yumi long saed blong speret, i minim ol narafala fasin tu we oli joen kolosap wetem lav. Pol i raetem se: ‘Yufala i mas putum ol fasin ya olsem prapa klos blong yufala. Yufala i mas gat sore long ol man, mekem i gud long ol man, tingting blong yufala i mas stap daon. Yufala i mas kwaet man, mo tingting blong yufala i mas longfala.’ Ol fasin ya, we evriwan oli joen wetem lav, oli haf long “nyufala laef ya” we i givim ona long God. (Kolosi 3:10, 12) ?Bambae yu traehad blong putum ol fasin ya olsem klos? I impoten we yu putum fasin blong laekem tumas ol brata blong yu olsem klos blong yu. Olsem nao, bambae yu gat fasin ya we i makemaot ol disaepol blong Jisas. Hem i talem se: “From we yufala i stap laeklaekem yufala, bambae olgeta man oli luksave se yufala i man blong mi.” —Jon 13:35.

WAN SEFPLES

15. ?Olsem wanem kongregesen i olsem wan sefples?

¹⁵ Mo tu, kongregesen i olsem wan sefples, wan ples blong haed we yu save haremgud insaed long hem. Long kongregesen, bambae yu faenem ol man we hat blong olgeta i stret, we oli stap traehad blong mekem ol samting we i stret long ae blong God. Plante long olgeta, oli sakem finis ol nogud fasin mo tingting we yu yu stap traehad blong sakem. (Taetas 3:3) Oli save givhan long yu, from we Baebol i talem long yumi blong ‘givgivhan long yumi long ol trabol blong yumi.’ (Galesia 6:2) I tru se, blong wokbaot long rod we i go kasem laef blong olwe, hemia i prapa responsabiliti blong yu fastaem. (Galesia 6:5; Filipae 2:12) Be, Jeova i givim Kristin kongregesen olsem wan nambawan samting blong halpem mo sapotem yu. Nating se ol problem blong yu oli mekem yu yu harem nogud tumas, i gat wan nambawan samting i stap blong givhan long yu —wan kongregesen we i gat lav, we bambae i sapotem yu taem yu gat trabol mo yu gat nid. —Skelem Luk 10:29-37; Ol Wok 20:35.

16. ?Olsem wanem ol elda long kongregesen oli halpem yumi?

¹⁶ Sam long olgeta we oli rere blong sapotem yu, hemia ‘ol man we oli olsem presen’ —ol elda long kongregesen, no ol man we oli lidim kongregesen, we oli glad mo oli wantem blong lukaot long ol sipsip. (Efesas 4:8, 11, 12; Ol Wok 20:28; 1 Pita 5:2, 3) Long saed blong olgeta ya, Aesea i talem profet tok ya se: “Bambae olgeta wanwan oli olsem wan ples blong haed taem i gat bigfala win, mo olsem wan sefples taem bigfala ren i foldaon. Bambae oli olsem ol wora we i ron long drae ples, mo olsem sado blong bigfala ston long ples we i hot tumas.” —Aesea 32:2.

17. (a) ?Jisas i wantem tumas blong halpem ol man long wanem rod? (b) ?God i promes blong givim wanem long ol man blong hem?

¹⁷ Taem Jisas i stap long wol, ol lida blong skul oli no lukaotgud long ol man wetem lav. Taem Jisas i luk we ol man oli trabol tumas, samting ya i rili tajem hat blong hem, mo hem i wantem tumas blong halpem olgeta long saed blong speret. Jisas i sore long olgeta, from we “oli trabol tumas, oli no moa gat paoa, oli olsem ol sipsip we oli no gat man blong lukaot long olgeta.” (Matyu 9:36) !Samting ya i eksplenemgud trabol blong plante man tede! Oli stap traehad blong winim ol problem we oli spolem hat blong olgeta, be i no gat wan man we oli save lukluk i go long hem, blong givim help long saed blong speret mo mekem olgeta oli haremgud. Be ol man blong Jeova oli save kasem help long saed blong speret, from we hem i promes se: “Bambae mi putumap sam man blong lukaot long sipsip we bambae oli lukaot long ol man. Mo bambae ol man ya oli no moa save fraet, tingting blong olgeta bambae i no moa trabol tumas, mo bambae i no gat wan we i lus.” —Jeremaea 23:4.

18. ?From wanem yumi mas go luk wan elda sipos yumi nidim help long saed blong speret?

¹⁸ Traem savegud ol elda long kongregesen. Long plante yia finis, oli bin folem save blong God long laef blong olgeta. From samting ya, oli kasem ol fasin we Baebol i talem, blong oli kam naf blong lidim kongregesen. (1 Timote 3:1-7; Taetas 1:5-9) Yu no mas fraet blong go luk wan long olgeta sipos yu nidim help long saed blong speret, blong winim wan fasin no tingting we i agensem loa blong God. Bambae yu faenem se ol elda oli folem advaes blong Pol, se: “Yufala i mas mekem tingting blong ol man ya we oli fraet, i strong bakegen. Yufala i mas givhan long olgeta we oli no gat paoa. Mo long olgeta man, yufala i mas mekem tingting blong yufala i longfala.” —1 Tesalonaeka 2:7, 8; 5:14.

STAP SEFGUD WETEM OL MAN BLONG JEOVA

19. ?Jeova i givim wanem blesing long ol man we oli lukaot sefples insaed long ogenaesesen blong hem?

¹⁹ Nating se yumi stap laef long medel blong ol fasin we oli nogud, Jeova i givim long yumi kakae, klos, mo sefples long saed blong speret. I tru, yumi mas wet long nyufala wol we God i promes long hem, blong kasem ol gudfala samting long saed blong bodi long wan paradaes. Be olgeta we oli stap insaed long ogenaesesen blong Jeova oli haremgud naoia, from oli stap sefgud long wan paradaes long saed blong speret. Esikel i talem wan profet tok long saed blong olgeta ya, se: “Bambae oli stap sefgud, mo bambae i no gat man blong mekem oli seksek.” —Esikel 34:28; Ol Sam 4:8.

20. ?Olsem wanem Jeova bambae i givimbak moa samting bitim ol samting we yumi livim blong mekem wosip long hem?

²⁰ !Yumi save glad tumas we Jeova i stap givim ol gudfala samting long saed blong speret tru long Tok mo ogenaesesen blong Hem! Kam kolosap long ol man blong God. Yu no mas wet blong mekem samting ya, from we yu fraet se ol fren mo famle blong yu bambae oli tingting nogud long yu, taem yu stap kasem save ya blong God. Maet sam long olgeta oli no glad we yu stap kampani wetem ol Wetnes blong Jeova mo yu stap go long ol miting long Haos Kingdom. Be God bambae i givimbak long yu plante samting we i moa gud bitim ol samting we yu mas livim blong mekem wosip long hem. (Malakae 3:10) Mo tu, Jisas i talem se: ‘Man we i livim haos blong hem, no brata no sista blong hem, no papa no mama blong hem, no pikinini blong hem, no graon blong hem, from we i man blong mi, no from we i man blong gud nyus blong mi, hem bambae i no save sot long ol samting ya. Long wol ya bambae hem i save kasem wan handred taem antap bakegen, wanem samting we hem i livim, olsem haos, no brata no sista no mama no papa no pikinini no graon blong hem, wetem ol trabol we ol man oli mekem long hem tu. Mo long nyufala wol we bambae i kam, hem bambae i gat laef we i no save finis.’ (Mak 10: 29, 30) Yes, nomata wanem samting yu mas livim no wanem trabol yu kasem, yu save haremgud blong kampani mo stap sefgud long saed blong speret wetem ol man blong God.

[Futnot]

JEKEM SAVE BLONG YU

?Hu ya “slef we i stret mo waes”?

?Wanem rod we Jeova i wokem blong givim kakae long yumi long saed blong speret?

?Olsem wanem olgeta long Kristin kongregesen oli save halpem yumi?